Read KIMERU BIBLE PROTESTANT EDITION 1Ane 8 Bible Online

1Ane 8 - KIMERU BIBLE PROTESTANT EDITION bible

1Ane 8

¹ Rîu Solomoni nî eetîre atongeeria ba nthîgûrû ya Israeli ba mîîrîga na ba mîciî yonthe ya antû ba Israeli beeta kîrî we kûu Jerusalemu. Nawe aaboothûranîrie kenda barita Îthandûkû rîa kîrîkanîro kîa MWATHANI kuuma Zaiûni, tayo Ntûûra ya Daudi barîtonyia kîûrûûne.

² Tontû bûû, antû ba Israeli bonthe baroothûrana îgiiteene rîa mambura ja tûganda kûrî mweriine jwa Ethanimu, taju mweri jwa mûgwanja.

³Rîrîa atongeeria bonthe boothûranîre athînjîri-Mûrungu barajûkia Îthandûkû rîa kîrîkanîro kîa MWATHANI.

⁴Nabo baraikia îthandûkû rîu kîûrûûne. Ningî athînjîri-Mûrungu bangî na Alawi nî baajûkîrie îema rîa gûtirimanîra na MWATHANI, na into bionthe birîa bitheru birîa biaakaraga îemeene rîu barabiikia kîûrûûne.

⁵Mûnene Solomoni na antû bonthe ba Israeli nî boothûranîre amwe au mbere ya Îthandûkû rîa kîrîkanîro, na bararita kîgongwana kîa ng'ondu na ndeegwa inyiingî mono itîtarîka.

⁶Rîu athînjîri-Mûrungu baratonyia Îthandûkû rîa kîrîkanîro kîa MWATHANI kîûrûûne na bararîîka antû arîa atheru buru ruungu rwa kerubimu.

⁷Najo mathagu ja kerubimu jarîa jaambaarîte jarakunîka îthandûkû na mîaro îrîa rîaakamatagwa nayo.

⁸Mîaro îîu nayo yaarî îîmîraaja mono ûrîa mîthia îrîngî kwonekana nî muntû arûngami eerekerete mwari jwa antû arîa atheru buru. Nabio into biu birî o kinya naarua îîjî.

⁹ Îthandûkûûne rîu nî kwaarî na mbechua ijîîrî akî cia maiga irîa Musa eekîre ku arî kîrîmeene gîa Sinai. Antû au nio MWATHANI eekanîîre na antû ba Israeli kîrîkanîro rîrîa baumîte nthîgûrû ya Misri.

¹⁰ Rîrîa athînjîri-Mûrungu baumagarîre antû arîa atheru buru a kîûrû, îtu rîroojûra kîûrûûne,

¹¹ûntû athînjîri-Mûrungu batîngîûmba kûrita ngûgî yaao nîûntû bwa îtu rîu. Mwago jwa MWATHANI nî jwaaenagia îtuune rîu rîoojûûrite kîûrûûne.

¹² Rîu nîrîo Solomoni aarombere arauga atîrî, “Gwe MWATHANI nîgwe wîkîte rîûa îgûrû, îndî waithuurîra gûtûûraga muunduune jûmûtumanu,

¹³Rîu ngûgwaakîra kîûrû gîkîthongi mono, antû aaku a gûtûûra kenya na kenya.”

¹⁴Mûnene Solomoni aragarûka areerekera kîrîndî kîrîa kîarûngi na arakîrombera itharimo bia Mûrungu.

¹⁵Nawe arauga atîrî, “Kumagieni MWATHANI Mûrungu wa Israeli, we ûrîa ûûjûrîtie mûciîtio jûrîa aaciîtîîrie baaba Daudi rîrîa aaugîre atîrî,

¹⁶ ‘Kuuma rîrîa ndaaritîre antû baakwa Israeli kuuma Misri, gûtî ntûûra ndathuura kîrî mîîrîga ya Israeli yonthe kenda mbakîrwa kîûrû ku. Îndî nî ndakûthuurîre gwe Daudi wathaga antû baakwa.’”

¹⁷ Solomoni aracokia arauga atîrî, “Baaba Daudi nî aaithuranîrîte gwaka kîûrû nîûntû bwa MWATHANI Mûrungu wa Israeli.

