Read KIMERU BIBLE PROTESTANT EDITION 2Sam 17 Bible Online

2Sam 17 - KIMERU BIBLE PROTESTANT EDITION bible

2Sam 17

¹Ahithofeli aracoka areera Abusalomu, “Mbîtîkîîria nthuure asikarî ngiri îkûmi na ijîîrî (12,000), mbîte ûtukû bûbû mpîngane na Daudi.

²Mwithûkîre rîrîa anogi na akua nkoro, mûmakie na antû baawe bamatûke. Naani mbûrage mûnene wenka.

³Rîu ncokie antû bangî bonthe kîrî gwe o ta ûrîa mwekûrû wa mûranû acokaga kîrî mûkûrû waawe. Ûrîenda kûûraga muntû ûmwe wenka na antû bangî bonthe bakare na thîîrî.”

⁴Kîrîra kîu kîragwîria Abusalomu na akûrû bonthe ba Israeli mono.

⁵Rîu Abusalomu arauga, “Mbîtîreeni Hushai wa kuuma Ariki kinya we twigue ûrîa akauga.”

⁶Hushai akwîja, Abusalomu aramwîra, “Ahithofeli agûtwa kîrîra, tûkîthingate? Warega tûkûthingata ûtwîre ûrîa ûkwenda tûthithia.”

⁷Hushai aramûcokeria aramwîra, “Kîrîra kîrîa Ahithofeli aeejana nandî tî gîkîega.

⁸Gwe nî wiijî atî abaagu na asikarî baawe nî nchamba cia ndwaa, na nandî nî bang'eenti o ta ndûû îrîîri twaana. Nkûrûki ya ûû abaagu nî muntû wiijî mantû ja ndwaa mono, atîûmba kûraara amwe na antû bangî.

⁹Kinya nandî oomba kwîthîrwa aiciithîte gîkurunguune kana antû angî. Asikarî beetû bakëeja kûûragwa mbere, antû barîa bakaigua bakauga, ‘Antû ba Abusalomu bagûtemwa ntaame; bakûûragwa.’

¹⁰Rîu kinya nchamba yeetû ya ndwaa, îrîa îrî nkoro înjûmo ta ya ngatûnyi îkamaka mono tontû antû bonthe ndeene ya Israeli nî baijî atî abaagu nî nchamba na antû barîa barî amwe nawe nî kûûî.

¹¹Îndî kîrîra kîrîa ngakwaa nî gîkî, asikarî ba Israeli bonthe bothûrane beeje kîrî gwe, kuuma Dani mwanka Beerisheba, bakûthingate baingîi mono ta mûthanga jwa îria, ûbatongeerie ndweene gwengwa.

¹²Tontû bûû, tûkamwîthûkîra o arîa arî, tûmûkirimanie amwe na antû baawe ta ûrîa îme rîgûûjaga rîgakunîka nthî, baage wa gûtigara.

¹³Akëeja kûmatûka agakûrûka ntûûreene, antû ba Israeli bakajûkia mîkanda bakuucie rûthingo rûgwe kîguuruune nthîgûrû mwanka kwaage kaiga no kamwe gatigi karûngi.”

¹⁴Abusalomu na antû bonthe barîa baarî amwe nawe barauga atîrî, “Kîrîra kîa Hushai wa kuuma Ariki nîkîo kîega nkûrûki ya kîrîra kîa Ahithofeli.” MWATHANI nî aarî akûgiita kwangaratania ûûme bwa kîrîra kîa Ahithofeli nîkenda Abusalomu athirua.

¹⁵Rîu Hushai areera athînjîri-Mûrungu Zadoki na Abiathari atîrî, “Ûna na ûna nîbu Ahithofeli eerîre Abusalomu na akûrû bonthe ba Israeli, naani ndamwatha amwe nabo kîrîra kîna na kîna.

¹⁶Tontû bûû, nandî tûmaneni kîrî Daudi na mpwîî eerwe atîrî, ‘Ûtukû naarua ûkáraara mariûkoone ya Jorodani rwanda, îndî una Jorodani na mpwîî nîkenda mûnene amwe na antû baawe batîkathirue.’”

¹⁷Kagiiteene kau Jonathani mûtaana wa Abiathari na Ahimaazi mûtaana wa Zadoki nî beetereete barî kîthimeene kîa Enirogeli oome ya ntûûra ya Jerusalemu, tontû batîngîûmîîria gûkûrûka bagîkîra kwonwa. Kûrî nthûûmba ya mwarî yeetaga kûbamenyithia ûrîa mantû jakari, nabo bageeta kûmenyithia Daudi.

¹⁸Îndî kaîjî karaboona kareeta karamenyithia Abusalomu. Tontû bûû, Jonathani na Ahimaazi baraciûmia bareeta gwiciitha kwa muntû ûmwe ndeene ya Bahurimu. Muntû ûu nî aarî na kîthima nja yaawe, nabo baratonya ku.

¹⁹Mwekûrû wa muntû ûu arakunîkîra mûromo jwa kîthima kîu, na araanîka nkano îgûrû. Gûtî muntû wamenyere ûntû bûu.

²⁰Rîrîa nthûûmba cia Abusalomu cieejîre nja ya mûka ûu, baramûûria, “Barîkû Ahimaazi na Jonathani?” Mûka ûu arabacokeria, “Bakuuna mûuro.” Bakûbacwaa baabaga baracoka Jerusalemu.

²¹Nyuma ya nthûûmba cia Abusalomu gwîta, Ahimaazi na Jonathani barauma kîthimeene, bareeta baraa Daudi nteto. Baramwîra atîrî, “Ûkîîra wîîte na mpwîî uune rûûjî, tontû ûna na ûna nîkîo kîrîra kîrîa Ahithofeli araejanîre nîûntû bwaaku.”

²²Rîu Daudi amwe na antû bonthe barîa baarî amwe nawe barauna mûuro jwa Jorodani, na kûgîkea gûtî muntû waao no ûmwe ûtaarî akuuna rûûjî.

²³Rîrîa Ahithofeli oonere kîrîra kîaawe gîtîrathingatwa, arathuuta ntigiri yaawe aracoka ntûûreene yaao. Akûthûranîra mantû ja nja yaawe, araicuuria arakua. Arathikwa kaburiine ka îthe.

²⁴Rîrîa Abusalomu na antû baawe baunîre mûuro jwa Jorodani, Daudi nî aarî agûkinya ntûûra ya Mahanaimu.

²⁵Abusalomu nî aarî akweethia Amasa mûtongeeria wa njûûrî antû a Joabu. Amasa aarî mûtaana wa Mûishmaeli weetagwa Ithira. Nawe agûrîte Abigali mwarî wa Nahashi, mwari wa ng'ina wa Zeruia ûrîa waarî ng'ina wa Joabu.

²⁶Abusalomu na antû ba Israeli baraamba kambî yaao nthîgûrû ya Gileadi.

²⁷Rîrîa Daudi aakinyîre Mahanaimu, Shobi mûtaana wa Nahashi kuuma ntûûra ya Raba nthîgûrû ya Amoni, na Makiri mûtaana wa Amieli kuuma Lodebari, na Barizilai Mûgileadi kuuma Rogelimu bareta kîrî Daudi.

²⁸Baramwikîria into bia kûmamîra na mpakûri na nyongû na nkano na mûnyaki na mûtu na mpîndî inkarange na mûng'aû na nchûgû.

²⁹Ningî baramwikîria nainchû na maguta na ng'ondu cia kûrîwa nî Daudi na antû barîa aarî nabo tontû nî baanogi na nî baarî na mpara na nyoonta barî rwanda.