Read KIMERU BIBLE PROTESTANT EDITION 2Sam 18 Bible Online

2Sam 18 - KIMERU BIBLE PROTESTANT EDITION bible

2Sam 18

¹Daudi nî oothûranîrie antû barîa baarî amwe nawe, na arabathuurîra atongeeria ba ikundi bia antû ngiri ngiri na bia antû îgana îgana.

²Aratûma njûûrî îîu îgaanîtue ikundi bithatû bing'anene: kîmwe gîatongeeretue nî Joabu na kîngî nî Abishai mûtaana wa Zeruia. Abishai aarî mûtaana wa ng'ina wa Joabu. Gîkundi kîu kîngî gîatongeeretue nî Itai wa kuuma Giti. Mûnene Daudi arabeera, “Kinya ni ngeetania naabuî.”

³Îndî antû bau baramwîra, “Ûtîbuîrîte gwîtania naatuî. Tontû anthû beetû batîtindanîra naatuî twamatûka kana kinya booraga nusu ya asikarî beetû. Nîgwe bakethîrwa bagîcwaa tontû gwe ûkûrûkîte asikarî ngiri îkûmi (10,000). Tontû bûû, nî kaaba ûtigwe aja ntûûreene nîkenda ûtûtûmîra ûteethio ûrî o.”

⁴Mûnene arabeera, “Nkathithia ûrîa bûkwona kwagîrîte.” Tontû bûû, Daudi ararûngama rûteere rwa mpingîro, njûûrî ciaawe nacio irakûrûkîîra au mbere yaawe barî ikundi bia ngiri ngiri na bia îgana îgana.

⁵Mûnene araatha Joabu, Abishai, na Itai arabeera, “Tontû bwaakwa, bûkéeja kûthithîria Abusalomu bûbûthûûku.” Asikarî bonthe baraigua Daudi akîîra atongeeria mantû jau jegiî Abusalomu.

⁶Njûûrî iu cia ndwaa iraumagara ireeta kûrwaa na cia Israeli, bararwîra Mwitûûne jwa Efuraimu.

⁷Asikarî ba Daudi baratutuma njûûrî ya Israeli mono na barooraga antû ngiri mîrongo îîrî (20,000).

⁸Ndwaa îrataamba gûntû gûkwingî, mwanka kûreethîrwa antû barîa bakuîrîte mwitûûne nîbo baarî babaingî nkûrûki ya barîa bakuîrîte ndweene.

⁹Îgiiteene rîu rîa ndwaa, Abusalomu nî aatirimanîre na asikarî ba Daudi. Aakamati nî nyûmbû yaawe na nyûmbû îîu îrakûrûkîîra rungu rwa mpang'i imatu cia mûtî jûmûnene jwa muuru na mûtwe jwaawe jûragwatwa nî mpang'i iu, aratigwa acuracuri o. Nyûmbû îrakûrûkîîra rungu rwaawe îraciîtîra.

¹⁰Asikarî ûmwe aroona areeta areera Joabu, “Nkwona Abusalomu acuracurîte mûtîîne jûmûnene jwa muuru!”

¹¹Joabu aracokeria muntû ûu wamwîrîre nteto atîrî, “Ûkëethîra nî woonîre Abusalomu, nîkî ûtîmûûragîîre o au? Ni ningwa ndîngî kwaa igiitwa bia fetha îkûmi na ngagwîkîra mûcibi jwa ûchamba.”

¹²Îndî muntû ûu aracokeria Joabu atîrî, “Kinya ûkëeja kûnenkera mbeecha cia fetha ngiri îmwe (1,000), ni ntîûmba kûringithia mûtaana wa mûnene na njara ciaakwa, tontû twinthe nî twaigîrue mûnene agîkwîra bûrî na Abishai na Itai atîrî, ‘Tontû bwaakwa, bûkáthithîria Abusalomu ûntû bûbûûî.’

¹³Kinya nkëeja kûûraga Abusalomu rî, mûnene arîngî kwigua tontû nî amenyaga mantû jonthe, nî nkûmenya ûtîngîûmba gûnteeteera.”

¹⁴Joabu arauga, “Ntî na kagiita ka gûta naagwe kaîrî.” Arajûkia matumo jathatû aramunta Abusalomu nkoro acuracurîte o ûu muuruune.

¹⁵Asikarî îkûmi barîa baakamataga mathaga ja ndwaa ja Joabu barathiûrûka Abusalomu baramûtumbûra.

¹⁶Joabu araathana tarumbeta, îringwe kwonania ndwaa îkûthira. Njûûrî iratiga kwîngana na antû ba Israeli iracoka.

