Read KIMERU BIBLE PROTESTANT EDITION 2Sam 16 Bible Online

2Sam 16 - KIMERU BIBLE PROTESTANT EDITION bible

2Sam 16

¹ Daudi akuuma kathûmbîîne ga kîrîma kîu, aratirimana na Ziba nthûûmba ya Mefiboshethi. Ziba nî aarî na ntigiri inyiingî mma ciaîkîtue mîgaate magana jaîrî (200), na imanja îgana rîmwe (100) rîa nzabibû injûmo, na imanja îgana (100) bia matuunda na kîgîîna kîûjûri ndibei.

²Mûnene Daudi arooria Ziba atîrî, “Nî biambi bibi?” Ziba aramûcokeria, “Ntigiri nî cia gûkamata antû ba nja yaaku mwathi waakwa, mîgaate na matuunda nî bia kûrîwa nî antû babeethî, na ndibei nî ya barîa bakanoga na kûnyoonta barî rwanda.”

³ Daudi aramûûria, “Arî kû Mefiboshethi mwana wa Jonathani mûtaana wa Saûlû mwathi waaku?” Zîba aramwîra, “Nî aratigîrwe Jerusalemu tontû nî agwîtîkia Aisraeli bakamûcokeria ûnene bwa ûjûûwe Saûlû.”

⁴Rîu mûnene Daudi areera Ziba, “Tega bionthe birîa biraarî bia Mefiboshethi nandî nî biaaku.” Ziba aracokia akiugaga, “Nî nkwinyiiyia mbere yaaku, mwathi waakwa mûnene, ndîrokara nkîonaga wega kuuma kîrî gwe.”

⁵Rîrîa Daudi aakinyîre ntûûra ya Bahurimu, muntû ûmwe wa rûrîîjo rwa Saûlû weetagwa Shimei mûtaana wa Gera, araumagara akîrumanaga.

⁶Shimei arambîrîîria kûgera Daudi maiga, amwe na atongeeria baawe, kinya këethîra aakarîîtue nteere cionthe.

⁷Shimei ararumana akiugaga, “Îta, uma aja îta, mûûragani na mwînyangia!

⁸MWATHANI nî atûmîte ûcokerwa nî tharike ya antû ba nja Saûlû barîa wooragîre. MWATHANI nî anenkanîre ûnene kîrî mûtaana waaku Abusalomu, na nandî ûkûthira gwe mûûragani!”

⁹Rîu Abishai mûtaana wa Zeruia areera mûnene Daudi atîrî, “Nîkî tontû mûnene ûgwîtîkîîria kurû îîjî îkûruma? Mbîtîkîîria mbîte mîng'eere.”

¹⁰Daudi areera Abishai na mûtaana wa ng'ina Joabu, “Îîjî tî ngûgî yeenu buî ataana ba Zeruia. Akëeja kwîthîrwa arînduma nîûntû MWATHANI nî amwîtîkîîrîtie anduma, nûû ûbuîrîte kûûria?”

¹¹Daudi areera Abishai na atongeeria bangî bonthe atîrî, “Këethîra mûtaana waakwa weengwa nî agûcwa ûrîa ambûraga, a Mûbenjamini ûûjû agacwaa ûrîa ambûragîkia bûng'ana? Tiganeni nawe arumane, tontû MWATHANI nî amwîtîkîîrîtie.

¹²Kwombîka MWATHANI oomba kûraithîîria mîthangîko îrîa ndî nayo akareeta itharimo antû a irumi bia naarua.”

¹³Tontû bûû, Daudi na antû bau baawe baraciîtîra, nawe Shimei areeta arî rûteere rwa kîrîma akuî nabo akîbageraga maiga, na akîbauragîria tîîri na kûbarumanga.

¹⁴Mûnene na antû barîa bonthe baarî amwe nawe nî baanogi mono. Tontû bûû, bagûkinya mûuroone jwa Jorodani baranogoka.

¹⁵Abusalomu na antû ba Israeli bonthe barîa baarî amwe nawe o na kinya Ahithofeli nî baakinyîre Jerusalemu.

¹⁶Rîrîa Hushai ûrîa waarî wa kuuma Ariki na waarî mûcoore wa Daudi eetîre kîrî Abusalomu nî aamwîrîre atîrî, “Ûrotûûra matukû jamaingî mûnene! Ûrogîta ûtûûro bûbûraaja mûnene!”

¹⁷Abusalomu aramûûria, “Gûkû nîku kwîthîrwa ûrî mwîtîkua kîrî mûcoore waaku? Nîkî tontû ûtîreetania na mûcoore waaku”

¹⁸Hushai nawe aramûcokeria, “Gûtîûmbîka! Ûûni ngatuîka wa ûrîa ûthuuri nî MWATHANI na antû baba na antû ba Israeli na nkare amwe nawe.

¹⁹A kaîrî rî nûû mbwîrîte gûtumîkîra? Anga tî mûtaana waawe? O ta ûrîa ndîratumîkagîra abaagu, nîu ngagûtumîkagîra.”

²⁰Rîu Abusalomu areera Ahithofeli atîrî, “Nandî twee kîrîra kîa ûrîa tûkathithia.”

²¹Ahithofeli areera Abusalomu atîrî, “Îta ûkathengeere aka bagwîka ba abaagu barîa atigîte bakaragia nja. Rîu Israeli îkaigua atî ûkwinunkia buru kîrî abaagu, nabo antû barîa barî rûteere rwaaku bagîe inya nkûrûki.”

²² Tontû bûû nî baambîîre Abusalomu îema îgûrûgûrû rîa nyomba, nawe Abusalomu arathengeera aka bau bagwîka ba îthe Israeli yonthe îkîonaga.

²³Îgiiteene rîu kîrîra kîonthe kîrîa Ahithofeli aeejanaga kîajûkagua ta rûteto kuuma kîrî Mûrungu. Tontû bûû, kîrîra kîu nî gîekagîîrwa mono nî Daudi na Abusalomu bobaîrî.