Read KIMERU BIBLE PROTESTANT EDITION 1Ane 15 Bible Online

1Ane 15 - KIMERU BIBLE PROTESTANT EDITION bible

1Ane 15

¹Kûrî mwakeene jwa îkûmi na înaana jwa waathani bwa mûnene Jeroboamu mûtaana wa Nebati, nîrîo Abijamu aaere mûnene wa Juda.

²Nawe aathanîre mîaka îthatû arî Jerusalemu. Ng'ina eetagwa Maaka na aarî mwarî wa Abishalomu.

³Nawe nî aathithîrie meeyia ta jarîa îthe aathithîrie, na ararega gûkara ta ûjûûwe Daudi ûrîa waathîkîrîte MWATHANI buru.

⁴ Îndî nîûntû bwa nthoni cia Daudi, MWATHANI nî aaere Abijamu mûtaana wa kwaathana Jerusalemu nyuma yaawe nîkenda akaria Jerusalemu.

⁵ MWATHANI aathithîrie ûu nîûntû Daudi nî aathithîrie mantû jarîa jaagîrîte, na ataarî akûregana na mawaatho jaawe tiga akî mantûûne jegiî muntû weetagwa Uria kuuma nthîgûrû ya Ahiti.

⁶ Nayo ndwaa îrîa yaambîrîtie gatîgatîîne ka Rehoboamu na Jeroboamu nî yeetîre na mbere ûtûûroone bunthe bwa Abijamu.

⁷Mathithio jangî jonthe ja Abijamu jarîa aathithîrie nî jaandîki Yukuune rîa Mantû ja Karaaja jegiî Anene ba Juda.

⁸Rîu Abijamu nî aakuîre na arathikwa ntûûreene ya Daudi. Mûtaana waawe Asa araa mûnene

⁹Kûrî mwakeene jwa mîrongo îîrî mûnene Jeroboamu akîathanaga Israeli, Asa nî aaere mûnene wa Juda.

¹⁰Nî aathanîre arî Jerusalemu mîaka mîrongo îna na jûmwe. Ûjûûwe wa Asa eetagwa Maaka na aarî mwarî wa Abishalomu.

¹¹Asa nî aathîkîîre MWATHANI o ta ûrîa ûjûûwe Daudi aathithîtie.

¹² Nî eengîre amaraya ba arûme na aka barîa baatumîkagîra irombero barauma nthîgûrûûne îîu na arathetheranga mîrungu ya mîng'uanano îrîa yaathithîtue nî athani barîa baathanaga mbere yaawe.

¹³Nî aatuunyîre ûjûûwe Maaka gîtîîo gîa kwaa mûka wa mûnene nîûntû Maaka nî aathithîtie mûng'uanano jûrî kîthûnû jwa mûrungu mûka Ashera jûrîa jweerîkanaga atî nî jwaaejanaga inya ya gûciarana. Ningî Asa nî aajûgitangîre arajûîthîîria kamûuroone ka Kidironi.

¹⁴Îndî kinya këethîra we ataakoborangîre irombero bionthe birîa antû baarombagîra nî aatûûrîre akîathîkagîra MWATHANI magiita jonthe.

¹⁵Ningî nî aaikîrie kîûrûûne into birîa îthe aathûrîrîte MWATHANI o na kinya birîa bia thaabu na fetha na into bingî birîa we mwene aathûrîrîte MWATHANI.

¹⁶Nako kagiita karîa konthe aakarîrîre arî mûnene wa Juda nî aarûjaga magiita jarîa maingî na mûnene ûrîa waathaga Israeli îgiiteene rîu weetagwa Baasha.

¹⁷Baasha nî aithûkîîre Juda na araaka ntûûra ya Rama na aramiirigîra na nthingo indiku nîkenda gûtîkagîte muntû wa kuumagara kana gûkûrûka Juda.

