Read KIMERU BIBLE PROTESTANT EDITION 2Ane 14 Bible Online

2Ane 14 - KIMERU BIBLE PROTESTANT EDITION bible

2Ane 14

¹Amazia mûtaana wa Joashi, aaere mûnene wa Juda mwakeene jwa îîrî jwa waathani bwa Jehoashi, mûtaana wa Jehoahazi.

²Amazia aarî na ûkûrû bwa mîaka mîrongo îîrî na îtaano rîrîa aaere mûnene. Nawe aathanîre mîaka mîrongo îîrî na kenda arî Jerusalemu. Ng'ina eetagwa Jehoadini na kwaao kwaarî Jerusalemu.

³Amazia nî aathithîrie mantû jaameega mbere ya MWATHANI kinya këethîra tî ta jarîa kîûjûjû kîaawe Daudi aathithîtie. Mantûûne jamaingî nî aathithagia o ta ûrîa Joashi aathithagia.

⁴Îndî gûntû kûrîa mûrungu jwa Baali jwaathaathagîrua gûtathûkangua. Antû noo beetîre na mbere kûritîra igongwana ku na kwîîthîria ubaani nao.

⁵Amazia amenya akûmaarîra ûneneene, nîrîo ooragîre asikarî barîa bonthe booragîre îthe.

⁶ Îndî atooragîre aana ba asikarî bau ooragani. Nîkwîthîrwa Waathoone bwa Musa, MWATHANI augîîte atîrî, “Aciari batîûragîrwa meeyia ja aana baao kana aana booragîrwa meeyia ja aciari baao. Îndî o muntû o muntû akooragîrwa meeyia jaawe.”

⁷Amazia nî ooragîîre asikarî ngiri îkûmi (10,000) ba Edomu kîguuruune gîa chumbî. Ningî araithûkîra ntûûra ya Sela aramîtaa, aramîaa riîtwa Jokitheeli, na rîu nîrîo riîtwa îtagwa mwanka naarua tûrî.

⁸Rîu Amazia nî aatûmanîre kîrî mûnene wa Israeli tawe Jehoashi mûtaana wa Jehoahazi. Jehoahazi aarî mûtaana wa Jehu. Amazia areera Jehoashi atîrî, “Njû ndweene twonane meetho kwa meetho.”

⁹Mûnene Jehoashi wa Israeli aracokeria Amazia mûnene wa Juda, arauga eerwe ûjû, “Îgiita rîmwe nî kwaarî na gîkamba kîa miigua. Nakîo kîratûmana kîrî mûtarakwa jwa Lebanoni kîrajwîra atîrî, ‘Nenkera mwarî waaku aee mûka wa mûtaana waakwa.’ Îndî nyamû ya kîthaka îkûrûkîte îrakinyanga gîkamba kîu kîa miigua.

¹⁰Nî mma nî ûrombere antû ba Edomu ndweene, nabu ûntû bûu bwakûûjûria rwikumio. Ng'anîrwa nî ûûmbani bûu, ûkare gwaaku. Nî yambi thîîna ûgûcwaa na ûkîmenyaga îgaakûthiria na îthirie antû ba Juda.”

¹¹Îndî Amazia ataigîrue nteto iu. Tontû bûû, Jehoashi mûnene wa Israeli araumagara na njûûrî areeta kûrwaa na Amazia mûnene wa Juda. Nabo baarwîrîîre ntûûreene ya Bethishemeshi nthîgûrûûne ya Juda.

¹²Nayo njûûrî ya Juda îroombwa ndweene nî njûûrî ya Israeli nabo asikarî ba Juda baramatûka; o muntû araana nja yaawe.

¹³Jehoashi mûnene wa Israeli nî aagwatîîre Amazia mûnene wa Juda ntûûreene ya Bethishemeshi. Jehoashi mûnene wa Israeli nî eetîre ntûûreene ya Jerusalemu aramomoranga rûthingo rwa ntûûra; kuuma mpingîroone ya Efuraimu mwanka mpingîroone îrîa îrî mûthia jwa rûthingo. Aamomorangîre gûntû kwa ûraaja bwa mita magana jaîrî (200m)

¹⁴Jehoashi arajûkia thaabu yonthe na fetha, na into bionthe birîa biaarî kîûrûûne. Ningî aracoka arajûkia into bionthe birîa biaarî mîthithûûne ya gîkaro kîa mûnene na arajûkia atae aracoka nabo ntûûreene ya Samaria.

