Read KIMERU BIBLE PROTESTANT EDITION 1Ane 18 Bible Online

1Ane 18 - KIMERU BIBLE PROTESTANT EDITION bible

1Ane 18

¹Nyuma ya îgiita mma, kûrî mwakeene jwa îthatû mpareene înene, MWATHANI nî aarîîrie Elija aramwîra atîrî, “Îta ûcionanie kîrî mûnene Ahabu, naani nkaurithia ngai.”

²Tontû bûû, Elija areeta kîrî Ahabu. Îgiiteene rîu mpara nî yaang'eenti mono kûu Samaria.

³Ahabu nî eetîre Obadia, ûrîa waarûngamîrîte gîkaro kîa mûnene. Obadia nî eetîkîtie MWATHANI mono.

⁴Rîrîa Jezebeli ooragaga iroria bia MWATHANI, Obadia nî aajûkîrie iroria îgana rîmwe araitha nusu yaabio gîkurunguune kîmwe na nusu îngî gîkurunguune kîngî. Nawe nî aabareraga na mîgaate na rûûjî barî ku.

⁵Rîu Ahabu areera Obadia atîrî, “Ga twîtanie na nthîgûrû yonthe tûgîcwaga kûrîa kûrî na ithima na iguuru nîkenda tûrîîthia mbarathi na nyûmbû cieetû itîgaakue.”

⁶Tontû bûû, bareetîkanîîria rûteere rûrîa o ûmwe waao ageeta; Ahabu areeta rûteere rûmwe, Obadia areeta rûteere rûngî.

⁷Obadia eetîte nî atirimanîre na Elija. Obadia akûmûmenya araturia maru, areenamîîria, aratiirîthia ûthiû nthî, na arooria Elija atîrî, “Nîgwe itû mwathi waakwa Elija?”

⁸Elija aramûcokeria atîrî, “Îî nî ni. Îta wîre mûnene ndî aja.”

⁹Obadia aramûûria, “Nîka nthithîtie ûthûûku bûrîkû nîûntû ûgûcwaa mbûragwa nî mûnene Ahabu?

¹⁰Ga ngûkwîra na mma riîtweene rîa MWATHANI Mûrungu waaku, ûrîa ûtûûraga mwoyo atî mûnene atûmanîte ûcûûwa nthîgûrûûne cionthe. Gûtî nao ûtîracûûwa. Mûnene kinya ûrîkû, ûrîa waaugaga atî ûtîroonwa nthîgûrûûne yaawe, Ahabu nîka aamûnyuithagia muuma atî, ûgûcûûwa waûra.

¹¹Nîatîa îndî ûkûmbîîra mbîte nkaamwîre ûrî aja?

¹²A Roho wa MWATHANI akëeja gûkûjûkia, agagwikia gûntû kûngî ndauma aja? Twejania na Ahabu na akwaaga rî, tîka akaambûraga? Nî ûkûmenya bwega atî ni nthûûmba yaaku kuuma waanene bwaakwa ntwîre nkîrîte MWATHANI.

¹³Ga ûtaaigua atî Jezebeli agûtua kûûraga iroria bia MWATHANI, nî ndaithîre iroria îgana ikurunguune biîrî o gîkurunguune ndîraitha iroria mîrongo îtaano na ndaatua kûbireraga na mîgaate na rûûjî birî ku?

¹⁴Nîatîa îndî ûkûmbîîra mbîte nkeere mûnene atî ûrî aja, na ûkîmenyaga atî nîka akaambûraga ndamwîra ûu?”

¹⁵Elija aramwîra atîrî, “Ga ngûkwîra na mma riîtweene rîa MWATHANI Mweneinya ûrîa ûtûûraga mwoyo, ûrîa ni ntumîkagîra, ngaacionania kîrî mûnene naarua!”

¹⁶Rîu Obadia areeta areera Ahabu mantû jau jonthe. Ahabu areeta gûcemania na Elija.

¹⁷Rîrîa Ahabu oonere Elija, aramwîra, “Tuuge ûrî aja gwe kaumo ka thîîna ya Israeli?”

¹⁸Elija aramûcokeria atîrî, “Kaumo ka thîîna ya Israeli tî ni, îndî nîgwe na nja yeenu, nîûntû nî buî bûkûregana na maathana ja MWATHANI, bûkarombaga mîrungu ya mîng'uanano tayo Baali.