¹⁸Mûnene Asa akwona ûu, aranenkera nchaama ciaawe fetha na thaabu yonthe îrîa yaatigeere kîûrûûne na gîkaroone kîa mûnene baikîria Beni-hadadi mûnene wa Sîria kûu Damaski. Ningî arabatûma na ntûmwa îkuuga ûjû:

¹⁹“Jûkia kîewa gîkî kîa thaabu na fetha, tûgwatanîre ta ûrîa biûjûûjû bieetû na bieenu biaagwatanîrîte. Tontû bûû, ndakûromba ûûrage ngwatanîro yaaku na mûnene Baasha wa Israeli nîkenda aarita asikarî baawe nthîgûrû yeetû.” Mûnene Beni-hadadi aarî mûtaana wa Tabirimoni ûrîa waarî mûtaana wa Hezioni.

²⁰Beni-hadadi nî eetîkîrîîrie îromba rîa mûnene Asa, aratûma njûûrî yaawe îreeta îraithûkîra ntûûra cia Israeli. Nayo îrataa ntûûra ya Ijoni na Dani na Abeli-bethi-maaka na Kinerethi yonthe na nthî yonthe ya Nafutali.

²¹Baasha akwigua ûrîa kwaarî gûgûkarîka nî aatigîre kwirigîra ntûûra ya Rama na areeta gûtûûra ntûûra ya Tiriza.

²²Rîu, mûnene Asa ararita waatho atî gûtîkagîte muntû ûtigwa Juda yonthe kîrî antû bonthe ba Juda; îndî beete Raba bagakamate maiga na mîgogo îrîa Baasha aatumagîra kwirigîra ntûûra îîu. Asa aratumîra into biu kwirigîra ntûûra ya Mizipa na ya Geba îrîa îrî nthîgûrû ya Benjamini.

²³Najo mathithio jangî jonthe ja mûnene Asa, na mantû jaawe ja ûchamba bwaawe jaandîki Yukuune rîa Mantû ja Karaaja jegiî anene ba Juda. Ûkûrûûne bwaawe nî aajîrue magûrû.

²⁴Mûnene Asa nî aakuîre na arathikwa kaburiine karîa anene baathikagwa ntûûreene ya Daudi. Mûtaana waawe Jehoshafati araa mûnene.

²⁵Kûrî mwakeene jwa îîrî jwa waathani bwa mûnene Asa wa Juda, Nadabu mûtaana wa Jehoshafati nî aaere mûnene wa Israeli. Nawe araathana ku mîaka îîrî.

²⁶Mûnene Nadabu nî eeîîrie MWATHANI o ta îthe na aratûma Israeli îtonya meeyiene.

²⁷Baasha mûtaana wa Ahija wa mwîrîga jwa Isakari, nî aabangîre kûûraga Nadabu. Akûmenya Nadabu na njûûrî yaawe nî baacîgîîrîîtie ntûûra ya Afilisti îgwîtwa Gibethoni nî eetîre aramûûragîra nao.

²⁸Baasha ooragîre Nadabu mwakeene jwa îthatû jwa waathani bwa Asa mûnene wa Juda, na akûmûûraga araa mûnene wa Israeli.

²⁹ Ningî akwaa mûnene o rîo, arooraga antû ba rûrîîjo rwa Jeroboamu; gûtîwe kinya ûmwe aatigaria. Nabu ûntû bûu bwaathithîkîre kûringana na ûrîa MWATHANI eerîte nthûûmba yaawe kîroria Ahija kuuma Shilo.

³⁰Kûûragwa kûu kwa nchiarwa cia Jeroboamu kwaumanîrie na mûthûûro jûrîa MWATHANI Mûrungu wa Israeli aathûûrîre nîûntû bwa meeyia jarîa mûnene Jeroboamu aathithîrie na jarîa aatûmîre Aisraeli bathithia.

³¹Mathithio jangî jonthe ja mûnene Nadabu jaandîki Yukuune rîa Mantû ja Karaaja jegiî Anene ba Israeli.

³²Mûnene Asa wa Juda nî aatûûrîre akîrûjaga na Baasha mûnene wa Israeli matukûûne jarîa maingî ja waathani bwaawe.

³³Kûrî mwakeene jwa îthatû jwa waathani bwa Asa mûnene wa Juda, Baasha mûtaana wa Ahija nî aaere mûnene wa Israeli. Nî aathanîre arî ntûûra ya Tiriza, mîaka mîrongo îîrî na îna.

³⁴Nawe nî eeyîîrie MWATHANI o ta Jeroboamu na aratûma Aisraeli beeyia.