Read KIMERU BIBLE PROTESTANT EDITION 1Ane 12 Bible Online

1Ane 12 - KIMERU BIBLE PROTESTANT EDITION bible

1Ane 12

¹Rehoboamu nî eetîre Shekemu gûntû kûrîa antû ba mîîrîga ya Israeli ya bwa rûgûrû boothûrene nîûntû bwa kûmweethia mûnene.

²Jeroboamu mûtaana wa Nebati aakûmenya nteto iu, nî aacokere kuuma Misri kûrîa aarî akûmatûkîra nîûntû bwa gûkîra mûnene Solomoni.

³Agûcoka, antû ba mîîrîga ya Israeli ya bwa rûgûrû nî baamûtûmanîre na bareetania nawe kîrî mûnene Rehoboamu. Nabo bareera Rehoboamu atîrî,

⁴“Abaagu aatwinyîrîîtie na gûtûritithia ngûgî tûtîkûûmba. Nandî rî, tûûthîrie mûrigo jûjû nîkenda ûtûûro bûbua, naatuî tûgakwathîkagîra.”

⁵Rehoboamu arabeera atîrî, “Îteeni na bwîje nyuma ya ntukû ithatû mbwîre macokio ja ûntû bûu.” Tontû bûû, antû baraciîtîra.

⁶Rîu mûnene Rehoboamu areeta gûcwaa kîrîra kuuma kîrî akûrû barîa baaeejaga îthe Solomoni nkuagaya rîrîa aarî mwoyo, nawe arabeera atîrî, “Û-mbatheni ûrîa ngacokeria antû baba.”

⁷Nabo baramwîra atîrî, “Këethîra nî ûkwenda kwatha antû baba bûbwega, bacokerie îcokio rîrîa rîkabagwîria. Nabo bagatûûra bakwathîkîrîte.”

⁸Îndî Rehoboamu ataatindanîîre na kîrîra kîu gîa akûrû. Tontû bûû, areeta kîrî nthaka cia nthukî yaao irîa aathuurîte cia kûmweejaga nkuagaya.

⁹Rehoboamu arabeera atîrî, “Û mbîîreni ûrîa ngacokeria antû baba bakûmbîîra mboothîrie mûrigo jwa ngûgî irîa baaba aabainyîrîtie nacio.”

¹⁰Nabo baramwîra atîrî, “Beere ûjû, kaaraira gaakwa kamati nkûrûki ya kauna ka baaba.

¹¹Îî baaba aabûinyirîîtie mono na kûbûritithia ngûgî bûtîkûûmba. Ni naani nkabwinyîîria nkûrûki. Këethîra baaba aabûûraga na kîboko na ni nkabûûraga na mûcarica.”

¹²Ntukû ithatû ikûthira, Jeroboamu na antû barîa, bareetania kîrî Rehoboamu o ta ûrîa aabeerîte.

¹³Bagûkinya, mûnene atîtindanîre na kîrîra gîa akûrû îndî ka aabaarîîrie na rûng'ento.

¹⁴Nawe arabacokeria o ûrîa nthaka ciaamwathîte arabeera atîrî, “Îî baaba aabwinyîrîîtie mono na kûbûritithia ngûgî bûtîkûûmba. Ni naani nkaabwinyîîria nkûrûki. Këethîra Baaba aabûûraga na kîboko, ni nkaabûûraga na mûcarica.”

¹⁵Rîu mûnene ataatindanîîre na bwa antû nîûntû nîbu bwaarî wendi bwa MWATHANI nîkenda rûteto rwaawe rûûjûra rûrîa aarîtie na Jeroboamu mûtaana wa Nebati agîtumagîra kîroria gîa kuuma Shilo kîrîa gîeetagwa Ahija.

¹⁶ Nabo antû bakwona atî mûnene atîkûbanoga, baragondoka baramûûria atîrî, Ga twonaga mbi kuuma kîrî Daudi na antû ba mûciî jwaawe? Twicokereeni gweetû Israeli, Rehoboamu nî atigwe na mûciî jwaao. Tontû bûû, antû bau ba Israeli ya bwa rûgûrû baraciathûra.

