Read KIMERU BIBLE PROTESTANT EDITION 1Ane 14 Bible Online

1Ane 14 - KIMERU BIBLE PROTESTANT EDITION bible

1Ane 14

¹Kûrakara atîrî, Abija mûtaana wa Jeroboamu nî aajîrue.

²Jeroboamu nî eerîre mwekûrû waawe atîrî, “Ithuranîre, wigarûre ûrîa ûtîmenyeka na wîte Shilo, narîa Kîroria Ahija ûrîa waugîre nkaa mûnene wa Israeli atûûraga.

³Jûkia mîgaate îkûmi na keki na gîempe kîa nainchû wîte ûmûûrie ûrîa mwana weetû agakara, nawe agakwîra.”

⁴Tontû bûû, mwekûrû wa Jeroboamu nî eetîre kwa kîroria Ahija nau Shilo. Îgiiteene rîu, Ahija nî aarî agûkûra aûra meetho.

⁵Rîu MWATHANI nî aarî akwîra Ahija, atî mwekûrû wa Jeroboamu nî eejîte kûmwona nîûntû bwa mûtaana waao ûrîa waajîtue. MWATHANI nî aarî akûmwîra ûrîa akamûcokeria. Mwekûrû wa Jeroboamu agûkinya, nî aacieetherie teeka atî we.

⁶Îndî rîrîa kîroria Ahija aigîrue mwekûrû ûu o rîrîa aakinyîre mwariine, aramwîra atîrî, “Kûrûka. Nî nkûmenya nîgwe mûka wa Jeroboamu. Nîkî tontû ûgûcieethia tîgwe.

⁷Îta wîre Jeroboamu atîrî, ûjû nîu MWATHANI Mûrungu wa Israeli agûkwîra: ‘Nî ni ndaakûthuurîre kuuma gatîgatîîne ka antû babaingî, ndakweethia mûnene wa antû baakwa ba Israeli ya bwa rûgûrû.

⁸Ningî ndîratuunya nchiarwa cia Daudi ûnene ndîrakûnenkera. Îndî amwe na jau, ûthithîtie mantû jarîa ntîendaga, warega gûkara ta Daudi, nthûûmba yaakwa, ûrîa waambathîkîrîte buru na athingata maathana jaakwa na kûthithia mantû jarîa jaagîrîte mbere yaakwa.

⁹Gwe ûthithîtie mantû jamathûûku jarîa jataathithua nî mûnene ûngî. Gwe nî ûmbutatîrîte na waanthûûria mono nîûntû bwa kûthithia na kûthaathayia mîrungu ya chuuma.

¹⁰ Tontû bûû, rî, ngatema ntaame mûciî jwa Jeroboamu: Mbûrage nchiarwa ciaawe cia arûme cionthe cithire buru itige nthî întheri.

¹¹Muntû wa ndûgû cieenu ûrîa ûgakuîra ntûûreene akaarîjagwa nî kurû, na o ûrîa ûgakuîra bûûrîîne akaarîîjagwa nî nyoni cia îgûrû.’” Ûu nîu MWATHANI augîte.

¹²Rîu Ahija areera mwekûrû wa Jeroboamu atîrî, “Ûkîîra nandî ûciaanîre. Naagwe ûgîtonya ntûûreene yeenu ûû, mûtaana weenu agaakua.

¹³Nayo Israeli yonthe îkamûrîrîra na îmûthike. We nîwe wenka wa nja ya Jeroboamu ûkathikwa ûrîa kwaagîrîte nîûntû MWATHANI Mûrungu wa Israeli nî agwîragua nîwe.

¹⁴Amwe na bûu, naarua îîjî MWATHANI akaathuurîra Israeli mûnene ûrîa ûkathiria rûrîîjo rwa ûnene bwa Jeroboamu.

