Read KIMERU BIBLE PROTESTANT EDITION 1Ane 6 Bible Online

1Ane 6 - KIMERU BIBLE PROTESTANT EDITION bible

1Ane 6

¹Solomoni aambîrîîrie gwaka kîûrû kîa MWATHANI, mweriine jwa îîri, jûrîa jweetagwa Zivu, mwakeene jwa îna, kuuma akwaambîrîrîa kwaathana nthîgûrû ya Israeli. Îgiita rîu kwaarî mîaka magana jana na mîrongo înaana (480) kuuma antû ba Israeli bakuuma nthîgûrû ya Misri.

²Nayo nyomba îrîa mûnene Solomoni aakîîre MWATHANI yaarî na ûraaja bwa mita mîrongo îthatû (30m), na waariî bwa mita îkûmi (10m) na gwitia bwa îgûrû mita îkûmi na ithaano (15m).

³Nakîo kîarago kîrîa kîaarî mwariine jwa kîûrû kîaarî kîa mita îkûmi (10m) ûraaja na mita ithaano (5m) waariî. Tontû bûû, ûraaja bwa kîarago kîu bwang'anene na bwa kîûrû.

⁴Nacio nthingo cia kîûrû nî ciaarî na ndiricha ciaaki na mbaaû nacio ndiricha iu ciaarî inini bwa oome na imbariî bwa ndeene.

⁵Naku ndee oome nteere cio-ijîîrî na nyuma ya kîûrû nî aakîre nyomba irî na ngoroba ithatû igwatanîte na nthingo. O ngoroba îmwe yaarî ya ûraaja bwa gwitia bwa îgûrû bwa akuî mita ijîîrî na robo.

⁶Kanyomba kamwe ka ngoroba ya nthî kaarî na waariî bwa mita ijîîrî na nusu (2.5m). Nako ka ngoroba ya gatîgatî kaarî na waariî bwa akuî mita ithatû (3m). Nako ka ngoroba ya îgûrû kaarî ka waariî bwa mita ithatû na nusu (3.5m). Tûnyomba tûtû twakari ûjû nîûntû ngoroba ya nyomba îîu yaaki îrî na nkathî ithatû îgîcekeaga o ûrîa kîûrû gîaitagia. Nayo mîarîro ya ngoroba yaamamagîrua nkathî iu ithatû. Tontû bûû, mîaro îîu îtaatonyagua nthingoone cia kîûrû.

⁷Kîûrû nakîo gîakîrwe na maiga jarîa jaajîri na jatendererua îrandiine. Tontû bûû, gûtî nyondo, kana tindo, kana gîntû kîngî gîa chuuma kîaigîgîkana rîrîa kîûrû gîakagwa.

⁸Mwari jwa ngoroba ya nthî jwaarî rûteere rwa ûmotho rwa kîûrû. Ningî nî kwaarî na nkathî cia gwitia ngorobeene ya ijîîrî na ya ithatû.

⁹Tontû bûû, mûnene Solomoni nî aakîre kîûrû aroojûria. Ningî areekîra ciring'i yaaki na mbaaû na mbito cia mîtarakwa.

¹⁰Nayo nyomba ya ngoroba ithatû îrîa aakîre ndee oome nteere cio-ijîîrî na nyuma yaagwatitheenue na kîûrû na mbaaû cia mîtarakwa. Nayo o ngoroba yaarî ya ûraaja bwa mita ijîîrî na nusu (2.5m).

¹¹Na-rî, MWATHANI nî eerîre Solomoni ûjû:

¹²“Ûkëeja kûthingata mataaro jaakwa na ûkaathîkîra mawaatho jaakwa na ûgeeka maathana jaakwa, na ûkajathingata, ûûni nkarikithia rûteto rwaakwa kîrî gwe, rûrîa ndeerîre abaagu Daudi.

¹³Naani ngakarania na antû baakwa Israeli kîûrûûne gîkî ûgwaaka na ntikarobeerûkîra.”

¹⁴Tontû bûû, Solomoni nî aakîre kîûrû, na oojûria.

¹⁵Nawe nî aakunîkîre nthingo cia kîûrû ndeene na mîtarakwa kuuma nthîgûrû mwanka îgûrû. Ningî nî aakûnîkîre nthîgûrû na mbaaû cia mîthithinda.

¹⁶ Ningî naarîa mbere ya kîûrû buru, nî aagiitîre kanyomba ka mita îkûmi (10m) na mbaaû cia mîtarakwa ciumîte nthîgûrû mwanka îgûrûgûrû. Nako kanyomba kau kareetwa antû arîa atheru buru.

