Read KIMERU BIBLE PROTESTANT EDITION 1Ane 5 Bible Online

1Ane 5 - KIMERU BIBLE PROTESTANT EDITION bible

1Ane 5

¹Mûnene Hiramu wa Tiro aarî mûcoore wa bata wa mûnene Daudi. Tontû bûû, akwigua atî Solomoni aakweethua mûnene antûûne a îthe Daudi, nî aamûtûmîîre nthûûmba ciaawe.

²Solomoni nî aacokerie Hiramu aramwîra atîrî,

³“Nî ûkûmenya atî baaba Daudi aratwîre kûrwaa na anthû baawe tabo nthîgûrû irîa aankeene nacio. Tontû bûû, atîngîûmba gwaakîra MWATHANI Mûrungu waawe kîûrû mwanka rîrîa MWATHANI aamweere ûûmbani kîrî anthû bau.

⁴Îndî nandî MWATHANI Mûrungu waakwa nî aampeete thîîrî nteere cionthe, na ntî na mûnthû kana ûgwati noo bûrîkû.

⁵ MWATHANI nî aaciîtîîrie baaba Daudi aramwîra atîrî, ‘Mûtaana waaku ûrîa nkaeethia mûnene nyuma yaaku nîwe ûkambakîra kîûrû.’ Tontû bûû, nandî nî nkwenda gwaka kîûrû kîu gîa kûthaathaîria MWATHANI Mûrungu waakwa.

⁶Nandî rî, tûma nthûûmba ciaaku ciîte ikaandîîkîre mîtarakwa ya Lebanoni, nîûntû nî ûkûmenya antû beetû batiijî kûrîîka mîtî ta beenu ba kuuma Sidoni. Ngaatûma nthûûmba ciaakwa iritanîrie ngûgî na ciaaku na nkaarîa nthûûmba ciaaku mûchaara o jûrîa ûkaugîra”

⁷Rîrîa Hiramu aaigîrue nteto cia Solomoni, nî aagwîrîrue mono. Nawe arauga atîrî, “MWATHANI arokumua ntukû ya naarua, nîûntû nî aeete Daudi mûtaana ûmûûme ûjû aa mûnene nyuma yaawe na aathaga mûgongo jûmûnene ûu.”

⁸Hiramu aratûmana kîrî Solomoni arauga atîrî, “Nî nthirîtie kwigua ntûmwa yaaku na ngaakûrîîkîra mîtarakwa na mîthithinda o ta ûrîa ûûrîtie.

⁹Nthûûmba ciaakwa ikareeta mîgogo kuuma Lebanoni mwanka îrieene. Nacio ikamîoga ithûmba ithûmba na ibiereerie îrieene mwanka arîa ûkaugîra. Rîu antû baakwa bakamîogora na antû baaku bajûkîîrie ngûgî yaabio au. Naani bûrîa akî mpenda ûteethereria nabu nî kûmaathîra antû baakwa.”

¹⁰Tontû bûû, Hiramu aratua kûnenkagîra Solomoni mîgogo yonthe ya mîtarakwa na mîthithinda îrîa yeendekanaga.

¹¹Solomoni aanenkagîra Hiramu nkunia ngiri mîrongo îîrî (20,000) cia nkano na lita ngiri magana jana (400,000) cia maguta jamatheru ja mîzeituni o mwaka cia kûrera antû baawe.

¹²MWATHANI araa Solomoni ûmenyo o ta ûrîa aamwîrîte. Nabo Solomoni na Hiramu nî baatûûrîre na thîîrî na bobaîrî bareekanîîra kîrîkanîro.

¹³Mûnene Solomoni nî oothûranîrie kuuma Israeli yonthe, antû ngiri mîrongo îthatû (30,000) ba kûrita ngûgî kwa inya.

¹⁴ Ningî araeethia Adoniramu mûrûngamîîri waao. Nawe nî aabagaanîrie ikundi bithatû bia ngiri îkûmi îkûmi. Nakîo o gîkundi gîeetaga kûrita ngûgî Lebanoni mweri jûmwe, gîgacoka nja mîeri îîrî.

¹⁵Ningî Solomoni nî aarî na antû ngiri mîrongo înaana (80,000) ba kwaja maiga nau irîmeene na bangî ngiri mîrongo mûgwanja (70,000) ba kûjakamata.

¹⁶Ningî antû bangî ngiri ithatû na magana jathatû (3,300) arabaeethia arûngamîîri ba bau bangî.

¹⁷Nabo nî baajîre maiga jamanene ja goro ja gwaka mûsingi jwa kîûrû kûringana na waatho bwa Solomoni.

¹⁸Tontû bûû, aariti ngûgî ba Solomoni na ba Hiramu na antû bangî ba kuuma ntûûra ya Gebali nî baathuranîîre maiga na mbaaû cia gwaka kîûrû.