Read KIMERU BIBLE PROTESTANT EDITION 2Ane 15 Bible Online

2Ane 15 - KIMERU BIBLE PROTESTANT EDITION bible

2Ane 15

¹Uzia mûtaana wa Amazia aaere mûnene wa Juda mwakeene jwa mîrongo îîrî na mûgwanja jwa waathani bwa Jeroboamu wa baîrî mûnene wa Israeli.

²Uzia aambîrîîrie kwaathana arî na ûkûrû bwa mîaka îkûmi na îtantatû. Aathanîre arî Jerusalemu mîaka mîrongo îtaano na îîrî. Ng'ina eetagwa Jekolia, na aarî wa kuuma ntûûra ya Jerusalemu.

³Uzia nî aathithîrie mantû jameega mbere ya MWATHANI, o ta ûrîa îthe Amazia aathithagia.

⁴Îndî gûntû kûrîa mîrungu ya Baali yaathaathagîrua gûtaathûûkangua. Antû noo beetîre na mbere kûrîtîra igongwana ku na kwîthîria ubaani nao.

⁵MWATHANI nî aatûmîre mûnene agwaatwa nî mûrimo jwa mûtigiri, na aratûûra naju mwanka rîrîa aakuîre. Ningî aakaraga nyomba yaawe wenka. Jothamu, mûtaana wa mûnene, nîwe watongagîîria nja ya îthe na nîwe wathaga nthîgûrû ya Juda.

⁶Najo mantû jangî jonthe jarîa mûnene Uzia aathithîrie nî jaandîki yukuune rîa ngono cia anene ba Juda.

⁷ Uzia nî aakuîre, arathikwa mbîrîreene cia anene ntûûreene ya Daudi. Mûtaana waawe Jothamu, araa mûnene

⁸Zekaria mûtaana wa Jeroboamu wa baîrî aambîrîîrie kwaathana Israeli mwakeene jwa mîrongo îthatû na înaana jwa waathani bwa Uzia mûnene wa Juda. Aathanîre arî ntûûreene ya Samaria mîeri îtaantatû.

⁹Nî aathithîrie mantû jamathûûku mbere ya MWATHANI, o ta biûjûjû biaawe. Ataatiganîre na meeyia jarîa Jeroboamu mûtaana wa Nebati aathithîtie jarîa jaatûmîre Israeli îtonya meeyiene.

¹⁰Shalumu mûtaana wa Jabeshi nî aakunyanîîre mûnene Zekaria na aramûûragîra ntûûreene ya Ibleamu, araa mûnene

¹¹Najo mantû jangî jarîa mûnene Zekaria aathithîrie nî jaandîki yukuune rîa ngono cia anene ba Israeli.

¹² Tontû bûû, wîrane bwa MWATHANI bûrîa eerîte Jehu atî, “Nchiarwa ciaaku îkaathana ndeene ya Israeli mwanka nthukî ya inya,” bûroojûra.

¹³Shalumu mûtaana wa Jabeshi aambîrîîrie kwaathana mwakeene jwa mîrongo îthatû na kenda jwa waathani bwa Uzia mûnene wa Juda. Aathanîre mweri jûmwe akî arî Samaria.

¹⁴Menahemu mûtaana wa Gadi nî aaumîre ntûûreene ya Tiriza areeta ntûûreene ya Samaria, arooragîra mûnene Shalumu mûtaana wa Jabeshi ku. Menahemu arajûkia waathani.

¹⁵Najo mantû jangî jarîa Shalumu aathithîrie, na ûrîa aakunyanîîre mûnene, nî jaandîki yukuune rîa ngono cia anene ba Israeli.

¹⁶Menahemu nî aaumîre ntûûreene ya Tiriza areeta araithûkîra ntûûra ya Tifisa aramîîthîîria buru, na arathiria antû barîa baarî ku. Ningî nî aathirîrie antû ba gûntû kûrîa kwathiûrûkîrîte ntûûra îîu nîûntû nî baaregere kwinenkanîra waathoone bwaawe. Aracoka arakothoranga mau ja aka barîa baarî babarito.

¹⁷Menahemu mûtaana wa Gadi aaere mûnene wa Israeli mwakeene jwa mîrongo îthatû na kenda jwa waathani bwa Uzia mûnene wa Juda. Nî aathanîre mîaka îkûmi arî Samaria.

¹⁸Nî aathithîrie mantû jamathûûku mbere ya MWATHANI ûtûûroone bwaawe bunthe. Ningî ataatiganîre na meeyia jarîa Jeroboamu mûtaana wa Nebati aathithîtie, jarîa jaatûmîre Israeli îtonya meeyiene.