¹⁸Îndî MWATHANI areera baaba Daudi atîrî, ‘Îtua rîaaku rîa kûmbakîra kîûrû nî rîrîega.

¹⁹ Îndî kûnarî ûu ûtîmbakîra kîûrû kîu. Mûtaana waaku wengwa nîwe ûkambakîra kîo.’

²⁰“Ningî rî, MWATHANI akûûjûria wîrane bwaawe nîkwîthîrwa nî mpeete mûnene wa Israeli nyuma ya baaba na ndaakîra MWATHANI kîûrû.

²¹Ningî nî mbakîte kanyomba kûu kîûrûûne ga gwîkagwa Îthandûkû rîa kîrîkanîro rîrîa rîrî na mbechua irîa ciaandîki kîrîkanîro kîrîa MWATHANI aarîkanîîre na biûjûjû bieetû, rîrîa aabiritîre nthîgûrû ya Misri.”

²²Solomoni arî au mbere ya kîrîndî areeta ararûngama mbere ya kîritîro kîa igongwana ookîrîîtie njara ciaawe bwa îgûrû.

²³Nawe araromba akiugaga atîrî, “Itû MWATHANI Mûrungu wa Israeli gûtî Mûrungu ûngî ûkari tagwe, kûu îgûrû kana gûkû nthîgûrû. Gwe ûûjûragia kîrîkanîro kîrîa wîkanîrîte na antû baaku na ûkaboonia wendo bûtîthiraga bunka bakara bagîkwathîkagîra na mma.

²⁴Gwe nî ûririkanîte kîrîkanîro kîrîa weekanîîre na baaba Daudi na mantû jarîa jonthe waamwîrîrîte jakûûjûra naarua.

²⁵ Nandî rî, MWATHANI Mûrungu wa Israeli, ndakwerenca ûûjûrie wîrane bûrîa bûngî weeranîîre na nthûûmba yaaku, baaba Daudi. Nabu nî atî, gûtîkoroûra ûmwe wa nchiarwa ciaawe wa kwaathaga Israeli; bunka akî këethîra nchiarwa iu ciaawe ikamenyagîîra mîîtîre yaacio na ikwathîkagîre ta Daudi.

²⁶Itû Gwe, Mûrungu wa Israeli, ûjûria nandî wîrane bûrîa weekanîîre na nthûûmba yaaku, baaba Daudi.

²⁷ “Îndî rî, gwe Mûrungu ka ûûmba gûtûûra nthîgûrû? Këethîra ûtîng'anagîra gûkara îgûrû na kinya îgûrû rîrîa rîrî îgûrû buru, ûkang'anîra kanyomba gaka mbakîte?

²⁸Kûnarî ûu, thikîîra îromba rîaakwa ni nthûûmba yaaku, na ûmbûjûrîrie mantû jarîa jonthe ngaakûromba naarua îîjî.

²⁹ Karagia kîûrû gîkî ûtukû na mûthenya nîûntû nîku withuurîrîte ûthaathagîrua ku. Mbigagua itû rîrîa ngûkûromba ndî ku.

³⁰Ningî ûthikagîîrie maromba jaakwa na ja antû baaku, rîrîa bagûkûromba barî antû aja. Ningî, ûtûthikagîîre ûrî gwaaku kûu îgûrû na ûgatûrekera.

³¹“Na-rî, rîrîa muntû akaathitangwa nî ûngî nîûntû nî amwîîrîtie na anyuîre muuma kîritîroone kîa igongwana gîa kîûrû auge atî atîîtie,

³²itû MWATHANI ûthikîîre ûrî kûu îgûrû na ûbagitîre îgamba. Rîu ûkanûkie ûrîa wîîtie kûringana na ûrîa kwagîrîte na ûrekerie ûrîa ûtî na maatia na ûmue îtuui kûringana na waagîru bwaawe.

³³“Rîrîa, antû baaku ba Israeli bagacindwa nî anthû baao nîûntû nî bakwîîrîtie, îndî bacoke kîrî gwe na barombe bakiiriraga meeyia jaao barî kîûrûûne gîkî,

³⁴ûbathikîîre ûrî kûu îgûrû. Naagwe ûrekere antû baaku meeyia jaao na ûbacokie nthîgûrû îrîa waaere biûjûjû biaao.

