Read KIMERU BIBLE PROTESTANT EDITION 2Sam 3 Bible Online

2Sam 3 - KIMERU BIBLE PROTESTANT EDITION bible

2Sam 3

¹Ndwaa îreeta na mbere gatîgatî ka antû ba mûciî jwa Saûlû na antû mûciî jwa Daudi. Daudi areeta na mbere kûgîa inya anthû baawe nabo bareeta mbere kwaga inya.

²Ataana barîa Daudi agîîre nabo arî Heburoni nî baba: Amunoni, mûtaana wa kîraanga ûrîa ng'ina aarî Ahinoamu kuuma Jezereeli.

³Wa baîrî aarî Kileabu ûrîa ng'ina aarî Abigaili, ntigwa ya Nabali kuuma Karimeli. Wa bathatû aarî Abusalomu ûrîa ng'ina aarî Maaka, mwarî wa Talimai mûnene wa Geshuri.

⁴Wa bana aarî Adonija ûrîa ng'ina aarî Hagithi. Wa bataano aarî Shefatia, ûrîa ng'ina aarî Abitali.

⁵Wa bataantatû aarî Ithireamu, ûrîa ng'ina aarî Egila. Daudi agîîre na ataana bau bonthe arî Heburoni.

⁶Ndwaa rîrîa yetîte na mbere gatîgatî ka antû ba mûciî jwa Saûlû na antû ba mûciî jwa Daudi, Abuneri nawe areeta na mbere kûgîa inya kîrî antû ba mûciî jwa Saûlû.

⁷Saûlû nî aarî na mûka wa gwîka weetawa Rizipa, mwarî wa Aia. Ntukû îmwe Ishiboshethi, mûtaana wa Saûlû arooria Abuneri atîrî, “Nîkî tontû ûrathengereere mûka wa gwîka wa baaba?”

⁸Abuneri arathûûra mono akwigua nteto iu aramwîra, “Ka ndî kurû ya Juda? Ntwîre nkîathîkagîra antû ba nja ya abaagu Saûlû, ataana ba ng'ina na acoore baawe. Gûtî rîo ndarekeeria bûûmbwa nî Daudi. Amwe na bûu nî ûkûmbuna mûtî nîûntû bwa mûka!

⁹ Nandî MWATHANI aronthithîria bûbûûî, na mono nkûrûki ndîkwîja kûremwa kûgwatia Daudi kûûjûria jarîa MWATHANI amûciîtîîrie,

¹⁰atî akajûkia ûnene kuuma kîrî nja ya Saûlû na aethie Daudi mûnene wa antû ba Israeli na Juda, kuuma Dani mwanka Beerisheba.”

¹¹Ishiboshethi araaga bwa gûcokeria Abuneri tontû nî aamûkîrîte mono.

¹²Abuneri aratûmana kîrî Daudi akiugaga atîrî, “Nthîgûrû îîjî nî yaaû? Twîîke wîrane naani ngwatanîre nawe ûjûkie Israeli yonthe îkare waathaniine bwaaku.”

¹³Daudi aracokia atîrî, “Nî bwega, ngeeka kîrîkanîro naagwe, îndî nî nkwenda ûthithia ûntû bûmwe; nabu nî atî ûkámbona ûtîambîte kûreeta Mikali, mwarî wa Saûlû ûkîîja kûmbona.”

¹⁴ Daudi aracoka aratûmana kîrî Ishiboshethi mûtaana wa Saûlû akiugaga, “Ncokeria mwekûrû waakwa Mikali tontû nî ndooragîre Afilisti îgana nîkenda mûgûra.”

¹⁵Rîu Ishiboshethi arajûkia Mikali aramûtuunyana kuuma kîrî mûkûrû waawe, Palitieli, mûtaana wa Laishi.

¹⁶Îndî mûkûrû ûu waawe areetania na Mikali akîrîraga mwanka ntûûra ya Bahurimu. Rîu Abuneri aramwîra, “Coka.” Nawe aracoka.

¹⁷Abuneri areeta araaria na atongeeria ba Israeli arabeera atîrî, “Nî bûkarîte bûkîendaga Daudi aa mûnene weenu.

¹⁸Nandî kagiita gagûkinya, tontû MWATHANI nî aarîîkanîtie na Daudi amwîra, ‘Ngatumîra nthûûmba yaakwa Daudi nîkenda mbonokia Israeli antû baakwa kuuma kîrî Afilisti na kuuma kîrî anthû baao bangî bonthe.’”

¹⁹Abuneri aracoka araarîria antû ba mwîrîga jwa Benjamini. Rîu areeta Heburoni kîrî Daudi kûmwîra ûrîa antû bonthe ba Israeli na ba Benjamini booneete nî bwega bathithia.

