Read KIMERU BIBLE PROTESTANT EDITION 1Ane 11 Bible Online

1Ane 11 - KIMERU BIBLE PROTESTANT EDITION bible

1Ane 11

¹ Mûnene Solomoni nî eendeete aka ba nthîgûrû ingî mono. O amwe na kûgûra mwarî wa Farao, nî aagûrîre aka kuuma nthîgûrû cia Moabu na Amoni na Edomu na Sidoni na Ahiti.

² Nawe aabagûrîre kinya këethîra MWATHANI nî aakaanîtie Aisraeli kûgûranaga na antû ba mîgongo îîu nîkenda batîkeeje gûtûma baromba mîrungu îngî.

³Solomoni nî aarî na aka magana mûgwanja na aka ba gwîka magana jathatû. Nabo baratûma Solomoni autatîra Mûrungu.

⁴Agûtindira, baratûma aromba mîrungu îngî. Tontû bûû, ataathîkîîre MWATHANI Mûrungu waawe ta ûrîa îthe Daudi aathîkîîre.

⁵Solomoni nî aarombaga mûrungu jwa mûka jwa Sidoni jûrîa jweetagwa Ashitarothi, na mûrungu jûmûûî jwa Amoni jûrîa jweetagwa Moleki.

⁶Tontû bûû Solomoni nî eeyîîrie MWATHANI na ataathingatîre mawaatho jaawe ta ûrîa Daudi îthe aajathingataga.

⁷Solomoni nî aakîre iritîro biîrî bia igongwana kîrîmeene kîrîa kîrî bwa gaiti ya Jerusalemu. Nakîo kîritîro kîmwe kîa biu aakîîre Kemoshi, mûrungu jûmûûî jwa Moabu, na kîngî araakîra Moleki mûrungu jûmûûî jwa Amoni.

⁸Ûu nîu aakîîre aka barîa aagûrîte kuuma nthîgûrû ingî iritîro ta biu kûrîa baaîîthagîîria ubaani na baaritagîra mîrungu yaao igongwana.

⁹MWATHANI nî aakanîrwe nî mûthûûro mono nîûntû bwa Solomoni tontû nî aarî akûmumîîra jaîrî amûkaania atîkarombe mîrungu îngî

¹⁰îndî Solomoni ataamwathîkîîre.

¹¹Tontû bûû, MWATHANI areera Solomoni atîrî, “Nîkwîthîrwa nî ûeete ngîti wauna kîrîkanîro gîaakwa naagwe warega kwathîkîra mawaatho jaakwa, ngagûtuunya mûgongo jûjû njûnenkanîre kîrî ûmwe wa atongeeria baaku.

¹²Îndî nîûntû bwa nthoni cia abaagu Daudi, ntîthithia ûu îgiita rîa waathani bwaaku, îndî nî îgiita rîa waathani bwa mûtaana waaku.

¹³Ningî kinya we ntîmûtuunya mûgongo junthe. Îndî nîûntû bwa nthoni cia nthûûmba yaakwa Daudi na cia Jerusalemu, ntûûra îrîa ndaithuurîîre ningwa, nkamûtigîra mwîrîga jûmwe jwa Israeli.”

¹⁴MWATHANI nî aatûmîre Hadadi wa rûrîîjo rwa nja ya ûnene bwa nthîgûrû ya Edomu, aa mûnthû wa Solomoni.

¹⁵Karaaja mma rîrîa Daudi aagwatîre Edomu, Joabu mûtongeeria wa njûûrî cia asikarî baawe nî eetîre kûthika akuû ku. Arooraga arûme bonthe ba Edomu.

¹⁶Joabu arakara kûu na njûûrî yaawe antû a mîeri îtaantatû, na arooraga arûme bonthe ndeene ya nthîgûrû îîu.

¹⁷Îndî Hadadi na nthûûmba imwe cia nja yaao nî boombîre kûmatûka bareeta Misri. Îgiita rîu Hadadi aarî mwana mûnyi.

¹⁸Nabo bakuuma Midiani nî beetîre nthîgûrû ya Parani kûrîa antû bamwe baagwatanîre nabo bareetania mwanka Misri. Nabo bagûkinya Misri, mûnene Farao nî aaere Hadadi kîthaka na nyomba na biakûrîa.

¹⁹Farao nî eendere Hadadi mono mwanka aramûnenkera mwarî wa ng'ina wa Tapenesi, ûrîa waarî mwekûrû wa Farao, aa mwekûrû waawe.

²⁰Nawe mûka ûu araciarîra Hadadi mûtaana weetagwa Genubathi. Mûtaana ûu arererwe nî mûka-mûnene Tapenesi nja ya Farao na arakûrania amwe na aana ba Farao.

²¹Rîrîa Hadadi aigîrue arî Misri atî Daudi na Joabu mûtongeeria wa njûûrî nî baarî bagûkua, nî eetîre areera Farao atîrî, “Mbîtîkîîria ncoke gweetû.”

²²Farao aramûûria atîrî, “Nîmbi waga kuuma kîrî ni tontû ûkwenda gwîta nthîgûrûûne yeenu?” Hadadi aramwîra, “Gûtîkîo; îndî reka mbîte.” Nawe araicokera kwaao.

²³MWATHANI nî aatûmîre Rezoni mûtaana wa Eliada atuma ûthû na Solomoni. Rezoni aarî akûmatûka kuuma kîrî mwathi waawe Hadadezeri, mûnene wa Zoba.

