Read KIMERU BIBLE PROTESTANT EDITION 2Ane 12 Bible Online

2Ane 12 - KIMERU BIBLE PROTESTANT EDITION bible

2Ane 12

¹Joashi aaere mûnene wa Juda mwakeene jwa mûgwanja jwa waathani bwa Jehu, mûnene wa Israeli. Joashi aathanîre arî Jerusalemu mîaka mîrongo îna. Ng'ina wa Joashi eetagwa Zibiha wa kuuma ntûûreene ya Beerisheba.

²Joashi nî aathithîrie mantû jarîa jaagîrîte mbere ya MWATHANI ûtûûroone bwaawe bunthe nîûntû Jehoiada mûthînjîri-Mûrungu nî aamweejaga kîrîra.

³Îndî gûntû kûrîa mûrungu jwa Baali jwaathaathagîrua gûtaathûûkangua. Antû nî beetîre na mbere kûritîra igongwana ku na kwîîthîria ubaani nao.

⁴ Joashi nî eetîre athînjîri-Mûrungu arabeera atîrî, “Bwîkage mbeecha cionthe irîa ireetagwa kîûrûûne nîûntû bwa igongwana. Iu nî mbeecha irîa iritagwa nîûntû bwa igongwana mwanya mwanya na irîa iritagwa irî biewa.

⁵O mûthînjîri-Mûrungu nî ajûkagie mbeecha kuuma kîrî antû barîa agûtumîkîra. Mbeecha iu itumagîrwe nîûntû bwa kûthithia kîûrû kûrîa kîthûkangi.”

⁶Îndî kinya mwakeene jwa mîrongo îîrî na îthatû jwa waathani bwa Joashi, athînjîri-Mûrungu bataarî bakûthithia kîûrû kûrîa kîathûûkangi.

⁷Tontû bûû, mûnene Joashi areeta mûthînjîri-Mûrungu, Jehoiada amwe na athînjîri-Mûrungu bangî arabooria atîrî, “Nîmbi îgirîîtie bûthithia kîûrû kûrîa kîthûûkangi? Nandî bûkájûkieni mbeecha kaîrî kuuma kîrî barîa babûtumîkagîra. Îndî bûnenkanagîre mbeecha iu nîkenda ithithia kîûrû.”

⁸Nabo athînjîri-Mûrungu bareetîkîîria gûtiga kûjûkia mbeecha kuuma kîrî antû, na kinya gûtiga mantû ja kûthithia kîûrû.

⁹Jehoiada, mûthînjîri-Mûrungu arajûkia îthandûkû, ararîtûra gakutho nkunîkiine na ararîîka rûteere rwa ûrîo rwa kîritîro kîa igongwana. Akuî na au îthandûkû rîaarî nîo antû baatonyagîîra kîûrûûne. Mûthînjîri-Mûrungu ûrîa weethagîrwa arî ngûgîîne akarîtie mwari nî eekagîra mbeecha cionthe irîa ciaaritagwa nî antû îthandûkûûne rîu.

¹⁰Rîrîa rîonthe boonaga mbeecha ikwingîa îthandûkûûne karani wa mûnene na mûthînjîri-Mûrungu ûrîa mûnene nî beetaga bagatara mbeecha cionthe irîa cieethagîrwa irî îthandûkûûne bagaciîkîra mîbukoone bakamîoga.

¹¹Nabo nî baajûkagia mbeecha iu ciathimwa bakainenkanîra kîrî antû barîa baarûngamîrîte ngûgî ya gwaka kîûrû kûrîa kîthûkangi. Nabo arûngamîîri ba mwako nî baarîage aaki na mbaaû na abundi bangî.

¹²Ningî nî baarîaga aaki na maiga na aaji maiga. Ningî nî baagûraga mbaaû na maiga ja gwaka kûrîa kwaathûkangi. Mbeecha ingî nî baarîaga nacio ngûgî cionthe cia kûthithia kîûrû kûrîa kwaathûkangi.

¹³Îndî bataatumîîre mbeecha iu nîûntû bwa kûgûra taawa, kana mpakûri, kana tarumbeta, kana gîntû kîngî kinya kîrîkû kîa thaabu kana kîa fetha.

¹⁴Mbeecha cionthe ciaatumagîrwa kûrîaa ariti ngûgî na kûgûra into birîa biatûmagîrwa gwaka kîûrû kûrîa kîathûûkangi.

¹⁵ Arûngamîîri bau ba mwako baarî eetîkua. Tontû bûû gûtaarî na gîtûmi kîa kûbooria boonanie ûrîa mbeecha iu ciaatumagîrwa.

¹⁶ Mbeecha cia igongwana bia kûthiria maatia, na cia igongwana bia kûthiria meeyia itaikagua kîûrûûne. Îndî cianenkanagîrwa kîrî athînjîri-Mûrungu.

¹⁷Îgiiteene rîu Hazaeli, mûnene wa Sîria nî eetîre kwithûkîra antû ba Gathi, nawe aramîtaa. Aracoka areeta kwithûkîra ntûûra ya Jerusalemu.

¹⁸Îndî Joashi mûnene wa Juda, arajûkia biewa bionthe birîa mûnene Jehoshafati, na mûnene Jehoramu, na mûnene Ahazia, baarî bakûritîra MWATHANI amwe na biewa biaawe wengwa, na thaabu yonthe îrîa yaarî mîthithûûne ya kîûrû kîa MWATHANI, na îrîa yaarî gîkaroone kîa mûnene, aratûmana biikîrua Hazaeli mûnene wa Sîria. Tontû bûû, Hazaeli araciîtîra aratigana na ntûûra ya Jerusalemu.

¹⁹Mantû jangî jonthe jarîa mûnene Joashi aathithîrie nî jaandîki Yukuune rîa ngono cia anene ba Juda.

²⁰Nabo atongeeria barîa baathanaga barî rungu rwa mûnene Joashi nî baamûkunyanîîre baramûûragîra nyomba îrîa îrî Milo njîreene ya gwîta Sila.

²¹Atongeeria barîa baamûûragîre baarî Jozakari mûtaana wa Shimeathi, na Jehozabadi mûtaana wa Shomeri. Nabo baramûthika mbîrîreene cia beethe ntûûreene ya Daudi. Amazia, mûtaana wa Joashi araa mûnene