Read KIMERU BIBLE PROTESTANT EDITION 2Sam 23 Bible Online

2Sam 23 - KIMERU BIBLE PROTESTANT EDITION bible

2Sam 23

¹Iji nîcio nteto cia mûthia cia Daudi: Daudi mûtaana wa Jesii araaria na Mûrungu, tontû nî muntû ûrîa Mûrungu aathûngûrîte. Mwîtûûrîrua maguta wa Mûrungu wa Jakubu, mwini wa ndwîmbo inthongi cia Israeli.

²“Roho wa MWATHANI nî aragia arî ndeene yaakwa; naani nî mbaragia nteto ciaawe.

³Mûrungu wa Israeli nî aarîîtie naani, we rwaara rwaakwa rwa iiga ambîrîte, ‘Rîrîa muntû aathanaga na îota kîrî antû bangî, akaathana agîkîraga Mûrungu,

⁴we abatharagîra o ta ûrîa riûa rîthaaraga rîrîa gûtî na matu, rîgatûma nyaki îriiba nyuma ya ngai yaura.’

⁵Nî mma ûu nîu Mûrungu akatharima nchiarwa ciaakwa, tontû nî eekîre kîrîkanîro na ûûni kîa gûtûûra, kîrîa gîîki bwega na gîtîkarogarûrwa. Anga tîgwe ûndetagîra kûûmbana na akoojûria jarîa mpendaga?

⁶Îndî antû barîa batiijî Mûrungu bakari ta miigua ya gûtewa nîûntû îtîûmba kûgwatîka na njara.

⁷Muntû ûreenda kumîtonga, acwaga chuuma kana mûthîrî jwa îtumo; nabo bakaîthua bathire buru.”

⁸Jaja nîjo mariîtwa ja nchamba cia ndwaaa cia Daudi: Joshebu-bashebethi kuuma Takemoni. Ûu nîwe waatongagîîria nchamba îrîa ithatû. Aagwatîre îtumo, ararwaa na antû magana janaana (800) arabooraga bonthe îgiita rîmwe.

⁹Ûrîa wamûthingatîte kîrî barîa bathatû, aarî Eleazari mûtaana wa Dodo kuuma Ahohi. Nî aarî amwe na Daudi rîrîa baregenîre na Afilisti barîa boothûranîte nîûntû bwa kûrwaa. Rîrîa antû ba Israeli bakîrîre baramatûka,

¹⁰we nî ookîrîre araambîrîîria kûûraga Afilisti mwanka njara îranoga na atîrekie rûchiû. Ntukû îîu MWATHANI nî aaeejanîre kûûmbana gûkûnene. Antû ba Israeli bacokîre kwîja kûjûkia akî into bia barîa booragi.

¹¹Wabathatû aarî Shaama, mûtaana wa Agee, kuuma Harari. Îgiita rîmwe Afilisti nî boothuranîre Lehi, antû kwaarî muunda jwaandi nchûgû na Aisraeli barabamatûka.

¹²Îndî Shama araciaanda muundeene jûu gatîgatî, arajûkaria, na arooraga Afilisti bau. MWATHANI nî aejanîre kûûmbana gûkûnene.

¹³Rîrîa Daudi atwîre gîkurunguune kîa Adulamu na Afilisti barîa beejîte kwithûka baarî kîguuruune kîa Refaimu, antû bathatû kîrî atongeeria mîrongo îthatû ba njûûrî cia Israeli nî beetîre kûraitha Daudi kîambîrîriene kîa îgiita rîa maketha.

¹⁴Daudi îgiiteene rîu aarî gitiiroone; nacio mbûûtû cia Afilisti ciaarî Bethlehemu.

¹⁵Daudi arairîrîîria kwona Bethlehemu arauga, “Wûi nkëeja kwona muntû wa gûnkuundia rûûjî kuuma kîthimeene kîrîa kîrî rûteere rwa mpingîro ya Bethlehemu!”

¹⁶Rîu nchamba iu cio ithatû cia njûûrî cia Israeli irakûrûka kambîîne ya Afilisti, barataa rûûjî kîthimeene kîa Bethlehemu kîrîa kîaarî akuî na mpingîro baraikîria Daudi. Îndî Daudi ararega kûnyua rûûjî rûu ararwîtûûra nthî rûkari ta kîgongwana kîrî MWATHANI.