¹⁵MWATHANI agaakanûkia Israeli iinaine ta nthanje cia îrimba, na aakûûre Israeli kuuma nthîgûrû îîjî njega îrîa aaere boojûûwe na aamînyagie kûraaja ntagaaro ya mûuro jwa Eufurate. Nawe akaabathithîria ûu nîûntû nî bamûthûûrîtie nîûntû bwa kûthithia tûmîng'uanano twa mûrungu mûka jwîtagwa Ashera.

¹⁶MWATHANI akeerûkîra Aisraeli nîûntû Jeroboamu nî eeîîrie na aaratûma beeyia.”

¹⁷Rîu, mwekûrû wa Jeroboamu araicokera kwaao Tiriza. Nawe agîkinya mwariine jwa nyomba yaawe ûû, mûtaana waao arakua.

¹⁸Nabo Aisraeli baramûrîrîra na baramûthika o ta ûrîa MWATHANI aaugîîte agîtumagîra kîroria Ahija.

¹⁹Mantû jangî jonthe ja Jeroboamu, amwe na ndwaa na mwathanîre jwaawe, nî jaandîki Yukuune rîa Mantû ja Karaaja jegiî Anene ba Israeli.

²⁰Nawe mûnene Jeroboamu aathanîre mîaka mîrongo îîrî na îîrî (22). Rîu arakua na arathikwa. Kuuma rîu mûtaana waawe Nadabu araa mûnene.

²¹Rehoboamu, mûtaana wa Solomoni, aaere mûnene wa Juda arî na ûkûrû bwa mîaka mîrongo îna na jûmwe (41). Araathana mîaka îkûmi na mûgwanja (17). Nawe aakaraga Jerusalemu, ntûûra îrîa MWATHANI aathuurîte kuuma kîrî ingî cionthe cia Israeli, aramîeethia antû aawe a kûthaathagîrua. Ng'ina wa Jeroboamu aaumîte nthîgûrû ya Amoni na eetagwa Naama.

²²Antû ba Juda nî baathithîrie meeyia jamathûûku mono jakûrûkîte ja biûjûjû biaao na jaratûma MWATHANI athûûra na inya mono.

²³ Nî baakîre irombero bia mîrungu ya mîng'uanano tûrîmeene na baraaka itugî bia maiga na tûmîg'uanano twa Asheri na baratwîka rungu rwa mîtî arîa baarombagîra.

²⁴ Kûthûkia mantû buru, nî baarî na aka na arûme ba maraya barîa baatumîkaga iromberoone biu. Tontû bûû, antû ba Juda nî baathithîrie mantû ja nthao na meeyia ja mîthemba yonthe jarîa jathithagua akî nî antû barîa MWATHANI eengîre nthî îîu nîkenda aa antû ba Israeli.

²⁵ Kûrî mwakeene jwa îtaano jwa waathani bwa mûnene Rehoboamu, Farao Shishaki wa Misri nî aaithûkîîre Jerusalemu.

²⁶ Nawe arataa mûthithû junthe na into bionthe birîa biaarî kîûrûûne na gîkaro kîa mûnene na kinya rong'o cia thaabu irîa Solomoni aarî akûthithia.

²⁷Mûnene Rehoboamu nî aathithîrie rong'o cia îturutia nîkenda ciîkwa arîa iu ciaataîrwe cieekagwa, arainenkanîra njareene cia akaria ba mpingîro ya gîkaro kîa mûnene.

²⁸O rîrîa mûnene eetaga kîûrûûne, akaria bau nî bakamataga rong'o iu na nyumeene bagaicokia o arîa ciaaingagîrwa.

²⁹Mathithio jangî jonthe ja Rehoboamu jaandîki Yukuune rîa Mantû ja Karaaja jegiî Anene ba Juda.

³⁰Nako kagiita kau konthe Rehoboamu aathanîre nî aakarîre akîrûjaga na Jeroboamu magiita jamaingî.

³¹Rîu Rehoboamu nî aakuîre na arathikwa kaburiine karîa anene baathikagwa ntûûreene ya Daudi. Mûtaana waawe Abijamu araa mûnene.