²⁰Rîrîa Abuneri eetîre Heburoni na gîkundi kîa antû mîrongo îîrî, Daudi arathuranîra kîatho nîûntû bwaao.

²¹Abuneri aramwîra, “Kambûkîîre mbîte, mbûthûranie antû ba Israeli bonthe bathingate mwathi waakwa mûnene, nîkenda beeka kîrîkanîro naagwe, na nîkenda naagwe waathana kunthe o narîa ûkwenda.” Nîu Daudi ararekeeria Abuneri nawe araciîtîra na ûkiri.

²²Kagiita o kau Joabu na nthûûmba ingî cia Daudi nî baacokere baumîte kwithûka barî na into bibingî mono birîa baataîte. Abuneri nawe ataarî amwe na Daudi Heburoni rîu tontû nî aarî akûmûrekeeria aciîtîra na thîîrî.

²³Rîrîa Joabu na njûûrî yonthe îrîa aarî nayo aakinyîre, Joabu nî eerîrwe, “Abuneri mûtaana wa Neri nî akwîjîte kîrî mûnene na mûnene akûmûrekeeria eeta na thîîrî.”

²⁴Rîu Joabu areeta kîrî mûnene aramûûria, “Nîatîa ûthithîrie? Nîkî tontû ûrekererie Abuneri eeta o rîrîa eejîre kîrî gwe?

²⁵Ka ûtîkûmenya Abuneri eejîre nîkenda akwaîria amenya jarîa jonthe ûkûthithia; ûkiumagara na ûgîcoka?”

²⁶Joabu aaumagarîre kuuma kîrî Daudi aratûma antû barathingatia Abuneri baramûcokeria kîthimeene gîa Sira. Îndî Daudi ataamenyaga mantû jau.

²⁷Rîrîa Abuneri aakinyîre Heburoni, Joabu arakara ta amwikîîtie nkireba gateere mpingîroone, aramûmuntîra kîu o arakua, na ararîyia ûu tharike ya mûtaana wa ng'ina Asaheli.

²⁸Nyumeene rîrîa Daudi aigîrue mantû ja gîkuû kîa Abuneri arauga, “Ûûni amwe na antû barîa mbathaga, tûtîkwigua tûthûûkîtie mbere ya MWATHANI, nîûntû bwa kûûragwa kwa Abuneri mûtaana wa Neri.

²⁹Tharike îîu îrocokera Joabu na îgacokera nja ya îthe. Ndene ya nthukî cionthe nja ya Joabu îkoroaga muntû ûrî na gîconono kana mûtigiri, kana wagîîte inya, kana ooragîri ndweene kana wagîîte biakûrîa bia kûng'ana.”

³⁰Nîu Joabu na mûtaana wa ng'ina Abishai barooraga Abuneri kwirîîria tharike ya mûtaana wa ng'ina, Asaheli, ûrîa wooragîîrwe ndweene ya Gibeoni.

³¹Rîu Daudi areera Joabu na antû bonthe barîa aarî nabo atîrî, “Tambûranga nguû ciaaku wîkîre mathango withikîîre nîûntû bwa Abuneri.” Daudi nawe arathingata barîa bakamatîte mwîrî.

³²Abuneri arathikwa Heburoni, nawe mûnene arookia kajû ararîra nîûntû bwa Abuneri, na antû bonthe bararîra amwe nawe, barî aû kaburiine.

³³Mûnene Daudi ararîrîra Abuneri akiugaga, “Nîkî tontû Abuneri arakuîre ta kîaa?

³⁴Njara ciaawe itîraogi kana magûrû jaawe. Arakuîre ta muntû ooragi nî amaramari!” Antû bonthe baramûrîrîra kaîrî.

³⁵Antû barageria kwîra Daudi arûme gantû mûthenya jûnthe, îndî ararega akiugaga, “MWATHANI aronthithîria bûbûûî, nkëeja kûrûma gantû gûtîratuka!”

³⁶Antû baramenya ûntû bûu na bûrabagwîria, o ta ûrîa mantû jonthe jarîa aathithagia jaabagwîragia.

³⁷Antû bonthe ba Israeli ntukû îîu baramenya atî tî wendo bwa mûnene Daudi, Abuneri, mûtaana wa Neri ooragwa.

³⁸Mûnene areera atongeeria baawe atîrî, “Ka bûtîkûmenya mûtongeeria wa bata nî akuîte Israeli naarua?

³⁹Kinya këethîra nî ni mûnene ûrîa ûthuuri nî MWATHANI, ntî na inya naarua, ataana baba ba Zeruia nî bagûnkîria inya. MWATHANI arokanûkia amaramari baba o ta ûrîa ûmaramari bwaao bûkari!”