Read KIMERU BIBLE PROTESTANT EDITION 2Sam 19 Bible Online

2Sam 19 - KIMERU BIBLE PROTESTANT EDITION bible

2Sam 19

¹Joabu aramenyithua atî mûnene Daudi nî aithikîrîte akîrîraga nîûntû bwa Abusalomu.

²Tontû bûu, nkerû cia kûûmbana ndweene irîa asikarî baarî nacio iragarûka kwaa kwithikîîra bamenya atî mûnene nî aithikîîrîte nîûntû bwa mûtaana waawe Abusalomu.

³Asikarî bau baracoka ntûûreene bakiri ta barî na nthao cia kûûmbwa ndweene.

⁴Mûnene araitha ûthiû bwaawe ararîra na kajû akiugaga, “Wûi Abusalomu, mûtaana waakwa Abusalomu! Abusalomu mûtaana waakwa!”

⁵Rîu Joabu arakûrûka gîkaro kîa mûnene aramwîra atîrî, “Naarua nî ûtûmîte nthûûmba ciaaku asikarî icokerwa nî nthao. Nthûûmba iji nîcio itûmîte woonoka amwe na ataana baaku, na aarî baaku, na eekûrû baaku na aka baaku ba gwîka.

⁶Gwe wendeete barîa bakûthwîre na ûkathûûra barîa bakwendeete. Naarua ûkwonania mma atî atongeeria ba njûûrî na asikarî batî gîtûmi kîrî gwe, tontû nkwona ûrîngî kûgwîrua naarua këethîra Abusalomu arî o natuî twinthe tûkeethîrwa tûkuîte.

⁷Nandî rî, ûkîîra wîîte waarîrie nthûûmba ciaaku cia asikarî ûkîbekagera inya, tontû nî ngûciîtia riîtweene rîa MWATHANI atî warega kûbaarîria, gûtî waao no ûmwe ûgatigwa rûteere rwaaku ûtukû bûbû. Gwakarîka ûu nîbu bûkaa ûthûûku bûbûnene nkûrûki ya moothûûku jonthe jarîa jakwîjîîra kuuma waana bwaaku mwanka nandî.”

⁸Rîu mûnene arokîîra areeta arakara nthî rûteere rwa mpingîro ya ntûûra. Njûûrî ciaawe ireerwa “Mûnene nî akari nthî rûteere rwa ntûûra.” Nacio ireeta arîa aarî. Kagiiteene kau asikarî ba Israeli nî baarî bakûmatûka o muntû o muntû aana nja kwaawe.

⁹Antû bonthe ba Israeli barambîrîria gûtetania bakînung'unaga atîrî, “Mûnene nîwe watûtunyûkîrie kuuma kîrî anthû beetû, na aratwonokia kuuma kîrî Afilisti, îndî nî aramatûkîre Abusalomu auma nthîgûrû yeetû.

¹⁰Abusalomu ûrîa twaithurîîre aa mûnene weetû nî arakuîrîîre ndweene. Nandî rî, tî kaaba tuuge no atîa mantû jegiî mûnene Daudi gûcoka?”

¹¹Mûnene Daudi aratûmana kîrî athînjîri-Mûrungu Zadoki na Abiathari, arauga, “Ûrieni akûrû ba Juda, ‘Nîkî tontû bûrî ba mûthia kuuga mûnene nî acoke gîkaroone kîaawe kîa ûnene, o rîrîa antû ba Israeli bonthe batûmanîte kîrî mûnene nîûntû bwa mantû jau?

¹²Buî bûrî ba ndûgû cieetû, na tûrî ba kîero kîmwe buru; nîkî tontû bûrî ba nyuma kwenda mûnene acoka gîtûûroone kîaawe?’”

¹³Îreni Amasa atîrî, “Tûrî ba kîu kîmwe. Nî ngûciîtia atî kuuma nandî nîwe mûtongeeria wa njûûrî antû a Joabu. Mûrungu aronthithîria bûbûûî nkëeja kûremwa kûûjûria mûciîtio jûu.”

