Read KIMERU BIBLE PROTESTANT EDITION 2Ane 10 Bible Online

2Ane 10 - KIMERU BIBLE PROTESTANT EDITION bible

2Ane 10

¹Nî kwaarî na nchiarwa mîrongo mûgwanja (70) cia Ahabu ciaatwîre ntûûreene ya Samaria. Tontû bûû, Jehu nî aandîkîre barûga aratûmana ciikua kîrî atongeeria ba ntûûra, na kîrî akûrû ba ntûûra, na kîrî akaria ba nchiarwa cia Ahabu kûû Samaria. Barûga yaaugaga atîrî,

²“Buî nî buî bûmenyagîîra nchiarwa cia mwathi weenu Ahabu. Ningî bûrî ngaarî cia ndwaa, na mbarathi, na ntûûra imbirigîre na nthingo, na mathaga ja ndwaa. Tontû bûû, bwakinyîrwa nî barûga îîjî

³bûthuure ûmwe wa nchiarwa cia mwathi weenu Ahabu, ûrîa ûûmba kûjûkia ûnene bûmweethie mûnene. Naabuî bûmûrwîîre.”

⁴Atongeeria ba ntûûra ya Samaria baraigua ûguaa mono barooria atîrî, “Këethîra anene baîrî nî baaremerwe nîwe rî, noo tuî.”

⁵Tontû bûû, mûrûngamîîri wa gîkaro kîa mûnene, na mûtongeeria wa ntûûra ya Samaria, na akûrû, na amenyeeri ba nchiarwa cia Ahabu, nî baatûmanîre kîrî Jehu bakiugaga ûjû, “Tuî tûrî nthûûmba ciaaku. Naatuî tûkaathithia jonthe jarîa ûkauga tûthithie. Gûtî we tûkaaeethia mûnene. Thithia o ûrîa ûkwona kwagîrîte.”

⁶Jehu nî aabaandîkîîre barûga ya ijîîrî akiugaga, “Këethîra nî bûngweete mbaru rî, na këethîra bûkaambathîkîra, rûûjû thaa ta iji, bûndeetere biongo bia nchiarwa cia Ahabu gûkû ntûûreene ya Jezereeli.” Nacio nchiarwa iu mîrongo mûgwanja baareragîrwa nja cia antû barîa baarî îgweta ba ntûûra.

⁷Rîrîa barûga îîu yaakinyîîre antû ba îgweta, nî baagwatîre nchiarwa irîa mîrongo mûgwanja cia Ahabu, baraciûraga, baragiita biongo barabiîkîra ikabûûne baraikîria Jehu kûu ntûûreene ya Jezereeli.

⁸Nawe mûtûmwa areeta areera Jehu atîrî, “Biongo bia nchiarwa cia Ahabu biikûreetwa.” Nawe Jehu arauga atîrî, “Biîkeeni ithûmba biîrî mpingîroone ya ntûûra mwanka rûkîîrî.”

⁹Rûûneene Jehu araumagara ararûngama mbere ya antû bonthe arabeera atîrî, “Buî bûtî na maîtia. Nî ni ndîrabangîre kûûraga mwathi waakwa mûnene Joramu na ndîramûûraga, îndî nûû ûûragîte baba bonthe?

¹⁰Menyeni atî gûtî ûntû noo bûmwe bûrîa MWATHANI aaugîîte bwegiî nchiarwa cia Ahabu, bûrîa eerîre kîroria Elija, bûkaûrîra nthî. Ûntû bûu bûkûûjûra.”

¹¹ Jehu nî ooragîre antû barîa bonthe baatigeere ntûûreene ya Jezereeli ba ndûgû cia Ahabu, amwe na barîa bonthe baathanaga amwe nawe, na acoore baawe barîa banene, na athînjîri-mûrungu baawe. Gûtî we noo ûmwe wonoka.

¹²Ningî Jehu nî aagwatîre rûgendo rwa gwîta ntûûreene ya Samaria. Arî njîreene, arakinya antû gweetagwa Kambî ya Arîîthi,

¹³nî aacemanîrie na ndûgû cia Ahazia ûrîa waakuîre arî mûnene wa Juda. Jehu arabooria atîrî, “Bûrî baaû” Nabo baracokia barauga, “Tûrî ndûgû cia Ahazia, na nîka twîjîte kûriûngîra ataana ba mûnene, na ba mûka wa mûnene weetagwa Jezebeli.”

¹⁴Jehu areera antû baawe ûjû: “Bagwateeni barî mwoyo.” Nabo barabagwata barî mwoyo, bareeta kûbooragîra akuî na îrinya rîa Kambî ya Arîîthi. Bonthe baarî antû mîrongo îna na baîrî, na gûtî noo ûmwe waao woonoka.

¹⁵Kuuma au Kambîîne ya Arîîthi Jehu areeta aratirimana na Jehonadabu mûtaana wa Rekabu eetîte gûtirimana nawe. Jehu aramûkeethia aramûûria atîrî, “Ûkaagwatanîra naani ta ûrîa nkwenda tûgwatanîra?” Jehonadabu aramûcokeria “Îî nî nkwenda!” Jehu nawe aramwîra atîrî, “Këethîra nîu reete njara.” Jehonadabu aramûgwata njara. Jehu nawe aramûteetheeria aitia ngaarîîne yaawe ya ndwaa.

¹⁶Jehu aramwîra, “Twîtanie ûkoone ûrîa ncieejeene kîrî MWATHANI.” Nabo bareetania mwanka Samaria.

