Read KIMERU BIBLE PROTESTANT EDITION 1Ane 16 Bible Online

1Ane 16 - KIMERU BIBLE PROTESTANT EDITION bible

1Ane 16

¹Rîu MWATHANI nî aarîîrie kîroria Jehu, mûtaana wa Hanani ûntû bwegiî Baasha arauga atîrî,

²“Gwe Baasha, nî wiijî atî waarî gîntû gûtîkîo, îndî nî ndaakweetherie mûtongeeria wa antû baakwa Israeli. Amwe na bûu, nî ûthingatîte mîtîre îmîthûûku ya Jeroboamu na watûma antû baakwa, Aisraeli beeyia. Ûntû bûbû nî bûnthûûrîtie mono.

³Tontû bûû, ngaakûthiria amwe na antû beenu, o ta ûrîa ndaathirîrie Jeroboamu mûtaana wa Nebati.

⁴Ningî antû beenu barîa bagakuîra ntûûreene bakaarîîwa nî kurû na barîa bagakuîra bûûrîîne bakarîîwa nî nyoni cia îgûrû.”

⁵Mathithio jangî jonthe ja Baasha na mantû ja ûchamba bwaawe jaandîki Yukuune rîa Mantû ja Karaaja jegiî Anene ba Israeli.

⁶Baasha nî aakuîre na arathikwa ntûûreene ya Tiriza. Rîu mûtaana waawe Ela araa mûnene

⁷MWATHANI aatumîîre kîroria Jehu, mûtaana wa Hanani, kwaria rûteto rûu rwegiî Baasha na antû baao. Nawe aarîrie ru nîûntû bwa meeyia jarîa Baasha eeîîrie MWATHANI. We nî aathûûrîrie MWATHANI nîûntû bwa kwîyia o ta ûrîa mûnene Jeroboamu eeîîrie na nîûntû bwa kûthiria antû ba mûciî jwa Jeroboamu.

⁸Kûrî mwakeene jwa mîrongo îîrî na îtaantatû (26) jwa waathani bwa Asa mûnene wa Juda, Ela mûtaana wa Baasha nî aaere mûnene wa Israeli na araathana mîaka îîrî arî Tiriza.

⁹Kûrakara atîrî, mûtongeeria ûmwe wa Zimuri, ûrîa waatongagîîria nusu ya mbûûtû ya asikarî ba mûnene ba ngaarî cia ndwaa, nî aabangîre kûmûûraga. Ela nî aanyuîre aroogita mono arî Tiriza, nja ya muntû weetagwa Ariza ûrîa waarî mûrûngamîîri wa gîkaro kîa mûnene.

¹⁰Rîu Zimuri nî aatonyere nja îîu, arooraga Ela na araa mûnene. Naku kwaarî mwakeene jwa mîrongo îîrî na mûgwanja jwa waathani bwa Asa mûnene wa Juda.

¹¹Zimuri akwaa mûnene, nî ooragîre antû bonthe ba ndûgû cia mûnene Baasha arabathiria buru. Gûtî ntomûrûme kana mûcoore noo ûmwe wa Baasha waatîgarîre.

¹²Tontû bûû, mûnene Zimuri nî aathirîrie antû bonthe ba mûciî jwa Baasha, o ta ûrîa MWATHANI eerîte kîroria Jehu mantû jegiî Baasha.

¹³Mûnene Baasha na mûtaana waawe Ela, nî baathûûrîrie MWATHANI Mûrungu wa Israeli mono nîûntû bwa meeyia jaao ja kûromba mîrungu ya mîng'uanano na gûtûma Aisraeli beeyia.

¹⁴Mathithio jangî jonthe jarîa Ela aathithîrie nî jaandîki Yukuune rîa Mantû ja Karaaja jegiî anene ba Israeli

¹⁵Kûrî mwakeene jwa mîrongo îîrî na mûgwanja (27) waathaniine bwa Asa mûnene wa Juda, Zimuri nî aaere mûnene wa Israeli na araathana ntukû mûgwanja aarî ntûûreene ya Tiriza. Îgiita rîu asikarî ba njûûrî ya Israeli nî baacîgîîrîîtie ntûûra ya Afilisti yeetagwa Gibethoni.

¹⁶Nabo bakwigua atî Zimuri nî aarî akûbanga na ooraga mûnene Ela, nî baaeetherie mûtongeeria waao weetagwa Omuri mûnene wa Israeli o ntukû îîu.

