Read KIMERU BIBLE PROTESTANT EDITION 2Sam 6 Bible Online

2Sam 6 - KIMERU BIBLE PROTESTANT EDITION bible

2Sam 6

¹Kûrakara atîrî, Daudi o kaîrî aroothûrania asikarî barîa beega ndeene ya Israeli, asikarî ngiri mîrongo îthatû (30,000).

² Arabatongeeria mwanka Baala ndeene ya Juda nîkenda bajûkia Îthandûkû rîa kîrîkanîro kîa Mûrungu, rîrîa rîgwetanagîrua na riîtwa rîa MWATHANI Mweneinya, ûrîa ûkaraga ûneneene bwaawe gatîgatî ka kerubimu.

³ Bararîjûkia kuuma nja ya Abinadabu îrîa yaarî karîmeene, bararîka ngaarîîne înjerû ya ng'ombe. Uzza na Ahio, ataana ba Abinadabu, bareetithia ngaarî îîu ya ng'ombe.

⁴Ahio arîtongeeretie arî mbere.

⁵Daudi nawe amwe na antû ba Israeli bathingatîte barî nyuma bakîthûngûthaga na kwina ndwîmbo na inya yaao yonthe. Bainaga bakîringaga wandîîndî na inanda bia kînubi, na tamburini na ntuara na thaani cia kûringithania.

⁶Rîrîa baakinyîre îtîîriine rîa Nakoni, ng'ombe iragitara. Uzza aratambûrûkia njara aragwata Îthandûkû rîa kîrîkanîro.

⁷MWATHANI araakana nî mûthûûro nîûntû bwa ûrîa Uzza athithia, aramûûragîra o au. Uzza arakuîra rûteere rwa Îthandûkû rîa kîrîkanîro.

⁸Daudi araigua bûbûûî nîûntû bwa ûrîa MWATHANI akanûkia Uzza. Antû au kûreetwa Perezi-uza[3] mwanka naarua îîjî.

⁹Rîu Daudi aramaka nîûntû bwa MWATHANI mono araciûria, “Nîatîa mpûûmbîkia kwîthîrwa nî ni wa gwikia Îthandûkû rîa kîrîkanîro kîa Mûrungu gwaakwa?”

¹⁰Tontû bûû, Daudi ateendere gwiikia Îthandûkû rîa kîrîkanîro ntûûreene ya Jerusalemu. Aragarûka arariikia nja ya Obediedomu mûtûûri wa ntûûra ya Gathi.

¹¹ Narîo Îthandûkû rîa kîrîkanîro rîrakara nja ya Obediedomu mîeri îthatû. MWATHANI aratharima Obediedomu na nja yaawe.

¹²Daudi akwigua atî “Obediedomu na nja yaawe yonthe nî îtharimi mono nî MWATHANI nîûntû bwa Îthandûkû rîa kîrîkanîro,” areeta ararîgîîra kuuma kwa Obediedomu arariikia Jerusalemu barî na kûgwîrua gûkwingî.

¹³Rîrîa barîa bakamatîte Îthandûkû rîu rîa kîrîkanîro bagwîta narîo antû a makinya jatantatû, Daudi araritîra MWATHANI kîgongwana kîa ndeegwa na njaû înoru.

¹⁴Daudi arainîra MWATHANI akîthûngûthaga na inya yaawe yonthe, eekîrîte nguû întheru ya efodi.

¹⁵Tontû bûû, Daudi amwe na antû bonthe bararikia ntûûreene ya Jerusalemu bagîkûngûagîra na bakîriingaga tarumbeta.

¹⁶O rîrîa Îthandûkû rîa kîrîkanîro rîakûrûkagua ntûûreene ya Jerusalemu Mikali mwarî wa Saûlû, araraithîîria ndiricheene aroona Daudi akîthûngûthaga na kwina mbere ya MWATHANI. Nawe aramûmeneeria nkoroone yaawe.

¹⁷Baraikia Îthandûkû rîu rîa kîrîkanîro bararîîka ndeene ya îema rîrîa Daudi aarî agwaka. Rîu Daudi ararita igongwana bia gwakîîria na bia thîîrî kîrî MWATHANI.

¹⁸14 Daudi akûthiria kûrita igongwana biu, aratharima antû riîtweene rîa MWATHANI Mweneinya,

¹⁹ Ningî aragaîra antû ba Israeli bonthe, aka na arûme biakûrîa bia mûgaate, kînuku kîa nyama, na keki îrugi na nzabibû injûmo. Rîu antû bonthe baraana.

²⁰Nyumeene Daudi agwîta kûtharima nja yaawe, Mikali, mwarî wa Saûlû, araumagara kûmûthagaana aramwîra atîrî, “Mûnene wa Israeli agwicûîra riîtwa rîa îgweta mono naarua! Tontû akûritîte nguû akîonagwa nî nthûûmba ciaawe cia aarî ta muntû kîaa mwagi nthoni.”

²¹Daudi aramûcokeria atîrî, “Nkwinagîra MWATHANI ûrîa wanthuurîre antû a abaagu na nja yaawe, arampeethia mûtongeeria wa antû baawe Israeli. Ngeeta na mbere kûgwîrua ndî mbere ya MWATHANI.

²²Naani o kaîrî ngaciethia ta muntû ûtî na îgweta, meethoone jaaku nkare ta muntû wa ûtheri, îndî mbere ya nthûûmba cia aarî bau, mbîthîrwe ndî na îgweta mono.”

²³Mwanka ntukû îrîa aakuîre, Mikali mwarî wa Saûlû ataarî na mwana.