Read KIMERU BIBLE PROTESTANT EDITION 1Ane 17 Bible Online

1Ane 17 - KIMERU BIBLE PROTESTANT EDITION bible

1Ane 17

¹ Kîroria gîeetagwa Elija kuuma ntûûreene ya Tishibe ndeene ya Gileadi nî eerîre mûnene Ahabu atîrî, “Ndîkwîra na mma atî, riîtweene rîa MWATHANI Mûrungu wa Israeli ûrîa ûtûûraga mwoyo, na no we ûrîa ntumîkagîra, gûtîîthîrwa kûrî na îme kana ngai mîaka îmîkai îrîa îkeeja, mwanka rîrîa nkauga kuure.”

²Ningî MWATHANI nî aarîîrie Elija aramwîra atîrî,

³“Uma aja wîte bwa gaiti ûgaiciithe akuî na kamûuro ka Kerithi, karîa karî bwa gaiti ya Jorodani.

⁴Nyuunyaga rûûjî kuuma karûûjîîne kau, na ûrîîjage biakûrîa birîa mbîîrîte nkûngûrû ikûreetagîre.”

⁵Elija nî aathîkîîre MWATHANI, areeta gûtûûra akuî na kamûuro ga Kerithi.

⁶Nawe aratua kûnyunyaga rûûjî rwa kamûuro kau, nacio nkûngûrû iratua kûmûreetagîra mîgaate na nyama o rûkîîrî na ûgoro.

⁷Îndî agûkara kagiita gagakai karûûjî kau nî kaawîre, nîûntû bwa kwaaga ngai.

⁸MWATHANI nî aarîîrie kîroria Elija aramwîra atîrî,

⁹ “Ithuranîre wîte ûgatûûre ntûûreene ya Zarefathi îrîa îrî akuî na Sidoni, nîûntû nî mbîrîte ntigwa îmwe ya nao îkûmaathagîre.”

¹⁰Tontû bûû, nî eetîre Zarefathi. Nawe areeta arakinya mpingîroone ya ntûûra îîu. Akuî na mpingîro nî kwaarî na ntigwa îmwe yaaunaga nkû. Nawe aramîîta aramîîra atîrî, “Itû ndeetera tûûjî nkuunde.”

¹¹Nayo îîtîte kûmûgîîrîra tu, Elija aramîîra atîrî, “Ûndeetere kinya kamûgaate.”

¹²Rîu ntigwa îîu îramwîra atîrî, “Ga ngûkwîra na mma riîtweene rîa MWATHANI Mûrungu waaku, ûrîa ûtûûraga mwoyo atî gûtî gantû ndî nako tiga nkuundi îmwe ya mûtu na tûguta tûnini. Naani nkwîjîte aja gûcwaa tûkû mbîta kûruga tûmûtu tûu, tûng'ana o ûu. Naani na mûtaana waakwa twarîa biakûrîa biu bia mûthia, rîu twikuîra.”

¹³Elija aramwîra atîrî, “Ûgákîra! Îta ûthuranîre biakûrîa bieenu o ûu ûkûbangîte. Îndî wambe ûndugîre kamûgaate ûndeetere. Rîu ûruge na bûrîe bûrî na mûtaana waaku.

¹⁴Nîkwîthîrwa MWATHANI Mûrungu wa Israeli ariuga ûjû, ‘Kamûtu kau na tûguta tûu, bitîkorothira mwanka ntukû îrîa ni MWATHANI nkaurithia ngai.’”

¹⁵Nayo ntigwa îîu îreeta na îrathithia o ûrîa Elija aamîîrîte. Naku nî kwaarî na biakûrîa bia kûng'ana bia kûrîîwa nî Elija na ntigwa na antû ba nja yaawe.

¹⁶Ningî o ta ûrîa MWATHANI eerîte kîroria Elija, kamûtu kau gaataanyiia kana tûguta tûthira.

¹⁷Na-rî bagûkarakara, mûtaana wa ntigwa îîu nî aajîrue, na aroombwa nî mûrimo, arakua.

¹⁸Nayo ntigwa îîu îreera Elija atîrî, “Itû muntû wa Mûrungu, nîatîa wagîta? Ka ûkwîja gwaakwa ûkaririkania Mûrungu meeyia jaakwa na ûgatûma mwana waakwa akua?”

¹⁹Elija aramwîra atîrî, “Nenkera mûtaana waaku.” Rîu Elija aramûjûkia araitia nawe kanyomba ka îgûrû karîa aakaraga na aramûrîkîîra ûrûrî.

²⁰Nawe arakaîra MWATHANI akiugaga atîrî, “Itû MWATHANI Mûrungu waakwa, nîkî ûntû wathithîria ntigwa îîjî ûntû ta bûbû? Ka wooraga mûtaana waayo na nî kwaawe ngûkara?”

²¹ Akuuga ûu, araitambûrûkia îgûrû rîa mwana ûu mainda jathatû, akîrombaga atîrî, “Itû MWATHANI waakwa riûkia mwana ûûjû.”

²²MWATHANI araigua îromba rîu, arariûkia mûtaana ûu.

²³Rîu Elija arajûkia mûtaana areenama nawe areera ng'ina atîrî, “Tega mûtaana waaku akûriûka.”

²⁴Nayo ntigwa îkwona arî mwoyo, îreera kîroria Elija atîrî, “Nkûmenya nandî atî ûrî muntû wa Mûrungu, na atî nî mma nî MWATHANI ûkwîraga mantû jarîa waaragia.”