Read KIMERU BIBLE PROTESTANT EDITION 1Ane 7 Bible Online

1Ane 7 - KIMERU BIBLE PROTESTANT EDITION bible

1Ane 7

¹Mûnene Solomoni nî aakîre nyomba yaawe wengwa na aramîûjûria na mîaka ikûmi na îthatû.

²Nawe araaka nyomba înene îgwîtwa Mwitû jwa Lebanoni ya ûraaja bwa mita mîrongo îtaano (50m) na waariî bwa mita mîrongo îîrî na ithaano (25m) na mita îkûmi na ithaano (15m) gwitia bwa îgûrû. Nayo yaaki na ndwari ithatû cia itugî bia mîtarakwa na

³ciring'i ya nyomba îîu yaaki ya mîtarakwa.

⁴Ningî nteere cio-ijîîrî cia nthingo nî kwaarî na ndiricha ndwari cio ithatû

⁵Nayo mîari na ndiricha biaathithîtue na mbaaû cia kona inya.

⁶Ningî nî aakîre nyomba îgwîtwa Kîbeeri kî Itugî. Nayo yaarî na ûraaja bwa mita mîrongo îîrî na ithaano (25m) na waariî bwa mita îkûmi na ithaano (15m). Nakîo nî kîaarî na kîarago kîagwatîîri na itugî au mbere yaakîo.

⁷Ningî nî aakîre nyomba înene yeetagwa Kîbeeri Rûriga rwa Ûnene. Ningî ni yeetagwa Nyomba ya Kûgambanîra, nîûntû nîku Solomoni aagitagîra magamba. Nyomba îîu yaaki na mbaaû cia mîtarakwa kuuma nthîgûrû mwanka îgûrû.

⁸ Nyomba yaawe yongwa ya gûtûûra, îrîa yaaki nyunjurî ya Kîbeeri gîa Kûgambanîra yaaki na mwakîre jwa nyomba îîu îngî. Ningî araakîra mwekûrû waawe, tawe mwarî wa Farao nyomba o ta îîu.

⁹Nyomba iu cionthe o amwe na kîarago kîrîa kînene ciaaki na maiga ja goro, kuuma mûsingiine mwanka îgûrû. Maiga jau jaaji na jaagitangwa nteere cionthe kûringana na ithimi.

¹⁰Nayo mîsingi yaaki na maiga ja goro. Najo jaunganîtue maiga ja ûraaja bwa mita inya (4m) na jangî ja mita ithaano (5m).

¹¹Îgûrû rîajo kwaarî maiga ja goro, na jagitagwa kûringana na îthimi na nî kwaarî kinya na mbaaû cia mîtarakwa.

¹²Nakîo kîarago kîa gîkaro kîa mûnene na kîarago kîa ndeene ya kîûrû na kîarago kîrîa kîaarî mwariine jwa kîûrû gîaaki na kosi îmwe ya mîtarakwa o kîrî kosi ithatû cia maiga.

¹³Mûnene Solomoni nî aatûmanîîre mûturi wa maturutia weetagwa Hiramu kuuma Tiro.

¹⁴Hiramu aatigîri ûtea bûu nî mûtigairî îthe ûrîa waarî wa kuuma Tiro. Ng'ina wa Hiramu aarî mwoyo, na aaumîte mwîrîgeene jwa Nafutali. Hiramu areeja na areetîkîîria kwaa mûrûngamîîri wa ngûgî yonthe yegiî maturutia îrîa aaei nî mûnene Solomoni.

¹⁵Hiramu nî oombîre itugî birî bia îturutia, o gîtugî kîrî kîa ûraaja bwa mita kenda (9m) na mûthiûrûko akuî mita ithathatû (6m). Nawe arabiîka mwariine jwa kîûrû.

¹⁶Nawe arabiûmbîra biongo biîrî bia îturutia. O kîongo kîaarî kîa ûraaja bwa mita ijîîrî na nusu (2.5m). Nabio biongo biu birarîkîîrwa îgûrû rîa itugî biu.

¹⁷Nawe aragemia biongo bia itugî biu na nyororo ciîndanîtue.

¹⁸Ningî arabithiûrûkîria na ndwari ijîîrî cia îturutia ikari ta mîkukumanga.

