Read KIMERU BIBLE PROTESTANT EDITION 1Ane 2 Bible Online

1Ane 2 - KIMERU BIBLE PROTESTANT EDITION bible

1Ane 2

¹Rîrîa Daudi aarî akuî gûkua, nî eetîre mûtaana waawe Solomoni aramwîra atîrî,

³Ningî thithagia ûrîa MWATHANI Mûrungu waaku augîîte na wathîkagîre Waatho na mataaro na maathana jaawe jarîa jaandîki maathaneene ja Musa. Wathithia ûu ûkathinyaara mîtîreene yaaku na ngûgîîne ciaaku cionthe.

⁴Naagwe ûkëeja kwathîkîra MWATHANI akojûria wîrane bûrîa aanciîtîîrie atî, nchiarwa ciaakwa ikaathaga Israeli bunka ciaathîkîîra maathana jaawe na nkoro ciaao na mîoyo yaao yonthe.

⁵ Ningî, untû bûngî bûrîa ûtîbuîrîte kûûrîrua nîbu nî ûrîa Joabu mûtaana wa Zeruia aanthithîîrie. Gwe nî ûkûririkana ûrîa aambûragîîre atongeeria baîrî ba njûûrî cia Israeli, tabo Abuneri mûtaana wa Neri na Amasa mûtaana wa Jetheri. Nî aaboragîre îgiiteene rîa thîîrî akirîîria nîûntû bwa antû barîa booragîri ndweene. Narîo îgi rîrîa aambîkîîre nîûntû bwa kûûraga antû bataarî na maatia nî rînthangîkagia kinya naarua tûrî.

⁶Nandî tumîra ûûme bwaaku woone ûrîa ûkathithia, ûtîkareke atindira ûtîmûûragîte.

⁷ Îndî ûthithîrie ataana ba Barizilai Mûgileadi mantû ja kîaao ûbaeethie acoore baaku ba ndeene. Nîkwîthîrwa nî baanteetherie rîrîa ndaamatûkîte Abusalomu mûtaana wa nyakwe.

⁸ Ningî ûûngî nî Shimei mûtaana wa Gera Mûbenjamini kuuma Bahurimu. We nî aandumîre kîrumi gîkîthûûku mono ntukû îrîa ndeetîte Mahanaimu. Îndî rîrîa eejîre kûnthagaana nkiuna Jorodani, nî ndamûciîtîîrie riîtweene rîa MWATHANI ndamwîra ntîmûûraga.

⁹Nandî rî, ûkaareka akua atîkanûkîîtue. Gwe tumîra ûûme bwaaku ûmenye ûrîa ûkathithia, ûtîkareke atindira ûtimûûragîte.”

¹⁰Daudi nî aakuîre na arathikwa ntûûreene ya Daudi.

¹¹ Nawe aarî akwatha Israeli mîaka mîrongo îna; aathanîre mîaka mûgwanja arî Heburoni, na mîaka mîrongo îthatû na îthatû arî Jerusalemu.

¹² Tontû bûû, Solomoni nî aaere mûnene antû a îthe Daudi na waathani bwaawe nî bwaagwatîre inya mono.

¹³Adonija mûtaana wa Hagithi nî eetîre kîrî Bathisheba ng'ina wa Solomoni. Bathisheba aramûûria atîrî, “Wîjîte na thîîrî?” Adonija aracokia, “Îî mbîjîte na thîîrî.”

¹⁴Rîu Adonija aramwîra atîrî, “Kûrî u nkwenda gûkwîra.” Bathisheba aramûûria “Nî bûrikû.”

¹⁵Rîu Adonija aramwîra atîrî, “Nî ûkûmenya atî nî ni ndîreejaga kwaa mûnene na antû bonthe ba Israeli nîu bareerîgîîrîte. Îndî nî kûragarûkîre na mûtaana wa chiaa Solomoni aa mûnene kûringana na wendo bwa MWATHANI.

