Read KIMERU BIBLE PROTESTANT EDITION 1Ane 9 Bible Online

1Ane 9 - KIMERU BIBLE PROTESTANT EDITION bible

1Ane 9

¹Rîrîa Solomoni aathirîrie gwaka kîûrû na gîkaro kîa mûnene na mîako îrîa yonthe eendaga gwaka,

² MWATHANI nî aacionanîrie kîrî we kaîrî o ta ûrîa aacionanîtie kîrî we kûu Gibeoni.

³MWATHANI aramwîra atîrî, “Nkwigua îromba rîaaku na merenchana jaaku. Naani nkwaathûra kîûrû gîkî waakîte kîee antû arîa ngatûûraga kûthaathagîrua. Ningî ngatûûra ngîkarîtie na nkîmenyeerete magiita jonthe.

⁴Naagwe ûkëeja kwîthîrwa ûrî ûmwagîru na ûrî na mîîtîre îmîega ta abaagu Daudi na ûkathithagia jarîa jonthe mbugîîte na ûkaathîkagîra Waatho bwaakwa na mataaro jaakwa,

⁵ naani nkaarikithia waathani bwaaku kîrî antû ba Israeli kenya na kenya o ta ûrîa ndaaciîtîîrie abaagu Daudi ndamwîra atîrî, ‘Nthîgûrû ya Israeli îkaathagwa nî ûmwe wa nchiarwa ciaaku kenya na kenya.’

⁶Îndî gwe kana nchiarwa ciaaku bûkëeja gûtiga kûmbathîkagîra na bûgatiga kwathîkagîra maathana jaakwa na Waatho bwaakwa bûrîa mbûnenkerete na bûgeetaga gûtumîkîra mîrungu îngî bûkîmîthaathayia,

⁷rîu nkabwînga buume nthîgûrûûne îrîa mbweete. Ningî nkeerûkîra kîûrû gîkî ndaathûra kîaa antû arîa nkathaathagîrua. Nabo antû ba mîgongo îîu îngî bakaamenaga na bathûmbagie Aisraeli.

⁸ Nakîo kîûrû gîkî gîgakoborangwa kîee îgaanjo. Nawe ûrîa wonthe ûgakûrûkagîîra au ageetaga akîringaga mîkenke nî kûrigara agaciûria atîrî, ‘Nîkî tontû MWATHANI athithîrîtie nthîgûrû îîjî na kîûrû gîkî mantû jakari ûu?’

⁹Nabo antû bagacokagia atîrî, ‘Aisraeli bathithîrîtue ûu tontû nî bareganîte na MWATHANI Mûrungu waao ûrîa waritîre biûjûjû biaao nthîgûrû ya Misri na baratua kwathîkagîra na kûthaathagia mîrungu îngî. Kîu nîkîo gîatûmîre MWATHANI abaretera mîthangîko îîu yonthe.’”

¹⁰Solomoni aakîre Kîûrû na gîkaro kîa mûnene mîaka mîrongo îîrî.

¹¹Hiramu mûnene wa Tiro nîwe waanenkagîra Solomoni mîtarakwa na mîthithinda na thaabu, o îrîa yeendekanaga. Nawe mûnene Solomoni aranenkera Hiramu ntûûra mîrongo îîrî nthîgûrûûne ya Galili.

¹²Îndî Hiramu agwîta kwona ntûûra iu itamûgwîrîrie.

¹³Nawe arooria Solomoni atîrî, “Mûtaana wa chiaa, nî ntûûra ikari atîa iji wanenkera?” Tontû bûû, antû au gwîtagwa Kabuli[2] mwanka naarua tûrî.

¹⁴Hiramu aarî agûtûmîra Solomoni kilo ngiri inya na magana jataano (4,500kg) cia thaabu.

¹⁵Solomoni akûthiria gwaka kîûrû na gîkaro kîa mûnene agîtumagîra ariti ngûgî ba gûkinyîîria nî aacokere arang'ananîria gûntû kûrîa kweenûki rûteere rwa ûrîo rwa ntûûra na aramiirigîra na rûthingo. Ningî aratumîra antû bau ba gûkinyîîrua gwaka ntûûra cia Hazori na Megido na Gezeri.

¹⁶(Farao mûnene wa Misri nî aarî akwithûkîra Gezeri na amîtaa.) Nawe akûûraga atûûri baayo, aramîmuntia mwanki. Nyumeene Solomoni akûgûrana kwa Farao, araeewa ntûûra ya Gezeri îrî ta kîewa kîrî mwarî waawe.

¹⁷Solomoni aramîaka bwega. Ningî aratumîra ariti ngûgî bau ba gûkinyîîria gwaka Bethihoroni îrîa îrî bwa nthî,

¹⁸na Baalathi na Tamari îrîa îrî rwanda rwa Juda.

¹⁹Ningî arabatumîra gwaka ntûûra cia gwîka ûtonga bwaawe na nkanata cia mbarathi na gûntû gwa gwîkaga ngaarî ciaawe cia ndwaa. Nabo nîbo aatumîîre gwaka birîa bionthe eendaga gwaka kûu Jerusalemu na Lebanoni na kûu kûngî ndeene ya mûgongo jwaawe.

²⁰Nacio nchiarwa cia antû ba Kanaani barîa batooragîrwe nî Aisraeli bakûjûkia nthîgûrû yaao nîbo Solomoni aatumagîra barî ariti ngûgî ba gûkinyîîria.

²¹Nabo nî Aamori na Aperizi na Ahivi na Ajebusi barîa nchiarwa ciaao irî nkombo mwanka naarua tûrî.

²²Îndî kîrî antû ba Israeli Solomoni gûtî bo aaeethia nkombo. Bo baaritaga ngûgî barî asikarî, na atongeeria, na arûngamîîri ba njûûrî, na eetithia ba ngaarî cia ndwaa na asikarî ba mbarathi.

²³Ningî nî kwaarî na Aisraeli magana jataano na mîrongo îtaano (550) barîa baarûngamagîîra ariti ngûgî ba gûkinyîîria mîakoone ya mûnene Solomoni.

²⁴Mwekûrû wa Solomoni ûrîa aagûrîte kuuma kwa Farao mûnene wa Misri nî aathaamîre kuuma ntûûreene ya Daudi areeta nyomba îrîa mûnene Solomoni aamwakîrîte. Rîu aroojûria mwînûko na mûthetu, arajûng'ananîria. Mwînûko jûu jwaarî rûteere rwa ûrîo bwa ntûûra.

²⁵ Solomoni aratua gwîtaga maita jathatû o mwaka kûrita igongwana bia gwakîîria na bia thîîrî na kwîîthia ubaani kîritîroone kîa igongwana kîrîa aakîrîte MWATHANI. Rîu Solomoni arathiria gwaka kîûrû.

²⁶Ningî mûnene Solomoni nî aakîre meri inyiingî arî ntûûreene ya Ezioni-geberi îrîa îrî akuî na Elothi mpwîroone cia Îria Îtuune, nthîgûrûûne ya Edomu.

²⁷Mûnene Hiramu nî atûmîre antû bamwe baawe barîa baaijî ngûgî ya meri bagatethererie ba Solomoni.

²⁸Nabo bareetithia meri mwanka nthîgûrû ya Ofiri. Rîu barauma nau na kilo cia thaabu ngiri îkûmi na inya (14,000kg) baraikîria Solomoni.