³⁵“Rîrîa îgûrû rîkaingwa na ngai îrege kuura nîûntû antû baaku nî bakwîîrîîtie, îndî bacoke kîrî gwe na barombe bakiiriraga meeyia jaao barî kîûrûûne gîkî,

³⁶ûbathikîîre ûrî kûu îgûrû. Naagwe ûrekere nthûûmba ciaaku, antû ba Israeli meeyia jaao, na ûbaritanage kûthithia mantû jamaagîru. Rîu itû MWATHANI uurithie ngai nthîgûrûûne yaaku îrîa waaere antû baaku yaa yaao.

³⁷Gûkëeja kûgîa mpara kana mîrimo îmîthûûku nthîgûrûûne kana imera bikëeja kwîîthua nî mpio kana bikarîwa nî ngigî kana anthû bakëeja gûcîgîria ntûûra kana antû baaku bagwatwa nî kathûngûthi kana mûrimo kinya jûrîkû,

³⁸muntû waaku kana antû baaku bonthe ba Israeli bakûromba bagîgûkaîîraga bakiiriraga meeyia jaao na bookîrîîtie njara bacierekeretie kîûrûûne gîkî,

³⁹itû ûbaigue ûrî kûu îgûrû ûtûûraga na ûbarekere meeyia jaao. Ningî ûgiitîre o muntû îgamba kûringana na mîîtîre jaawe nîûntû nîwe wenka wiijî nkoro ya muntû.

⁴⁰Nabo antû baaku bagakwaathîkagîra magiita jonthe barî nthîgûrû îrîa waaere biûjûjû bieetû.

⁴¹Na-rî, ageni barîa batî antû baaku ba Israeli, rîrîa bakauma nthîgûrû ciaao, nîûntû bwa riîtwa rîaaku,

⁴²nîkwîthîrwa nî baigîtue mantû jamanene jakwegiî, na baigua mantû jegiî inya yaaku na ûrîa ûthithîrîtie antû baaku, beeja gûkûromba barî kîûrûûne gîkî,

⁴³ûbaigue ûrî kûu îgûrû kûrîa ûtûûraga na ûboojûrîrie jonthe jarîa bagakûromba. Ûbathithîrie ûu nîkenda antû bonthe ba nthîgûrû bakûmenya na bagûkîraga o ta ûrîa tuî antû baaku ba Israeli tûthithagia. Ningî nîkenda antû bau bakamenya atî kîûrû gîkî mbakîte nîkîo antû arîa ûbuîrîte kûthaathagîrua.

⁴⁴“Ningî ûkëeja kwîra antû baaku ba Israeli beete bakarwee na anthû baao, na kûrîa bakeethîrwa barî bakaromba, beerekerete ntûûra îîjî withuurîrîte na kîûrû gîkî mbakîte nîûntû bwa riîtwa rîaaku,

⁴⁵itû ûthikîîre maromba jaao na gûkaya kwaao. Naagwe ûbaigue ûrî kûu îgûrû na ûbae ûûmbani.

⁴⁶“Na-rî, rîrîa antû baaku bagakwîîria, nîûntû gûtî muntû ûtîîagia, naagwe ûthûûre nîbo, na ûbarekererie bacindwe na batawe nî anthû baao na baikue nthîgûrû îngî yëethîrwa yaankeene nabo kana îrî kûraaja,

⁴⁷itû ûbathikîîre bakûromba. Nabo barî kûrîa bakeethîrwa barî, bakëeja kwirira meeyia na maatia jaao na bakûromba bagîgûkaagîra, itû MWATHANI wigue maromba jaao.

⁴⁸Ningî barî o nthîgûrû îîu bakëeja kwirira na nkoro ciaao na mîoyo yaao yonthe na bakûromba beerekerete nthîgûrû îrîa waaere biûjûjû bieetû, na ntûûra îrîa ûthuurîte na kîûrû gîkî mbakîte nîûntû bwa riîtwa rîaaku,

⁴⁹itû ûbathikîîre ûrî îgûrû kûrîa ûtûûraga na ûbaigîîrue kîaao.