¹⁷Nakîo kîanya kîrîa gîatigarîre kuuma antû atheru buru mwanka mwariine kîaarî kîa ûraaja bwa mita mîrongo îîrî (20m).

¹⁸Nakîo kîûrûûne ndeene mbaaû cia mîtarakwa ciathithîtue ikari ta ikiri na ta maûa. Nthingo ciaakunîki buru na mbaaû cia mîtarakwa ûrîa maiga jatîngîonekana.

¹⁹Kanyomba karîa kaagitîrwe arîa mbere buru a kîûrû tako antû atheru buru nîo Îthandûkû rîa kîrîkanîro na MWATHANI rîeekîrwe.

²⁰Nako kanyomba kau kaarî ka ûraaja bwa mita îkûmi (10m) na waariî bwa mita îkûmi (10m) na mita îkûmi (10m) gwitia bwa îgûrû. Nawe arereeria kanyomba kau na thaabu întheru. Ningî nî aatumîîre mbaaû cia mîtarakwa gwaka kîritîro kîa igongwana ku.

²¹Solomoni arereeria kîûrû ndeene na thaabu întheru, na aragitanîîria nyororo cia thaabu mwariine jwa Antû Aatheru ndeene.

²² Nawe arereeria kîûrû kîonthe ndeene na thaabu na kinya kîritîro kîrîa kîaarî antû atheru buru.

²³ Nî aathithîrie biûmbe biîrî bia mathagu jaîrî biîtagwa kerubimu na mbaaû cia mîthaata, na aabiîka antû atheru buru. O kîmwe kîaarî kîa akuî mita ithaano (5m) gwitia bwa îgûrû.

²⁴O îthagu rîmwe rîa kerubimu, rîaarî rîa ûraaja bwa mita injîîrî na nusu (2.5m). Kuuma mûthia jwa îthagu rîmwe mwanka mûthia jwa îthagu rîngî kwaarî mita ithaano (5m).

²⁵Kinya mathagu jo-jaîrî ja kerubimu ûu ûngî jaarî ja uraaja bwa mita ithaano (5m). Nabio biûmbe biu bio biîrî nî biang'uaneene na biang'anana buru.

²⁶Kerubimu ûmwe aarî wa mita ithaano (5m) gwitia bwa îgûrû kinya ûu ûngî aarî na ûraaja o ta bûu.

²⁷Nawe areeka kerubimu bau antû atheru buru bereekene. Mathagu jaabo jaambaarîte, jaringithagia rûthingo na jaîrî jaringithanîtie gatîgatî na jaîrî jangî jakaringithia rûthingo, o îthagu rûteere rwaarîo.

²⁸Solomoni arereeria kerubimu iu na thaabu.

²⁹Nakîo kîûrû bwa ndeene kîragemua na biûmbe bia kerubimu na mîkîndû na maûa.

³⁰Ningî kinya nthîgûrû yeereererue na thaabu

³¹Naku mwariine jwa antû arîa atheru buru areekîra mûrango jwaatûri gatîgatî. Naju jwaatumi na mbaaû cia mîthaata.

³²Nayo mîari îragemua na mbicha cia kwaja cia kerubimu na mîtî ya mîkîndû na maûa.

³³Naku mwariine jwa kîûrû areekîra mûrango jwa kona inya jûtumi na mbaaû cia mîthaata.

³⁴Ichunchî bio-biîrî bia mîari yo-îîrî biaarî bia gûkûnja. Nayo yaathithîtue na mbaaû cia mîthithinda.

³⁵Nawe aragemia mîrango îîu na mbicha cia kwaja cia kerubimu na mîtî ya mîkîndû na maûa, nabio nî bieereeretue na thaabu îng'anu.

³⁶Solomoni araaka kîarago au mbere ya kîûrû, na rûthingo rweekîri kosi îmwe ya mîtarakwa kîrî kosi ithatû cia maiga.

³⁷Na-rî, mweriine jwa Zivu, mwakeene jwa îna jwa waathani bwa Solomoni nîrîo mûsingi jwa kîûrû kîa MWATHANI jweekîîrwe.

³⁸Naju mwakeene jwa îkûmi na jûmwe, mweri jwa Bulu, naju nî mweri jwa înana, kîûrû kîroojûra kîonthe o ta ûrîa mûtaratara jwa waaki jwathimîri. Tontû bûû, Solomoni aagîakîre na mîaka mûgwanja.