Read KIMERU BIBLE PROTESTANT EDITION 1Ane 4 Bible Online

1Ane 4 - KIMERU BIBLE PROTESTANT EDITION bible

1Ane 4

¹Mûnene Solomoni nîwe waathanaga Israeli yonthe.

²Nabo baba nîbo baarî atongeeria baawe babanene thirikarîîne yaawe: mûthînjîri-Mûrungu aarî Azaria mûtaana wa Zadoki. Azaria mûtaana wa Zadoki nîwe waarî mûthînjîri-Mûrungu ûmûnene.

³Elihorefu na Ahija ataana ba Shisha nîbo baarî tûrani twa koti, nawe Jehoshafati mûtaana wa Ahiludi aarî mûrûngamîîri wa maandîko ja thirikarî.

⁴Benaia mûtaana wa Jehoiada aarî mûtongeeria wa njûûrî ya asikarî. Zadoki na Abiathari baarî athînjîri-Mûrungu.

⁵Azaria mûtaana wa Nathani aarî mûtongeeria wa athaani ba tûthîgûrû tûrîa Israeli yaagaanîtue. Zabudi mûthînjîri-Mûrungu tawe mûtaana wa Nathani aarî mweejani nkuagaya wa mûnene.

⁶Ahishari aarî mûtongeeria wa atumîkîri gîkaro kîa mûnene. Adoniramu mûtaana wa Abuda aarî mûrûngamîîri wa antû barîa baritithagua ngûgî kwa inya.

⁷Ningî Solomoni nî aathuurîre antû îkûmi na baîrî na arabaeethia athani ba tûthîgûrû îkûmi tûrîa Israeli yaagaanîtue. Ngûgî yaao yaarî kûreeta biakûrîa na biakûnyua kîrî mûnene na nja yaawe kuuma tûthîgûrû tûu. O ûmwe waao aaretaga marero ja mweri jûmwe o mwaka.

⁸Jaja nîjo mariîtwa ja athani bau îkûmi na baîrî na kathîgûrû karîa o ûmwe waao aarûngamîrîte: Beni-huri aarî mûtongeeria wa nthîgûrû ya irîma ya Efuraimu.

⁹Beni-dekeri aarûngamîrîte ntûûra cia Makazi na Shaalibimu na Bethishemeshi na Eloni na Beth-hanani.

¹⁰Beni-hesedi aarûngamîrîte ntûûra cia Arubothi, na Sokoh na nthîgûrû yonthe ya Heferi.

¹¹Benabinadabu aarûngamîrîte nthîgûrû îgwîtwa Nafathi-dori. Aagûrîte mwarî wa Solomoni ûgwîtwa Tafathi.

¹²Baana mûtaana wa Ahiludi aarûngamîrîte ntûûra cia Taanaki, na Megido na nthîgûrû îrîa îîtîte yaamunta rûteere rûrîa rûngî rwa Jokimeamu na Bethisheani mwanka ntûûra ya Abeli-mehola agîankanaga na ntûûra ya Zarethani îrîa îrî ûmotho bwa Jezereeli.

¹³Beni-geberi aarî mûtongeeria wa ntûûra ya Ramothi-gileadi na ntûûra cia mwîrîga jwa Jairi ûrîa waarî wa rûrîîjo rwa Manase. Ningî nî aarûngamîrîte ntûûra mîrongo îtaantatû îrîa ciaarî nthîgûrû ya Arigobu kûu Bashani. Ntûûra iu ciairigîri na nthingo na cieekîrwa mpingîro ciaaingagwa na konji indaaja cia îturutia.

¹⁴Ahinadabu mûtaana wa Ido aarûngamîrîte kathîgûrû geetagwa Mahanaimu.

¹⁵Ahimaazi ûrîa waagûrîte Basemathi mwarî wa Solomoni, aarûngamîrîte kathîgûrû ka mwîrîga jwa Nafutali.

¹⁶Baana mûtaana wa Hushai aarûngamîrîte nthîgûrû ya Asheri na ntûûra ya Bealothi.

¹⁷Jehoshafati mûtaana Parua aarûngamîrîte nthîgûrû ya mwîrîga jwa Isakari.

¹⁸Shimei mûtaana wa Ela aarûngamîrîte nthîgûrû ya mwîrîga jwa Benjamini.

