Read KIMERU BIBLE PROTESTANT EDITION 2Sam 9 Bible Online

2Sam 9 - KIMERU BIBLE PROTESTANT EDITION bible

2Sam 9

¹ Ntukû îmwe Daudi arooria atîrî, “Kûrî muntû nja ya Saûlû no ûmwe ûtigarîte, mpûûmba kûthithîria bwega nîûntû bwa Jonathani?”

²Naku nî kwaarî na muntû weetagwa Ziba nthûûmba ya nja ya Saûlû. Bakûmwîta Daudi aramûûria atîrî, “Nîgwe Ziba?” Nawe aracokia, “Îî nî ni.”

³ Mûnene aramûûria, “Gûtî muntû ûngî wa mûciî jwa Saûlû mpûûmbîkia kûthithîria bwega ta ûrîa nciîtîrîtie Mûrungu?” Ziba aramwîra, “Kûrî ûngî ûmwe woonjete magûrû na nî mûtaana wa Jonathani.”

⁴Daudi aramûûria, “Arî kû we?” Ziba aramûcokeria, “Arî nja ya Makiri mûtaana wa Amieli ndeene ya Lodebari.”

⁵Rîu Daudi aramûtûmanîra.

⁶Rîrîa Mefiboshethi mûtaana wa Jonathani na jûûjû wa Saûlû aakinyîre, araigwîthia nthî kwonania gîtîîo kîa Daudi. Daudi aramwîta, “Mefiboshethi,” nawe areetîka, “Ndî ûthûmbeene bwaaku mûnene.”

⁷Daudi areeta na mbere kûmwîra, “Ûgákîra tontû ngakûthithîria bwega nîûntû bwa abaagu Jonathani. Ngakûnenkera nthî yonthe îrîa yaarî ya ûjûûgu Saûlû, na ûkarîjagîra meetheene yaakwa magiita jonthe.”

⁸Mefiboshethi araigwîthia nthî kwonania kwinyiyia kwaawe arauga, “Ûûni ndî ûû nthûûmba yaaku nîkenda ûmenyeera na nîbu nkari ta kurû înkuû?”

⁹Rîu Daudi areeta Ziba, ûrîa waarî nthûûmba ya Saûlû, aramwîra atîrî, “Nkûnenkera Mefiboshethi mwana wa mûtaana wa Saûlû into birîa bionthe biaarî bia Saûlû mwathi waaku.

¹⁰Naagwe amwe na ataana baaku na nthûûmba ciaaku bûkamûrîmîra miuunda ya nja ya Saûlû. Bûretage maketha nîkenda boonage irio biakûrîa. Îndî Mefiboshethi akarîjaga meetheene yaakwa magiita jonthe.”

¹¹Rîu Ziba aramûcokeria atîrî, “Jonthe jarîa mûnene auga, ni nthûûmba yaaku nkathithia.” Kuuma rîu Mefiboshethi aarîjaga kwa mûnene o ta ûmwe wa aana ba mûnene.

¹²Mefiboshethi nawe nî aarî na mûtaana ûmûnini weetagwa Mika. Nabo antû bonthe barîa batûûraga nja ya Ziba baraa nthûûmba cia Mefiboshethi.

¹³Tontû bûû, Mefiboshethi ûrîa woonji magûrû jo-jaîrî aratûûra Jerusalemu, akîrîjaga irio meetheene ya mûnene.