¹⁹Itugî biu biaarî na biongo biakari ta mpakûri na biaarî bia ûraaja bwa akuî mita ijîîrî (2m).

²⁰Biongo biu biarîkîîri mûthiûrûkoone jwa itugî biu na îgûrû rîa arîa kwagemetue na nyororo. Ningî kîrî ndwari ijîîrî irîa ciaarî o kîongoone, o rwari rwaarî na matuunda îgana rîmwe (100) ja kûûmba na îturutia jakari ta mîkukumanga.

²¹Rîu Hiramu nî eekîre itugî biu bio-biîrî mbere ya mwari jwa kîûrû. Nakîo kîrîa eekîre rûteere rwa ûmotho aragîîta Jakini, na kîrîa eekîre rûteere rwa ûrîo aragîîta Boazi.

²²Najo maûa jau jakûrîîkîrwa îgûrû rîa itugî ngûgî ya itugî îrathira.

²³Hiramu nî aathithîrie gîtangi gîa kîthiûrûrî na îturutia. Nakîo kîaarî kîa akuî mita ijîîrî na nusu (2.5m) kworokera na mita ithaano (5m) kwarama na akuî mita îkûmi na ithaano (15m) kûthiûrûka.

²⁴Naju mûromo jwa gîtangi ndee bwa oome jwaagemetue na ndwari ijîîrî cia ikiri bia îturutia. Nabio ikiri biu biombanîrîtue rîmwe na gîtangi.

²⁵Nakîo gîtangi kîu gîakarîrîte ndeegwa îkûmi na ijîîrî cia îturutia itegeete bwa oome. Tontû bûû, ndeegwa ithatû ciaategeete bwa ûrîo, na ingî ithatû bwa ûmotho, na ingî ithatû bwa gaiti na ithatû bwa rûgûrû.

²⁶Gîtangi kîathithîtue na rûthingo rwa ûmatu bwa centimita inyanya (8cm). Mûromo jwaakîo jwaathithîtue ta jwa gîkombe jwikûmîte bwa oome ta mûromo jwa nyongû. Gîtangi kîu kîaarî kîa lita ngiri mîrongo îna (40,000 L).

²⁷Ningî Hiramu nî aathithîrie ngaarî îkûmi cia gûkururia cia îturutia, ngaarî yaarî ya ûraaja bwa mita ijîîrî (2m), na waariî o ta bûu na akuî mita îmwe na nusu (1.5m) gwitia.

²⁸Ngaarî iu ciaathithîtue ûjû: Ciaaki na gîkongoro kîa îturutia nteere na nthî na gîkarîkîrwa îgûrû rîa bureemu cia îturutia.

²⁹Naku nî kwaarî na mîng'uanano ya ngatûnyi na ya ndeegwa na ya kerubimu gîkongoroone kîu. Ningî o bureemuune iu nî kwombi maûa jarigiceene rungu na îgûrû rîa ngatûnyi na ndeegwa iu.

³⁰Ningî o ngaarî yaarî na magûrû jana ja îturutia jaagwatithanîtue na chuuma ya îturutia. Naku mîthieene yo îna ya ngaarî nî kwaarî tûtugî twa îturutia twaagemetue na maûa jaarigicene.

³¹Îgûrû rîa tûtugî tûu nî kwathithîtue mûkang'i jwaarî jwa nusu mita gwitia (0.5 m) bwa îgûrû na centimita îkûmi na inyanya (18cm) kworokera. Nacio nteere ciaaju nî ciaagemetue na tûbicha twa kwaja.

³²Najo magûrû ja ngaarî iu jaarî ja ûraaja bwa centimita mirongo îtantaatû na ithanthaatû (66cm) na jaarî rungu rwa gîkongoro. Nayo mîchuuma îrîa yaagwatithenie magûrû yombanîrîtue amwe na ngaarî iu.

³³Magûrû jau jaathithîtue ta magûrû ja ngaarî cia ndwaa. Mîchuuma yaacio îrîa yaagwatithenie magûrû, na rimu na waya cia magûrû na gachuuma ga gatîgatî karîa kagwataga waya ibiathithîtue na îturutia.

