Read KIMERU BIBLE PROTESTANT EDITION 1Ane 1 Bible Online

1Ane 1 - KIMERU BIBLE PROTESTANT EDITION bible

1Ane 1

¹Mûnene Daudi nî aarî agûkûra mono. Kinya këethîra nthûûmba ciaawe nî ciamûguîkagîra na nguû ataigagua mûruutîra.

²Tontû bûû, nthûûmba ciaawe iramwîra atîrî, “Nî kaaba tûgûcwîre mwarî akarage amwe naagwe na akûmenyagîîre. Nawe akamamaga ûrûrî bûmwe naagwe, akûruutagîîrie.”

³Nîu bareeta bagîcwaga mwarî ûrîa mûthongi buru nthîgûrûûne ya Israeli yonthe. Nabo baroona Abishagi kuuma ntûûra ya Shunami baramwikia kîrî mûnene.

⁴Mwarî ûu waarî ûmûthongi mono, na nî aaere mûmenyeeri wa mûnene, na aramûtumîkîra îndî mûnene ataamûthengeera.

⁵ Nîkwîthîrwa îgiita rîu Abusalomu mûtaana wa ng'ina ûrîa mûkûrû nî aarî agûkua, Adonija mûtaana wa Daudi ûrîa aaciere na Hagithi, nîwe waarî ûmûkûrû kîrî ataana ba îthe. Nawe aarî muntû ûmûthongi mono.

⁶Ningî kinya këethîra nî aacimbaimbagia akiugaga nî akwenda kwaa mûnene, îthe ataanoganagia nawe. Nîu araciûthûranîria ngaarî cia ndwaa na mbarathi na asikarî mîrongo îtaano ba gwîtanagia nawe.

⁷Adonija nî aarîrie na Joabu (ûrîa ng'ina aarî Zeruia) na Abiathari mûthînjîri-Mûrungu, nabo baramûgwata mbaru.

⁸Îndî Zadoki mûthînjîri-Mûrungu, na Benaia mûtaana wa Jehoiada, na kîroria Nathani, na Shimei, na Rei na nchamba cia ndwaa cia Daudi bataagwata Adonija mbaru.

⁹Adonija nî aaritîre kîgongwana kîa ng'ondu, na ndeegwa inkai na njaû înoru, antû agwîtwa Iiga rîa Njoka rîrîa rîrî akuî na kathima ka Enirogeli. Nî eetîte ataana ba ng'ina bonthe tabo ataana ba mûnene na atongeeria ba mûnene bonthe kuuma Juda.

¹⁰Îndî ateetîte kîroria Nathani kana Benaia, kana akaria ba mûnene, kana mûtaana wa ng'ina Solomoni.

¹¹ Nathani nî oorîrie Bathisheba, ng'ina wa Solomoni atîrî, “Ningî ûkwigua atî Adonija mûtaana wa Hagithi agûcieethia mûnene na mûnene Daudi atîkûmenya?

¹²Rîu rî, njû nkwee kîrîra, kenda ûcionokia na woonokia mwoyo jwa mûtaana waaku Solomoni.

¹³Îta o nandî kîrî mûnene Daudi ûmwîre, ‘Uga mwathi waakwa mûnene ûtaanciîtîîrie ni nthûûmba yaaku ya mûka ûrambîîra atî, Mûtaana waakwa Solomoni nîwe ûkaathana nyuma yaaku, na nîwe ûgakarîra rûriga rwaaku rwa ûnene? Nîkî îndî nandî tontû Adonija arî mûnene?’

¹⁴Naagwe ûkîaragia na mûnene o ûu, ûûni nkeeja ntonye na ndikithie nteto ciaaku.”

¹⁵Tontû bûû, Bathisheba areeta arakûrûka kanyomba karîa mûnene aamamaga. Daudi nî aarî agûkûra mono na Abishagi kuuma ntûûra ya Shunami nîwe wamûtumîkagîra.

¹⁶Bathisheba areenamîîria nthî mbere ya mûnene. Mûnene, aramûûria atîrî, “Nîmbi ûkwenda?”

¹⁷Bathisheba aramwîra atîrî, “Mwathi waakwa, nî wanciîtîrie riîtweene rîa MWATHANI Mûrungu waaku ûrambîîra atî, Solomoni mûtaana waakwa akaathana nyuma yaaku, na agakarîra rûriga rwaaku rwa ûnene.

