Read KIMERU BIBLE PROTESTANT EDITION 2Sam 8 Bible Online

2Sam 8 - KIMERU BIBLE PROTESTANT EDITION bible

2Sam 8

¹Nyuma ya kagiita, Daudi araithûkîra Afilisti kaîrî, araboomba na arabatuunya ntûûra ya Methegama.

²Aracoka araûûra antû ba Moabu, araboomba. Arabeera bamame nthî barî mûstarî, nawe arooraga antû baîrî kîrî o bathatû, na aratigaria muntû ûmwe kîrî o bathatû. Rîu Amoabu baraa nkombo cia Daudi baratua kûretaga ûgoti kîrî we.

³Aracoka araûûra Hadadezeri, mûtaana wa Rehobu, ûrîa waarî mûnene wa Zoba. Hadadezeri eetîte kwithûkîra na gûtaa nthîgûrû îrîa yaarî rûteere rwa mûuro jwa Eufurate.

⁴Daudi aragwata na kûmûtuunya asikarî ngiri îmwe na magana mûgwanja (1,700) eetithia ba mbarathi, na bangî ngiri mîrongo îîrî (20,000) barîa beetaga na magûrû. Agûtigaria mbarathi cia gwîtithia ngaarî îgana (100), arakûranga ingî cionthe magûrû.

⁵Rîrîa antû ba Sîria kuuma Damaski beetîre gûteethia Hadadezeri, Daudi arooraga antû ngiri mîrongo îîrî na ijîîrî (22,000).

⁶Rîu Daudi areeka atongeeria baawe ndeene ya Damaski na antû bau ba Sîria baraa nkombo ciaawe baratua kûritaga ûgoti. MWATHANI araa Daudi ûûmbani kunthe kûrîa eetaga.

⁷Daudi arajûkia rong'o cia thaabu irîa ciaarî ikûjûkua nî antû ba Hadadezeri, aracireeta Jerusalemu.

⁸Aracoka arajûkia îturutia rîringî mono kuuma ntûûreene irîa ciathagwa nî Hadadezeri cia Beta na Berothai.

⁹Rîrîa mûnene Toi wa Hamathi aaigîrue atî Daudi akûûmba njûûrî ya Hadadezeri,

¹⁰Toi aratûma Joramu mûtaana waawe kîrî Daudi nîkenda amûkeethia na amwîra nî bwega nîûntû bwa kûûmbana. Magiita jamaingî, Hadadezeri nî arûjaga na Toi. Joramu araretera Daudi biewa bia thaabu na fetha na îturutia.

¹¹Mûnene Daudi araathûrîra MWATHANI biewa biu areeteerwe nî Joramu na thaabu na fetha îrîa ajûkîîtie kuuma kîrî nthîgûrû irîa aacindîte,

¹²ta Edomu na Moabu na Amoni na Afilisti na Amaleki, na kinya birîa ajûkîîtie kuuma kîrî Hadadezeri.

¹³ Daudi aragîa îgweta mono nkûrûki aakûûraga Aedomu ngiri îkûmi na inyanya (18,000) kîguuruune kîa chumbî.

¹⁴Nawe arathuura atongeeria baawe baathana Edomu. Tontû bûû, antû ba Edomu baraa nkombo ciaawe. Gûntû kunthe kûrîa Daudi eetaga MWATHANI nî aamweejaga ûûmbani.

¹⁵Daudi nî aathanîre Israeli yonthe na kûratwîka atî nî aagiitagîra antû baawe bonthe magamba ûrîa kwaagîrîte.

¹⁶Joabu mûtaana wa Zeruia nîwe waarî mûtongeeria wa njûûrî, nawe Jehoshafati mûtaana wa Ahiludi aarî mwîki mantû.

¹⁷Zadoki mûtaana wa Ahitubu na Ahimeleki mûtaana wa Abiathari baarî athînjîri-Mûrungu. Seraia aarî karani.

¹⁸Banaia mûtaana wa Jehoiada aarî mûrûngamîîri wa akaria ba mûnene; Akerethi na Apelethi. Ataana ba Daudi nabo baarî athînjîri-Mûrungu.