Read KIMERU BIBLE PROTESTANT EDITION 1Ane 20 Bible Online

1Ane 20 - KIMERU BIBLE PROTESTANT EDITION bible

1Ane 20

¹Beni-hadadi mûnene wa Sîria nî ûthûranîîrie njûûrî ciaawe cionthe. Nawe agwati mbaru nî anene mîrongo îthatû na baîrî (32), barî na mbarathi cia ndwaa na ngaarî cia ndwaa nî bacîgîîrîrie ntûûra ya Samaria na baramithûkîra.

²Beni-hadadi nî aatûmîre atûmwa kîrî Ahabu, mûnene wa Israeli aramwîra atîrî, “Ûûni mûnene Beni-hadadi ndîkwîra ûjû:

³nenkanîra fetha yaaku, na thaabu yaaku, na aka baaku barîa athongi mono, na aana baaku bonthe bae baakwa.”

⁴Mûnene Ahabu wa Israeli arabacokeria arabeera atîrî, “Îteeni bwîre mwathi waakwa mûnene Beni-hadadi atî, ‘Ûûni na bionthe ndî nabio nî biaawe.’”

⁵Nabo atûmwa ba Beni-hadadi nî beetîre kîrî Ahabu kaîrî baramwîra ntûmwa ya Beni-hadadi îrîa yaugaga ûjû, “Ûûni Beni-hadadi ndîraatûmanîre kîrî gwe ngîkwîraga, ‘Ûnenkere fetha, na thaabu, na aka baaku, na aana baaku,’

⁶îndî nandî nî asikarî baakwa ngatûma rûûjû thaa ta iji, beeje bakunguruthanie kunthe gîkaroone gîaaku, na nja cia atongeeria baaku. Bajûkie bionthe birîa bakeenda, birîa bakoona birî bia gîtûmi.”

⁷Rîu Ahabu mûnene wa Israeli nî eetîre atongeeria bonthe ba nthîgûrû ya Israeli arabeera ûjû, “Atîrî, mûnene wa Sîria nîka agûcwaa gûtûreteera thîîna; nîkwîthîrwa nî araatûmanîre mûnenkera aka baakwa na aana baakwa na fetha ciaakwa na thaabu yaakwa. Naani ntîraregere nabio.”

⁸Nabo atongeeria bonthe na antû bonthe, nî baamwîrîre atîrî, “Ûkámûnoga kana ûthithia ûrîa akuuga.”

⁹Tontû bûû, mûnene Ahabu aracokeria atûmwa ba Beni-hadadi atîrî, “Îîreeni mwathi waakwa mûnene atîrî, ‘Nî ndîraarî ndîgwîtîkîîria kûthithia bûrîa araambûûrîtie mbere. Îndî bûbû bwa nyuma, nkûrega.’” Nabo atûmwa bau bareeta bareera mûnene Beni-hadadi ûrîa mûnene Ahabu augîre.

¹⁰Beni-hadadi nî aatûmanîre kaîrî kîrî mûnene Ahabu arauga atîrî, “Mîrungu îronthithîria bûbûûî na îmbûrage, ndarega kûthiria ntûûra ya Samaria buru mwanka antû baakwa baaga mûthetu jwa gûkamata na nkuundi.”

¹¹Ahabu arabacokeria atîrî, “Îteeni bwîre Beni-hadadi, ndamwîra ûjû: ‘Muntû atiikumagia mbere atîreeta ndweene îndî aikumagia oombana ndweene.’”

¹²Rîrîa Beni-hadadi eeragwa nteto iu nîka baanyunyaga na anene bangî barî maemeene. Nawe areera asikarî baawe atîrî, “Ibangeeni bûkaithûkîre ntûûra ya Samaria.” Nabo baraibanga.

¹³Kûrakara atîrî, kîroria kîmwe nî gîeetîre kîrî Ahabu mûnene wa Israeli kîramwîra atîrî, “MWATHANI ariuga ûjû: ‘Nî ûkwona njûûrî îîjî înene ûjû? Atîrî, nkaamînenkanîra kîrî gwe naarua îîjî. Naagwe ûkaamenya atî ni nî ni MWATHANI.’”

¹⁴Ahabu arooria atîrî, “Nûû ûgaatumîra kûthithia ûu?” Kîroria kîracokia atîrî, “MWATHANI ariuga nî asikarî babeethî barîa bakaragia arûngamîîri ba tûthîgûrû tûrîa tûrî waathoone bwaaku.” Ahabu arooria, “Nûû ûgaatongeeria njûûrî îîu?” Nakîo kîroria kîramûcokeria, “Nî ûûgwe.”