¹⁷Jehu akinya Samaria nî ooragîre antû ba ndûgû cia Ahabu bonthe barîa baatigeere atîgûtigaria noo ûmwe, kûringana na ûrîa MWATHANI eerîte kîroria Elija.

¹⁸Jehu nî oothûranîrie antû bonthe arabeera atîrî, “Ahabu aatumîkagîra mûrungu jwa Baali bûbûkai, îndî ûûni nkaajûtumîkîra nkûrûki.

¹⁹Tontû bûû, nandî mbîtîreeni iroria bionthe bia mûrungu jwa Baali, na barîa bonthe bajûthaathayia amwe na athînjîri-mûrungu baaju. Gûkaagîta noo ûmwe ûûra nîûntû nî nkwenda kûritîra Baali kîgongwana gîkînene mono. Ûrîa ûkaarega kwîja akooragwa.” Îndî Jehu aabeeraga ûu akibaaiiria nîkenda abooraga bonthe.

²⁰Jehu ararita Waatho arauga, “Îîkeeni ntukû na bûtûmîîrie rîrîa tûkoothûrana nîkenda tûthaathayia mûrungu jwa Baali.” Nayo ntukû îratûmîîrua.

²¹Jehu aratûmana nthîgûrûûne ya Israeli kunthe. Nabo athaathayia ba Baali bonthe bareeja na gûtî noo ûmwe waao waatigwa. Baratonya kîromberoone kîa Baali, baroojûra ku; kuuma mûthia jûmwe gwîta mûthia jûngî.

²²Jehu areera muntû ûrîa waarî mûmenyeeri wa nguû irîa ntheru atîrî, “Nenkera antû baba bonthe bathaathayia mûrungu jwa Baali nguû.” Nawe arabanenkera.

²³Jehu barî na Jehonadabu mûtaana wa Rekabu baratonya kîromberoone kîa Baali. Jehu areera barîa baathaathayia Baali atîrî, “Raitheeni bwega gûtîkeethîrwe kûrî muntû ûthaathayia MWATHANI gatîgatîîne keenu.”

²⁴Jehu na Jehonadabu bareeta kûrita igongwana. Jehu nî eekîte antû mîrongo înaana oome ya kîrombero na nîaabeerîte ûjû, “Ûrîa weenu ûkaarekeeria noo ûmwe wa barîa barî kîromberoone gîkî nîkenda amatûka, kinya we akooragwa”

²⁵Rîrîa Jehu aathirîrie kûrita kîgongwana gîa gwakîîria nî eerîre akaria baawe, na atongeeria ba njûûrî atîrî, “Kûrûkeeni bûboorage bonthe. Bûkárekeeria noo ûmwe waao amatûka.” Bathiria kûbooraga, barabagera oome. Ningî baratonya kanyomba ka ndeene ga kîrombero kîa Baali,

²⁶bararita gîtugî kîrîa kîaarî nyomba ya mûrungu jwa Baali na barakîîthîîria.

²⁷Barathûûkangia gîtugî kîrîa kîaarî gîkîtheru na baramomoranga kîrombero kîu, barakîeethia kîoro, na nîu kîrî kinya naarua tûrî.

²⁸Ûu nîu Jehu aatûmîre mûrungu jwa Baali jûtiga kûrombagwa nthîgûrûûne ya Israeli.

²⁹ Îndî Jehu ataatiganîre na meeyia jarîa Jeroboamu mûtaana wa Nebati, aathithagia, jarîa jaatûmîre antû ba Israeli batonya meeyiene ja kûthaathayia mîrungu ya mîng'uanano ya tûjaû twa thaabu îrîa yeeki ntûûreene ya Betheli na ya Dani.

³⁰MWATHANI nî eerîre Jehu atîrî, “Ûkûthithia mantû jameega meethoone jaakwa, na wathithiria nchiarwa cia Ahabu ûrîa ndîngîenda ithithîrua. Tontû bû nchiarwa ciaaku ikaathana ndeene ya Israeli mwanka nthukîîne ya inya.”

³¹Îndî Jehu atáthîkîîre Waatho bwa MWATHANI Mûrungu wa Israeli na nkoro yaawe yonthe. Ningî ataatiganîre na meeyia jarîa mûnene Jeroboamu aathithagia jarîa jaatûmîre Israeli îtonya meeyiene.

³²Îgiiteene rîu, MWATHANI nî aambîrîîrie kûnyiyia nthîgûrû ya Israeli. Mûnene Hazaeli wa Sîria nî aataîre nthîgûrû ya Israeli yonthe.

³³Kuuma rûteere rwa bwa gaiti rwa Jorodani, gwîta bwa ûmotho mwanka ntûûreene ya Aroeri, îrîa yaarî rûteere rwa mûuro jwa Arinoni. Nayo îîu yaarî nthîgûrû ya antû ba Gileadi, na ba Bashani, na nîyo yaarî nthîgûrû ya mîîrîga ya Gadi, na Rubeni na Manase ya bwa gaiti.

³⁴Najo mantû jangî jamanene jarîa Jehu aathithîrie nî jaandîki yukuune rîa Mantû ja Karaaja jegiî Anene ba Israeli.

³⁵Jehu nî aakuîre na arathikwa ntûûreene ya Samaria. Jehoahazi mûtaana waawe araa mûnene.

³⁶Rîrîa Jehu arî Samaria, rîaarî mîaka mîrongo îîrî na înaana (28).