Read KIMERU BIBLE PROTESTANT EDITION 1Ane 22 Bible Online

1Ane 22 - KIMERU BIBLE PROTESTANT EDITION bible

1Ane 22

¹Sîria na Israeli nî ciaakarîre irî na thîîrî mîaka îthatû.

²Îndî mwakeene jwa îthatû kûrî na thîîrî o ûu, mûnene wa Juda ûrîa weetagwa Jehoshafati nî eetîre kwona mûnene Ahabu wa Israeli.

³Mûnene Ahabu nî eerîre atongeeria baawe atîrî, “A nî bwijî ntûûra ya Ramothi-gileadi nî yeetû? Tuî tûkiri o ûu gûtî u tûkûthithia twîta kûmîtunyûkia kuuma kîrî mûnene wa Sîria.”

⁴Ningî arooria mûnene Jehoshafati atîrî, “Ûganteethia kwithûkîra ntûûra ya Ramothi-gileadi?” Jehoshafati aramûcokeria atîrî, “Ni nkabûgwatia na mbîje na njûûrî cia asikarî o na kinya asikarî ba mbarathi.

⁵Îndî mbere ya twîta amba ûûrie MWATHANI mantû jegiî ûntû bûu.”

⁶Tontû bûû, mûnene Ahabu aroothûrania iroria magana jana arabooria atîrî, “Mbîte nkaithûkîre ntûûra ya Ramothi-gileadi kana ndekane nayo?” Nabo baramûcokeria atîrî, “Îta, MWATHANI agaatûma ûtae ntûûra îîu.”

⁷Jehoshafati arooria atîrî, “Gûtî kîroria kîngî gûkû tûûmba kûûria ûrîa MWATHANI akuuga ûntûûne bûbû?”

⁸Mûnene Ahabu aramûcokeria atîrî, “Îî, kîrî o gîtagwa Mikaia mûtaana wa Imula. Îndî nî nkîthwîre mono, nîûntû gîtîndoragîria wega, tiga wûûî akî.” Nîrîo mûnene Jehoshafati aamwîrîre atîrî, “Ûtîbuîri kuuga ûu.”

⁹Rîu nîrîo mûnene Ahabu aatûmîre mûtongeeria ûmwe aramwîra atîrî, “Îtanga wîîte kîroria Mikaia mûtaana wa Imula.”

¹⁰Nabo anene bau bobaîrî nî beekîîre ndwambambio ciaao cia ûnene na barakarîra itî biaao bia ûnene au îtîîriine akuî na mpingîro ya Samaria. Nabio iroria bionthe nî biaarî au mbere yaao bikîroragia.

¹¹Kîmwe kîaabio gîeetagwa Zedekia mûtaana wa Kenaana nî kîaathithîtie ngoji cia chuuma kîrauga atîrî, “MWATHANI ariuga atî ngoji iiji nîcio bûgaatumîra kûûmba Sîria ndweene.”

¹²Nabio iroria bingî bionthe biaaroragia ûntû o bûmwe akî bikabeera atîrî, “Îteeni bûkaithûkîre ntûûra ya Ramothi-gileadi, nîûntû MWATHANI agaatûma bûûmbane.”

¹³Muntû ûrîa waatûmi gwîta kîroria Mikaia nî aamwîrîre atîrî, “Iroria biu bingî bionthe birarorerie mûnene biamwîra akoombana, na nî kaaba ûmwîre u kinya gwe.”

¹⁴Îndî Mikaia aramwîra atîrî, “Ga ngûkwîra na mma, riîtweene rîa MWATHANI ûrîa ûtûûraga mwoyo, nkauga mantû jongwa jarîa MWATHANI akaambîîra.”

¹⁵Rîrîa Mikaia aakinyîre kîrî mûnene Ahabu, mûnene aramûûria atîrî, “Mikaia, ûûni na Jehoshafati twîte tûkaithûkîre ntûûra ya Ramothi-gileadi nandî kana tûrekane nayo?” Kîroria Mikaia aracokia atîrî, “Îî îteeni bûmiithûkîre bûkoombana, na gûtî nkaanja MWATHANI akaamînenkanîra kîrî buî!”

¹⁶Îndî mûnene aramwîra atîrî, “Nî nkwîrîte kaîrî na kaîrî atî rîrîa ûkûmbarîria riîtweene rîa MWATHANI, ûmbîîrage ûrîa bungwa akwîrîte.”