¹⁵Rîu Ahabu aroothûrania asikarî barîa baarî babeethî baakaragia arûngamîîri barakinya magana jaîrî ja mîrongo îthatû na baîrî (232). Ningî arathuranîra asikarî ba Israeli ngiri mûgwanja (7,000) barathingata bau.

¹⁶Nabo baraumagara kûrî thaa thita. Îgiita rîu mûnene Beni-hadadi no aanyunyaga barî na atongeeria barîa mîrongo îthatû na baîrî barîa baamûgwataga mbaru barî maemeene.

¹⁷Nabo asikarî barîa baarî babeethî nî baumagarîre barî mbere. Nabo achûnkûûni barîa mûnene Beni-hadadi aarî agûtûma, baracoka baramwîra atîrî, “Kûrî antû bakuumagara ntûûreene ya Samaria.”

¹⁸Rîu Beni-hadadi arauga atîrî, “Îteeni bûbareete barî mwoyo, bëethîrwa beejîte gûcwaa thîîrî kana gûcwaa ndwaa.”

¹⁹Tontû bûû, asikarî babeethi barîa bakaragia atongeeria nî baaumagarîre bathingati nî njûûrî ya Israeli.

²⁰O asikarî nî ooragaga muntû ûrîa aarûjaga nawe. Asikarî ba Sîria nî baamatûkîre, îndî asikarî ba Israeli bareengana nabo. Mûnene Beni-hadadi wa Sîria nî aamatûkîre na mbarathi, barî na asikarî baawe ba mbarathi.

²¹Mûnene wa Israeli nî aaumagarîre arataa mbarathi, amwe na ngaarî cia ndwaa. Nawe nî ooragîre antû ba Sîria babaingî mono.

²²Nakîo kîroria kîmwe nî gîeetîre kîreera Ahabu mûnene wa Israeli atîrî, “Ambîîria kwithuranîra o nandî; ûbange njûûrî, na ûmenye ûrîa ûkaathithia, nîûntû mûnene wa Sîria agakwithûkîra mwambîrîrioone jwa mwaka jûu jûngî.”

²³Atongeeria ba mûnene Beni-hadadi wa Sîria nî baamwîrîre atîrî, “Mîrungu ya Israeli nî mîrungu îrîa îkaraga irîmeene. Tontû bûû, nîkîo gîtûmi baratûûmbîre ndweene. Îndî nandî ga tûrwîre mûgwanthîîne na nî mma tûkaboomba.

²⁴Naagwe ûthithie ûjû: ûkáreka njûûrî îtongeerua nî anene barîa mîrongo îthatû na baîrî (32), îndî nî îtongeerue nî atongeeria ba njûûrî.

²⁵Ûcoke ûthuranîre njûûrî înene o ta îrîa yaarî o mbere, na mbarathi na ngaarî cia ndwaa ing'ana o ta irîa irataîrwe. Rîu tûkaarwîra nabo bûûrîîne na nî mma tûkaboomba.” Beni-hadadi arabaigua arathithia ûrîa baamwîrîre.

²⁶Naju mwambîrîrioone jwa mwaka, Beni-hadadi nî aathuranîîre njûûrî ya Sîria bareeta ntûûra ya Afeki kûrwaa na Israeli.

²⁷Njûûrî ya asikarî ba Israeli nî yaathuranîîrwe îranenkerwa mathaga ja ndwaa. Njûûrî ya Sîria yoojûri kunthe. Îndî njûûrî ya Israeli yaambîte kambî mbere ya njûûrî ya Sîria na yaakari ta tûkundi twîîrî twa mbûri tûrîîthîtue.

²⁸Nawe muntû wa Mûrungu nî eetîre kîrî mûnene wa Israeli aramwîra atîrî, “MWATHANI ariuga ûjû: ‘Tontû antû ba Sîria baugaga ndî Mûrungu ûrîa ûtûûraga irîmeene akî, na ntîtûûraga igwanthîîne, ngatûma bûûmbe njûûrî îîu nene ya Sîria ndweene, nîrîo bûkamenya atî ni nî ni MWATHANI.’”

²⁹Nabo Asîria na Aisraeli nî baakarîre ntukû mûgwanja kambîîne irîa cierekene. Nayo ntukû ya mûgwanja îgûkinya barambîrîria kûrwaa. Nabo antû ba Israeli nî booragîre asikarî ngiri îgana rîmwe (100,000) ba Sîria ntukû îmwe.

