Read KIMERU BIBLE PROTESTANT EDITION 2Sam 13 Bible Online

2Sam 13 - KIMERU BIBLE PROTESTANT EDITION bible

2Sam 13

¹Nyuma ya mantû jau, kûrakara atîrî, Abusalomu mûtaana wa Daudi nî aarî na mwarî wa ng'ina ûmûthongi mono weetagwa Tamari. Amunoni mûtaana ûngî wa Daudi nî endete Tamari mono mono.

²Wendo bûrîa Amunoni aarî nabu kîrî mwarî wa ng'ina Tamari bûramûthangîkia mono. Tontû bûu, Amunoni araciajithia aathûgaanagia gûtî u arîngî thithia amûthengeera nîûntû Tamari aarî karaiti.

³Îndî Amunoni nî aarî na mûcoore weetagwa Jonadabu mûtaana wa Shimeha. Shimeha aarî mûtaana wa ng'ina Daudi. Nandî Jonadabu aarî muntû ûmûûme mono.

⁴Jonadabu arooria Amunoni atîrî, “Nîkî tontû gwe mûtaana wa mûnene ûkaraga ntukû cionthe ûnogi na withikîrîte?” Amunoni aramûcokeria, “Nî mpendeete Tamari, mwarî wa ng'ina wa Abusalomu.”

⁵Jonadabu aramwîra atîrî, “Mama gîtandeene gîaaku, ûcieethie ta wajîtue. Rîrîa abaagu akeeja gûkûraitha ûmwîre, ‘Rekeeria mwarî wa cia Tamari eeje anthithîrie irio, athuranîre biakûrîa nkîonaga, na nîkenda anenkeeria bio wengwa.’”

⁶Tontû bûû, Amunoni aramama, arakara ta ajîtue. Rîrîa mûnene eejîre kûmwona, Amunoni aramwîra atîrî, “Ndakwerenca îtîkîîria mwarî wa chiaa Tamari eeje anthithîrie tûmîgaate twa gûkaanda nkîmwonaga, nîkenda anenkera tu wengwa.”

⁷Rîu Daudi aratûmana nja kîrî Tamari aramwîra, “Îta nyomba ya mûtaana wa nyakwe Amunoni, ûkamûthuranîîre biakûrîa.”

⁸Tontû bûu, Tamari areeta nyomba ya mûtaana wa ng'ina Amunoni aramwîthîra amami. Arajûkia mûtu, arajûkaanda Amunoni ategeete, na araruga tûmîgaate.

⁹Ararita tûmîgaate tûu karaîîne nîkenda Amunoni arîa. Îndî Amunoni ararega kûrîa aramwîra, “Îîra antû bonthe baumagare.” Antû bonthe baraumagara.

¹⁰Rîu Amunoni areera Tamari atîrî, “Ndeetera biakûrîa kanyomba gaka ka ndeene, ûnenkeerie na njara ciaaku ndîe.” Tamari arajûkia tûmîgaate tûrîa athithîtie araikîria Amunoni mûtaana wa ng'ina kanyomba ka ndeene.

¹¹Îndî rîrîa Tamari amwikîîrie tumîgaate nîkenda arîa, aramûgwata njara aramwîra, “Njû mwarî wa cia nkûthengeere!”

¹²Aramûcokeria akiugaga, “Arî mûtaana wa chiaa! Ûgankinyîîria kwa inya kûthithia ûntû ta bûû tontû bûtîthithagua nthîgûrû ya Israeli. Ûkáthithia ûntû bwa waa ta bûû.

¹³A ni-rî, nkamenya gwîta nî nthao? Naagwe menya ûgakara ta kîaa ûgîe nthao. Tontû bûû, ndakwerenca waarie na mûnene, nîûntû ndî na mma atîrega kûnenkanîra kîrî gwe.”

¹⁴Îndî ararega kûthikîîra Tamari, na nîûntû Amunoni nî aamûkîragia inya, aramûkinyîîria na inya, aramama na Tamari atîkwenda.

¹⁵Rîu Amunoni arathûûra Tamari mono, mwanka kûmûthûûra kûrîa amûthûûrîre kûrakûrûkithia kûmwenda kûrîa amwendeete. Amunoni aramwîra, “Ûkîîra wîîte!”

¹⁶Tamari aramwîra atîrî, “Arî mûtaana wa chiaa, îîyia rîa gûmpînga ûjû nîrîo rîthûûku nkûrûki ya rîa ûrîa wathithia!” Îndî Amunoni ararega kûmûthikîîra.

¹⁷Areeta mûthaka ûmwe ûrîa wamûmenyagîîra aramwîra, “Umagaria mûka ûûjû ntige kûmwona, na auma wiinge mwari!”

¹⁸Tamari nî ekîrîte nguû ya rwambambio yaarî na njara indaaja, o ta ûrîa karaaja mwarî karaiti wa mûnene eekagîra. Nthûûmba ya Amunoni îramumagaria oome na îrainga mwari.