¹⁶Nandî rî, ndî na ûntû bûmwe nkwenda gûkûromba naagwe itû ûkandegeera bu.” Bathisheba aramwîra atîrî, “Û mbîîra bu.”

¹⁷ Adonija aramwîra atîrî, “Tontû nî nkûmenya gwe ûtîregeerwa, itû mbûûrîria mûnene Solomoni aanenkere Abishagi Mûshunemu aee mûka waakwa.”

¹⁸Bathisheba aramwîra atîrî, “Ûkuuga bwega; naani ngakwarîrîîria kîrî mûnene.”

¹⁹Tontû bûû, Bathisheba nî eetîre kwaarîrîîria Adonija kîrî mûnene Solomoni. Nawe mûnene aramûthagaana na gîtîîo. Rîu arakarîra rûriga rwaawe rwa ûnene, ningî areetîria ng'ina gîtî. Bathisheba arakara gîtîîne rûteere rwa ûrîo rwa mûnene.

²⁰Bathisheba arauga atîrî, “Ndî na ûntû bûbûkai nkwenda gûkûromba, na ûkandegeera.” Mûnene nawe aramwîra, “Uga ûrîa ûkwenda, maama, nîûntû ntîkûregeera.”

²¹Bathisheba arauga atîrî, “Reka Adonija mûtaana wa abaagu ajûkie Abishagi Mûshunemu aee mûka waawe.”

²²Mûnene Solomoni aracokeria ng'ina atîrî, “Nîkî tontû ûkûmbîîra mûnenkere Abishagi? No ûmûrombere kinya ûnene, nîûntû nîwe mûkûrû nja yeetû na ningî nî aigîki nî Abiathari, mûthînjîri-Mûrungu, na Joabu mûtaana wa Zeruia!”

²³Mûnene Solomoni araciîtia riîtweene rîa MWATHANI akiugaga atîrî, “MWATHANI arombûraga këethîra ntîûraga Adonija nîûntû bwa kûromba ûntû bûu!

²⁴Anga tî MWATHANI ûmpeethetie mûnene antû a Baaba Daudi? Anga tî we ûûjûrîtie wîrane bwaawe anenkanîra waathani kîrî ni na nchiarwa ciaakwa? Ni naani ka ngûciîtia na MWATHANI ûrîa ûtûûraga mwoyo atî Adonija atîraara o naarua.”

²⁵Tontû bûû, mûnene Solomoni aratûma Benaia mûtaana wa Jehoiada; nawe arooraga Adonija.

²⁶ Mûnene areera Abiathari mûthînjîri-Mûrungu atîrî, “Aana kweenu Anathothi! Gwe ûbuîrîte kûûragwa, îndî ntîkûûraga nandî nîûntû nî waamenyagîîra Îthandûkû rîa Maathana ja MWATHANI Mûrungu rîrîa baaba Daudi aathanaga. Ningî nî waathangîkaga na baaba mîthangîkoone yonthe.”

²⁷ Solomoni areenga Abiathari ngûgîîne ya ûthînjîri Mûrungu. Nabu ûntû bûbû bûroojûria rûteto rwa MWATHANI rûrîa aarîîtie arî Shilo rwegiî Eli mûthînjîri-Mûrungu na nchiarwa ciaawe.

²⁸Joabu nî aagwete Adonija mbaru kinya këethîra mbereene ataagwete Abusalomu mbaru. Tontû bûû, akwigua ûrîa gwaakarîkîre aramatûka îemeene rîa gûcemanîria na MWATHANI na aragwata koona cio-inya cia kîritîro kîa igongwana.

²⁹Mûnene Solomoni rîrîa aamenyithîrue atî Joabu nî aarî îemeene agwete mîthia ya kîritîro, aratûmana nîkenda oorua kîrîa gîatûmîte amatûka nau. Joabu aracokia atî aamatûkîre kîrî MWATHANI tontû nî aakîraga mûnene Solomoni. Rîu mûnene aratûma Benaia eeta kûûraga Joabu.

