Read KIMERU BIBLE PROTESTANT EDITION 2Sam 21 Bible Online

2Sam 21 - KIMERU BIBLE PROTESTANT EDITION bible

2Sam 21

¹Îgiiteene rîrîa Daudi aathanaga, nî kwagîîre mpara înene mîaka îthatû îthingateene. Daudi arooria MWATHANI kîrîra nîûntû bwa mpara îîu. MWATHANI aramûcokeria, “Nî tharike îbûcokerete îrîa Saûlû na antû ba nja yaawe batûûrîre bakûûraga antû ba Gibeoni.”

² Tontû bûu mûnene Daudi areeta antû ba Gibeoni. (Antû ba Gibeoni bataarî bamwe ba Israeli îndî baumîte kîrî Amori barîa Israeli yaciîtîtie îtîbooraga. Îndî Saûlû arabooraga nîûntû bwa wîîru bûrîa aarî nabu nîûntû bwa Israeli na Juda.)

³Daudi arooria Agibeoni atîrî, “Nîatîa bûkwenda mbûthithîria? Nîatîa mpûûmba kûreaa ûthûûku bûrîa bwaathithîîrue, nîkenda bûtharima mûgongo jûjû jwa antû ba MWATHANI?”

⁴Nabo baramûcokeria atîrî, “Ûthûûku bûrîa twathithîîrue bûtîûmba kûrîwa na fetha kana thaabu, na tûtîkwenda kûûraga antû ba Israeli.” Daudi arabooria, “Mbûthithîrie atîa îndî?”

⁵Antû bau ba Gibeoni bareera Daudi atîrî, “Saûlû nîwe wacwaga gûtûûraga na nîwe weendaga gûtûthiria buru nîkenda tûtîgatûûre no kû nthîgûrûûne ya Israeli.

⁶Tontû bûû, tûnenkere nthaka mûgwanja cia rûrîîjo rwaawe nîkenda tûbacuurie mbere ya MWATHANI kîrîmeene kîa Gibea.” Daudi arabeera, “Nkabûnenkera bo.”

⁷ Îndî mûnene aracaîîra mûtaana wa Jonathani Mefiboshethi tontû nî aciîtîrie mbere ya MWATHANI kîrî îthe.

⁸ Daudi arajûkia Arimoni na Mefiboshethi ataana barîa Rizipa mwarî wa Aia bagîîte nabo barî na Saûlû. Aracoka arajûkia ataana bataano ba Mikali mwarî wa Saûlû barîa bagîîte nabo barî na Adirieli Mûmeholathi ûrîa mûtaana wa Barizilai.

⁹Nawe arabanenkanîra kîrî antû ba Gibeoni, barîa babacuurîrie kîrîmeene mbere ya MWATHANI. Bonthe mûgwanja barakua barî amwe. Nabo booragîrwe kîambîrîriene kîa maketha ja mûnyaki.

¹⁰Rîu Rizipa, mwarî wa Aia, areekîra mathango na araara jangî îgûrû rîa rwaara rwa iiga, arakara o kuuma kîambîrîriene kîa maketha ja mûnyaki mwanka kûraura. Rizipa nî akaragia mîîrî îîu îtîkarîwe nî nyoni mûthenya na ûtukû akamîkaria îtîkarîwe nî nyoomo.

¹¹Rîrîa Daudi eerîrwe ûrîa Rizipa mwarî wa Aia aathithîtie,

¹² nî eetîre arajûkia marûitû ja Saûlû na ja mûtaana waawe Jonathani kuuma kîrî antû ba Jabeshi-gileadi. Antû bau nîbo baarî bakuiya marûitû jau kuuma antû arîa gwatirimanagîrwa Bethishani, arîa Afilisti baacuurîrie mîîrî ya Saûlû na Jonathani bakûboragîra Giliboa.

¹³Daudi arajûkia marûitû ja Saûlû na Jonathani na aroothûrania marûitû ja nthaka mûgwanja irîa ciacuurîtue.

¹⁴Barajathika kaburiine ga Kishi, îthe wa Saûlû, narîa Zela, nthîgûrû ya Benjamini. Barathithia o ûrîa mûnene aaugîîte. Nyuma ya kûthithia ûu, Mûrungu aracokia maromba jaao.

¹⁵Naku nî gwookîre ndwaa kaîrî gatîgatî ga Israeli na Afilisti. Daudi nî eetîre amwe na nthûûmba ciaawe kûrwaa na Afilisti, na barî ndweene Daudi aranoga.

¹⁶Ishibibenobu, ûmwe wa nchiarwa cia imuntû bibinene ûrîa îtumo rîaawe rîaarî rîa ûrito bwa kilo ithatû na nusu cia îturutia na waciogeete rûchiû rûrwerû, nî oonîre teeka oomba kûûraga Daudi.

¹⁷ Îndî Abishai mûtaana wa Zeruia areeta gûteethia Daudi, na ararwaa na kîmuntû kîu arakîûraga. Rîu antû ba Daudi baramwîra atîrî, “Ûkarîîtania naatuî ndweene kaîrî, taawa ya Israeli îîja kworua.”

¹⁸Nyumeene, nî kwagîîre na ndwaa kaîrî gatîgatî ga Israeli na Afilisti ntûûreene ya Gobu. Sibekai wa kuuma Husha arooraga kîmuntû gîeetagwa Safu ûmwe wa nchiarwa cia imuntû bibinene.

¹⁹Ningî nî kwagîîre ndwaa kaîrî gatîgatî ga Israeli na Afilisti ntûûreene ya Gobu. Elihanani mûtaana wa Jairi kuuma Bethlehemu arooraga Goliathû wa Gathi, ûrîa îtumo rîaawe rîaarî na rûthîrî rwarîo rwang'anaga ta mûgaamba jwa gwokothera mîrigi ya gûtuma.

²⁰Kûragîa na ndwaa kaîrî kûu ntûûreene ya Gathi. Naku kwaarî na kîmuntû kîmwe gîkînene mono kîaarî na biara bitantatû o njara na bitaantatû bia o kûgûrû. Biara biaawe bionthe bia njara na magûrû biaarî mîrongo îîrî na bina. Nawe aarî ûmwe wa nchiarwa cia imuntû birîa binene.

²¹Rîrîa aamarîrie njûûrî cia Israeli, Jonathani nî aamûûragîre. Jonathani aarî mûtaana wa Shimei. Shimei nawe aarî mûtaana wa ng'ina wa Daudi.

²²Imuntû biu bio bina nîbio biaarî nchiarwa cia imuntû birîa binene kuuma Gathi. Nabio biooragîrwe nî Daudi na asikarî baawe.