Read KIMERU BIBLE PROTESTANT EDITION 2Sam 22 Bible Online

2Sam 22 - KIMERU BIBLE PROTESTANT EDITION bible

2Sam 22

¹Daudi nî aarîîrie MWATHANI nteto irîa irî rwîmboone rûrû ntukû îrîa aamûtunyûkîrie kuuma kîrî anthû baawe bonthe na kuuma kîrî Saûlû,

²arauga: “MWATHANI nîwe rwaara rwaakwa rwa iiga, giitiiro gîaakwa, na mûntunyûkia.

³Mûrungu waakwa nîwe rwaara rwaakwa rwa iiga, na kîmatûko gîaakwa nî kîrî we. Nîwe rong'o yaakwa na inya ya kûmbonokia antû arîa gûtîkinyîrîka na giitiiro gîaakwa. Nîgwe mwonokia waakwa, ûmbonokagia ntîkaathithie ûthûûku.

⁴Ndeetîre MWATHANI, ûrîa wagîrîte gûkumagua, na ndîroonokua kuuma kîrî anthû baakwa.

⁵Nîkwîthîrwa mîgombe ya gîkuû yanthiûrûkîrîte na ndûûjî cia kûthirania iraambîrîria gûnkuokîra;

⁶ndîratheekwa nî nthaara cia gwa akuû na mîtego ya gîkuû yaarî mbere yaakwa.

⁷Mîthangîkoone yaakwa nîndeetîre MWATHANI, Mûrungu waakwa ndîramwîta. Nawe arî kîûrûûne kîaawe araigua kajû gaakwa, na gûkaya gwaakwa kûramûkinyîra.

⁸Rîu nthîgûrû îragitagita na kwinaina na biee bia îgûrû bireegega na birateetema nîûntû bwa kûthûûra kwa MWATHANI!

⁹Toogi îrauma nyiûrû ciaawe, na mwanki jûrauma kanyua kaawe jûkûîîthania na makara jagwakana jarauma kîrî we.

¹⁰Areenîka îgûrû areenama, matu jamatumanu jarî ruungu rwa magûrû jaawe.

¹¹Abuurûkîte athuutîte kerubi, akîonekaga arî mathaguune ja ruuo.

¹²Nawe aatûmîte muundu jûrîa jwamûthiûrûkîte jûmwitha, nîju matu jamarito ja ngai.

¹³Kuuma werûûne bûrîa bwarî mbere yaawe kûrauma makara ja mwanki jagîakanaga.

¹⁴Rîu MWATHANI aragondoka arî îgûrû kajû ka Ûrîa Ûrî Îgûrû buru karaigîîgua.

¹⁵Nawe aragera mîgwî arabanyagania arabeenga buru na rweni rwaawe.

¹⁶Rungu rwa îria rûroonekana na biee bia nthî biraguûka, nîûntû bwa îgondoka rîa MWATHANI na gûtiûka kwa mîrukî ya nyiûrû ciaawe.

¹⁷Nawe aratambûrûkia njara kuuma îgûrû arangwata, arandita rûûjîîne rûrwingî.

¹⁸Aantunyûkîrie kuuma kîrî mûnthû ûrî na inya, kuuma kîrî barîa baanthwîre, tontû nî baarî inya nkûrûki yaakwa.

¹⁹Baampinyîrîtie ntukû îrîa yaarî ya thîîna kîrî ni, îndî MWATHANI arambigîka.

²⁰Nawe arampumîria antû kûrî webero, arambonokia nîûntû nî aagwîragua nî ni.

²¹MWATHANI aandîîre biewa kûringana na waagîru bwaakwa arandîa kûringana na ûrîa njara ciaakwa itaathithîtie ûthûûku.

²²Tontû nî nthingataga njîra cia MWATHANI na ntaatigana na MWATHANI nîûntû bwa wûûî.

²³Mawaatho jaawe nî njathingataga na nî nthithagia jarîa aathanîte.

²⁴Mwathani ataarî na ûntû bwa kûnguutîra, nî ndamenyereete ntîkathithie ûthûûku.

²⁵MWATHANI nî ampeete îrîi nîûntû bwa waagîru bwaakwa, tontû nî oonete ndî ûmûtheru.