¹⁹Nandî rî, ûrîthîîthia atîrî, îîra antû bonthe ba Israeli boothûrane kîrîmeene gîa Karimeli. Ningî ûreete iroria magana jana ja mîrongo îtaano (450) bia Baali na iroria magana jana (400) bia mûrungu mûka taju Ashera birîa bireragwa nî Jezebeli.”

²⁰Tontû bûû, Ahabu aroothûrania antû bonthe ba Israeli na iroria bia Baali kûu kîrîmeene gîa Karimeli.

²¹Elija araitia nao arooria antû atîrî, “Bûgaatûûra bûthingatîte njîra ijîîrî mwanka rî? Gûkëethîrwa MWATHANI nî Mûrungu mûthaathayieni wenka, îndî gûkëethîrwa nî Baali mûrungu mûthaathayieni wenka.” Gûtî we wa antû bau wauga noo atîa.

²²Rîu Elija areera antû atîrî, “Kîrî iroria bia MWATHANI, nî ni ninka ntigi, îndî iroria bia Baali birî o magana jana ja mîrongo îtaano (450).

²³Reeteeni ndeegwa ijîîrî. Iroria bia Baali bithuure ndeegwa îmwe, bimîûrage na bimîgiitange inuku. Birîîkîîre nyama nkûûne, îndî bikágwatia mwanki. Naani nkooraga ndeegwa îîu îngî, ndîîkîîre nyama nkûûne îndî ntîgwatia mwanki.

²⁴Rîu iroria biu birombe mûrungu jwaao jwa Baali naani ndoombe MWATHANI Mûrungu waakwa. Mûrungu ûrîa ûgacokia maromba na njîra ya gwaakania mwanki, nîwe Mûrungu.” Nabo antû bareetîkanîîria na bûu augîre.

²⁵Rîu, Elija areera iroria bia Baali atîrî, “Tontû nî buî baingî rî, jûkieni ndeegwa îrîa bûkwenda bûmîthuranîre bûrî ba mbere. Bûrombe mûrungu jweenu. Îndî bûkaagwatia mwanki bwingwa.”

²⁶Nabo barathuura ndeegwa îmwe na bamîthuranîra baraambîrîria kûromba. Bareeta na mbere kûromba kuuma rûkîîrî mwanka thaa thita, bakîgondokaga bakiugaga atîrî, “Itû Baali, tûthikîîre!” Ningî bareeta na mbere kwina bakîthûngathûngûthaga boona këethîra akabaigua, îndî gûtî kajû baigua. Nabo bareeta na mbere kûromba na kwina bakîthûngathûngûthaga au mbere ya kîritîro kîa igongwana kîrîa baakîte, îndî gûtî u gwaakarîka.

²⁷Elija akwona gwakinya thaa thita araambîrîîria kûbacikûûra akîbeeraga atîrî, “Ciûmieni! Ciatîîreeni mma. Anga we tî mûrungu! Mbuga ga kûrî ûntû arî nabu, kana eethîrwe agwîta gwiteethia, kana eethîrwe ka ariûngîte! Kana kwombîka akeethîrwa ka akindi nî toro, na abwigua agookîîra!”

²⁸Tontû bûû, bararomba na inya nkûrûki bagiitemangaga na tûchiû, na imee, mwanka bonthe baraa tharike ntheri.

²⁹Nabo bareeta na mbere bagîkaaga na kûrîra gûkûnene mwanka rîrîa igongwana biaritagwa. Îndî amwe na jau jonthe gûtî we wabathikîîra, kana abaigua, kana abacokeria.

³⁰Rîu nîrîo Elija eerîre antû bonthe atîrî, “Îjaîjeeni.” Nabo antû bareeta baramûthiûrûkîra. Nakîo kîritîro kîa igongwana kîa MWATHANI kîraakwa nî Elija kaîrî, nîûntû nî kîaarî gîkûmomorwa.

³¹ Elija arajûkia maiga îkûmi na jaîrî, kûringana na mîîrîga îkûmi na îîrî ya ataana ba Jakubu tawe ûrîa MWATHANI aaere riîtwa Israeli.

