Read KIMERU BIBLE PROTESTANT EDITION 2Sam 15 Bible Online

2Sam 15 - KIMERU BIBLE PROTESTANT EDITION bible

2Sam 15

¹Nyuma ya kûgwatanîra na Daudi, Abusalomu araicwîra ngaarî ya ndwaa na mbarathi ciaayo, na antû mîrongo îtaano (50) ba gwîtania nawe.

²Abusalomu nî ookagîîra rûkîîrî kainda ageeta akarûngama rûteere rwa njîra îrîa îkûrûkaga mpingîroone ya ntûûra. O rîonthe rîrîa muntû eejaga arî na îgamba akwenda mûnene amûgambîra, Abusalomu nî amwîtaga akamwîra, “Uumîte ntûûra îrîkû.” Rîrîa muntû ûu amwîra mwîrîga jûrîa aumîte ndeene ya Israeli,

³Abusalomu nî aaugaga atîrî, “Îgamba rîaaku rîrî na ûûma, îndî gûtî muntû no ûmwe mûnene athuurîte wa gûkûthikîîra.”

⁴Abusalomu agacoka akauga, “Nkoona wa gûmpeethia mûgambithania nthî îîjî, rîu o bunka muntû wonthe ûrî na îgamba arîngî kwîja kîrî ni, nkamûgambîra na îota.”

⁵Rîrîa rîonthe muntû endaga kwînamîria kîrî we amwonia gîtiio, Abusalomu nîka aregaga, îndî amûgwataga akamûcûnca.

⁶Ûu nîu Abusalomu athithagîria o bunka muntû wa Israeli ûrîa weetaga kîrî mûnene kûgiitîrwa îgamba. Ûû nîu Abusalomu aaciendithîrie kîrî antû ba Israeli.

⁷Nyuma ya mîaka îna, Abusalomu nî eerîre mûnene atîrî, “Mbîtîkîîria mbîte Heburoni, nkoojûrie mûciîtio jûrîa ndaciîtîîrie MWATHANI.

⁸Ni nthûûmba yaaku rîrîa ndaarî Geshuri ya Sîria, nî ndaciîtîrie mûciîtio atî ‘MWATHANI na mma akëeja gûncokia Jerusalemu, ngeeta kûmûritîra kîgongwana.’”

⁹Mûnene aramwîra, “ciîtîre na thîîrî.” Abusalomu arookîîra areeta Heburoni.

¹⁰Rîu Abusalomu aratûmana na witho mîîrîgeene yonthe ya Israeli akiugaga, “Rîrîa bûkaigua kajû ka tarumbeta buuge na kajû gakanene atîrî, ‘Abusalomu nî mûnene Heburoni!’”

¹¹Abusalomu nî eetanîtie na antû magana jaîrî (200) kuuma Jerusalemu barîa eetîte. Nabo beetanîtie nawe batîkûmenya no atîa.

¹²Abusalomu akîritaga igongwana, nî atûmanîîre Ahithofeli wa kuuma ntûûra ya Gilo, ûrîa waarî mwathi Daudi ûkûrû. Mûbango jwa witho jwa Abusalomu jwa kwenda kûjûkia ûnene bwa Daudi nî jweetîre na mbere kûrika na antû barîa baarî rûteere rwa Abusalomu bareeta na mbere bakîongerekaga.

¹³Muntû mûna nî eetîre kîrî Daudi aramwîra, “Antû ba Israeli nî bagarûkîte bathingata Abusalomu.”

¹⁴Daudi nawe areera nthûûmba ciaawe cionthe irîa ciaarî amwe nawe Jerusalemu atîrî, “Ûkîîreeni tûmatûke, tûtîkeeje gûkirimanua nî Abusalomu. Twîtangeni na mpwîî atîkeeje kwîjanga na mpwîî atûkirimania. Aatûtuîkîîria agatûthithîria bûbûûî na athirie ntûûra na rûchiû.”

¹⁵Rîu nthûûmba iu cia mûnene iracokia, “Nî twithuranîrîte kûthithia bunthe bûrîa gwe mûnene mwathi weetû ûgatwîra.”

¹⁶Tontû bûû, mûnene nî aumagarîre na antû ba nja yaawe bonthe baramûthingata. Mûnene nî aatigîre aka ba gwîka îkûmi bakaragia nja.

¹⁷Mûnene aratongeeria antû baawe bonthe na bagûkinya nyomba ya mûthia ndeene ya ntûûra îîu, bararûngama.

¹⁸Atongeeria baawe bonthe bararûngama rûteere rwa mûnene. Asikarî baawe barîa baumîte Kereti na Aperethi na bangî magana jatantatû (600) ba kuuma Giti, barîa baarî bakûmûthingata kuuma Gathi barakûrûkîîra mbere ya mûnene bagîcencaga.

