Read KIMERU BIBLE PROTESTANT EDITION 2Ane 16 Bible Online

2Ane 16 - KIMERU BIBLE PROTESTANT EDITION bible

2Ane 16

¹Ahazi mûtaana wa Jothamu aaere mûnene wa Juda mwakeene jwa îkûmi na mûgwanja jwa waathani bwa Peka mûnene wa Israeli.

²Ahazi aarî na ûkûrû bwa mîaka mîrongo îîrî, rîrîa aaere mûnene. Nî aathanîre mîaka îkûmi na îtaantatû arî Jerusalemu. Îndî ataathithagia mantû jarîa jaagîrîte meethoone ja MWATHANI Mûrungu waawe ta ûrîa kîûjûjû kîaawe Daudi kîathithagia.

³ Îndî we aathingataga mîîtîre ya anene ba Israeli. Ningî kinya nî aaritîre mûtaana waawe arî kîgongwana kîa gwakîîria athingatîte wîthîre bûbûthûûku bwa mîgongo îrîa MWATHANI eengîîre antû ba Israeli.

⁴Nî aaritaga igongwana na akaîthîîria ubaani gûntû kûrîa mûrungu jwa Baali jwathaathagîrua, na irîmeene, na rungu rwa mîtî yonthe îrîa îriibîte.

⁵ Rezini mûnene wa Sîria na Peka mûtaana wa Remalia, mûnene wa Israeli, nî beetîre kwithûkîra ntûûra ya Jerusalemu, baramîcîgîîria. Îndî batoombîre mûnene Ahazi.

⁶Îgiiteene rîu nîrîo mûnene wa Sîria aaithûkîîre ntûûra ya Elathi areenga antû ba Juda kuuma ku. Nabo antû ba Edomu bareeta ku na nîku batûûraga mwanka naarua tûrî.

⁷Ahazi nî aatûmanîre kîrî Tigilathi Pileseri, mûnene wa Asîria akiugaga atîrî, “Ni ndî nthûûmba yaaku na ndî mûtaana waaku. Njû ûmbonokie kuuma kîrî mûnene wa Sîria na mûnene wa Israeli, barîa bambithûkîrîte.”

⁸Ningî Ahazi nî aajûkîrie fetha, na thaabu îrîa yaarî kîûrûûne na mîthithûûne ya gîkaro kîa mûnene, aratûmîra mûnene wa Asîria birî kîewa.

⁹Mûnene wa Asîria areetîkîîria ûrîa Ahazi aamûûrîtie, na araithûkîra ntûûra ya Damaski, aramîtaa. Arajûkia antû ba Damaski arabaikia ntûûreene ya Kiri barî atae. Ningî nî ooragîre mûnene Rezini.

¹⁰Mûnene Ahazi nî eetîre Damaski gûtirimana na Tigilathi Pileseri mûnene wa Asîria. Ahazi nî oonere kîritîro kîa igongwana kîrîa kîaarî kûu Damaski. Ahazi aratûmîra Uria mûthînjîri-Mûrungu mbicha yaakîo na mwakîre jwaakîo jûkwonania ûrîa ûngwa gîakari.

¹¹Uria mûthînjîri-Mûrungu araaka kîritîro o ta kîu athingatîte mbicha îrîa mûnene Ahazi aatûmîte arî ntûûreene ya Damaski. Aagîakîre mbere ya mûnene Ahazi acoka kuuma Damaski.

¹²Rîrîa mûnene aakinyîre aumîte Damaski, nî eetîre kwona kîritîro kîu kîa igongwana. Ningî aracoka areeta au kîritîroone kîa igongwana,

¹³araarîta kîgongwana kîa gwakîîria, na kîa irio, na kîa biakûnyua, na araminya tharike ya kîgongwana kîa thîîrî kîritîroone kîa igongwana.

¹⁴ Nakîo kîritîro kîa igongwana kîrîa kîathûrîri MWATHANI, gîaaki na îturutia na kîaarî mbere ya kîûrû, arakîrita au kîaarî gatîgatî ga kîûrû na kîritîro kîa igongwana kîu ûrîa aakîte, aragîîka bwa ûrîo bwa kîûrû kîu kîrîa aakîte.

¹⁵Ningî Ahazi nî eerîre Uria mûthînjîri-Mûrungu atîrî, “Kîritîro gîkî gîaakwa kîa igongwana nîo ûkaaritagîra igongwana; igongwana bia rûkîîrî bia gwakîîria na bia irio kuuma kîrî ni mûnene na kuuma kîrî antû. Ningî ûritagîre o igongwana bia kûnyua bia antû. Nayo tharike ya nyomoo cionthe irîa ikaritagwa igongwana ûmîminyage kîritîroone kîu kîa igongwana. Îndî kîritîro kîu kîa igongwana kîthithîtue na îturutia gîkeethîrwa kîrî gîaakwa gîa kûûrîrua mantû kuuma kîrî MWATHANI.”

¹⁶Mûthînjîri-Mûrungu nî aathithîrie mantû jau jonthe o ta ûrîa mûnene Ahazi aamwîrîte.

¹⁷ Mûnene Ahazi nî aathûûkangîrie tûgaarî twa îturutia tûrîa twatumagîrwa kîûrûûne, na ararita iraî birîa biaarî îgûrû rîa tu. Ningî nî aaritîre gîtangi kîrîa kînene kîaarî îgûrû rîa ndeegwa cia îtûrûtîa arakîrîkîîra mûsingiine jwa maiga.

¹⁸Ningî ararita karîngo karîa gaaki kîûrûûne ga kûrîkagîîra gîtî kîa mûnene na arainga njîra îrîa mûnene eetagîîra agîtonya kîûrûûne ntukû ya sabatû. Aathithîrie mantû jau nîkenda agwîria mûnene wa Asîria.

¹⁹Mantû jangî jarîa mûnene Ahazi aathithîrie nî jaandîki yukuune rîa ngono cia anene ba Juda.

²⁰ Ahazi nî aakuîre na arathikwa mbîrîreene cia anene ntûûreene ya Daudi. Hezekia mûtaana waawe araa mûnene