³⁴O ngaarî yaategeki itugîîne bina o gîtugî mûthieene. Nabio itugî biombanîrîtue na ngaarî.

³⁵Îgûrû rîa ngaarî nî kwaathiûrûkirîtue mûcibi jwa waariî bwa robo mita. Natu tûtugî na ikongoro na mûcibi biombanîrîtue amwe na o ngaarî.

³⁶Ningî arîa kunthe gwatigeere kaanya tûtugîîne na ikongoroone biu kwaagemetue na tûmîng'uanano twa kerubimu, na ngatûnyi na mîtî ya mîkîndû na maûa jarigiceene.

³⁷Nawe ûu nîu aathithîrie ngaarî cionthe ikari ûmwe na ing'aneene buru.

³⁸ Ningî Hiramu aracoka arathithîria o ngaarî kîraî kîaayo. Nakîo o kîraî kîaarî na waariî bwa mita ijîîrî (2m), na irîngî gîa lita magana janaana (800 L).

³⁹Nawe nî eekîre ngaarî ithaano rûteere rwa ûmotho na ithaano ingî rûteere rwa ûrîo rwa kîûrû. Nakîo gîtangi aragîîka koneene îrîa yaarî gîtîgatîne kîa rûteere rwa gaiti na ûmotho bwa nyomba.

⁴⁰Ningî Hiramu nî aathithîrie nyongû na iciko na mpakûri. Rîu Hiramu arathiria ngûgî yonthe îrîa aaei nî mûnene Solomoni yegiî kîûrû kîa MWATHANI.

⁴¹Into bibi bithingatîte nîbio Hiramu aathithîrie: Itugî biîrî na biongo biîrî bikari ta mpakûri birîa biarî îgûrû rîa itugî. Nyororo ciîndanîtue igemetue cia o kîongo. Ndwaari ijîîrî cia mîkukumanga ya îturutia o kîongoone,

⁴²mîkukumanga magana jana (400), o rwaari rûrî na mîkukumanga îgana rîmwe (100).

⁴³Ngaarî îkûmi. Iraî îkûmi.

⁴⁴Gîtangi. Ndegwa îkûmi na ijîîrî cia kûgwatîîra gîtangi.

⁴⁵Nyongû na iciko na mpakûri. Into biu bionthe Hiramu aathithîîrie mûnene Solomoni, nîûntû bwa kîûrû kîa MWATHANI biaarî bia îturutia rîtheri.

⁴⁶Into biu bionthe biathithîîrue gîkerûrîroone kîrîa gîaaki kûu mûgwanthîîne jwa Jorodani, gatîgatî ka Sukothi na Zarethani.

⁴⁷Solomoni ataatindanîîre kûthima into biu bia îturutia nîûntû nî biaarî bibingî mono. Tontû bûû, ûrito bwa îturutia rîrîa rîatumîri bûtaamenyekana.

⁴⁸ Ningî Solomoni nî aakithîrie into bingî bia thaabu bia gûtumagîrwa kîûrûûne. Nabio nî bibi: Kîritîro kîa igongwana na meetha ya kûrîkagîîrwa mîgaate îrîa yaathûrîri Mûrungu, na itugî îkûmi bia kûrîkagîîra taawa nî biaarûngîki au mbere ya antû arîa atheru buru.

⁴⁹ Biaabio bitaano biarûngîki rûteere rwa ûmotho, na bitaano rûteere rwa ûrîo. Ningî araakithia maûa na taawa na mîgwati ya thaabu.

⁵⁰Bingî birîa biaathithîrue nî ikombe na mîgwati ya kworia ntaambi na mpakûri na thaani cia kwîîthagîria ubaani na tûraî twa gûkamataga natu makara ja mwanki. Nabio biaathithîtue na thaabu ntheri, na marenci ja mîari ya antû arîa atheru buru, na ja mîari ya oome ya kîûrû.

⁵¹ Rîrîa mûnene Solomoni aathirîrie waaki bwa kîûrû na gwîkîra into ku, areetere into birîa îthe Daudi aathurîrîte MWATHANI tabio fetha na thaabu na into bingî arabiîka tûnyomba tûrîa twekagwa mîthithû ya kîûrû.