¹⁷Arauga atîrî, “MWATHANI gûtîûmbîka nyua rûûjî rûrû tontû nî ûmwe na kûnyua tharike ya antû baba bareekererie mîoyo yaao nîkenda barûtaa.” Tontû bûû, ataarûnyuîre. Jau nîjo jaarî mathithio ja nchamba iu cio ithatû.

¹⁸Abishai mûtaana wa ng'ina wa Joabu ûrîa waarî mûtaana wa Zeruia, nîwe waarî mûtongeeria wa nchamba “mîrongo îthatû” (30). Nawe ooragîre antû magana jathatû (300) na îtumo, aratûma riîtwa rîaawe rîgea îgweta gatîgatî ga nchamba iu “mîrongo îthatû.”

¹⁹Nîwe waarî na îgweta nkûrûki ya bau “mîrongo îthatû” na nîwe waeere mûtongeeria waao, îndî ataarî na îgweta ta rîa “nchamba irîa ithatû,” tacio Joshebu-bashebethi, Eleazari na Shama.

²⁰Nî kwaarî na nchamba îngî yeetagwa Benaia mûtaana wa Jehoiada kuuma Kabuzeeli na nî aathithîtie mathithio jamanene ja kwonania ûchamba. Nî ooragîte nthaka ijîîrî cia kuuma Moabu, na ntukû îmwe nkamia îkîgûjaga aatonyere gîkurunguune arooraga ngatûnyi.

²¹Ningî nî ooragîre mûthaka ûmûnene wa kuuma Misri. Mûthaka ûu nî agwete îtumo îndî Banaia areeta kîrî we agwete nchûgûma, aramûtuunya îtumo aramûûraga narîo.

²²Benaia nîwe wathithîrie mathithio jau ja ûchamba aratûma riîtwa rîaawe rîgea îgweta gatîgatî ka “nchamba irîa mîrongo îthatû.”

²³Aragîa îgweta mono gatîgatîîne ka “nchamba iu mîrongo îthatû,” îndî tî ta rîa nchamba irîa ithatû. Rîu Daudi aramweethia mûrûngamîîri wa asikarî barîa bamûkaragia.

²⁴Kîrî barîa Mîrongo Îthatû kwaarî na Asaheli mûtaana wa ng'ina wa Joabu, na Elihanani mûtaana wa Dodo kuuma Bethlehemu,

²⁵na Shaama kuuma Harodi, na Elika kuuma Harodi,

²⁶na Helezi kuuma Paleti, na Ira mûtaana wa Ikeshi kuuma Tekoa, na

²⁷Abiezeri kuuma Anathothi, na Mebunai kuuma Husha,

²⁸na Zalimoni kuuma Ahohi, na Maharai kuuma Netofa,

²⁹na Helebu mûtaana wa Baanaha kuuma Netofa, Itai mûtaana wa Ribai kuuma Gibea ya Benjamini,

³⁰na Benaia kuuma Pirathoni, na Hidai kuuma kîgwanthîîne kîrîa kîrî akuî na Gaashi,

³¹Abi-aliboni kuuma Aribathi, Azimavethi kuuma Bahurimu,

³²Eliaba kuuma Shaaliboni. Ataana ba Jasheni: Jonathani mûtaana wa

³³Shaama kuuma Harari, Ahiamu mûtaana wa Sharari kuuma Harari,

³⁴Elifeleti mûtaana wa Ahasibai kuuma Maaka, Eliamu mûtaana wa Ahithofeli kuuma Gilo,

³⁵Heziro kuuma Karimeli, Paarai kuuma Ariba,

³⁶Igali mûtaana wa Nathani kuuma Zoba, Bani kuuma Gadi,

³⁷Zeleki kuuma Amoni, Naharai kuuma Beerothi, ûrîa wakamataga mathaga ja ndwaa ja Joabu mûtaana wa Zeruia,

³⁸Ira kuuma Ithira, Garebi kuuma Ithira,

³⁹Uria kuuma Hiti. Bonthe baarî mîrongo îthatû na mûgwanja.