Read KIMERU BIBLE PROTESTANT EDITION 1Ane 21 Bible Online

1Ane 21 - KIMERU BIBLE PROTESTANT EDITION bible

1Ane 21

¹Akuî na gîkaro kîa Ahabu, mûnene wa Samaria, kîrîa kîrî Jezereeli nî kwaarî na muunda jwa muntû weetagwa Nabothi.

²Ntukû îmwe mûnene Ahabu nî eerîre Nabothi atîrî, “Nenkera muunda jûjû jwaaku jwa mîzabibû mpaande nyani, nîûntû jûrî akuî na gîkaro gîaakwa. Naani ngakûnenkera jûngî jûmwega nkûrûki ya jûu. Ningî woona kwagîrîte ngaakûgûrîra ju.”

³Îndî Nabothi areera Ahabu atîrî, “MWATHANI akororekeeria nkûnenkera mbûrago ya biûjûjû.”

⁴Ahabu arakûrûka nyomba yaawe athûûri na anogi nkoro mono nîûntû bwa ûrîa eeri nî Nabothi ûrîa Mûjezireeli. Tontû nî aarî akûmwîra, “Ntîkûnenkera mbûrago ya biûjûjû.” Nawe mûnene aramama ûrûrîîne bwaawe eerekerete rûthingo, atîkûrûma gantû.

⁵Jezebeli, mwekûrû waawe nî eetîre kîrî we arakûrûka aramûûria atîrî, “Nîatîa withikîrîte ûjû? Nîmbi îgûtûma ûrega kûrîa biakûrîa?”

⁶Ahabu aramûcokeria aramwîra atîrî, “Nîka mbîîrîre Nabothi ûrîa Mûjezireeli aanenkere muunda jwaawe jwa mîzabibû mûgûrîre, kana këethîra nî akwenda mûnenkere jûngî, nawe aarega.”

⁷Mwekûrû waawe Jezebeli aramwîra atîrî, “Uga tîgwe mûnene wa Israeli? Ûkîîra, ûrîe ûgwîrîîtue. Ûûni nî ni ngaakûnenkera muunda jwa mîzabibû jwa Nabothi ûu Mûjezireeli.”

⁸Jezebeli nî aandîkîîre atongeeria na antû ba îgweta ba ntûûra ya Jezereeli barûga areekîra caini ya mûnene Ahabu na arariinga mûûri jwa mûnene.

⁹Nayo barûga yaugaga ûjû, “Tueni ntukû ya gûciata biakûrîa, na bwîtane mûcemanio, bwee Nabothi gîtîîo.

¹⁰Rîu bûcwee ngîti ijîîrî ciuge atî nî arumîte Mûrungu na aruma mûnene. Naabuî bûmuumagarie oome ya ntûûra bûmûûrage na maiga.”

¹¹Nabo atongeeria ba ntûûra îîu, na antû ba îgweta, barîa baatwîre ntûûreene îîu, amwe na Nabothi nî baathithîtie ûrîa Jezebeli augîîte, o ta ûrîa barûga ciaawe irîa aandîkîte ciaugaga.

¹²Nabo nî baatuîre ntukû ya gûciata biakûrîa, na baraa Nabothi gîtîîo.

¹³Nacio ngîti irîa ijîîrî irakara nthî akuî na Nabothi, irakûûjîîra atî Nabothi nî aarî akûruma Mûrungu na aruma mûnene. Tontû bûû, antû baramuumagaria oome ya ntûûra, baramûûraga na maiga.

¹⁴Rîu baratûmana kîrî Jezebeli baramwîra atîrî, “Nabothi akûûragwa na maiga na agûkua.”

¹⁵O rîrîa Jezebeli aigîrue ûntû bûu, na atî Nabothi akûûragwa na maiga akua, nî eerîre mûnene Ahabu atîrî, “Îta ûjûkie muunda jûrîa jwa mîzabibû jwa Nabothi ûrîa Mûjezireeli jûrîa araregeete gûkwenderia.”

¹⁶Ahabu akwigua atî Nabothi nî akuîte, nî eetangîre nîkenda ajûkia muunda jûu jwa Nabothi jwa mîzabibû jwaa jwaawe.

¹⁷MWATHANI nî aarîîrie kîroria Elija ûrîa waarî wa kuuma ntûûra ya Tishibi aramwîra atîrî,

¹⁸“Îta kîrî Ahabu mûnene wa Israeli ûrîa ûrî Samaria. Naagwe ûkamwîthîra muundeene jwa Nabothi jwa mîzabibû akîendaga kûjûjûkia jwaa jwaawe.

¹⁹ Naagwe ûmwîre atî ni MWATHANI ndîmwîra atîrî, ‘Ga ûkûûraga muntû na ûkajûkia into biaawe?’ Ningî ûmwîre, ‘Ndîkwîra na mma atîrî, arîa kurû iraacûnîîre tharike ya Nabothi nîo igaacûnîra kinya yaaku.’”

²⁰Ahabu akwona Elija aramwîra atîrî, “Nîka wantuîkîîria gwe mûnthû waakwa?” Elija aramwîra atîrî, “Îî ngûkwîthîîria. Gwe nî ûcieejanîte kûthithagia mantû jarîa MWATHANI athwîre.

²¹Tontû bûû, MWATHANI arîkwîra atîrî, ‘Ngaakûgera ngero; nthirie nchiarwa ciaaku na mbûrage arûme ba nja yaaku bëethîrwa barî nkombo kana batî nkombo.

²²Nkaathiria antû ba nja yaaku o ta ûrîa ndaathirîrie antû ba nja ya Jeroboamu mûtaana wa Nebati na ba nja ya Baasha, mûtaana wa Ahija. Nîkwîthîrwa nî ûnthûûrîîtie mono na watûma Aisraeli beeyia.’

²³ Ningî mantûûne jegiî mwekûrû waaku Jezebeli, MWATHANI ariuga atîrî, ‘Kiimba kîaawe gîkaarîîrwa ntûûreene ya Jezereeli nî kurû.’

²⁴Muntû wa ndûgû cieenu ûrîa ûgaakuîra ntûûreene akarîîwa nî kurû, na ûrîa ûgaakuîra bûûrîîne akaarîîwa nî nyoni cia îgûrû.”

²⁵Gûtoonora muntû ûngî ta Ahabu, akîathagwa nî mwekûrû waawe Jezebeli, waacieejanîte kûthithia mantû jarîa MWATHANI athwîre.

²⁶Ahabu nî aathithîrie moothûûku ja kûthaathayia mîrungu ya mîng'uanano ta îrîa Aamori baathaathagia, barîa MWATHANI aarî akwînga nthîgûrû îîu nîkenda Aisraeli batûûra ku.

²⁷Rîrîa mûnene Ahabu aigîrue mantû jau nî aatambûrangîre nguû, areekîra mathango, na araciata biakûrîa arambîrîîria kûmamagîra mathango na gwîtaga aithikîîrîte.

²⁸MWATHANI nî eerîre kîroria Elija atîrî,

²⁹“Ûkwona ûrîa Ahabu ainyiîtie? Tontû bûû, ntîmûgera ngero arî mwoyo, îndî ngeeteera mwanka mûtaana waawe aambîrîîrie kwaathana rîu ndeete ûthûûku bûrîa mbugîrîte.”