Read KIMERU BIBLE PROTESTANT EDITION 1Ane 3 Bible Online

1Ane 3 - KIMERU BIBLE PROTESTANT EDITION bible

1Ane 3

¹Mûnene Solomoni nî aathithîrie ngwatanîro na Misri na aragûra mwarî wa Farao[1] areeta gûtûûra nawe ntûûreene ya Daudi. Baatûûrîre ku mwanka rîrîa aathirîrie gwaka gîkaro kîaawe kîa ûnene, na kîûrû kîa MWATHANI na rûthingo rûthiûrûrûkîrîte Jerusalemu.

²Antû baaritagîra igongwana gûntû mwanya mwanya nîûntû kîûrû kîa MWATHANI gîtaarî gîgwakwa.

³Solomoni nî eendeete MWATHANI na nî athingataga mîîtîre ya îthe Daudi. Îndî amwe na bûu nî aaritaga igongwana na gwakîîria ubaani gûntû kûrîa baaritagîra igongwana.

⁴Mûnene Solomoni nî eetîre Gibeoni kûritîra kîgongwana ku, nîûntû antû au nîo kwaarî na kîritîro kîa igongwana kîrîa kîarî na nkuuma nkûrûki ya gûntû kûrîa kûngî kwaritagîrwa igongwana. Nî aarî akûrita igongwana nkûrûki ya ngiri antû au.

⁵Kûrakara atîrî, agwîta ûtukû bûu MWATHANI nî aamuumîrîîre kîrootoone, aramûûria atîrî, “Urîenda nkwaa mbi?”

⁶Solomoni aramûcokeria atîrî, “Gwe nî weendete nthûûmba yaaku, baaba Daudi na wendo bûbûnene nîûntû we nî aarî muntû mwîtîkua na ûmwagîru na weendete ûûma. Ningî ûreeta na mbere na kûmwonia wendo bûtîkûthira na ûramwaa mûtaana ûrîa naarua ûkwaathana antû a we.

⁷Anga itû MWATHANI Mûrungu waakwa, tî Gwe ûmpethetie mûnene antû a baaba Daudi, kinya këethîra ndî mwana mûnyi na ntî na ûûme bwa kwaathana!

⁸Naani nandî tî-ni ûûjû gatîgatî ga kîrîndî gîkiingî gîtîtarîka kîa antû baaku barîa ûthuurîrîte.

⁹Nandî rî, itû mpa ûmenyo kenda mpûûmba kwatha antû baaku na îota na mpûûmba kwaathûrana wega na ûûî. Nîkwîthîrwa rî, nîatîa mpûûmba kwatha kîrîndî gîkî gîaaku kîng'ana ûjû?”

¹⁰MWATHANI nî aagwîrîrue ûntû bûu Solomoni aamûrombere.

¹¹Nawe aramwîra atîrî, “Nîkwîthîrwa ûkûromba ûûme bwa kwaathana ûrîa kwagîrîte, na ûtîrandoomba utûûro bûbûraaja kana ûtonga, kana kûthirua kwa anthû baaku,

¹²ngakûûjûrîria bûrîa waaromba. Naani ngûkwaa ûûme bûbwingî bwa gûciûra nteto, bûrîa gûtî muntû weethîrwa arî nabu na gûtî we ûkarogîa ta bu nyumeene.

¹³Ningî nkwongeere birîa ûtîrandomba tabio ûtonga na gîtîîo ûrîa gûtî mûnene ûgagûkûrûka nabio ûtûûroone bwaaku.

¹⁴Na-rî wathingata na waathîkîra mawaatho na maathana jaakwa o ta ûrîa abaagu Daudi aathithagia, ni ngaakwaa ûtûûro bûbûraaja.”

¹⁵Solomoni agûûkîîra araciûkîrwa ga akûrootaga. Nawe areeta Jerusalemu na ararûngama mbere ya Îthandûkû rîa kîrîkanîro kîa MWATHANI, na ararita igongwana bia gwakîîria na bia thîîrî. Nyuma arathithîria nthûûmba ciaawe cionthe kîatho.

¹⁶Nabo amaraya baîrî nî beetîre bararûngama mbere ya mûnene.

¹⁷Ûmwe wa bo arauga atîrî, “Itû, mwathi waakwa, tu-baîrî ûûni na mûka ûûjû tûtûûraga nyomba îmwe. Naani nî ndaaciarîre kaîjî mûka ûûjû arî ku.

¹⁸Na-rî, tûkûthiria ntukû ijîîrî kinya we araciara kaîjî tûrî nyomba tu-baîrî akî.

¹⁹Ûtukû bûmwe mwana waawe nî aakuîre nîûntû mûka ûûjû nî aamûmamîîre.

²⁰Nawe nî ookîrîîre ûtukû maindûkîra tûmami, na arajûkia mwana waakwa areeta nawe ûrûrî bwaawe na aracoka aramamia kiimba kîa mwana waawe rûteere rwaakwa.

²¹Naani ndîgûûkîîra rûkîîrî gwonkia mwana, ndîreethîra nî ûmûkuû. Îndî ndîkûmûraithîîria bwega, ndîroona tî mwana waakwa.”

²²Mûka ûu ûngî arauga atîrî, “Arî tîu! Mwana waakwa nî ûûjû ûrî mwoyo na ûrîa ûkuîte nîwe waaku.” Mûka ûu wa mbere arauga atîrî, “Arî buru! Waaku nî ûrîa ûkuîte, na waakwa nî ûûjû ûrî mwoyo.” Nabo aka bau bobaîrî bareeta na mbere kûringanîra nkaanja barî au mbere ya mûnene.

²³Mûnene arabeera atîrî, “O muntû ariuga atî mwana waawe nî ûûjû ûrî mwoyo, na ûrîa ûkuîte nî wa ûu ûngî.”

²⁴Mûnene aratûmanîra rûchiû, naru rûrareetwa.

²⁵Mûnene arauga atîrî, “Atûrana mwana ûu ûrî mwoyo gatîgatî aume îchunchî biîrî. Ûnenkere ûmwe gîchunchî kîmwe ûngî kîngî.”

²⁶Mûka ûrîa waarî ng'ina wa kaana kau kaarî mwoyo nî aakendeete na wendo bûbûnene mono. Tontû bûû, areera mûnene atîrî, “Itû, mwathi waakwa, ûgakooraga! Mûnenkere ko!” Îndî ûu ûngî arauga atîrî, “Gûtî we weetû ûgeeta nako. Kaathûrane.”

²⁷Mûnene aracokia arauga atîrî, “Ûgagaatûrania! Kanenkanîre kîrî mûka wa mbere tontû na mma nîwe ng'ina.”

²⁸Rîrîa antû ba Israeli baigîrue ûrîa Solomoni aagiita îgamba rîu, nî baamwîkîrîîre mono. Ningî nî baamenyere kuuma rîu atî Mûrungu nî aamweete ûûme bwa kûgiita magamba na îota.