²⁶Gwe ûrî mwîtîkua kîrî eetîkua na kîrî muntû ûrîa ûtî bia kûgutîrwa gwe ûrî ûmwega.

²⁷Kîrî barîa atheru gwe ûrî ûmûtheru na kîrî barîa bakîgami nî ûbathithagîria mantû ja ûgîti.

²⁸Wonokagia barîa bainyiiagia na barîa baikumagia ûkeenîka.

²⁹Gwe MWATHANI nîgwe weerû bwaakwa nîgwe wîngaga muundu jwaakwa

³⁰Nî ûtûmaga nkoomba njûûrî ya anthû, na nî ûmbîkagîra inya nkoomba kûthûngûtha rûthingo rwaao.

³¹Njîra cia Mûrungu ûu, nî intheru, na wîrane bwaawe nî bwa mma. Nîwe rong'o ya bonthe barîa bamwethagia giciitho.

³²Mûrungu wenka nîwe MWATHANI nîwe wenka rwaara rweetû rwa iiga.

³³Mûrungu ûu nîwe giitiiro gîaakwa gîkîriku oonokagia barîa batî îgi njîreene ciaao.

³⁴ Nîwe ûtûmaga magûrû jaakwa jagîta mpwîî ta ja nkûrûngû na agatûma ndiirikîria ndûngi tûrîmeene.

³⁵Nî aritanaga njara ciaakwa ûtea bwa ndwaa, mwanka ikoomba gûkûma ûta bwa îturutia.

³⁶Gwe MWATHANI nî ûmpeete wonokio bwaaku ta rong'o, na ûteethio bwaaku bwaatûma nenea.

³⁷Ûmpeete webero bûbûng'anu arîa magûrû jaakwa jakinyaga najo magûrû jaakwa jaarega gûterûka.

³⁸Nî ndenganîre na anthû baakwa mwanka ndabathiria na ntaatigana nabo batîthirîte buru.

³⁹Ndabathirîrie buru, ndîrabamuntanga, na batoomba gûûkîîra kaîrî, noo kûgwa baagwîre magûrûûne jaakwa.

⁴⁰Gwe nî wankundîkîre inya ya kûrwaa, ûratûma barîa baarûjaga naani bagwaa nthî rungu rwaakwa.

⁴¹Nî watûmîre anthû baakwa bagarûka bamatûka, na barîa baanthwîre ndîrabathiria.

⁴²Baacwîre wa kûbateetha baramwaga barakaîra MWATHANI îndî atabacokeria.

⁴³Ndabathiîre barakara ta tîîri, ndîrabathetheranga ndîrabakinyaangîra nthî barakara ta ntaka njîreene.

⁴⁴Gwe Mwathani nî ûnditîte ng'ang'anoone cia antû baakwa wampeethia mûtongeeria wa mîgongo na antû ntaijî baraa nthûûmba ciaakwa.

⁴⁵Antû ba kûngî beejaga kîrî ni bairingîte nthî bambigua akî bakambathîkîra.

⁴⁶Antû ba kûngî baatuîkangaga, bakaumîra biiciithoone biaao bakiinainaga.

⁴⁷MWATHANI arî mwoyo na arotharimwa we rwaara rwaakwa rwa iiga! Mûrungu waakwa arokumua, We rwaara rwa iiga rwa wonokio bwaakwa.

⁴⁸Nîwe Mûrungu ûrîa ûndîagîîria na agatûma mîgongo îmbathîkîra.

⁴⁹Nîwe mûntunyûkia kuuma kîrî anthû baakwa na mûmbûkîîria îgûrû rîa barîa bagûciitithia îgûrû rîaakwa nîwe ûntuunyûkagia kuuma kîrî antû barîa ngîti.

⁵⁰ Tontû bûû, ngagûkumia gatîgatî ka mîgongo gwe MWATHANI, mbine rwîmbo rwa kûgonga riîtwa rîaaku.

⁵¹Nîwe mûnaara jwa wonokio kîrî mûnene ûrîa aatuîte na mwonia mwîtûûrîrua maguta waawe kîaao Daudi na nchiarwa ciaawe kenya na kenya.”