⁵⁰Naagwe ûbarekere meeyia na îrema rîaao, na ûtûme batîkathangîkue nî anthû baao.

⁵¹Nîkwîthîrwa bo nî antû baaku bongwa barîa waaritîre Misri, nthîgûrû îrîa baathangîkîte ta baarî mwankiine jwa gûkerura chuuma.

⁵²“Itû MWATHANI Mûrungu, ûrotûûra kûthithagîria antû ba Israeli na mûnene waao mantû jameega na ûkabaigagua bakûromba ûteethio.

⁵³Nîgwe waabathuurîre kuuma kîrî antû bonthe ba nthîgûrû baraa antû baaku bongwa, o ta ûrîa waugîre na njîra ya nthûûmba yaaku, tayo Musa, rîrîa waaritîre biûjûjû bieetû kuuma Misri.”

⁵⁴Solomoni akûthiria kûromba, akîerencaga MWATHANI, nî aarûngamîre au mbere ya kîritîro kîa igongwana arîa aaturîtie maru na arookîîria njara bwa îgûrû.

⁵⁵Nawe arookia kajû ararombera kîrîndî kîonthe kîrîa kîothûreene au itharimo kuuma kîrî Mûrungu. Nawe arauga atîrî,

⁵⁶ “Arokumua MWATHANI, we weete antû baawe ba Israeli thîîrî o ta ûrîa aaugîîte akathithia. We gûtî bu bwa mawîrane jameega jarîa eerîîrîte Musa atoojûria.

⁵⁷MWATHANI Mûrungu weetû arotûûra amwe na tuî, o ta ûrîa aatûûraga amwe na biûjûjû bieetû. MWATHANI akarotûtiganîîria kana atwîrûkîra.

⁵⁸Arotûma tûmwendage na tûmwathîkagîre na tûjûragie ndwaatho na maathana jarîa aathîre biûjûjû bieetû.

⁵⁹MWATHANI Mûrungu weetû arotûûraga gûtûthithagîria mantû jau ndamûromba. Ningî agatûûra kwigagîrua antû ba Israeli o na mûnene waao kîaao na akaabojûragîria moobatu jaao ja o ntukû.

⁶⁰Nabo antû bonthe ba nthîgûrû bakaamenya atî MWATHANI nîwe Mûrungu wenka; na gûtî ûngî tiga we.

⁶¹Naabuî antû baawe bûrotûûra bwîtîkîtie MWATHANI weetû, na bûtûûrage bwathîkîrîte mataaro na maathana jaawe o ta ûrîa bûkûthithia naarua.”

⁶²Nawe mûnene na antû baawe bonthe barîa baarî au, nî baaritîîre MWATHANI igongwana.

⁶³Solomoni nî aaritîîre MWATHANI ndeegwa ngiri mîrongo îîrî na ijîîrî (22,000) na ng'ondu ngiri îgana rîa mîrongo îîrî (120,000) ta kîgongwana kîa thîîrî. Tontû bûû, mûnene na antû bonthe ba Israeli baraathûrîra MWATHANI kîûrû kîu.

⁶⁴Ningî O ntukû îîu yongwa Solomoni nî aathûrîre kîarago gîa gatîgatî kîrîa kîrî mwariine jwa kîûrû kîa MWATHANI. Araitera kîaragoone kîu kîgongwana kîa gwakîîria na kîa irio na kîa mathuunya kîrî kîgongwana kîa thîîrî. Nawe aathithîrie ûu nîûntû kîritîro kîrîa kîathithîtue na îturutia kîaarî gîkînini ûrîa gîtîngîûmba kûng'anîra kûritîrwa igongwana biu.

⁶⁵Nyuma Solomoni na antû baawe bonthe ba Israeli barathithia mambura ja tûgaanda antû a ntukû mûgwanja. Nakîo kîrîndî kîreeja gîkiingî kuuma mûcîcîbîroone jwa Hamathi bwa rûgûrû mwanka mwankeene jwa Misri bwa gaiti.

⁶⁶Ntukûûne ya inyaanya Solomoni nî eerîre antû baane. Nabo baramûkumia mono baraana bagwîrîtue nîûntû bwa itharimo birîa MWATHANI eetûûrîrîtie nthûûmba yaawe Daudi na antû baawe ba Israeli.