Read KIMERU BIBLE PROTESTANT EDITION 2Ane 13 Bible Online

2Ane 13 - KIMERU BIBLE PROTESTANT EDITION bible

2Ane 13

¹Jehoahazi mûtaana wa Jehu aajûkîrie waathani mwakeene jwa mîrongo îîrî na îthatû jwa waathani bwa Joashi, mûtaana wa Ahazia. Jehoahazi aathanîre nthîgûrûûne ya Israeli arî ntûûreene ya Samaria, mîaka îkûmi na mûgwanja.

²Jehoahazi nî aathithîrie mantû jamathûûku mbere ya MWATHANI nîûntû nî aathithîrie meeyia ta jarîa Jeroboamu, mûtaana wa Nebati aathithagia aratûma antû ba Israeli bathithia meeyia.

³Tontû bûû, MWATHANI nî aathûûrîre mono nîûntû bwa Israeli, ararekeeria antû ba Israeli baithûkîrwa na boombwa jamaingî ndweene nî Hazaeli mûnene wa Sîria na kinya mûtaana waawe Beni-hadadi.

⁴Nîrîo mûnene Jehoahazi aarombere MWATHANI, nawe MWATHANI aramwigua. MWATHANI nî aarî akwona mîthangîko ya Israeli nîûntû bwa ûrîa baainyagîîrua nî mûnene wa Sîria.

⁵MWATHANI nî aabaeere mûtongeeria ûrîa waaboonokerie kuuma kîrî antû ba Sîria. Nabo antû ba Israeli baratûûra kiindajî o ta ûrîa gwakari mbereene.

⁶Îndî amwe na bûû, antû ba Israeli bataatiganîre na meeyia jarîa Jeroboamu aathithagia na aratûma Israeli îthithia. Ningî beetîre na mbere kûthithia meeyia na barareka mûrungu jwa mûng'uanano jwa Ashera jwîta na mbere kwîthîrwa jûrî ntûûreene ya Samaria.

⁷Njûûrî ya mûnene Jehoahazi îrîa yaatigeere yaarî înini mono. Kwaarî na Asikarî ba mbarathi mîrongo îtaano (50) na ngaarî îkûmi cia ndwaa, na asikarî ngiri îkûmi (10,000) nîûntû mûnene wa Sîria nî aarî agûkinyanga bangî booka tîîri.

⁸Mantû jangî jamanene jonthe jarîa Jehoahazi aathithîrie, nî jaandîki yukuune rîa ngono cia anene ba Israeli.

⁹Jehoahazi nî aakuîre, na arathikwa ntûûreene ya Samaria. Jehoashi mûtaana waawe arajûkia waathani.

¹⁰Jehoashi mûtaana wa Jehoahazi aambîrîîrie kwaathana mwakeene jwa mîrongo îthatû na mûgwanja jwa waathani bwa Joashi nthîgûrûûne ya Juda. Jehoashi aathanîre arî ntûûreene ya Samaria mîaka îkûmi na îtaantatû.

¹¹Nî aathithîrie mantû jamathûûku mbere ya MWATHANI, ataatiganîre na meeyia jarîa Jeroboamu, mûtaana wa Nebati aathithagia na atûma Israeli îthithia.

¹²Mantû jamanene jangî jonthe jarîa Jehoashi aathithîrie, kinya ndwaa irîa aarwîre na Amazia mûnene wa Juda, nî jaandîki Yukuune rîa ngono cia anene ba Israeli.

¹³Jehoashi nî aakuîre na arathikwa ntûûreene ya Samaria amwe na anene bangî ba Israeli. Jeroboamu wa baîrî nî aajûkîrie ûnene.

¹⁴ Elisha nî aajîtue mbajua înene mono na nî aarî akuî gûkua. Jehoashi, mûnene wa Israeli nî eetîre kûmûraitha. Jehoashi aramûrîrîra akiugaga, “Wûi baaba, Wûi baaba! Gwe nchamba ya Israeli ûgwîta!”

¹⁵Elisha aramwîra atîrî, “Jûkia ûta na mîgwî.” Jehoashi arajûkia ûta na mîgwî.

¹⁶Elisha areera mûnene wa Israeli ûjû, “Ithuranîre kûratha.” Nawe mûnene araithuranîra. Elisha ararîkîîra njara yaawe njareene ya mûnene.

¹⁷Elisha areera mûnene atîrî, “Rugûra ndiricha ya bwa gaiti.” Nawe mûnene aramîrugûra. Elisha aramwîra atîrî, “Rîu ratha.” Nawe mûnene araratha. Elisha arauga, “Jûu nî mûgwî jwa MWATHANI jwa ûûmbani. Nî mûgwî jûrîa jûgatûma Sîria yûûmbwa. Nîkwîthîrwa gwe ûkaarwîra na antû ba Sîria ntûûreene ya Afeki mwanka ûbathirie buru.”

¹⁸Elisha aracoka aramwîra, “Jûkia mîgwî.” Nawe aramîjûkia. Elisha aramwîra atîrî, “Ratha nthîgûrû na mîgwî îîu.” Nawe Jehoashi araratha nthî maratha jathatû rîu aratiga.

¹⁹Elisha arathûûra mono nîwe, aramwîra atîrî, “Këethîra ûkûratha maratha jataano kana jatantatû, ûrîngî kwithûkîra antû ba Sîria mwanka ûkabathiria buru. Îndî nandî ûkaboomba ndweene mainda jathatû akî.”

²⁰Elisha nî aakuîre, na arathikwa. Mwambîrîrioone jwa o mwaka o mwaka, ikundi bia atuunyani nî biaithûkagîra nthîgûrû ya Israeli kuuma Moabu.

²¹Îgiiteene rîmwe, rîrîa muntû ûmwe aathikagwa, gîkundi ta kîu kîa atuunyani nî kîonerwe. Nabo antû baragera kiimba mbîrîreene ya Elisha baramatûka. Rîrîa kiimba kîagwîre mbîrîreene, kîragwa marûitûûne ja Elisha kîrariûka, kîrarûngama.

²²Hazaeli, mûnene wa Sîria nî aakarîre ainyîrîtie nthîgûrû ya Israeli îgiita rîonthe rîrîa Jehoahazi aathanaga.

²³Îndî MWATHANI nî aabeendeete na nî aabaigagîîrua kîaao. Aabaigagîîrua kîaao nîûntû bwa kîrîkanîro kîrîa eekanîîrîte na Abrahamu, na Isaaka, na Jakubu. Ataabarekeeria bathirua kana oorîrua nîbo mwanka naarua tûrî.

²⁴Rîrîa Hazaeli mûnene wa Sîria aakuîre, Beni-hadadi mûtaana waawe nîwe waajûkîrie ûnene.

²⁵Tontû bûû, mûnene Jehoashi, mûtaana wa Jehoahazi nî oombîre Beni-hadadi mûtaana wa Hazaeli ndweene ithatû, na aramûtuunya ntûûra cia Israeli irîa aataîte.