¹⁴Daudi aracokanîîria nkoro cia antû ba Juda baraa antû ba nkoro îmwe mwanka baratûmana kîrî we bakiugaga atîrî, “Cokeeni ûgwe amwe na nthûûmba ciaaku.”

¹⁵Tontû bûû, antû ba Juda baratirimana na mûnene Daudi mûuroone jwa Jorodani. Antû ba Juda nî baarî bakwîja mwanka Giligali nîkenda bamûringîîria auna mûuro.

¹⁶ Mûbenjamini ûrîa weetagwa Shimei mûtaana wa Gera kuuma Bahurimu, areetania na antû ba Juda kûthagaana mûnene Daudi.

¹⁷Shimei eejîte amwe na antû ngiri îmwe ba mwîrîga jwa Benjamini. Ziba nawe ûrîa waarî nthûûmba nja ya Saûlû, areejania na ataana baawe îkûmi na bataano, amwe nthûûmba ciaawe mîrongo îîrî, bareeta Jorodani kîrî mûnene.

¹⁸Barauna îriûko rîa Jorodani nîkenda baunia mûnene amwe na antû barîa baarî nawe na nîkenda bathithia o ûrîa mûnene arîngî eenda kûthithua. Rîrîa mûnene aunaga mûuro jwa Jorodani, Shimei mûtaana wa Gera kuuma Bahurimu araigwîîthia nthî mbere ya mûnene.

¹⁹Areera mûnene atîrî, “Ûkáririkana ûthûûku bûrîa ni nthûûmba yaaku ndakûthithîîrie rîrîa waumîte Jerusalemu; ûkorobûririkana.

²⁰Ni nî nkûmenya nî nthûûkîtie na nîkîo gîtûmi mbîjîte naarua ndî muntû wa mbere kuuma mwîrîga junthe jwa Josefu, nîkenda nkûthagaana gwe mwathi waakwa mûnene.”

²¹Abishai mûtaana wa Zeruia araaria arauga, “Nî mma Shimei abuîrîte kûûragwa tontû nî arumîre mûnene, mwîtûrîrua maguta wa MWATHANI.”

²²Îndî Daudi aracokia areera Abishai na mûtaana wa ng'ina Joabu atîrî, “Bûî ataana ba Zeruia nîmbi bikûbûthîînia tontû naarua bûgûcieethia anthû baakwa? Tontû nî ni mûnene wa Israeli, naarua gûtî muntû ûgakua.”

²³Mûnene araciîtîria Shimei aramwîra, “Ndîkwîra na mma ûtîûragwa.”

²⁴ Mefiboshethi, mûtaana wa Jonathani, areeta kûthagaana mûnene. Nawe atathambîte magûrû kana eenja kîreru kana aûûra nguû kuuma ntukû îrîa mûnene Daudi aumîre Jerusalemu, mwanka rîrîa acokere gûtî na ûgwati.

²⁵Rîrîa Mefiboshethi aakinyîre aumîte Jerusalemu nîkenda athagaana mûnene, mûnene aramûûria, “Mefiboshethi, nîkî gîatûmîre ûrega gwîtania naani?”

²⁶Mefiboshethi arauga, “Mwathi waakwa, nthûûmba yaakwa nîyo yampaîrîîrie, ndîkûmwîra anthuranîrîre ntigiri nîkenda mbîtania naagwe, o ta ûrîa ûkûmenya ndî kîthua.

²⁷Ziba nî athûûmbîtie nthûûmba yaaku kîrî mûnene, îndî tontû ûkari ta mûraîka wa Mûrungu, thithia ûrîa ûkwona kwagîrîte.

²⁸Antû ba nja ya baaba bonthe nî baagîri kûthirua buru nî mûnene, îndî gwe ûrambîtîkîîria ni nthûûmba yaaku nkara o ta barîa barîjanagîra naagwe meetheene yaaku. Gûtî yuga ndî narîo gûkûromba ûntû bûngî.”