¹⁹Rîu mûnene arooria Itai ûrîa waarî wa kuuma Gitti atîrî, “Kinya gwe ka wîtanîtie natuî? Coka, ûkarage amwe na mûnene Abusalomu tontû ûrî mbîji ya kuuma kûngî na mûtae.

²⁰Wejîte rua, nîatîa nkoomba gwîtania naagwe na ûtîkûmenya nî naa ndeeta? Coka, na ûcokanie na antû ba kweenu. MWATHANI arobwigîîrua kîaao na akaa mwîtîkua kîrî buî.”

²¹Îndî Itai aracokeria mûnene aramwîra, “O ta ûrîa MWATHANI atwîre mwoyo, na o ta ûrîa gwe mûnene mwathi waakwa ûrî mwoyo, ndîciîtia atî o arîa ugeeta, gîkuûne kana mwoyoone, nîo ni nthûûmba yaaku nkeethîrwa ndî.”

²²Nîu Daudi aramwîra, “Kûrûka twîte.” Tontû bûû, Itai arakûrûka amwe na asikarî baawe amwe na antû baao.

²³Antû bararîra na inya rîrîa Daudi na antû barîa baamûthingatîte baaumîre bareeta. Mûnene arauna kamûuro ka Kidironi athingatîtwe nî antû bau baawe, bonthe amwe bareeta bwa rwanda.

²⁴Zadoki nî aarî o, amwe na Alawi bakamatîte Îthandûkû rîa kîrîkanîro kîa Mûrungu, bararîîka au nthî mwanka rîrîa antû bonthe baakûrûkîre. Mûthînjîri-Mûrungu Abiathari kinya we nî aarî o.

²⁵Rîu Daudi areera Zadoki atîrî, “Cokia Îthandûkû rîa kîrîkanîro ntûûreene, MWATHANI ambigîîrua kîaao, akandeeta ndîone na mbone antû arîa rîkaraga.

²⁶Îndî akëeja kwîthîrwa atîmbigîîrua kîaao kinya rîo nî bwega, nî athithîrie ûrîa akwoona kwagîrîte.”

²⁷Mûnene aracoka areera mûthînjîri-Mûrungu Zadoki, “Atîrî, gwe na Abiathari amwe na ataana beenu; Ahimaazi mûtaana waaku na Jonathani mûtaana wa Abiathari cokeeni na ûkiri.

²⁸Naani kagiiteene kau nkeethîrwa mbeteereete ntûmwa kuuma kîrî buî ndî îriûkoone.”

²⁹Tontû bûû, Zadoki na Abiathari baracokia Îthandûkû rîa kîrîkanîro Jerusalemu na barakara kûu.

³⁰Daudi araitia kîrîma kîa Mîarîki na magûrû jamatheri akîrîraga akunîkîrîte mûtwe kwonania kwithikîîra. Antû bonthe barîa baarî amwe nawe barakunîkîra mîtwe yaao baraitia bakîrîraga.

³¹Daudi arîkwîrwa Ahithofeli nî ûmwe wa barîa bagûkunyanîrîte barî nkireba na Abusalomu, araromba akiugaga, “MWATHANI ndakûromba ûgarûre kîrîra kîa Ahithofeli kîe waa.”

³²Rîrîa Daudi aitîrie arakinya kathûmbî ga kîrîma kîu arîa kûrombagîrwa, aratirimana na mûcoore waawe Hushai wa kuuma Ariki eetîte kûmwona na atambûrangîte nguû na aaigererete tîîri mûtwe.

³³Daudi aramwîra atîrî, “Ûkëeja gwîtania naani ûkaa mûrigo.

³⁴Îndî ûkëeja gûcoka ntûûreene ya Jerusalemu, ûkeera Abusalomu, ‘Nkaa nthûûmba yaaku mûnene o ta ûrîa ndîraarî nthûûmba ya abaagu mbereene’ waûmba gûnteethia na njîra ya kwangaratania kîrîra kîrîa Ahithofeli akaeejana.

³⁵Kinya Zadoki na Abiathari, athînjîri-Mûrungu barî nao. Tontû bûu o ûntû kinya bûrîkû bûrîa ûkaigua bûkîarua gîkaro kîa mûnene îîra Zadoki na Abiathari.

³⁶Barî na ataana baao Ahimaazi wa Zadoki na Jonathani wa Abiathari, na nîbo ûgatûma beeje bambîîre jarîa jonthe ûkaigua.”

³⁷Tontû bûû, Hushai mûcoore wa Daudi arakinya Jerusalemu o rîrîa Abusalomu akinyaga.