Read KIMERU BIBLE PROTESTANT EDITION 1Ane 10 Bible Online

1Ane 10 - KIMERU BIBLE PROTESTANT EDITION bible

1Ane 10

¹ Rîrîa mûka-mûnene wa nthîgûrû ya Sheba aaigîrue nkuma ya Solomoni nî eetîre Jerusalemu kûmûgeria na biûria bibiûmo.

²Nawe eetanîrie na nthûûmba inyiingî na nkamîîra ciaîrîte into bia gwîkîra irio mûchemo, na thaabu inyiingî na maiga ja goro. Mûka-mûnene ûu agûkinya kîrî Solomoni, nî aamûûrîrie biûria bionthe birîa aarî nabio nkoroone.

³Solomoni nî aamûcokerie biûria biaawe bionthe na gûtî kinya kîmwe kîaamûrema.

⁴Mûka-mûnene wa Sheba nî aacigîîrue ûûme bwa Solomoni, na aracionera gîkaro kîa mûnene kîrîa aakîte.

⁵Ningî araithaîra irio birîa baamathîri na nyomba irîa ciaatûûragwa nî atongeeria ba thirikarî ya Solomoni na ûrîa ariti ngûgî ba nyomba yaawe baaritaga ngûgî na mûtaratara jûmwega na nguû irîa beekîrîte. O ûu aracionera akîîki barîa baatumîkagîra Solomoni arî na biatho na igongwana bia gwakîîria birîa aaritîre kîûrûûne. Nawe mûnene ûu wa Sheba akwona mantû jau jonthe araama na aragega.

⁶Nawe areera Solomoni atîrî, “Mantû jarîa ndîraigîîtue nthîgûrû yaakwa ja ûûme bwaaku nî ja mma.

⁷Îndî ntîreetîkagia mantû jau mbere ya mbîja nciigîrua na ncionera ningwa. Atîrî, ntîreeri kinya nusu yaajo. Ûûme na ûtonga bwaaku nî nkûrûki ya ûrîa ndîraigîtue.

⁸Nîatîa aka baaku barî na munya! Tî kaaba nthûûmba ciaaku irîa igûtumîkagîra na ikaigagua ûûme bwaaku!

⁹Arokumua MWATHANI Mûrungu waaku, we ûrîa ûtûmîte waa mûnene wa Israeli. Nîkwîthîrwa wendo bwaawe kîrî Israeli nî bwa kenya na kenya, we akweethetie mûnene waayo kenda ûmîtongagîîria na îota na waagîru.”

¹⁰Rîu mûka-mûnene ûu wa kuuma Sheba aranenkera mûnene Solomoni into birîa aamûreterete tabio: Kilo magana jana ja thaabu, na into bibingî mono bia gwîkîra irio mûchemo, na kîthûmba gîa maiga ja goro. Gûtaarî gûkwonewa kaîrî into bibingî ta biu bia gwîkîra irio mûchemo birîa mûnene wa Sheba aaere Solomoni.

¹¹Mûnene Hiramu kinya we nî aarî akûretera mûnene Solomoni thaabu na mîtî ya mîthaata na maiga ja goro jakamati nî meri inyingî kuuma Ofiri.

¹²Solomoni nî aatumîîre mîtî îîu ya mîthaata gwaka itugî bia kîûrû na gîkaro kîa mûnene na gûtumîra aini inanda na wandîîndî. Nayo mîthaata îîu nîyo yaarî îmîthongi mono ûntû gûtooneka îngî tayo Israeli mwanka naarua tûrî.

¹³Solomoni nî aaere mûnene ûu wa Sheba biewa birîa biaarî wîthîre kwaa mûnene ûngî na bingî bionthe birîa aarombere. Rîu mûka-mûnene ûu amwe na nthûûmba ciaawe baraana nthîgûrû yaao ya Sheba.

¹⁴Solomoni nî oothûranagia kilo ngiri mîrongo îîrî na ithatû (23,000) cia thaabu o mwaka.

