Read KIMERU BIBLE PROTESTANT EDITION 2Sam 20 Bible Online

2Sam 20 - KIMERU BIBLE PROTESTANT EDITION bible

2Sam 20

¹ Nî kwaarî muntû wa ûtheri buru ntûûreene ya Giligali weetagwa Sheba mûtaana wa Bikiri kuuma mwîrîga jwa Benjamini. Araringa tarumbeta aracoka aragondoka na kajû gakanene arauga, “Mûciî jwa Daudi gûtîu jûtwegiî. Ningî tûtî na kiigai kuuma kîrî mûtaana wa Jesii! Antû ba Israeli, o muntû nî aane kwaawe!”

²Tontû bûû, antû ba Israeli bonthe bareerûkîra Daudi barathingata Sheba mûtaana wa Bikiri. Îndî antû ba Juda kuuma mûuro jwa Jorodani mwanka Jerusalemu barathingata mûnene waao bakîmwathîkagîra.

³ Daudi agûkinya Jerusalemu gîtûûro kîaawe kîa ûnene, arajûkia aka ba gwîka îkûmi barîa baatigi nîkenda bamenyeera gîtûûro kîu arabeeka nyomba bakarîtue nî mûkaria. Aabamenyagîîra barî ku îndî atabathengagîîra. Tontû bûû, barakara baingîri mwanka rîrîa bakuîre. Baatwîre bakari ta aka ntigwa.

⁴Rîu mûnene areera Amasa, “Mbûthûranîria antû ba Juda mbere ya ntukû ithatû ithira, na kinya gwe wîthîrwe ûrî o.”

⁵Tontû bûû, Amasa areeta antû ba Juda îndî araremwa nî kûboothûrania mbere ya ntukû ithatû irîa eerîri.

⁶Rîu Daudi areera Abishai atîrî, “Sheba mûtaana wa Bikiri agatwaa nthîîna nkûrûki ya îrîa tweei nî Abusalomu. Jûkia asikarî wîngane nawe mbere ya akûrûka ntûûreene irîa ciirigîri na rûthingo atûmatûka.”

⁷Joabu na Akerethi na Apelethi na Abishai amwe na nchamba cionthe cia ndwaa barauma Jerusalemu bareengana na Sheba mûtaana wa Bikiri.

⁸Bagûkinya kiigene kîrîa kînene kîrîa kîrî Gibeoni, Amasa arabathagaana. Îgiita rîu Joabu nî aaitungîte na mathaga ja ndwaa; eekîrîte nguû ya ndwaa, aciogeete mûcibi arîa aacuurîtie rûchiû rûrî kîûgeene kîaru. Eetîte, rûchiû rûragwa nthî.

⁹Arooria Amasa atîrî, “Ûrî ûmwega mûtaana wa baaba?” Joabu aragwata Amasa kîreru kîaawe na njara yaawe ya ûrîo nîkenda amûcûnca.

¹⁰Îndî Amasa atoonere rûchiû njareene ya kîmotho ya Joabu; tontû bûu Joabu aramûmunta kîu, mara jareetîka nthî. Joabu atamûmuntîre rîa jaîrî atîrakua. Joabu na mûtaana wa ng'ina Abishai bareeta na mbere kwîngana na Sheba mûtaana wa Bikiri.

¹¹Rîu muntû ûmwe mûthingati wa Joabu ararûngama rûteere rwa kiimba kîa Amasa arauga, “Ûrîa ûrî rûteere rwa Joabu na rwa Daudi, nî athingate Joabu!”

¹²Mwîrî jwa Amasa jwagaragari tharikeene yaaju gatîgatî ka njîra îmbariî. O muntû wonthe ûrîa wakûrûkagîîra au oona mwîrî jûu, nî aarûngamaga. Mûthingati ûu wa Joabu akwona ûrîa antû baarûngamaga, arakururia mwîrî jwa Amasa, arajwikia kîthakeene na arajûkunîkîra na nguû.

¹³Mwîrî jwa Amasa jûkûritwa njîreene îmbariî, asikarî bonthe barathingata Joabu nîkenda beengana na Sheba, mûtaana wa Bikiri.

¹⁴Sheba kagiiteene kau nî aarî agûkûrûkîîra nthîgûrû ya Israeli akinya ntûûra ya Abeli ya Bethimaaka. Nabo antû ba mwîrîga jwa Bikiri bonthe baroothûrana baramûthingata.

¹⁵Antû barîa baarî amwe na Joabu bakwigua atî Sheba arî Abeli ya Bethimaaka, bareeta baracîgîîria ntûûra. Baroombania mûthetu jûkiritheene na rûthingo rwa oome rwa ntûûra. Nabo asikarî ba Joabu barambîrîria kûmomoranga rûthingo.

¹⁶Ntûûreene îîu nî kwaarî na mûka ûmwe ûmûûme nawe areetana na kajû arauga “Thikîîreeni, thikîîreeni! Îreni Joabu nî eejaîje aja mwîre ûntû.”

¹⁷Joabu areeta akuî, mûka ûu nawe aramûûria, “Nîgwe Joabu?” Joabu aracokia, “Îî nî ni.” Rîu mûka ûu aramwîra, “Thikîîra ûrîa nthûûmba îkwenda gûkwîra.” Joabu aramûcokeria, “Nî nthikîîrîte.”

¹⁸Mûka ûu aramwîra, “Karaaja antû baugaga, ‘Îteeni Abeli bûgacwee kîrîra gîa kûthiria mantû jarîa bûrî najo.’ Nabo nî baathithagia ûu.

¹⁹Îîjî nî ntûûra înene yeendeete ûkiri na yaathîkîrîte Israeli, nîkî tontû ûkwenda kûmîthiria? Nîkî tontû ûkwenda kwînyangia antû ba rûgai rwa MWATHANI?”

²⁰Joabu aramûcokeria atîrî, “Arî! Ntîthithia ûntû ta bûu, ntîthiria ntûûra yeenu.

²¹Tî ûu nkwenda kûthithia, îndî kûrî na muntû wa kuuma nthîgûrû ya irîma ya Efuraimu wîtagwa Sheba mûtaana wa Bikiri. Nîwe ûremeete mûnene Daudi taka. Mûnenkanîreni akî ni mpuume ntûûreene yeenu.” Mûka ûu aracokeria Joabu arauga, “Tukagera mûtwe jwaawe rûteere rûu rwa rûthingo.”

²²Rîu mûka ûu araarîria antû ba ntûûra na ûûme nabo baragiita mûtwe jwa Sheba mûtaana wa Bikiri barajûgera oome kîrî Joabu. Tontû bûû, Joabu araringa tarumbeta na njûûrî yaawe îratiga gûcîgîîria ntûûra baraana. Joabu nawe aracoka Jerusalemu kîrî Daudi.

²³Joabu aarî mûtongeeria wa njûûrî ya Israeli, Benaia mûtaana wa Jehoiada nawe aarî mûtongeeria wa Akerethi na Apelethi.

²⁴Adoramu aarî mûtongeeria wa antû barîa barîtithagua ngûgî kwa inya. Jehoshafati mûtaana wa Ahiludi aarî mwaandîki.

²⁵Sheva aarî karani, Zadoki na Abiathari baarî athînjîri-Mûrungu.

²⁶Ira ûrîa Mûjairi, aarî mûthînjîri ûrîa wamenyagîîra Daudi.