¹⁷ Nîrîo Mikaia aamwîrîre atîrî, “Nî mboneete Aisraeli bonthe banyaganîte irîmeene ta ng'ondu itî na mûrîîthi. MWATHANI ariuga atîrî, ‘Tontû antû baba batî na mûtongeeria nî baciaanîre na thîîrî.’”

¹⁸Mûnene Ahabu areera Jehoshafati atîrî, “Ntîkwîrîre atîndoragîria wega noo ûthûûku akî.”

¹⁹ Mikaia areeta na mbere kûmwîra atîrî, “Thikîîra nandî rûteto rwa MWATHANI. Nî mboneete MWATHANI akarîrîte gîtî kîaawe kîa ûnene kûu îgûrû amwe na araîka barî rûteere rwaawe rwa ûrîo na rwa ûmûtho.

²⁰MWATHANI arabooria atîrî, ‘Nûû ûgeeta kwaîria Ahabu nîkenda eeta kwithûkîra ntûûra ya Ramothi-gileadi ooragîrwa nao?’ Nabo araîka bamwe barauga ûntû bûmwe, bangî barauga bûngî.

²¹Mûthieene Roho ûmwe arairita ararungama mbere ya MWATHANI arauga atîrî, ‘Ngeeta kûmwaîria.’

²²MWATHANI aramûûria ‘Ûkaathithia atîa?’ Roho arauga atîrî, ‘Ngeeta ntûme iroria bionthe bia Ahabu biarie ûrongo.’ Nîrîo MWATHANI aamwîrîre atîrî, ‘Îta ûkamwaîrie. Ndîkwona ûkamûûmba.’

²³“Tontû bûû, nandî rî, MWATHANI nî atûmîte iroria biaaku bionthe bikwaîria. Îndî MWATHANI wengwa augîîte ûkoona thîîna.”

²⁴Nîrîo kîroria Zedekia mûtaana wa Kenaana eetaîtîre akuî, aracamûra Mikaia rwî. Aramûûria atîrî, “Nîka Roho wa MWATHANI aatigîre kwaria naani aratua kwaragia naagwe?”

²⁵Mikaia aramwîra atîrî, “Ûkaamenya ntukû îrîa ûgaaciona wiciithîte gakumboone ka nyomba.”

²⁶Rîu mûnene Ahabu arauga atîrî, “Gwateeni Mikaia bûmwikie kîrî Amoni mûrûngamîîri wa ntûûra na kîrî Joashi mûtaana waakwa.

²⁷Ningî bûbeere atî ndauga bûmwingîre ncheera, arûmague kamûgaate na akuundague tûûjî, mwanka ncoke ndî thîîria.”

²⁸Kîroria Mikaia arauga atîrî, “Ûkëeja gûcoka ûrî mwoyo, bûmenye atî MWATHANI atîmbarîrîîtie. Buî bwinthe bûrî aja bûkoorîrua nî ûrîa ndauga.”

²⁹Rîu mûnene Ahabu wa Israeli na mûnene Jehoshafati wa Juda nî beetîre kwithûkîra ntûûra ya Ramothi-gileadi.

³⁰Ahabu nî eerîre Jehoshafati atîrî, “Ngeeta ndweene ndiigarûrîte ûrîa ntîmenyeka ndî mûnene. Îndî gwe ûkare na rwambambio rwaaku rwa ûnene.” Tontû bûû, Ahabu areeta ndweene aigarûrîte.

³¹Mûnene wa Sîria nî aarî akûrita waatho eera atongeeria barîa mîrongo îthatû na baîrî (32) atî batîkaarwee na muntû ûngî tiga mûnene wa Israeli.

³²Rîrîa atongeeria ba ndwaa boonere mûnene Jehoshafati barauga atîrî, “No mwanka ûûjû eethîrwe nîwe mûnene wa Israeli.” Tontû bûû, baramwerekera nîkenda barwaa nawe. Mûnene Jehoshafati arauga mbu.

³³Rîrîa atongeeria bau ba ndwaa boonere tî mûnene wa Israeli baratiga kwîngana nawe.

³⁴Îndî asikarî ûmwe wa Sîria aragera mûgwî atîthimîte muntû no ûrîkû. Naju jûraratha mûnene Ahabu. Mûgwî jûu, jwarathîîre arîa nguû ya chuuma ya kwigîra nayo yaagwatithanîîrîtue. Tontû bûû, mûnene Ahabu areera ndereba waawe wa ngaarî ya ndwaa atîrî, “Garûka ûndite ndweene nîûntû ndîkûrathwa.”