¹⁹Tamari araciaka mûju kîongo na aratambûranga rwambambio rûrûraaja rûrîa ekîrîte kwonania kwithikîîra. Areekîra njara mûtwe areeta akîrîraga.

²⁰Abusalomu mûtaana wa ng'ina aramûûria, “Nîka Amunoni akûthanga? Tiga kûthûûra waaga ûkiri mwarî wa chiaa, tontû menya nî mûtaana wa nyakwe. Ûkathûgaanîria mantû jau mono.” Tontû bûû, Tamari arakara nyomba ya mûtaana wa ng'ina Abusalomu aithikîîrîte.

²¹Rîrîa mûnene Daudi aigîrue nteto iu, arathûûra mono.

²²Îndî Abusalomu ateera Amunoni noo atîa nîkwîthîra nî aamûthûûrîre nîûntû bwa kûmama na Tamari kwa inya.

²³Nyuma ya mîaka îîrî, Abusalomu areethîrwa arî na kîatho kîa kwenja ng'ondu guee gûntû gweetagwa Baali-hazori akuî na Efuraimu. Kîathoone kîu, areeta ataana bonthe ba mûnene Daudi.

²⁴Aracoka areeta kîrî mûnene aramwîra, “Nî ngûkûûria gwe amwe na atongeeria baaku bwîje kîathoone gîa kwenja ng'ondu guee gwaakwa.”

²⁵Îndî mûnene ararega aramwîra, “Arî mwana waakwa, tûtîîja twinthe tontû twoomba kwaa mûrigo kîrî gwe.” Abusalomu aramûkinyîîria, îndî Daudi ararega, aramûtharima eeta na mbere.

²⁶Abusalomu nî aamwîrîre atîrî, “Gûkëethîrwa nîu, ndakwerenca wîtîkîîrie mûtaana wa baaba Amunoni eeje.” Mûnene aramûûria, “Nîkî tontû ûkwenda bwîtania?”

²⁷Îndî rîrîa Abusalomu eetîre na mbere kwerencana, mûnene Daudi areetîkîîria Amunoni amwe na ataana baawe bonthe beetania na Abusalomu.

²⁸Rîu Abusalomu areera nthûûmba ciaawe atîrî, “Tegeeni bwega bwoone rîrîa Amunoni akanyua oogite, rîu ndauga, ‘Ûrageni Amunoni,’ bûmûûrage. Bûgákîreni, nî ni ndabwaa waatho. Ûmîrieni na bûgîe ûchamba!”

²⁹Tontû bûû, nthûûmba cia Abusalomu irathithîria Amunoni o ta ûrîa ciaathîtwe. Rîu ataana ba mûnene bonthe barookîîra o muntû agiitagia nyûmbû yaawe akamatûka.

³⁰Barî o njîreene, ntûmwa îrakinyîra mûnene Daudi atî, “Abusalomu akûng'eera ataana baaku bonthe, na gûtî no ûmwe ûtigarîte!”

³¹Rîu mûnene arookîîra aratambûranga nguû ciaawe araigwîthia nthî, na nthûûmba ciaawe cionthe irîa ciaarî amwe nawe, iratambûranga nguû ciaao.

³²Îndî Jonadabu, mûtaana wa Shimeha, areera îthe mwanake Daudi atîrî, “Mwathi waakwa ûkáthûgaania nî booragîîte ataana baaku bonthe. Nî Amunoni akî. Tontû Abusalomu nî aatwîîre athûgaanîtie ûntû bûu kuuma rîrîa Amunoni aathengereere Tamari mwarî wa ng'ina kwa inya.

³³Nandî mwathi waakwa, tiga kûthûgaania nkoroone yaaku atî ataana bonthe ba mûnene nî bakuîte. Nî Amunoni wenka ûkuîte.”

³⁴Abusalomu nî aarî akûmatûka. Kagiiteene kau mûthaka ûrîa waarî mpingîroone akarîtie aroona antû babaingî nyuma yaawe beenami barî rûteere rwa kîrîma njîreene ya Horonaimu.

³⁵Jonadabu areera Daudi atîrî, “Tega ataana baaku bakwîja o ta ûrîa ni nthûûmba yaaku ngûkwîrîte.”

³⁶Akîthiria kuuga ûu, ataana ba mûnene barakûrûka. Bararîra na inya; kinya mûnene Daudi amwe na atongeeria baawe bararîra mono.

³⁷ Abusalomu aramatûka areeta kîrî Talimai mûtaana wa Amihudi mûnene wa Geshuri. Daudi nawe araithikîîra kagiita gakaraaja nîûntû bwa gûkua kwa mûtaana waawe.

³⁸Rîu Abusalomu akûmatûka eeta Geshuri arakara ku mîaka îthatû.

³⁹Mûnene Daudi akûthiria kwithikîîra nîûntû bwa gîkuu kîa Amunoni, arambîrîria kwenda kwoona mûtaana waawe Abusalomu.