¹⁵Najo mantû jangî jamanene jarîa mûnene Jehoashi aathithîrie, na ûrîa aarwîre na Amazia mûnene wa Juda, nî jaandîki yukuune rîa ngono cia anene ba Israeli.

¹⁶Jehoashi nî aakuîre, na arathikwa ntûûreene ya Samaria arîa anene bangî ba Israeli baathikagwa. Jeroboamu, mûtaana waawe, araa mûnene.

¹⁷Mûnene wa Juda, Amazia mûtaana wa Joashi, nî aatûûrîre mîaka îkûmi na îtaano nyuma ya gîkuu kîa Jehoashi, mûnene wa Israeli.

¹⁸Najo mantû jangî jarîa mûnene Amazia aathithîrie nî jaandîki yukuune rîa ngono cia anene ba Juda.

¹⁹Nabo antû ba Jerusalemu nî baamûkunyanîîre, nawe amenya aramatûka areeta ntûûreene ya Lakishi. Îndî antû baratûmwa Lakishi, bareeta baramûûragîra ku.

²⁰Barareeta mwîrî jwaawe jûkamati nî mbarathi, na barajûthika mbîrîreene cia anene Jerusalemu ta yo ntûûra ya Daudi.

²¹Nabo antû ba Juda bonthe nî baajûkîrie Azaria mûtaana wa Amazia baramweethia mûnene wa Juda arî na ûkûrû bwa mîaka îkûmi na îtantatû.

²²Azaria nîwe waakîre ntûûra ya Elathi aramîcokia nthîgûrûûne ya Juda kaîrî nyuma ya gîkuû kîa îthe.

²³Jeroboamu mûtaana wa Jehoashi aaere mûnene wa Israeli mwakeene jwa îkûmi na îtaano jwa waathani bwa Amazia mûnene wa Juda. Jeroboamu aathanaga arî ntûûreene ya Samaria, mîaka mîrongo îna na jûmwe.

²⁴Jeroboamu nî aathithîrie mantû jamathûûku mbere ya MWATHANI, na ataatiganîre na meeyia jarîa jonthe Jeroboamu mûtaana wa Nebati, aathithagia, jarîa jaatûmîre Israeli îtonya meeyieene.

²⁵ Nî aarwîre aratuunyana nthîgûrû ya Israeli yonthe îrîa yaatuunyani; kuuma mûcîcîbîroone jwa Hamathi mwanka gwîta îrieene rîa Chumbî. Aathithîrie ûu kûringana na ûrîa MWATHANI, Mûrungu wa Israeli eerîte nthûûmba yaawe kîroria Jona mûtaana wa Amitai. Jona aarî wa kuuma ntûûreene ya Gathi-heferi.

²⁶Nîkwîthîrwa MWATHANI nî aarî akwona mîthangîko îmîthûûku îrîa antû ba Israeli baathangîkaga, nîûntû gûtî muntû noo ûmwe eethîrwa arî nkombo kana atî nkombo waatigeere ûûmba kûbateethia.

²⁷MWATHANI ataarî akuuga akaabathiria buru kuuma nthîgûrûûne. Tontû bûû, aratumîra Jeroboamu wa baîrî, mûtaana wa Joashi kûboonokia.

²⁸Najo mantû jangî jonthe jamanene jarîa Jeroboamu wa baîrî aathithîrie, na ndwaa irîa aarwîte, ûrîa aarwîre aratuunyana ntûûra ya Damaski na ya Hamathi irîa ciaarî igûtawa nî Juda, nî jaandîki yukuune rîa ngono cia anene ba Israeli.

²⁹Jeroboamu nî aakuîre arathikwa mbîrîreene cia anene ba Israeli. Zekaria, mûtaana waawe araa mûnene.