Read KIMERU BIBLE PROTESTANT EDITION 2Sam 12 Bible Online

2Sam 12 - KIMERU BIBLE PROTESTANT EDITION bible

2Sam 12

¹ Kûrakara atîrî, MWATHANI aratûma kîroria Nathani kîrî mûnene Daudi. Nathani agûkinya kîrî Daudi aramwîra atîrî, “Nî kwaarî na antû baîrî ntûûreene îmwe: ûmwe aarî gîtonga na ûngî aarî nkîa.

²Muntû ûu gîtonga nî aarî na ng'ondu na ng'ombe inyiingî mono,

³îndî muntû ûrîa waarî nkîa gûtî gantû aarî nako tiga kamwatî kamwe gonka, nako nîka aagûrîte. Nako aakamenyagîîra mono na karakûrania na twaana twaawe. Kaarîjaga amwe nawe na gakanyuîra gîkombeene kîmwe nawe. Kamamaga kîbareene kîaawe na gaakari ta mwana wa mwarî kîrî we.

⁴Ntukû îmwe mûgeni arariungîra muntû ûu waarî gîtonga. Gîtonga kîu nakîo gîteendaga kûmûthînjîra nyomoo îmwe ya ndîîthia ciaawe, îndî we arajûkia kamwatî ka muntû ûrîa nkîa arakathînja nîûntû bwa biakûrîa bia mûgeni ûu.”

⁵Daudi araakanwa nî mûthûûro mono nîûntû bwa îthithio rîa muntû ûu gîtonga. Areera Nathani atîrî, “Riîtweene rîa MWATHANI ûrîa ûtûûraga mwoyo, muntû athithîtie ûntû ta bûu abuîrîte kûûragwa.

⁶Ningî akarîaa kamwatî kau mainda jana, tontû bwa kûthithia ûntû ta bûu na nîûntû bwa kwîthîrwa atî na kîaao.”

⁷Nathani areera Daudi, “Nîgwe muntû ûu. MWATHANI Mûrungu wa Israeli ariuga ûjû, ‘Ndakûthuurîre ndîrakweethia mûnene wa Israeli, na ndîragûtunyûkia kuuma kîrî Saûlû.

⁸Ndîrakûnenkera ûnene na aka baawe. Ndîrakweethia mûnene wa Israeli na Juda. Këethîra biu bitakûng'anaga ndîngî gûkûnenkera bingî mainda jaîrî ja bio.

⁹Nîkî tontû wamena rûteto rwa MWATHANI, wathithia ûrîa gûtîagîrîte mbere yaawe? Ûrooragithîrie Uria, Mûhiti ndeene ya ndwaa na wajûkia mwekûrû waawe aa mwekûrû waaku.

¹⁰Tontû bûû, antû ba nja yaaku batîkorotiga gûkua ikuû bibithûûku ndeene ya nthukî cionthe. Nîkwîthîrwa ûkûmena na njîra ya kûjûkia mwekûrû wa Uria, Mûhiti aa mwekûrû waaku.’

¹¹ MWATHANI arîkwîra ûjû, ‘Ngatûma ûthûûku bûkwîjîîra buumîte nja yaaku, njûkie aka baaku ûtegeete mbanenkanîre kîrî ntomûrûme ûngî, abathengeere mûthenya werûûne.

¹²Wathithîrie meeyia ûrî withoone, îndî nkathithia ûntû bûu mûthenya werûûne antû bonthe ba Israeli bakîonaga.’”

¹³Daudi areera Nathani atîrî, “Nî mbîîtie kîrî MWATHANI.” Nathani nawe aramûcokeria, “MWATHANI akûrekera meeyia jaaku, naagwe ûtîkua.

¹⁴Îndî nîûntû bwa îîyia rîrî rîtûmîte riîtwa rîa MWATHANI rîkamenwa, mwana ûrîa ûgaciarîrwa agakua.”

¹⁵Nathani araana. MWATHANI aratûma mwana ûrîa mwekûrû wa Uria aagîîte na Daudi aajua.