¹⁸Nandî rî, Adonija nî mûnene, kinya këethîra gwe, mwathi waakwa ûtiijî mantû jau.

¹⁹Adonija nî athirîtie kûrita igongwana bia ndeegwa, na njaû înoru, na ng'ondu inyiingî. Ningî nî athirîtie gwîta ataana ba mûnene bonthe na mûthînjîri-Mûrungu Abiathari na Joabu mûtongeeria wa njûûrî cia asikarî, îndî ateeta mûtaana waaku Solomoni.

²⁰Rîu rî, mwathi waakwa, antû bonthe ba Israeli nîgwe beetereete ûbeera ûrîa ûgakûrîa ûkua aee mûnene.

²¹Warega kûbeera, rîrîa ûgaakua, ni na mûtaana waakwa Solomoni, tûkathangîkua ta antû babathûûku.”

²²Akîaragia o ûu na mûnene, kîroria Nathani arakinya.

²³Mûnene aramenyithua atî kîroria Nathani akwîja. Nathani aratonya na areenamîîria aratirithia ûthiû nthî arî au mbere ya mûnene.

²⁴Rîu arooria atîrî, “Îgwe Mwathi waakwa mûnene, nîgwe uugîîte Adonija nîwe ûgaakûrîa ûkua aee mûnene?

²⁵Nîkwîthîrwa naarua nî eetîre na arita igongwana bia ndeegwa, na bia njaû înoru na bia ng'ondu inyiingî. Ningî nî eetîre ataana baaku bonthe na Joabu mûtongeeria wa njûûrî cia asikarî na Abiathari mûthînjîri-Mûrungu. Nandî bo nîka bakûrîa na kûnyua barî na mûnene bagîtûmagîîria na kajû bakiugaga atîrî, ‘Ûrotûûra matukû jamaingî gwe mûnene Adonija!’

²⁶Îndî ni nthûûmba yaaku, na Zadoki mûthînjîri-Mûrungu, na Benaia mûtaana wa Jehoiada na nthûûmba yaaku Solomoni tûtîîti.

²⁷Ka mwathi waakwa ûûmba kwîthîrwa wîtîkîîrîtie ûntû bûû bûthithua, na ûtîîre nthûûmba ciaaku nûû we ûbuîrîte gûkûrîa ûkua aa mûnene?”

²⁸Mûnene Daudi aracokia arabeera atîrî, “Mbîtîreeni Bathisheba.” Bathisheba areeja ararûngama mbere ya mûnene.

²⁹Mûnene araciîtia akiugaga atîrî, “Tontû bwa MWATHANI Mûtûûra mwoyo, we ûrîa ûmbonoketie kuuma mathîînene jaakwa jonthe,

³⁰na o ta ûrîa ndagûciîtîîrie riîtweene rîa MWATHANI, Mûrungu wa Israeli ndakwîra atîrî, ‘Solomoni mûtaana waaku nîwe ûkandîa ûkua aee mûnene,’ nîu nkaathithia naarua.”

³¹Bathisheba areenamîîria na aratirithia ûthiû nthî arauga atîrî, “Mwathi waakwa Daudi arotûûra kenya na kenya!”

³²Mûnene Daudi arabeera atîrî, “Mbîtîreeni Zadoki mûthînjîri-Mûrungu, na kîroria Nathani na Benaia mûtaana wa Jehoiada.” Nabo bareeta kîrî we.

³³Mûnene arabeera atîrî, “Jûkieni nthûûmba ciaakwa na bwitithie Solomoni mûtaana waakwa mûgongo jwa nyûmbû yaakwa, na bwînamanie nawe mwanka kîthimeene kîa Gihoni.

³⁴Zadoki na Nathani bamwîtûûrîrie maguta aee mûnene wa Israeli. Rîu bûringe tarumbeta bûkiugaga atîrî, ‘Mûnene Solomoni arotûûra matukû jamaingî!’

³⁵Naabuî bwîîje bûmûthingatîte rîrîa akeeja gûkarîra rûriga rwaakwa rwa ûnene. We nîwe ûkaandîa ûkua, aee mûnene nîûntû ni nî mûthuurîte aee mûtongeeria wa Israeli na Juda.”