¹⁷Barajûkia mwîrî jwa Abusalomu barajwarûkia îrinyeene rîrînene mwitûûne, bararîthika na maiga jamaingî. Asikarî ba Israeli bonthe baramatûka o muntû o muntû araana kwaawe.

¹⁸Rîrîa Abusalomu aarî mwoyo nî aaciakîrîte mûnaara ndeene ya kîguuru kîa mûnene, tontû nî aamenyaga atî na aana ba gûtûûria riîtwa rîaawe. Areeta mûnaara jûu riîtwa rîaawe na nou jwîtagwa mwanka naarua tûrî.

¹⁹Rîu Ahimaazi mûtaana wa Zadoki arauga, “Ka mbûgîe mbîte nkeere mûnene nteto injega atî MWATHANI akûmwonokia kuuma kîrî anthû baawe.”

²⁰Joabu aramûcokeria akiugaga, “Arî, tî bwega gwikia nkuma naarua, woomba gwikia ntukû îngî, îndî tî naarua tontû mûtaana wa mûnene nî akuîte.”

²¹Rîu Joabu areera nthûûmba yaawe ya mûka Mûethiopia atîrî, “Îta wîîre mûnene ûrîa woona.” Mûethiopia ûu arenamîîra kwonania kwathîka kwaawe kîrî Joabu, aroogîa areeta.

²²Ahimaazi mûtaana wa Zadoki arakinyîîria akiugaga, “Mbîtîkîîria kinya ni nthingate Mûethiopia ûu nkauge nteto iu.” Joabu aramûûria, “Nîkî tontû ûkwenda gwîta mwana waakwa? Gûtî kîewa ûkoona wauga nteto iu?”

²³Îndî Ahimaazi arauga, “Kinya gûgakarwa atîa ngeeta.” Joabu aramwîra, “Nthiî.” Tontû bûû, Ahimaazi aroogîa eetîrîte njîra ya kîguuru kîa Jorodani, na ntûti îtî thau arakûrûka nthûûmba îrîa Mûethiopia.

²⁴Kûrakara atîrî, kagiiteene kau Daudi nî akari nthî gatîgatî ka mpingîro cia ndeene na cia oome cia ntûûra. Mûkaria araitia îgûrû rîa rûthingo, araraithîîria, aroona muntû eejîte oogîi arî wenka.

²⁵Mûkaria ûu areetana areera mûnene. Mûnene aramwîra, “Gûkëethîrwa nî wenka, arî na nteto injega.” Muntû ûu woogîîte arakuîrîria.

²⁶Mûkaria rîu aroona muntû ûngî oogîi arî wenka, arauga na kajû, “Raithîîria, kûrî na muntû ûngî ûûgîi arî wenka!” Mûnene aramwîra, “Kinya we nî nteto injega areetete.”

²⁷Mûkaria areeta na mbere kuuga, “Ndîona muntû ûrîa ûkûûgîi mbere oogîi ta Ahimaazi mûtaana wa Zadoki.” Mûnene aramwîra, “Ahimaazi nî muntû ûmwega, nî areetaga nteto injega.”

²⁸Ahimaazi arakinya areeta kîrî mûnene araigwîthia nthî aramûkeethia aramwîra, “MWATHANI Mûrungu waaku arokumua, we ûrîa wanenkanîra anthû baaku barîa barakûremeete njareene cia mûnene.”

²⁹Mûnene aramûûria, “Mûthaka ûrîa Abusalomu nî ûmwega?” Ahimaazi aramûcokeria, “Rîrîa Joabu agûntûmaga nî mbonere antû barî na gachagacha îndî ntîmenyere gîtûmi.”

³⁰Mûnene aramwîra, “Coka rûteere ûrûngame arîa!” Areeta ararûngama o eteerete.

³¹O rîu Mûethiopia arakinya, areera mûnene atîrî, “Ndî na nteto injega kîrî mûnene, MWATHANI agûkwonokia ntukû îîjî ya naarua kuuma kîrî barîa barakûremeete.”

³²Mûnene aramûûria, “Mûthaka ûrîa Abusalomu nî ûmwega?” Mûethiopia ûu aramwîra, “Ndauga atî anthû ba mûnene bonthe barîa bamûremaga barokara ta mûthaka ûu Abusalomu!”

³³Mûnene aragwatwa nî kîeba gîkînene, arookîra araitia kanyomba karîa kaarî îgûrû rîa mpingîro akîrîraga akiugaga atîrî, “Wûi mûtaana waakwa! Mûtaana waakwa Abusalomu! Abusalomu, mûtaana waakwa! Tî kaaba ndîngîkua antû aaku!”