³⁰Asikarî ba Sîria barîa baatigeere nî baamatûkîre bareeta ntûûreene ya Afeki. Rûthingo rwa ntûûra rûrabagwîra rûrooraga asikarî ngiri mîrongo îîrî na mûgwanja (27,000). Ningî kinya mûnene Beni-hadadi nî aamatûkîre areeta gwiciitha kanyomba kamwe ka ndeene ntûûreene îîu.

³¹Nabo antû barîa baamûtumîkagîra baramwîra atîrî, “Tontû nî twigîîtue atî anene ba Israeli nî ba kîaao, îtîkîîria twîkîre mathango tuuna tweetû na twoge mîkanda biongo kwonania nî twinyiîtie. Kwombîka mûnene wa Israeli agakwigîîrua kîaao akarega gûkûûraga.”

³²Rîu bareekîra mathango na baraoga mîkanda biongo, bareeta kîrî mûnene Ahabu baramwîra atîrî, “Nthûûmba yaaku mûnene Beni-hadadi nî agûkûromba ûtîkamûûrage.” Ahabu arabooria atîrî, “Anga arî mwoyo? Nkwigua bwega tontû we nî mûtaana wa chiaa.”

³³Nabo atongeeria ba njûûrî ba mûnene Beni-hadadi nî baategeete boona këethîra nî aarî na wega. Akûbeera Beni-hadadi nî mûtaana wa ng'ina, baramenya o ntûti atî na ûthûûku. Baramwîra, “Nî mma nî mûtaana wa nyakwe.” Ahabu arabeera atîrî, “Îteeni bûmûreete.” Beni-hadadi areeta kîrî mûnene Ahabu. Ahabu aramwîtîkîîria aitia ngaarîîne yaawe ya ndwaa.

³⁴Rîu Beni-hadadi aramwîra atîrî, “Ngagûcokeria ntûûra irîa baaba aataîte kuuma kîrî abaagu, na wenda no ûciakîre nyomba cia biashara ntûûreene ya Damaski o ta ûrîa baaba aaciakîrîte ntûûreene ya Samaria.” Mûnene Ahabu aramwîra atîrî, “Tontû ûkuuga ûu, ngakûrekeeria wîte.” Nabo bareekanîîra kîrîkanîro. Mûnene Ahabu aramûrekeeria areeta.

³⁵Nakîo kîroria kîmwe kîa gîkundi kîa iroria nî kîerîre kîngî atîrî, “MWATHANI akwîra ndinga.” Îndî kîroria kîu kîngî kîrarega.

³⁶ Nakîo kîroria kîu kîeri kîringwe kîreera kîngî atîrî, “Nîkwîthîrwa ûtîrathithia ûrîa MWATHANI augîîte, twathûkana naagwe akî ûkooragwa nî ngatûnyi.” O ûu kîroria kîu gîeeta, kîratirimana na ngatûnyi, îrakîûraga.

³⁷Nakîo kîroria kîu kîeri kîriingwe, nî kîerîre muntû ûngî atîrî, “Itû ndakwerenca ndinga.” Nawe muntû ûu arakîriinga na inya mwanka aragîîkîra rûgûma.

³⁸Nakîo kîroria kîu kîracioga ûthiû na gîtambaa gîtîkamenyekane kîreeta kîrarûngama rûteere rwa njîra gîetereete mûnene wa Israeli akûrûka.

³⁹Rîrîa mûnene wa Israeli aakûrûkîte kîroria nî kîamwîrîre atîrî, “Ni nthûûmba yaaku nî ndîraarî ndweene. Kûraakarîre atîrî, muntû ûmwe nî arandeeteere mûtae arambîîra, ‘Karia muntû ûûjû, na akëeja kûûra ûkooragwa antûûne aawe, kana ûrîee baini ya fetha ngiri ithatû (3,000).’

⁴⁰Naani ni nthûûmba yaaku ndaingîyia mantû, muntû ûu aûra.” Mûnene Ahabu aramwîra atîrî, “Ûkwigiitîra îgamba gwengwa. Nî gûkare o ûu wauga.”

⁴¹Nakîo kîroria kîraritanga gîtambaa ûthiû, rîu mûnene aramenya nî ûmwe wa iroria.

⁴²Rîu kîroria kîramwîra atîrî, “MWATHANI ariuga ûjû: ‘Tontû nî ûrarekererie muntû ûrîa ndîraugîîte ooragwe amatûka, ûkooragwa antûûne aawe na njûûrî yaaku yûûragwe antûûne a njûûrî yaawe.’”

⁴³Mûnene Ahabu araana kûu Samaria aithikîîrîte na anogi nkoro mono.