³⁰Benaia areeta îemeene rîa MWATHANI areera Joabu atîrî, “Mûnene auga uume wîîje.” Îndî Joabu aramûcokeria atîrî, “Arî, ni ntiuma. Ngakuîra o aja.” Benaia aracoka kîrî mûnene aramwîra ûrîa Joabu aacokia.

³¹Mûnene aramwîra, “Thithia ûrîa Joabu akwîra. Mûûragîre o na ûmûthike, nîkenda ûtwangûra îgi rîrîa Joabu aatwîkîîre, ûûni na nchiarwa cia baaba Daudi, rîrîa ooragîre antû bataarî na maatia.

³²MWATHANI agaakanûkia Joabu nîûntû bwa kûûragana kûrîa ooraganîre baaba atîkûmenya. We nî ooragîre antû baîrî babaagîru nkûrûki yaawe, tabo Abuneri mûtaana wa Neri mûtongeeria wa njûûrî ya Israeli na Amasa mûtaana wa Jetheri mûtongeeria wa njûûrî ya Juda.

³³Joabu na nchiarwa ciaawe barotûûraga kûtheethwa nî gîkuû kîa Abuneri na Amasa kenya na kenya. Îndî MWATHANI arwaa Daudi na nchiarwa ciaawe na waathani bwaawe, ûthinyaari magiita jonthe.”

³⁴Rîu Benaia mûtaana wa Jehoiada nî eetîre, arooraga Joabu na aramûthika nja yaawe îrîa yaarî kûu bûûrîîne.

³⁵Mûnene nî aaeetherie Benaia mûtaana wa Jehoiada mûtongeeria wa njûûrî antû a Joabu, na araeethia Zadoki mûthînjîri-Mûrungu antû a Abiathari.

³⁶Mûnene nî eetîre Shimei aramwîra atîrî, “Ciakîre nyomba gûkû Jerusalemu, ûtûûre ku, na ûkorweeta oome ya ntûûra îîjî.

³⁷Menya atî weeja kuumagara ûkagiitania kamûuro ga Kidironi, ntukû îîu ûgaakua, naagwe nîgwe ûkeethîrwa wireterete thîîna îîu.”

³⁸Shimei aracokeria mûnene atîrî, “Ûkuuga bûbwega. Nkaathithia ûrîa wauga.” Shimei nî aatûûrîre Jerusalemu îgiita rîrîraaja.

³⁹Îndî, nyuma ya mîaka îthatû, nkombo ijîîrî cia Shimei nî ciamatûkîre kîrî mûnene wa Gathi, tawe Akishi mûtaana wa Maaka. Shimei nî aamenyithîrue atî bakûûra.

⁴⁰Shimei araitia ntigiri na areta Gathi kwa Akishi gûcwaa nkombo ciaawe. Araciona na araicokia nja kwaawe.

⁴¹Solomoni nî eerîrwe atî Shimei nî aarî aakuumagara Jerusalemu.

⁴²Mûnene areeta Shimei, aramwîra atîrî, “Anga ûtanciîtîîrie riîtweene rîa MWATHANI atî, ûtîkoroumagara Jerusalemu, na nî ndaagûciîtîîrie atî rîrîa ûkaumagara no mwanka ûkue. Anga ûteetîkîrîîrie ûntû bûu na waambîîra ûkambathîkîra?

⁴³Nîkî îndî uunîte wîrane bwaaku na MWATHANI na waarega kûmbathîkîra?

⁴⁴Gwe nî ûkûririkana bwega mantû jamaaî jonthe jarîa wathithîîrie baaba Daudi. Tontû bûû, MWATHANI agaagûkanûkia nîûntû bwa jo.

⁴⁵Îndî MWATHANI akantharima na atûme waathani bwa baaba Daudi bwîte na mbere kûgwata inya kenya na kenya.”

⁴⁶Rîu mûnene ararita waatho nawe Benaia mûtaana wa Jehoiada, arooraga Shimei. Solomoni arairikîria ûnene bwaawe.