²⁹Mûnene aramûcokeria atîrî, “Ûkáuga ûntû bûngî. Nî ngitîte atî ûgwe na Ziba bûgaane kîthaka kîa Saûlû.”

³⁰Mefiboshethi aramwîra, “Ziba nî ajûkie kîonthe, tontû gûcoka kwa mûnene arî thîîria nî bûng'anîte.”

³¹ Barizilai Mûgileadi areeta kuuma Rogelimu nîkenda aringîîria mûnene Daudi auna mûuro jwa Jorodani.

³²Barizilai aarî mûkûrû ûmûkûrû wa mîaka mîrongo înaana (80). Nawe nî aarî muntû ûmûtongu mono, na nîwe waejanîre irio bia kûrîwa nî mûnene rîrîa akaraga Mahanaimu.

³³Mûnene areera Barizilai atîrî, “Njû twîtanie Jerusalemu na ngakûmenyagîîra.”

³⁴Barizilai aramûcokeria atîrî, “Ka ntigeerie mîaka îng'ana rîu ngîîtania na mûnene Jerusalemu?

³⁵Naarua ndî na mîaka mîrongo înaana (80); gûtîkîo mpûûmbîkia kûgwîrua nîkîo. Nthûûmba yaaku îtîûmba kwigua mûchemo jwa biakûrîa kana biakûnyua. Kwombîka mbigua kajû ka aini kaîrî? Nthûûmba yaaku îtîbuîrîte kwaa mûrigo kîrî mûnene.

³⁶Ni nkaringaringîîria mûnene bûbûkai nkûrûke Jorodani. Nting'ani wa kûewa kîewa gîkînene ûu.

³⁷Nî ngûkûromba nthûûmba yaaku yaane ntûûreene yaao nîkenda îkuîra nao akuî na kaburi ya baaba na maama. Îndî nthûûmba yaaku Kimuhamu îrî aja, rekeeria îtanie na mwathi waakwa mûnene, na ûmûthithîrie o ûrîa bunthe ûkwona bwagîrîte.”

³⁸Mûnene araûga, “Îî Kimuhamu ageetania naani na nkamûthithîria o ûrîa bunthe ûkwona kwagîrîte. Nawe o bûnthe bûrîa ûkwenda nkûthithîria ngakûthithîria.”

³⁹Rîu Daudi na antû barîa baarî amwe nawe bonthe barauna Jorodani. Mûnene Aracûnca Barizilai na aramûtharima. Barizilai araana nja yaawe.

⁴⁰Mûnene Daudi areeta Giligali amwe na Kimuhamu. Antû ba Juda bonthe bareetania nawe na kinya nusu ya antû ba Israeli bareetania nawe.

⁴¹Rîu antû ba Israeli bonthe bareeta kîrî mûnene baramûûria atîrî, “Nîkî tontû ataana ba chiaa, Juda, barakûjûkîrie bakuunia Jorodani bakûringîrîîtie amwe na antû ba nja yaaku na atongeeria baaku bonthe?”

⁴²Antû ba Juda bonthe baracokeria antû ba Israeli atîrî, “Tontû mûnene nî wa ndûgû cieetû. Nîmbi îgûtûma bûthûûra? Ga kûrî biaawe tûrîte? Kana ga kûrî biewa atweete?”

⁴³Nabo antû ba Israeli bareera antû ba Juda atîrî, “Tuî twoomba kuuga Daudi nî weetû nkûrûki yeenu mainda îkûmi, kinya këethîra nî wa mwîrîga jweenu. Nîkî îndî tontû bûgûtûmeneria? Anga tî tuî twambîrîîrie kuuga mbere mûnene nî acoke?” Îndî antû ba Juda bareethîrwa nîbo baainyîrîtie mono ûrîa baaugaga nkûrûki ya antû ba Israeli.