¹⁹Tigilathi Pileseri mûnene wa Asîria nî aaithûkîîre nthîgûrû ya Israeli. Mûnene Menahemu aramûnenkera kilo ngiri mîrongo îthatû na inya (34,000) cia fetha nîkenda Tigilathi Pileseri ateethereria Menahemu kwirikîria waathaniine.

²⁰Mbeecha iu cionorete nîûntû mûnene Menahemu nî aatuîrîte itonga bionthe bia Israeli; o gîtonga kîrîte fetha mîrongo îtaano. Tontû bûû, mûnene wa Asîria aratigana na nthîgûrû ya Israeli araana.

²¹Najo mantû jangî jarîa mûnene Menahemu aathithîrie nî jaandîki yukuune rîa ngono cia anene ba Israeli.

²²Menahemu nî aakuîre. Nawe Pekahia mûtaana waawe araa mûnene

²³Pekahia mûtaana wa Menahemu aaere mûnene wa Israeli mwakeene jwa mîrongo îtaano jwa waathani bwa Uzia mûnene wa Juda. Aathanîre mîaka îîrî arî ntûûreene ya Samaria.

²⁴Nî aathithîrie mantû jamathûûku mbere ya MWATHANI, na ataatiganîre na meeyia jarîa Jeroboamu mûtaana wa Nebati aathithîtie jarîa jaatûmîre Israeli îtonya meeyiene.

²⁵Mûtongeeria wa njûûrî ya Pekahia tawe Peka mûtaana wa Remalia barî na antû mîrongo îtaano ba kuuma mwîrîgeene jwa Gileadi nî baakunyanîîre mûnene, baramûûragîra giitiiroone kîa gîkaro kîa mûnene, kûu ntûûreene ya Samaria. Nawe Peka araa mûnene.

²⁶Najo mantû jangî jonthe jarîa Pekahia aathithîrie nî jaandîki yukuune rîa ngono cia anene ba Israeli.

²⁷Peka mûtaana Remalia aaere mûnene wa Israeli mwakeene jwa mîrongo îtaano na îîrî jwa waathani bwa Uzia mûnene wa Juda. Peka aathanîre mîaka mîrongo îîrî arî ntûûreene ya Samaria.

²⁸Nî aathithîrie mantû jamathûûku mbere ya MWATHANI, na ataatiganîre na meeyia jarîa Jeroboamu mûtaana wa Nebati aathithîtie jarîa jaatûmîre Israeli itonya meeyiene.

²⁹Rîrîa Peka mûnene wa Israeli aathanaga, nîrîo Tigilathi-pileseri mûnene wa Asîria eetîre kwîthûkîra ntûûra ya Ijoni, na ya Abeli-bethi-maaka, na ya Janoa, na ya Kedeshi, na ya Hazori araitaa. Ningî araithûkîra nthîgûrû ya Gileadi, na ya Galili, na ya Nafutali. Aracoka arajûkia atae arabaikia Asîria.

³⁰Hoshea mûtaana wa Ela nî aakunyanîîre Peka mûtaana wa Remalia, aramûûraga, na araa mûnene Aathithîrie ûu mwakeene jwa mîrongo îîrî jwa waathani bwa Jothamu mûtaana wa Uzia.

³¹Najo mantû jangî jarîa Peka aathithîrie nî jaandîki yukuune rîa ngono cia anene ba Israeli.

³²Jothamu mûtaana wa Uzia aaere mûnene wa Juda mwakeene jwa îîrî jwa waathani bwa Peka mûnene wa Israeli.

³³Jothamu aaere mûnene arî na mîaka mîrongo îîrî na îtaano. Aathanîre arî Jerusalemu mîaka îkûmi na îtantatû. Ng'ina eetagwa Jerusha, na aarî mwarî wa Zadoki.

³⁴Nî aathithîrie mantû jaagîrîte meethoone ja MWATHANI o ta jarîa jonthe îthe Uzia aathithagia.

³⁵Îndî ataathûûkangîrie gûntû kûrîa mûrungu jwa Baali jwaathaathagîrua. Antû nabo nî beetîre na mbere kûritîra igongwana ku na kwîthîria ubaani nao. Jothamu nî aakîre mpingîro ya rûgûrû ya kîûrû.

³⁶Najo mantû jangî jonthe jarîa Jothamu aathithîrie nî jaandîki yukuune rîa ngono cia anene ba Juda.

³⁷Rîrîa aathanaga nîrîo MWATHANI aatûmîre Rezini mûnene wa Sîria na Peka mûtaana wa Remalia, mûnene wa Israeli baithûkîra nthîgûrû ya Juda.

³⁸Jothamu nawe nî aakuîre na arathikwa mbîrîreene cia anene ntûûreene ya Daudi. Mûtaana waawe Ahazi araa mûnene