¹⁶Daudi areerenca Mûrungu na maromba nîûntû bwa mwana ûu nîkenda abua. Araciata kûrîa biakûrîa na arakara nja amami nthî ûtukû bunthe.

¹⁷Nabo arûngamîîri ba nja yaawe bareeta kîrî we bararûngama rûteere rwaawe bakîendaga kûmûûkîîria, îndî ararega na ararega kûrîa biakûrîa amwe nabo.

¹⁸Ntukû ya mûgwanja kuuma rîu mwana arakua. Nthûûmba cia Daudi irakîra kûmwîra ikiugaga atîrî, “Rîrîa mwana araarî mwoyo atîraaragia natuî kana atûcokeria, nandî nîatîa tûkamwîra atî mwana nî akuîte? Oomba kwithithîria ûntû bûbûthûûku!”

¹⁹Îndî rîrîa Daudi oonere nthûûmba ciaawe ikîaranagîria na kîoe irî amwe, aramenya atî mwana nî akuîte. Arabooria atîrî, “Mwana nî akuîte?” Nabo baramwîra atîrî, “Îî nî akuîte.”

²⁰Rîu Daudi arookîîra arauma nthî, areeria, na araaka maguta, na areekîra ngûu ingî. Rîu areeta nyomba ya MWATHANI kûmûthaathayia. Agûcoka nyomba kwaawe, areetia biakûrîa, arareterwa nawe ararîa.

²¹Nthûûmba ciaawe rîu iramûûria, “Nîmbi gîtûmi kîa ûntû bûbû wathithia? Ûraciatîre kûrîa na kûnyua na warîra rîrîa mwana araarî mwoyo, îndî rîrîa mwana akua wookîîra warîa biakûrîa.”

²²Daudi arabacokeria, “Rîrîa mwana araarî mwoyo, ndîraciataga kûrîa na kûnyua na kûrîra tontû ndîrathûgaanagia, ‘MWATHANI oomba kûmbigîîrua kîaao mwana agatûûra mwoyo.’

²³Îndî nandî nî akuîte, kûrî na gîtûmi kîrîkû nkara nciatîte kûrîa na kûnyua? Ndoomba kûmûcokia mwoyo kaîrî? Ntukû îmwe ngeeta naarîa arî, îndî we atîûmba kwîja kaîrî naaja ndî.”

²⁴Rîu Daudi araboreria Bathisheba, mûka waawe. Aramûthengeera, nawe araciara kaana. Daudi arageeta Solomoni. MWATHANI areenda mwana ûu.

²⁵MWATHANI aratûma kîroria Nathani mwana ûu areetwa Jedidia tontû MWATHANI nî aamwendeete.

²⁶Joabu nî aarwîre na Raba ya antû ba Amoni na arataa ntûûra kûrîa anene baakaraga.

²⁷Rîu Joabu aratûmana kîrî Daudi akiugaga, “Ndîkwithûkîra ntûûra ya Raba na ndîkûjûkia ntûûra ya rûûjî.

²⁸Nandî rî, ûthûrania antû bau bangî, wîîje ûrwee na ntûûra ûmîtae gwengwa ntîkeeje kûmîtaa yeewa riîtwa rîaakwa.”

²⁹Daudi nî oothûranîrie antû bonthe areeta Raba, ararwaa nayo na aramîtaa.

³⁰Nawe nî aajûkîrie thirû kuuma kîongo kîa Moleki[4] Thirû îîu yaarî ya ûrito bwa talanta îmwe ya thaabu na nî yaarî na iiga rîa goro. Nayo thirû îîu nî yeekîîrwe mûtwe jwa Daudi. Daudi nî aajûkîrie into birîa aataîte ntûûreene îîu. Nabio biaarî bibingî mono.

³¹Nî aataîre antû barîa baarî ku na areeta arabaritîthia ngûgî cia gûtumîra mîchumeno, na into bibiûgî bia chuuma, na ntûûru. Ningî arabaritithia ngûgî ya kûûmba maturubarî. Ûu nîu aathithîrie na ntûûra cionthe cia antû ba Amoni. Rîu Daudi aracoka na antû bonthe Jerusalemu.