³⁶Benaia mûtaana wa Jehoiada areera mûnene atîrî, “Îî nîu! MWATHANI, Mûrungu waaku arorikithia ûntû bûu.

³⁷O ta ûrîa MWATHANI arakaraga arî amwe naagwe, arokaraga arî amwe na Solomoni, na atûme waathani bwaawe bûthinyaara nkûrûki ya bwaaku.”

³⁸Tontû bûû, Zadoki na Nathani na Benaia na asikarî barîa baakaragia mûnene bareeta baraitithia Solomoni mûgongo jwa nyûmbû ya mûnene Daudi na bareetania nawe mwanka kîthimeene kîa Gihoni.

³⁹Nabo bagûkinya, Zadoki, mûthînjîri-Mûrungu, arajûkia rûgoji rwa maguta kuuma îemeene rîa MWATHANI na areetûrîria Solomoni maguta. Rîu bararinga tarumbeta na antû bonthe barauga, “Mûnene Solomoni ûrotûûra matukû jamaingî.”

⁴⁰Nabo antû bonthe baraitia bamûthingatîte, bakîringaga mîtûrirû, na bakiinaga na nkerû na gûkûngûîra bagîkuuraga nkuuro irîngî inainia nthîgûrû.

⁴¹Na-rî, rîrîa Adonija na antû baawe baarî akuî kûthiria kîatho kîaao baraigua gîtuma kîu. Joabu akwigua mûgambîre jwa tarumbeta arooria atîrî, “Nkuuro iu irî ntûûreene nî cia mbi?”

⁴²Nawe atîrathira kwaria, Jonathani mûtaana wa Abiathari mûthînjîri-Mûrungu areeja. Adonija aramwîra atîrî, “Kûrûka, nîûntû ûrî muntû wa gîtûmi na ûreteete nteto injega.”

⁴³Jonathani aracokeria Adonija aramwîra atîrî, “Arî itû tî înjega, mûnene mûkaathe Daudi akweethia Solomoni mûnene.

⁴⁴Atûmîre Zadoki, na Nathani, Banaia, na asikarî barîa bamûkaragia baatûma Solomoni akamatwa nî nyûmbû yaawe.

⁴⁵Zadoki na Nathani, bamwîtûûrîria maguta barî kîthimeene kîa Gihoni, na beetania nawe kuuma Gihoni na antû bonthe nandî ka bakûmûkûngûîra ntûûreene yonthe. Iu nîcio nkuuro irîa bûkwigua.

⁴⁶Solomoni nîwe mûnene nandî.

⁴⁷O amwe na jau, nthûûmba cia mûnene Daudi nî ciîjîre kûmûgonga ikiugaga atîrî, ‘Mûrungu waaku arotûma riîtwa rîa Solomoni rîgîta îgweta nkûrûki ya rîaaku, na atûme ûnene bwaawe bûthinyaara nkûrûki ya bwaaku.’ Mûnene aratiirithia ûthiû bwaawe gîtandeene arathaathayia Mûrungu.

⁴⁸Mûnene araromba akiugaga atîrî, ‘MWATHANI Mûrungu wa Israeli arokumagua, we ûtûmîte naarua ûmwe wa nchiarwa ciaakwa akarîra rûriga rwaakwa rwa ûnene nkîonaga.’”

⁴⁹Nabo ageni ba Adonija bonthe nî baamakîre, na o muntû arookîîra, araciîtîra njîra yaawe.

⁵⁰Adonija nîûntû nî aakîraga Solomoni mono, nî eetîre îemeene rîa gûtirimanîra na MWATHANI, aragwata koona cio-inya cia kîritîro kîa igongwana.

⁵¹Solomoni nî aamenyithîrue atî Adonija nî agwete koona cio-inya cia kîritîro kîa igongwana akiugaga atîrî, “Mûnene Solomoni nî ambe anciîtîrie atî atîmbûraga.”

⁵²Solomoni arauga atîrî, “Akëeja kwonania nî muntû mwîtîkua atîringithua kinya anini, îndî akëeja kwoneka tî mwîtîkua nooka akooragwa.”

⁵³Rîu mûnene Solomoni aratûmanîra Adonija. Nawe akûreetwa kuuma kîritîroone kîa igongwana arainyiyia arî au mbere ya mûnene, nawe mûnene aramwîra, “Ciaanîre.”