³⁵Ndwaa îramata mono ntukû îîu. Mûnene Ahabu aragwatîîrwa arî ngaarîîne yaawe ya ndwaa eerekerete njûûrî ya Sîria. Nayo tharike îrîa yaaumaga au aamunti îreenamania na ngaarî îroojûra ku. Gûgîtuka arakua.

³⁶Kûrî akuî gûtuka kûratûmîîrua na kajû atî asikarî bonthe bacoke nthîgûrûûne ciaao; o muntû aane kwaawe.

³⁷Tontû bûû, mûnene Ahabu arakua. Naju mwîrî jwaawe jûraikua Samaria jûrathikwa.

³⁸Nayo ngaarî yaawe îkûthaambîrua kathimeene ga Samaria, kurû nî ciaacûnîre tharike yaawe na amaraya barathaamba na rûûjî rûu. Tontû bûû, kûrakarîka o ûrîa MWATHANI aaugîîte.

³⁹Mantû jangî jonthe jarîa Ahabu aathithîrie, na rûgono rwa ûrîa gîkaro kîaawe kîaagemetue na mîgwongo, na ûrîa aakîre ntûûra cionthe, nî jaandîki Yukuune rîa Mantû ja Karaaja jegiî Anene ba Israeli.

⁴⁰Ahabu agûkua, mûtaana waawe Ahazia araa mûnene.

⁴¹Kûrî mwakeene jwa îna mûnene Ahabu akîathanaga Israeli, Jehoshafati mûtaana wa Asa nî aaere mûnene wa Juda.

⁴²Jehoshafati aambîrîîrie kwaathana arî na ûkûrû bwa mîaka mîrongo îthatû na îtaano (35) na araathana mîaka mîrongo îîrî na îtaano (25) agîkaraga Jerusalemu. Ng'ina eetagwa Azuba na aarî mwarî wa Shilihi.

⁴³Jehoshafati nî aathîkagîra MWATHANI o ta ûrîa îthe Asa aathithagia. Îndî ataatharîrie irombero bia mîrungu ya mîng'uanano na antû nî beetîre na mbere kûritîra igongwana ku na kwîthîria ubaani ku.

⁴⁴Ningî Jehoshafati nî eekanîîre kîrîkanîro kîa thîîrî na mûnene wa Israeli.

⁴⁵Mantû jangî jonthe jarîa mûnene Jehoshafati aathithîrie na ûchamba bwaawe, na ndwaa irîa cionthe aarwîre nî jaandîki Yukuune rîa Mantû ja Karaaja jegiî Anene ba Juda.

⁴⁶Nî ooragîre maraya ja arûme na ja aka jarîa jaatigeere jagîtumîkagîra iritîroone bia igongwana kuuma o rîrîa îthe Asa aarî mwoyo.

⁴⁷Nayo nthîgûrû ya Edomu îtaarî na mûnene, yaathagwa nî muntû waathuuri nî mûnene wa Juda.

⁴⁸Mûnene Jehoshafati nî aakîre meri cia biashara nîkenda ciîtaga Ofiri kûgîîra thaabu. Îndî nî ciaathûkangîîre ntûûreene ya Ezioni-geberi mbere itîrakinya nao.

⁴⁹Nîrîo mûnene wa Israeli tawe Ahazia mûtaana wa Ahabu eerîre Jehoshafati atîrî, “Îtîkîîria nthûûmba ciaakwa ciîtanie na nthûûmba ciaaku meriine.” Îndî Jehoshafati ararega.

⁵⁰Jehoshafati nî aakuîre, arathikwa mbîrîreene cia biûjûjû biaao, irîa irî ntûûreene ya Daudi. Jehoramu, mûtaana waawe araa mûnene.

⁵¹Kûrî mwakeene jwa îkûmi na mûgwanja (17) mûnene Jehoshafati akîathanaga Juda, Ahazia mûtaana wa Ahabu nî aaere mûnene wa Israeli na araathana mîaka îîrî agîkaraga Samaria.

⁵²Nî aathithîrie mantû jamathûûku mono mbere ya MWATHANI o ta ûrîa îthe na ng'ina baathithagia. Ningî nî aathingatîre mîîtîre ya Jeroboamu mûtaana wa Nebati, ûrîa waatûmîre Israeli îthithia meeyia.

⁵³Ahazia nî aatumîkîîre mîrungu ya mîng'uanano tayo Baali na aramîthaathayia. Nawe arathûûria MWATHANI Mûrungu wa Israeli o ta ûrîa îthe aarî akûthûûria MWATHANI.