¹⁹Geberi mûtaana wa Uri aarûngamîrîte gîchunchî kîa nthîgûrû ya Gileadi, îrîa yaarî na tûthîgûrû twîrî: kamwe karîa kaathagwa mbereene nî Sihoni mûnene wa Aamori na kangî karîa kaathagwa nî Ogi mûnene wa Bashani. Ningî nî kwaarî na mûtongeeria ûngî ûrîa waarûngamîrîte atongeeria barîa îkûmi na baîrî.

²⁰Antû ba Juda na Israeli baarî babaingî o ta mûthanga jwa îria; nabo îbarîîjaga na bakanyua na bakagwîrua.

²¹ Nabu waathani bwa Solomoni bwaagwete mîgongo yonthe kuuma rûûjî rwa Eufurate na gwîta nthîgûrû ya Afilisti mwanka mwankeene jwa Misri. Antû nî baamûritagîra ûgoti na bakamwathîkîra ûtûûroone bwaawe bunthe.

²²Into birîa biendekanaga bia kûrera mûciî jwa Solomoni ntukû îmwe biang'anaga ûjû: kilo ngiri ithatû na magana jathatû (3,300) cia mûtu jwa nkano jûrîa mwinyu mono na kilo ngiri ithanthatû na magana jatantatû (6,600) cia mûtu jwa mpempe.

²³Ningî ndeegwa inoru îkûmî cia gûtuîra na ingî mîrongo îîrî cia kûrîîthia na ng'ondu îgana. Amwe na biu nî kwendekanaga nthûriga, na nthia, na nkûrûngû na ngûkû ing'anona.

²⁴Solomoni nî aathanaga nthîgûrû yonthe îrîa yaarî bwa rûgûrû rwa rûûjî rwa Eufurate kuuma Tifisa mwanka Gaza. Nabo anene bonthe barîa baarî nthîgûrû iu baarî rungu rwa waathani bwaawe. Nî aarî na thîîrî na nthîgûrû irîa aankeene nacio.

²⁵Îgiita rîonthe rîa waathani bwa Solomoni, nthîgûrû ya Juda na Israeli kunthe nî kwaarî kiindaajî. Tontû bûû, o nja nî yaarî na muunda jwaayo jwa mîzabibû na mîkûû.

²⁶ Ningî Solomoni nî aarî na tûnyomba ngiri mîrongo îna (40,000) twa mbarathi cia ngaarî cia ndwaa na mbarathi cia asikarî ngiri îkûmi na ijîîrî (12,000).

²⁷Nabo athani îkûmi na baîrî barîa baathuuri bakûreraga mûciî jwa Solomoni nî baaikagia birîa bionthe biendekanaga o muntû mweri jûmwe.

²⁸Ningî nî baaikagia nkano na mûnyaki jwa kûng'ana jwa mbarathi cia gûkururia ngaarî cia ndwaa na mbarathi ingî kûringana na ûrîa muntû aatuîri o mweri.

²⁹Mûrungu nî aaere Solomoni ûmenyo na gûciûkîrwa na ûûme bûbwingî mono mono.

³⁰Solomoni aroomîa nkûrûki ya antû ba boome ba kuuma bwa gaiti na kinya ba kuuma Misri.

³¹ Tontû bûû, nî aarî ûmûûme nkûrûki ya antû bangî bonthe. We nî aarî ûmûûme nkûrûki ya Ethani wa kuuma mwîrîgeene jwa Ezra na ataana ba Maholi tabo Hemani na Kalikoli na Darida. Nayo nkuma yaawe îrataamba gûntû kunthe ndeene ya nthîgûrû irîa baankeene nacio.

³² Nawe nî aatungîre njuno ngiri ithatû (3,000) na ndwîmbo nkûrûki ya ngiri îmwe.

³³Nî aaijî mantû jegiî mîtî kwambîrîîria na mîtarakwa ya Lebanoni mwanka makuuû jarîa jakûraga nthingoone. Ningî nî aaijî mantû ja nyamû irîa itûûraga nthî înjûmo na ja nyoni na ja nyomoo irîa irî mathendû na ja makûyû.

³⁴Nabo anene bonthe ba nthî baakinyîrwa nî nkuma ya ûûme bwa Solomoni, nî baatûmaga nchaama ciaao ciîta kûmûthikîîra.