³²Nawe araaka kîritîro kîa îgongwana na maiga jau, kîa kûthaathaîria MWATHANI. Aracoka areenja mûtaro gûkîthiûrûkîra. Naju jûrîngî kûûmba kûng'anîîra lita îkûmi na inya cia rûûjî.

³³Nawe araara nkû bwega kîritîroone kîu kîa igongwana, aragiitanga ndeegwa inuku, arabirîkîîra nkûûne. Nawe areera antû atîrî, “Reeteeni rûûjî mîtûngi îna, bwîtûûrîrie kîgongwana gîa gwakîîria na bwîtûûrîrie nkû.” Nabo barathithia ûu.

³⁴Elija arabeera atîrî, “Îtûûrîrieni kaîrî.” Nabo bareetûûrîria rîa jaîrî. Nawe arabeera beetûûrîrie rîa jathatû. Nabo bareetûûrîria rîa jathatû.

³⁵Naru rûûjî rureenamania na kîritîro kîa igongwana ruroojûra mûtaroone jûu.

³⁶Nacio thaa cia kûrita kîgongwana ciakinya, kîroria Elija areetaîta akuî na kîritîro kîa igongwana, araromba, akiugaga atîrî, “Itû MWATHANI, Mûrungu wa Abrahamu na wa Isaaka na wa Jakubu! Tûma kûmenyekane kuuma naarua atî nîgwe Mûrungu wenka ndeene ya Israeli. Ningî atî ûûni ndî nthûûmba yaaku na atî nthithîtie mantû jaja kûringana na rûteto rwaaku.

³⁷Itû MWATHANI, ncokeria maromba, nîkenda antû baba bamenya atî gwe nîgwe MWATHANI, na nîgwe Mûrungu, na atî nî ûkwenda bacoka kîrî gwe.”

³⁸Rîu mwanki jwa MWATHANI jûreenama jûraîîthia kîgongwana kîu gîa gwakîîria, na nkû na maiga na mûthetu na jûroomia rûûjî rûrîa rwaarî mûtaroone.

³⁹Nabo antû bonthe rîrîa boonere mantû jau, baraturia maru bareenamîîria baratiirithia moothiû nthî bakiugaga atîrî, “MWATHANI nîwe Mûrungu! MWATHANI nîwe Mûrungu.”

⁴⁰Rîu Elija areera antû atîrî, “Gwateeni iroria bibi bia Baali; na bûkaareka kînya kîmwe kîmatûka.” Nabo barabigwata. Elija arabiikia mûuroone jwa Kishoni arabiûragîra ku.

⁴¹Elija nî eerîre mûnene Ahabu atîrî, “Îta ûrîe na ûnyue; nîkwîthîrwa nî nkwigua mûruumo jwa ngai.”

⁴² Tontû bûû, Ahabu areeta kûrîa na kûnyua. Elija araitia kîrîmeene gîa Karimeli îgûrû. Araturia maru areenamîîria areekîra kîongo gatîgatî ka magûrû.

⁴³Rîu areera nthûûmba yaawe atîrî, “Îta nandî ûraithîrie bwa îria.” Nayo nthûûmba îreeta îrategeera îrauga, “Gûtî gîntû nkwona.” Elija aramîîra atîrî, “Îta kaîrî na kaîrî mainda mûgwanja.”

⁴⁴Îndî rîrîa yeetîre îîta rîa mûgwanja, nthûûmba îracoka îramwîra atîrî, “Nî nkwona kûrî gatu kanini kang'ana ja njara ya muntû, gaitîtie kuuma îrieene.” Kîroria Elija areera nthûûmba yaawe atîrî, “Îta wîre mûnene Ahabu aitie ngaarîîne yaawe ya mbarathi aciaanîre mbere ya ngai îtîramûrigîria aana.”

⁴⁵Nyuma ya kagiita gatî thau, matu jamairû jaragwatana na ruuo rûraambîrîîria kuurutana. Nayo ngai înene îraura. Mûnene Ahabu araitia ngaarîîne yaawe ya mbarathi acokeete Jezereeli.

⁴⁶Elija aroojûrwa nî inya ya MWATHANI, na araringa nguû kauna, aroogîa arakûrûkîra Ahabu njîreene arakinya Jezereeli arî mbere.