¹⁵Ningî nî oothûranagia thaabu îngî kuumania na ûgoti bûrîa bwaarîagwa nî abiashara na kuumania na biashara cia nthîgûrû yaawe na kuumania na biewa birîa aaretagîrwa nî anene ba Arabia na arûngamîîri ba nthîgûrû ya Israeli.

¹⁶Mûnene Solomoni nî aaturîre rong'o inene magana jaîrî, na aarereeria o rong'o na thaabu ya kilo mûgwanja.

¹⁷Ningî aratura tûrong'o tûngî magana jathatû, na arereeria o karong'o na thaabu ya kilo ijîîrî. Nawe areeka rong'o iu cionthe nyomba îrîa yeetagwa Mwitû jwa Lebanoni.

¹⁸Ningî mûnene nî aatumîre rûriga rwa ûnene na arereeria kûmwe na thaabu întheru na kûngî na mûgwongo.

¹⁹Gwitia gîtîîne kîu kwaarî na nkathî ya nkinyo na mîthieene yo îîrî ya o nkinyo nî kûombi tûmîng'uanano twîrî twa ngatûnyi.

²⁰Tontû bûû, tûmîng'uanano twa ngatûnyi twaarî îkûmi na twîîrî. Ningî gîtî kîu nde bwa nyuma nî kwombi mûng'uanano jwa kîongo kîa ndeegwa, naku arîa njara cirîîkagîrwa nî kwombi mûng'uanano jwa ngatûnyi. Gûtî gîtî kîngî kîa ûnene kîonekana ta kîu nthîgûrûûne noo îrîkû.

²¹Into bia mûnene Solomoni bionthe bia kûruga na bia kûrîîra na bia kûnyuîra kinya bia birîa bieekagwa nyomba îrîa yeetagwa Mwitû jwa Lebanoni biaarî bia thaabu întheru. Tontû bûû, gûtî kinya kîmwe gîaaturi na fetha, nîûntû îtaarî na goro matukûûne jau.

²²Mûnene Solomoni nî aarî na rûûtû rwa meri cia biashara[3] irîa cieetanagia amwe na rûûtû rwa meri cia Hiramu. O mîaka îthatû îkîthira rûûtû rûu rwa meri nî rwaamûretagîra thaabu, na fetha, na mîgwongo, na ncooro na maraî.

²³Ningî mûnene Solomoni nî aakûrûkîte anene bangî bonthe ba nthîgûrû mantûûne jegiî ûtonga na ûûme.

²⁴Nabo antû bonthe ba nthîgûrû nî bacwaga ûrîa boomba kwona Solomoni nîkenda baciigîrua ûûme bwaawe bûrîa MWATHANI aamweete.

²⁵O muntû wonthe ûrîa weejaga kîrî Solomoni nî aamûreetagîra biewa mwanya mwanya ta into bia fetha na bia thaabu, na nguû cia goro na mathaga ja ndwaa na into bia gwîkîra irio mûchemo, na mbarathi na nyûmbû. Gûtî mwaka jwaakûrûkagîrwa atîreeteri biewa ta biu.

²⁶ Solomoni nî oothûranîrie njûûrî ya asikarî ba ngaarî cia ndwaa ngiri îmwe na magana jana (1,400) na ba mbarathi ngiri îkûmi na ijîîrî (12,000). Bamwe baabo arabeeka Jerusalemu na bangî baao arabanyagia ntûûreene mwanya mwanya.

²⁷ Ningî îgiiteene rîa waathani bwa Solomoni fetha yaingîîte Jerusalemu ta maiga, nayo mîtarakwa yaingîîte ta mîkûû ya mwitû jwa irîma bia Shefala.

²⁸ Nabo abiashara ba Solomoni nî baagûraga mbarathi kuuma Misri na Cilicia[4]

²⁹na ngaarî cia ndwaa kuuma Misri. Rîu nabo bakeenderia anene ba Aiti na ba Sîria o mbarathi fetha îgana rîa mîrongo îtaano (150) na ngaarî ya ndwaa fetha magana jatantatû (600).