Read KIMERU BIBLE PROTESTANT EDITION 2Sam 7 Bible Online

2Sam 7 - KIMERU BIBLE PROTESTANT EDITION bible

2Sam 7

¹Naku nî gwaakarîre atîrî, mûnene nî aikarîîre nja yaawe, na MWATHANI aramwaa thîîrî kuumania na anthû baawe bonthe.

²Rîu areera kîroria Nathani atîrî, “Ûûni nkarîte nyomba yaakwa îrîa yaaki na mîtarakwa, îndî Îthandûkû rîa kîrîkanîro kîa Mûrungu rîkarîte îemeene.”

³Nathani aracokeria mûnene atîrî, “Îta ûthithie jarîa jonthe ûrî na jo nkoroone tontû MWATHANI arî amwe naagwe.”

⁴Îndî ûtukû bûu bungwa rûteto rwa MWATHANI nî rweejîrîîre Nathani atîrî,

⁵“Îta wîîre nthûûmba yaakwa Daudi atî MWATHANI ariuga ûjû: Ûûgwe waambakîra nyomba ya gûtûûraga?

⁶Ntatûûra nyomba îmbake kuuma rîrîa ndaritîre antû ba Israeli kuuma Misri mwanka naarua îîjî. Ntûûraga gwîta ndî îemeene.

⁷Ndene ya rîrîa nkarîte mbîtanîtie na antû baakwa ba Israeli kûrî mûtongeeria ndooria ‘Nîkî tontû batambakîra nyomba ya mîtarakwa?’

⁸“Nandî ûjû nîu ûkeera nthûûmba yaakwa Daudi, ‘atî MWATHANI Mweneinya auga, Ndakûritîre ngûgîîne yaaku ya kûrîîthia ng'ondu, nîkenda waa mûtongeeria wa antû baakwa Israeli.

⁹Naani nî nkaranîtie naagwe o gûntû kunthe kûrîa wîtaga, na nî nthirîtie anthû baaku bonthe barîa beejaga kûrwaa naagwe. Ngeekîra riîtwa rîaaku îgweta ta antû bangî barîa barî îgweta nthîgûrûûne îîjî.

¹⁰Ningî nkaeejana gîtûûro arîa antû baakwa Israeli bagatûûra, mbaande o, na batûûre batîkûthangîkua kaîrî. Antû barîa athûûku batîbanyamaaria kaîrî ta ûrîa barabathithagîria,

¹¹kuuma rîrîa ndathuurîre agambi batongeeria antû baakwa Israeli. Nkaeejana anthû bangî bonthe kîrî buî. Amwe na jau, MWATHANI agatûûria ûnene bwa nja yaaku.

¹² Rîrîa ûkamama narîa biûjûjû bieenu bimami, ngokîîria mwana ûmwe waaku mweethie mûnene na ndikie ûnene bwaawe.

¹³Nîwe ûgaaka kîûrû nîûntû bwaakwa, naani ngatûûria ûnene bwaawe kenya na kenya.

¹⁴ Nkaa îthe nawe akaa mwana waakwa. Rîrîa akathûûkia nkamûkanûkia ta ûrîa mûkûrû akanûkagia mûtaana waawe.

¹⁵Îndî kîaao gîaakwa gîtîmwîrûkîra ta ûrîa kîenîkîre Saûlû mbere ya waa mûnene.

¹⁶ Naagwe nchiarwa ciaaku igatûûria ûnene bwaaku kenya na kenya na bûtîkorothira.’”

¹⁷Nathani areera Daudi mantû jonthe jarîa MWATHANI aamûguûrîrîte.

¹⁸Daudi areeta îemeene mbere ya MWATHANI, araromba akiugaga, “Ûûni MWATHANI ndî mbi meethoone jaaku na kinya antû ba nja yaakwa nî bau, tontû ûntongeeretie mwanka nandî wantharima?

¹⁹Amwe na bûu nandî ûthithîtie bûbûnene nkûrûki MWATHANI tontû ûkûmbîîkîra mîciîtio ya ntukû irîa ikeeja tontû bwa nchiarwa ciaakwa. Weega ta bûu nî nkûrûki ya wîrîgîîro bwa antû, Îgwe MWATHANI!

²⁰Gûtî bu ndî na bu bwa gûkwîra nkûrûki tontû gwe MWATHANI nî ûmbijî bwega ni nthûûmba yaaku.

²¹Tontû bwa mantû jau waciîtia kîrî ni na ûntû bwa wendo bwaaku, ûkûnditana.

²²Nîkîo tontû ûrî ûmûnene MWATHANI Mûrungu! Gûtî ûngî ûkari ta gwe. Ningî gûtî Mûrungu ûngî tiga gwe, o ta ûrîa tûtwîre kwigua.

²³ Nthîgûrûûne yonthe gûtî antû boomba kûng'uananua na Aisraeli barîa Mûrungu waao oonokerie kuuma ûkomboone nîkenda baa antû baaku. Rîu naagwe ûraithithîria riîtwa rîragîa îgweta na njîra ya kûthithia mantû jamanene ja kûmakania; ûreenga anthû baao na mîrungu yaao.

²⁴Nî ûrikithîtie Israeli baa antû baaku, naagwe waa MWATHANI Mûrungu waao mwanka kenya.

²⁵“Nandî, gwe MWATHANI Mûrungu, ûroojûria mîciîtio îrîa wanciîtîria ni nthûûmba yaaku na nchiarwa cia nja yaakwa igatûûra mwanka kenya.

²⁶Nayo nkuma yaaku îkaigîîgua rîrîa antû bakauga ‘MWATHANI Mûrungu Mweneinya nîwe Mûrungu wa Israeli, na agatûûria waathani bwa nja ya Daudi mwanka kenya.’

²⁷Gwe MWATHANI Mweneinya Mûrungu wa Israeli ndî na ûchamba bwa kûromba nîûntû nî ûguûrîrîte nthûûmba yaaku mantû jaja ûkiugaga, ‘Ngatûûria waathani bwa antû ba nja yaaku.’

²⁸“Nandî, gwe MWATHANI Mûrungu Mweneinya, nî wîkaga wîrane na tontû bwa mîciîtio yaaku kîrî ni;

²⁹ndakûromba ûtharime nchiarwa cia nja yaakwa, nîkenda waathani bwaayo bûgatûûra mwanka kenya na kenya. MWATHANI itharimo bia mîciîtio yaaku birotûûra kîrî nchiarwa cia nja yaakwa mwanka kenya.”