Read KIMERU BIBLE PROTESTANT EDITION 2Ane 11 Bible Online

2Ane 11 - KIMERU BIBLE PROTESTANT EDITION bible

2Ane 11

¹Rîrîa Athalia ng'ina wa mûnene Ahazia aamenyere atî mûtaana waawe akuûûragwa, nî aaritîre waatho atî antû ba nja ya mûnene booragwe bonthe.

²Îndî Jehosheba, ûrîa waarî mwarî wa ng'ina wa Ahazia, na mwarî wa mûnene Joramu, nî aajûkîrie Joashi mûtaana wa Ahazia, amwe na ûrîa wamûmenyagîîra arabaitha. Jehosheba aathûranîte Joashi na ataana bangî ba Ahazia nîkenda atîkooragwe. Jehosheba aamwithîre ndeene ya kanyomba ka ndeene kîûrûûne.

³Jehosheba aaithîre Joashi kûu kîûrûûne mîaka îtaantatû îrîa Athalia aathanaga nthîgûrûûne.

⁴Îndî mwakeene jwa mûgwanja Jehoiada ûrîa waarî mûthînjîri-Mûrungu nî aatûmanîîre akaria ba mûnene na akaria gîkaro kîa mûnene arauga beete kîûrûûne. Nawe arabanyuithia muuma areeka kîrîkanîro nabo, aracoka araboonia Joashi mûtaana wa Ahazia.

⁵Jehoiada arabeera atîrî, “Bweja ngûgîîne ntukû ya sabatû bwigaanie ikundi bithatû. Gîkundi kîmwe gîkarie gîkaro kîa mûnene.

⁶Gîkundi kîngî gîkarie mpingîro ya Suri. Nakîo gîkundi kîa bithatû gîkare nyuma ya akaria barîa barî mpingîroone.

⁷Nabio ikundi biîrî birîa bitîîthagîrwa birî ngûgîîne ntukû ya sabatû, biîje kîûrûûne bikarie mûnene.

⁸Nakîo gîkundi kîu kîîthîrwe kîgwete mathaga gîkarîtie mûnene. Muntû wonthe ûrîa ûkeeja akuî naabuî no mwanka ooragwe.”

⁹Nabo atongeeria bau ba asikarî nî baathithîrie ûrîa mûthînjîri-Mûrungu aabeerîte. O mûtongeeria araretera Jehoiada asikarî barîa bataarî ngûgîîne ntukû ya sabatû, amwe na barîa baabuîri gwîta ngûgîîne ntukû ya sabatû.

¹⁰Jehoiada, mûthînjîri-Mûrungu, nî aaritîîre atongeeria ba asikarî matumo na rong'o irîa ciaarî cia mûnene Daudi, irîa cieeki kîûrûûne.

¹¹Nabo akaria bau bararûngama kuuma bwa ûmotho gwîta bwa ûrîo. Barathiûrûkîra kîritîro kîa igongwana na kîûrû bakarîtie mûnene bagwete mathaga ja ndwaa.

¹²Jehoiada aracoka araumagaria Joashi mûtaana wa mûnene, aramwîkîra thirû ya ûnene mûtwe, na aramûnenkera yuku rîa waathani. Baramwîtûûrîria maguta, baramweethia mûnene bakîringaga mpîî bakiugaga atîrî, “Mûnene arotûûra matukû jamaingî!”

¹³Rîrîa Athalia aaigîrua akaria na antû bakîriingaga gîtuma, nî eetîre kîûrûûne kîrî bo.

¹⁴ Athalia agîtega aroona mûnene arûngi gîtugîîne gîa kîûrû kûringana na wîîthîre. Nabo atongeeria ba asikarî, na aringi tarumbeta barûngi akuî na mûnene. Nabo antû bonthe nî baagwîrîîtue mono bakîringaga tarumbeta. Athalia aratambûranga nguû ciaawe arauga atîrî, “Îî nî nkunyanîri mbûragwa! Îî nî nkunyanîri mbûragwa!”

¹⁵Jehoiada mûthînjîri-Mûrungu areera atongeeria ba asikarî atîrî, “Muumagarîîrieni gatîgatî ka ikundi bia asikarî na muntû noo ûrîkû ûrîa ûkamûthingata ooragwe.” Ningî nî aarî akûbeera atîrî, “Bûkámûûragîreeni kîûrûûne.”

¹⁶Tontû bûû, baramûgwata, baramûkûrûkîîria mpingîroone ya mbarathi baramwikia gîkaro kîa mûnene baramûûragîra ku.

¹⁷Jehoiada nî aatûmîre mûnene amwe na antû beekanîra kîrîkanîro na MWATHANI atî bakaa antû baawe. Ningî aratûma antû beekanîra kîrîkanîro na mûnene waao.

¹⁸Nabo antû bonthe bareeta kîromberoone kîa Baali barakîmomoranga, na baratharia iritîro bia igongwana, na baraunanga mîrungu ya mîng'uanano. Ningî barooragîra Matani mûthînjîri-mûrungu wa Baali, mbere ya iritîro bia igongwana. Jehoiada aracoka areeka akaria nîkenda bakaria kîûrû.

¹⁹Jehoiada amwe na atongeeria ba asikarî, na akaria ba gîkaro kîa mûnene na antû bonthe, baraumagaria mûnene kuuma kîûrûûne. Baramûkûrûkîîria mpingîroone ya akaria baramwikia gîkaro kîa mûnene. Joashi arakarîra gîtî kîa ûnene.

²⁰Nabo antû bonthe baragwîrua, na ntûûra îraborera nîûntû Athalia nî aarî akûûragîrwa gîkaroone kîa mûnene.

²¹Joashi aaere mûnene arî na ûkûrû bwa mîaka mûgwanja (7).