Read KIMERU BIBLE PROTESTANT EDITION 2Sam 2 Bible Online

2Sam 2 - KIMERU BIBLE PROTESTANT EDITION bible

2Sam 2

¹Nyuma ya mantû jau, Daudi arooria MWATHANI atîrî, “Mbîte njûkie ntûûra ya Juda?” MWATHANI aramûcokeria, “Îîta!” Daudi arooria, “Ntûûra îrîkû?” MWATHANI aramwîra, “Heburoni.”

² Tontû bûû, Daudi arajûkia aka baawe bobaîrî; Ahinoamu wa kuuma Jezereeli na Abigaili kuuma Karimeli ûrîa waarî mûka ntigwa wa Nabali, bareeta Heburoni.

³Daudi aracoka arajûkia asikarî baawe amwe na nja ciaao baratûûra ntûûreene irîa icîgîîrîîtie Heburoni.

⁴ Rîu antû ba Juda bareeta Heburoni bareetûrîria Daudi maguta aa mûnene wa Juda. Rîrîa beerîre Daudi atî nî antû ba Jabeshi-gileadi barathikîre Saûlû,

⁵Daudi aratûmana kîrî bo akîbeeraga, “MWATHANI arobûtharima tontû bwa kwonania wathîki bweenu kîrî mûnene Saûlû bwamûthika.

⁶Nandî MWATHANI arobwonia wendo bwaawe na akaa mwîtîkua kîrî buî. Naani kinya ni nkabûthithîria bwega nîûntû bwa ûrîa bûthithîtie.

⁷Tontû bûû gîeni na inya na bûmîîrie. Mûnene weenu Saûlû nî arakuîre na antû ba Juda bantûrîria maguta nîkenda mpaa mûnene waao.”

⁸Na-rî, Abuneri mûtaana wa Neri, ûrîa waarî mûtongeeria wa njûûrî cia Saûlû, nî aarî agwikia Ishiboshethi, mûtaana wa Saûlû, Mahanaimu.

⁹Au nîo Abuna aetheerie Ishiboshethi mûnene wa antû ba Gileadi na ba Aasheri, na ba Jezereeli, na ba Efuraimu, na ba Benjamini na ba nthîgûrû yonthe ya Israeli.

¹⁰Ishiboshethi aarî na ûkûrû bwa mîaka mîrongo îna (40) rîrîa ambîrîîrie kwaathana Israeli. Nawe aathanîre antû a mîaka îîrî. Îndî antû ba Juda baathîkagîra Daudi.

¹¹Rîrîa Daudi aathîre antû ba Juda arî Heburoni nî ta mîaka mûgwanja na nusu.

¹²Kûrakara atîrî, Abuneri mûtaana wa Neri na atumîkîri ba Ishiboshethi mûtaana wa Saûlû, nî baaumîre Mahanaimu bareeta Gibeoni.

¹³Joabu, mûtaana wa Zeruia, na atumîkîri Daudi nabo nî babatirimîre ndieene ya Gibeoni na bamwe barakara nthî rûteere rûmwe bangî rûngî.

¹⁴Rîu Abuneri areera Joabu atîrî, “Nthaka nî ciumîre itindatindanie mbere yeetû.” Joabu aramûcokeria, “Îî nî ciumîre!”

¹⁵Nacio irookîîra iraumîra igîtaragwa nthaka îkûmi na ijîîrî cia mwîrîga jwa Benjamini irî cia rûteere rwa Ishiboshethi, na îkûmi na ijîîrî kuuma kîrî atumîkîri ba Daudi.

¹⁶O muntû aragwata mûrûûi mûtwe, aramûmunta rwaru na rûchiû, bonthe baragûjanîria nthî rîmwe barakua. Tontû bûû, antû au areetwa Helikathi-hazurimu[1]

¹⁷Ndwaa nî yang'eentîre mono ntukû îîu, na Abuneri amwe na antû ba Israeli baroombwa nî atumîkîri ba Daudi.

¹⁸Ataana ba Zeruia bo-bathatû nî baarî o: Joabu na Abishai na Asaheli. Asaheli aamatûkaga ta nkûrûngû.

¹⁹Rîu Asaheli areengana na Abuneri atîgûciûgûra.

²⁰Abuneri araciûgûra arauga, “A nîgwe Asaheli?” Nawe aramûcokeria, “Îî nî ni.”

²¹Abuneri aramwîra, “Tiga kwîngana naani, garûka bwa ûrîo kana bwa ûmotho ûgwate ûmwe wa nthaka ûjûkie kîrîa kîonthe arînakîo.” Îndî Asaheli ararega kûgarûka atigana nawe.

²²Abuneri areera Asaheli o kaîrî, “Tiga kwîngana naani. Nîka ûgûnkinyîîria gûkûûraga? Nîatîa nkoomba gûcionithania kîrî mûtaana wa nyakwe, Joabu?”

²³Îndî, Asaheli ararega kûgarûka atigana nawe. Tontû bûû, Abuneri aramûmunta kîu na ng'ûûra ya îtumo rîraumîîra mûgongo, aragwa nthî arakuîra o au. Ûrîa weejaga antû au Asaheli aagwîre arakuîra, nî aarûngamaga agakira ki.

²⁴Îndî Joabu na Abishai bareeta na mbere kwîngana na Abuneri. Riûa rîkîthûa, barakinya karîmeene ka Ama, karîa karî gaiti ya Gia, njîreene îrîa îîtaga rwanda rwa Gibeoni.

²⁵Antû ba mwîrîga jwa Benjamini baroothûrana nyuma ya Abuneri, bararûngama karîmeene îgûrû.

²⁶Rîu Abuneri arookîîria kajû areeta Joabu akiugaga, “Nîka tûkarwaa mwanka kenya? Ka ûtîkwona atî nyumeene no marûrû jagakara o? Ûgeteera mwanka rî wîra antû baaku batige kwîngana na atana ba ng'ina?”

²⁷Joabu aramûcokeria atîrî, “Nî ngûciîtia na MWATHANI ûrîa ûtwîîre mwoyo atî, këethîra tîka waaria, asikarî baakwa barîngî kwîngana naabuî mwanka rûûjû rûkîîrî.”

²⁸Tontû bûû, Joabu araringa tarumbeta, na asikarî baawe bonthe bararûngama na baratiga kwîngana na Aisraeli kaîrî, ndwaa îrathira.

²⁹Abuneri na asikarî baawe bararaara gwîta ûtukû bunthe beetîrîte kîguuruune kîa Jorodani. Barauna mûuro jwa Jorodani bareeta rûkîîrî runthe, barakinya Mahanaimu.

³⁰Joabu agûtiga kwîngana na Abuneri, aroothûrania asikarî baawe bonthe aroona bataarî o antû îkûmi na kenda, Asaheli atîgûtarîrwa o.

³¹Îndî asikarî ba Daudi nî baarî bakûûraga antû magana jathatû ja mîrongo îtaantatû ba mwîrîga jwa Benjamini barîa batongeeretue nî Abuneri.

³²Joabu na antû baawe barajûkia mwîrî jwa Asaheli barajûthika kaburiine ka îthe karîa kaarî Bethlehemu. Rîu bararaara gwîta ûtukû bunthe, kûrakea bagûkînya Heburoni.