¹⁷Rîu nawe Omuri na njûûrî yaawe baratigana na ntûûra ya Gibethoni, bareeta baracîgîîria ntûûra ya Tiriza.

¹⁸Zimuri akwona atî ntûûra îgûtawa, aratonya giitiiroone kîa gîkaro kîa mûnene, arakîmuntîa mwanki arakuîra ku.

¹⁹Nabu ûntû bûu bwaakarîkîre nîûntû bwa kûthithia meeyia o ta ûrîa Jeroboamu aathithîtie, na nîûntû bwa gûtûma Aisraeli beeyia. Ûntû bûu, nî bwaathûûrîrie MWATHANI mono.

²⁰Mathithio jangî jonthe ja Zimuri na rûgono runthe rwa ûrîa aajûkîrie ûnene na njîra îtîagîrîte nî jaandîki Yukuune rîa Mantû ja Karaaja jegiî Anene ba Israeli.

²¹Naku kûrakara atîrî, îgiiteene rîu, antû ba Israeli nî baagaukanîre ikundi biîrî. Gîkundi kîmwe nî kîeendaga kweethia Tibini mûnene. Tibini aarî mûtaana wa Ginathi. Îndî gîkundi kîu kingî kîendaga kweethia Omuri mûnene.

²²Omuri na gîkundi kîaawe nî boombanîre ndweene. Tibini nî aakuîre. Omuri araa mûnene wa Israeli.

²³Tontû bûû, Omuri aaere mûnene mwakeene jwa mîrongo îthatû na jûmwe (31) jwa waathani bwa Asa mûnene wa Juda, na araathana mîaka îkûmi na îîrî. Nawe aambîre kwaathana mîaka îtantatû arî Tiriza.

²⁴Nyumeene aragûra karîma ga Samaria kuuma kîrî muntû weetagwa Shemeri na ngiri itaantantû cia fetha. Nawe nî aairigîîre karîma kau na rûthingo, araaka ntûûra, aramîîta Samaria kuumania na riîtwa rîa muntû ûrîa aagûrîrîte kîthaka kîu tawe Shemeri.

²⁵Omuri nî eeyîîrie MWATHANI nkûrûki ya anene bonthe barîa baarî bakwaathana mbere yaawe.

²⁶Nî aathithîrie meeyia o ta ûrîa Jeroboamu aathithîrie na atûma Aisraeli baromba mîrungu ya mîng'uanano, barathûûria MWATHANI Mûrungu waao.

²⁷Mathithio jangî jonthe jarîa mûnene Omuri aathithîrie na mantû ja ûchamba bwaawe nî jaandîki Yukuune rîa Mantû ja Karaaja jegiî Anene ba Israeli..

²⁸Omuri nî aakuîre na arathikwa Samaria. Nawe mûtaana waawe Ahabu araa mûnene.

²⁹Kûrî mwakeene jwa mîrongo îthatû na înaana (38) jwa waathani bwa Asa mûnene wa Juda, Ahabu mûtaana wa Omuri nî aaere mûnene wa Israeli. Nî aathanîre arî Samaria mîaka mîrongo îîrî na îîrî (22).

³⁰Ahabu nî eeîîrie MWATHANI nkûrûki ya anene barîa baathanîte mbere yaawe.

³¹Ahabu ataathithîrie akî meeyia ta Jeroboamu, îndî nî aagûrîre kinya Jezebeli mwarî wa Ethibaali mûnene wa Sidoni. Ahabu nî aatumîkîîre na athaathayia mûrungu jwa mûng'uanano jwa Baali.

³²Nî aakîîre mûrungu jûu kîûrû, kûu Samaria na arajwakîra kîritîro kîa igongwana na aragîîka kûu kîûrûûne.

³³Ahabu nî aathithîrie mûng'uanano jwa mûrungu mûka jweetagwa Ashera. Ningî nî aathithîrie mantû jangî jamaingî mono ja kûthûûria MWATHANI, Mûrungu wa Israeli nkûrûki ya anene bonthe barîa baarî bakwaathana mbere yaawe.

³⁴ Îgiiteene rîa waathani bwaawe nîrîo Jeriko yaakîrwe kaîrî nî muntû weetagwa Hieli kuuma Betheli. Naru rûteto rûrîa MWATHANI eerîte Joshua mûtaana wa Nuni rûroojûra. Abiramu mûtaana wa Hieli ûrîa mûkûrû nî aakuîre mûsingi jûkwambwa, na Segubu, mûtaana waawe, ûrîa mûnini arakua mpingîro îkûthiria gwakwa.