Read KIMERU BIBLE PROTESTANT EDITION 1Ane 13 Bible Online

1Ane 13 - KIMERU BIBLE PROTESTANT EDITION bible

1Ane 13

¹MWATHANI nî aatûmîre kîroria kuuma Juda gîîta Betheli. Nakîo kîrethîra Jeroboamu aarûngi au kîritîroone kîa igongwana arita kîgongwana.

² Nakîo kîrauga ûrîa MWATHANI aakîathîte kiuge, “Kîritîro kîa igongwana, îgwe kîritîro kîa igongwana! Kaana gagaciarwa ka rûrîîjo rwa Daudi, gagwîtwa Josia. Nako gakooraga athînjîri-mîrungu ya mîng'uanano kîromberoone gîkî, na gaakîîrie maîndîîndî ja antû o.”

³Nakîo kîroria kîreeta na mbere kuuga atîrî, “Kîritîro gîkî kîa igongwana gîkamomorwa na mûju jwaakîo jûnyague. Rîu nîrîo bûkamenya atî MWATHANI nîwe ûntûmîte mbwîra mantû jau.”

⁴Mûnene Jeroboamu akwigua ûu aroorota kîroria kîu arauga atîrî, “Mûgwateeni!” Nayo njara ya mûnene îroomagara o rîo atîûmbe kûmîkûnja.

⁵Nakîo kîritîro kîramomoka o rîo na mûju jwaakîo jûranyaga o ûrîa kîroria kîaaroretie riîtweene rîa MWATHANI.

⁶Mûnene areera kîroria atîrî, “Itû mberencanîîra kîrî MWATHANI Mûrungu waaku aamborie njara.” Nakîo kîroria kîraromba na njara ya mûnene îrabua.

⁷Rîu mûnene areera kîroria atîrî, “Itû njû, twîte nja gwaakwa ûkagagûrwe ningî nkwee kîewa nîûntû bwa ûntû bûbû wanthithîria.”

⁸Kîroria kîramwîra atîrî, “Kinya ûgampa nusu ya ûtonga bwaaku ntîkunda kana ndîa gantû gwaaku.

⁹Nîkwîthîrwa MWATHANI nî ambîrîte atî nkárûma kana nkunda gantû kana ncokereera njîreene îrîa mbîjîre nayo.”

¹⁰Tontû bûû, aratiga njîra îrîa eejîte nayo Betheli na araana na njîra îngî.

¹¹Rîu kûu Betheli nî gwatûûraga kîroria kîmwe gîgîkûrû mono. Nabo ataana baakîo bareeta baramwîra jonthe jarîa kîroria kîmwe kuuma Juda kîaarî gîkûthithia Betheli ntukû îîu, na nteto irîa kîeerîre mûnene Jeroboamu.

¹²Nawe îthe arabooria atîrî, “Eetîre na njîra îrîkû?” Nabo baramwonia yo.

¹³Ningî kîreera ataana baakîo bakîthuranîîre ntigiri. Nabo bagûkîthuranîîra ntigiri, aramitia.

¹⁴Nawe aragwata njîra arathingatana na kîroria kîu gîa kuuma Juda na arakîîthîra gîkari nthî rungu rwa muuru. Kîroria kîu kîramwîra atîrî, “Nîgwe kîroria kîrîa kîreejîre kuuma Juda?” Nawe aracokia, “Nî ni.”

¹⁵Nakîo kîroria kîa Betheli kîramwîra atîrî, “Njû twîte gwaakwa ngakûgagûre.”

¹⁶Îndî kîroria gîa kuuma Juda kîramwîra atîrî, “Ntîenda kûgwaatwa ûgeni nja yaaku, kana ndûma kana nkunda gantû kinya karîkû nau.

¹⁷Tontû MWATHANI nî aankaanîrie ntîgakunde kana ndûma noo mbi, kana ncokeera njîreene îrîa mbîjîre nayo Betheli.”

¹⁸Nakîo kîroria kîu kîa Betheli kîramwîra atîrî, “Kinya ni ndî kîroria o ta gwe. MWATHANI nî antûmîîre mûraîka aambîîra nkûgwate ûgeni.” Îndî kîroria kîu kîa Betheli nîka kîamwaîîragia.

¹⁹Tontû bûû, bareeta gwa kîroria kîu ntindiri na ararîa na aranyua.

²⁰Nabo o bakarîte meetheene o au, MWATHANI nî aarîîrie kîroria kîu ntindiri.

²¹Nakîo kîragondokera kîroria kîu kîa Juda kîramwîra atîrî, “MWATHANI ariuga ûjû, ûtîramwathîkîra na ûtîraingia maathana jarîa MWATHANI Mûrungu waaku aakwathîre.

²²Îndî gwe ga ûcokere na waarîa biakûrîa kûrîa agûkaanîtie. Tontû bûû, ûkooragwa na ûtîthikwa kaburiine ka nja yeenu.”

²³Rîu bakûthiria kûrîa, kîroria kîu ntindiri kîrathuranîîra kîroria kîu kîa Juda ntigiri.

²⁴Nakîo kîroria gîa kuuma Juda kîaanîte kîrooragwa nî ngatûnyi. Naju mwîrî jwaawe jûratigwa nau na ngatûnyi na ntigiri irarûngama rûteere rwa kiimba kîaawe.

²⁵Barîa baakûrûkaga na njîra boona mwîrî jûu na ngatûnyi îrûngi gateere, baramenyithania mantû jau kîrî antû ba Betheli.

²⁶Rîrîa kîroria kîa Betheli kîaigîrue nteto iu kîrauga atîrî, “Kîu nî kîroria kîrîa kîaaregere kwaathîkîra MWATHANI. Tontû bûû, nî kîrooragîrwe nî ngatûnyi o ta ûrîa MWATHANI aaugîîte.”

²⁷Nakîo kîroria kîa Betheli kîreera ataana baakîo atîrî, “Nthuranîîreni ntigiri.” Nabo baramîthuranîra.

²⁸Nawe areeta areethîra kiimba gîa kîroria kîu kîringi nthî njîreene, nayo ntigiri na ngatûnyi irûngami rûteere. Îndî ngatûnyi îtaarî îkûrîa kiimba kana îringithia ntigiri.

²⁹Nakîo kîroria kîu kîrajûkia kiimba kîraîkia ntigiri. Rîu kîracoka nakîo Betheli nîkenda amûrîrîra na amûthika.

³⁰Ningî areeka kiimba kîu mbîrîreene ya nja yaawe yongwa. Nabo baraambîrîria kûrîra bakiugaga, “Wûi naanû! Mûtaana wa chiaa ûrîa weetû!”

³¹Nyuma areera ataana baawe atîrî, “Ndaakua bûnthike mbîrîreene ngoomene nawe.

³²Nîkwîthîrwa nteto irîa MWATHANI arîrie na kanyua ga kîroria gîkî ciegiî kîritîro kîa îgongwana Betheli na irombero bionthe ndeene ya ntûûra ya Samaria nî mma ikoojûra.”

³³Amwe na bûu mûnene Jeroboamu ataatigana na mîîtîre yaawe îmîthûûku, îndî nî eetîre na mbere kûthuura athînjîri-mûrungu kuuma nja itî cia Alawi nîkenda batumîkagîra iromberoone birîa aakîte.

³⁴Najo meeyia jau jaratûma antû ba mûciî jwa Jeroboamu na rûrîîjo rwaawe rweegerwa buru na rûthirua nthîgûrûûne.