²⁴Nawe nî oothûranîrie gîkundi kîa amaramari na araa mûtongeeria waakîo. Mantû jau jakarîkîre nyuma ya Daudi agûcinda mûnene Hadadezeri na ooraga njûûrî cia Sîria irîa ciamûteethagia ndweene. Nabo bareeta Damaski barakara ku na baraeethia Rezoni mûnene wa Damaski.

²⁵Rezoni aatûûrîre arî mûnthû wa Israeli îgiita rîonthe rîrîa Solomoni athanaga. Arathangîkia Solomoni mono ta ûrîa Hadadi kinya we aathangîkagia Solomoni. Rezoni nî amenaga Israeli na nî aathîre nthîgûrû ya Sîria.

²⁶Kinya mûtongeeria ûmwe thirikarîîne ya Solomoni, weetagwa Jeroboamu, nî aagarûkîre araa mûnthû wa mûnene Solomoni. Jeroboamu aarî mûtaana wa Nebati ûrîa waarî wa kuuma gûntû gweetagwa Zereda ndeene ya nthîgûrû ya Efuraimu. Ng'ina aarî ntigwa yeetagwa Zerua.

²⁷Jeroboamu aagarûkîre ûjû: Solomoni nî oojûrîrie gûntû kûrîa kweenûki mûtheetu; naku kwaarî rûteere rwa ûrîo rwa ntûûra ya Jerusalemu na kûthithia nthingo cia ntûûra iu naarîa gwaatûkangi.

²⁸Rîu Jeroboamu nî aarî mûthaka ûrî na inya na ûmûkamu. Rîrîa Solomoni oonere ûrîa mûthaka ûu aaritaga ngûgî bwega, nî aamweetherie mûrûngamîîri wa ariti ngûgî ba gûkinyîîria barîa baarî nchiarwa cia Josefu.

²⁹Ntukû îmwe rîrîa Jeroboamu aarî rûgendoone kuuma Jerusalemu nî aatirimîrwe nî kîroria gîa kuuma Shilo gîeetagwa Ahija kîrîa gîeekîrîte rwambambio rûrwerû. Kîroria kîu kîaamûtirimîre arî wenka njîreene antû amwe kûu bûûrîîne.

³⁰Rîu Ahija aararita rwaambambio rûu eekîrîte, ararûtambûranga rûrauma ntaaame îkûmi na ijîîrî.

³¹Nawe areera Jeroboamu atîrî, “Ijûkîrie mîtaame îkûmi; nîkwîthîrwa MWATHANI Mûrungu wa Israeli ariuga atîrî, ‘Ngatuunya Solomoni mûgongo, nkûnenkere mîîrîga îkûmi,

³²îndî nîûntû bwa nthoni cia îthe Daudi na ntûûra ya Jerusalemu îrîa ndaithuurîîre kuuma mûgongoone junthe jwa Israeli yaa yaakwa, nkamûtigîra mwîrîga jûmwe.

³³Naani nkaathithia ûjû nîûntû Solomoni nî ambutatîrîte na aromba mîrungu îngî. Nayo Mîrungu îîu nî Ashitarothi, mûrungu jwa mûka jwa antû ba Sidoni, na Kemoshi mûrungu jwa antû ba Moabu na Moleki mûrungu jwa antû ba Amoni. Ningî we nî eeyîtie mbere yaakwa na ataathingatîre mawaatho jaakwa ta ûrîa Daudi îthe aajathingataga.

³⁴Amwe na jau, ntîtuunya Solomoni mûgongo junthe îndî akaathanaga îgiita rîonthe rîa ûtûûro bwaawe. Naani nkaathithia ûu nîûntû bwa Daudi îthe waawe ûrîa ndaathuurîte na aratûûra akîathîkagîra maathana na mawaatho jaakwa.

³⁵Îndî ngaatuunya mûtaana wa Solomoni ûnene na nkûnenkere mîîrîga îkûmi,

³⁶nawe mûtigîre mwîrîga jûmwe. Ni nkamûtigîra ju nîkenda Daudi, nthûûmba yaakwa îîthagîrwa îrî na nchiarwa ikwaathana Jerusalemu, ntûûra îrîa ndiithuurîrîte kwaa antû arîa nkathaathagîrua.

³⁷Naagwe Jeroboamu ngakweethia mûnene wa Israeli waathanage ku o ûrîa ûkwenda.

³⁸Naagwe wambathîkîra buru na mbone na mma atî nî ûkûthingata maathana na ndwaatho ciaakwa ta ûrîa nthûûmba yaakwa Daudi aathithagia, ni ngatûûraga amwe naagwe. Ningî ngakweethia mûnene wa Israeli na ntûme nchiarwa ciaaku itûûra kwaathanaga nyuma yaaku, o ta irîa cia Daudi.

³⁹Îndî nîûntû bwa meeyia ja Solomoni ngakanûkia nchiarwa cia Daudi, îndî îkanûkia rîu rîtîtûûra kenya.’”

⁴⁰Tontû bûû, Solomoni nî aagererie kûûraga Jeroboamu, îndî Jeroboamu aramatûka areeta kîrî Shishaki, mûnene wa Misri. Nawe aratûûra Misri mwanka rîrîa Solomoni aakuîre.

⁴¹Mantû jangî jaonthe jarîa Solomoni aathithîrie, na njuno na kîrîra kîaawe, jaandîki Yukuune rîa mathithio ja Solomoni.

⁴²Solomoni nî aathîre Israeli yonthe arî Jerusalemu mîaka mîrongo îna.

⁴³Rîu arakua na arathikwa ntûûreene ya îthe Daudi. Nawe mûtaana waawe Rehoboamu araa mûnene.