Read KIMERU BIBLE PROTESTANT EDITION 1Ane 19 Bible Online

1Ane 19 - KIMERU BIBLE PROTESTANT EDITION bible

1Ane 19

¹Mûnene Ahabu nî eerîre mwekûrû waawe Jezebeli mantû jonthe jarîa jaarî jagûkarîka na ûrîa Elija aarî akûûraga iroria bionthe bia Baali.

²Jezebeli aratûma mûtûmwa kîrî Elija akamwîre atîrî, “Rûûjû rûgîkinya thaa ta iji ntîkûthithîtie ûrîa ûraathithîîrie iroria bia Baali, mîrungu yeetû îrombûraga.”

³Tontû bûû, Elija araigua ûguaa mono aramatûka atîkeeje kûûragwa. Areeta Beerisheba îrîa îrî nthîgûrûûne ya Juda na aratiga nthûûmba yaawe ku.

⁴ Îndî Elija agwîta rûgendo rwa ntukû îmwe bwa rwanda, arakara nthî mûgunyeene jwa mûtî jwîtagwa mûrama. Araromba akiiriragîîria gûkua, arauga atîrî, “Nkûûmîrwa nî mantû, itû MWATHANI. Nî kaaba ntî o. Nî kaaba nkuîte.”

⁵Nawe aramama rungu rwa mûtî jûu jwa mûrama, araawua nî toro. O rîo mûraîka aramûringithia aramwîra atîrî, “Ûkîîra ûrîe.”

⁶Elija akîgarûka aroona mûgaate jûkaandîri maigeene ja mwanki na gakiri ka rûûjî. Biu biaarî akuî na kîongo kîaawe. Nawe ararîa na aranyua aracoka aramama kaîrî.

⁷Nawe mûraîka wa MWATHANI areeja rîa jaîrî aramûringithia aramwîra atîrî, “Ûkîîra ûrîe, ûtîkeeje kûûmîrwa nî rûgendo.”

⁸Elija arookîîra ararîa na aranyua, areetîra nyiro îîu ntukû mîrongo îna mwanka arakinya kîrîmeene gîkîtheru kîrîa gîtagwa Sinai.

⁹Arî kûu, nî aatonyere gîkurunguune araraara ku. Rîu MWATHANI nî aamwarîîrie aramwîra atîrî, “Elija, nîatîa ûkûthithia aja?”

¹⁰ Aramûcokeria atîrî, “Itû MWATHANI, Mûrungu Mweneinya, nîgwe gwenka ntwîre gûtumîkîra. Îndî antû ba Israeli nî baunîte kîrîkanîro gîaaku, baamomoranga iritîro biaaku bia igongwana na booraga iroria biaaku, ndaatigwa ninka. Ningî kinya ni no bagûncwaa baambûraga.”

¹¹MWATHANI aramwîra atîrî, “Umîra ûrûngame mbere yaakwa au kîrîmeene, nîkwîthîrwa ni MWATHANI ngaakûrûkîîra au.” Rîu kîbuubani gîkînene gîgwatûranga maiga na irîma kîrakûrûka. Îndî MWATHANI ataarî ndeene yaakîo. Nakîo kîbuubani kîathira, nthî îrainaina. Îndî MWATHANI ataarî ndeene ya kwinaina kwa nthî.

¹²Nayo nthî yaathiria kwinaina, mwanki jûreeja. Îndî MWATHANI ataarî ndeene ya mwanki. Nyuma ya mwanki, kajû gagaceke kareeja gakari ta ka muntû ûkwaria na kîoe.

¹³Rîrîa Elija aaigîrue kajû kau, nî aakunîkîre ûthiû na nguû yaawe ya îgûrû, araumagara ararûngama mûromoone jwa gîkurungu. Nako kajû karamwîra atîrî, “Elija, nîatîa ûkûthithia aja?”

¹⁴Elija aramûcokeria atîrî, “Itû MWATHANI, Mûrungu Mweneinya, nîgwe gwenka ntwîre gûtumîkîra. Îndî antû ba Israeli nî baunîte kîrîkanîro, baamomoranga iritîro biaaku bia igongwana, na booraga iroria biaaku, ndaatigwa ninka. Ningî kinya ni no bagûncwaa baambûraga.”

¹⁵ MWATHANI aramwîra atîrî, “Îta ûcoke na njîra ya rwanda rûrîa rûrî akuî na ntûûra ya Damaski. Waakinya wîtûûrîrie Hazaeli maguta ûmwathûre aee mûnene wa Sîria.

¹⁶ Ningî wîtûûrîrie Jehu mûtaana wa Nimushi maguta ûmwathûre aee mûnene wa Israeli. Ûcoke wîtûûrîrie Elisha mûtaana wa Shafati kuuma Abeli-mehola maguta ûmwathûre aee kîroria antûûne aaku.

¹⁷Nawe muntû ûrîa ûkoonoka kûûragwa nî mûnene Hazaeli akooragwa nî Jehu; nawe ûrîa ûkoonoka kûûragwa nî Jehu, akooragwa nî Elisha.

¹⁸ Îndî ngaatigaria antû ngiri mûgwanja (7,000) ndeene ya Israeli barîa bateenamîîria kana bacûnca mîrungu ya mîng'uanano tayo Baali.”

¹⁹Tontû bûû, kîroria Elija nî aumîre au areeta areethîra Elisha mûtaana wa Shafati akîrîmaga na mûraû. Nî kwaarî na mîraaû îngî îkûmi na jûmwe mbere yaawe. Elisha aarîmaga na mûraû jwa mûthia. Rîu Elija arakûrûkîîra akuî nawe na aramûrîkîîra nguû yaawe ya îgûrû.

²⁰Elisha aratiga kûrîma, aramatûka athingatîte Elija. Elisha aramwîra atîrî, “Itû mbîtîkîîria mbîte nkeere aciari baakwa batigwe bwega, rîu mbîje nkûthingate.” Elija aramûûria atîrî, “Îî Îta! Ga kûrigîîrîtie?”

²¹Tontû bûû, Elisha aratiga Elija aracoka. Arajûkia gichooki kîaawe arakiunanga na arathînja ndeegwa. Araruga nyama na nkû cia gîchooki kîu. Aranenkera antû nyama bararîa. Nyumeene araithuranîra areeta arathingata Elija, arambîrîria kûmûtumîkagîra.