¹⁷Rehoboamu aratigwa akîathaga antû ba ntûûra cia Juda akî.

¹⁸Mûnene Rehoboamu agûtûma mûrûngamîîri waawe wa ariti ngûgî cia gûkinyîîria, tawe Adoramu kûu Israeli ya bwa rûgûrû, antû ba kûu baramûûraga na maiga. Rehoboamu araitangia ngaarî yaawe ya mbarathi aramatûka areeta Jerusalemu.

¹⁹Kuuma ntukû îîu antû ba Israeli ya bwa rûgûrû batwîre bareganîte na waathani bwa rûrîîjo rwa Daudi mwanka naarua.

²⁰Rîrîa antû ba Israeli ya bwa rûgûrû bamenyere atî Jeroboamu nî aarî agûcoka kuuma Misri, nî beetanîre mûcemanio baramweethia mûnene waao. Tontû bûû, nî mwîrîga jwa Juda junka jwaatigîrwe jûkîathagwa nî nchiarwa cia Daudi.

²¹Rehoboamu agûkinya Jerusalemu nî oothûranîrie njûûrî ya asikarî ngiri îgana rîmwe na mîrongo înaana (180,000) kuuma mwîrîgeene jwa Juda na Benjamini nîkenda beeta kûrwaa na Israeli ya bwa rûgûrû bamîcokia waathaniine bwaawe.

²²Îndî MWATHANI nî aatûmîre kîroria Shemaia, muntû wa Mûrungu

²³gîîta kwîra mûnene Rehoboamu na antû bonthe ba mwîrîga jwa Juda na jwa Benjamini ûjû:

²⁴“Bûkaithûkîreeni ndûgû cieenu, tabo antû ba Israeli ya bwa rûgûrû. Ciaanîreni bwinthe tontû bûu bûthithîkîte nî wendi bwaakwa.” Tontû bûû, baraathîkîra rûteto rwa MWATHANI, baraciaanîra.

²⁵Mûnene Jeroboamu nî aakîre na arairigîra na nthingo ntûûra ya Shekemu îrîa îrî irîmeene bia Efuraimu. Nawe agûkarakara nau areeta ntûûreene ya Penueli na aramîaka na aramiirigîra na nthingo.

²⁶Rîu araciîra atîrî, “Kûringana na ûrîa nkwona, antû baba beetaga Jerusalemu kûritagîra MWATHANI igongwana kîûrûûne kîrîa kîrî nao,

²⁷bakaanthûûra na beende mûnene Rehoboamu mûnene wa Juda na baambûrage.”

²⁸ Mûnene akûromba nkuagaya, arathithia njaû ijîîrî cia thaabu, na areera antû atîrî, “Bûkûnogua nî gwîtaga Jerusalemu magiita jonthe kûromba. Atîrî, îbuî antû ba Israeli, tîîjî mîrungu yeenu îrîa yaabûritîre nthîgûrû ya Misri.”

²⁹Nawe areeka mûrungu jûmwe Betheli, na jûngî areeka Dani.

³⁰Kûthithia ûû kûraa meeyia nîûntû antû nî beetaga kûthaathayia njaû îîu nao.

³¹Ningî nî aakîre irombero tûrîmene na arathuura athînjîri-mûrungu kuuma nja cia antû batî ba mwîrîga jwa Alawi.

³² Jeroboamu nî aathuurîre ntukû ya îkûmi na ithaano ya mweri jwa înaana yee ntukû ya mambura ja gûkûngûîra mîrungu yaawe. Ntukû îîu yaaringene na îrîa ya mambura kûu Jerusalemu. Nawe nî eetîre kîritîroone kîa igongwana kîrîa kîaarî Betheli na araritîra mûrungu jwa njaû irîa aathithîtie kîgongwana, na aratiga eeka athînjîri-mûrungu baritaga ngûgî iromberoone birîa aakîte nao.

³³Nayo ntukû ya îkûmi na ithaano mweriine jwa înaana îrîa aathurîte îgûkinya, nî eetîre Betheli. Nawe ararita kîgongwana kîritîroone kîa igongwana gûkûngûîra mambura jarîa aathuurîte jakûngûagîrwa nî antû ba Israeli.