Read KIMERU BIBLE PROTESTANT EDITION 2Ane 17 Bible Online

2Ane 17 - KIMERU BIBLE PROTESTANT EDITION bible

2Ane 17

¹Hoshea mûtaana wa Ela aaere mûnene wa Israeli mwakeene jwa îkûmi na îîrî jwa waathani bwa Ahazi mûnene wa Juda. Hoshea aathanîre arî ntûûreene ya Samaria mîaka kenda.

²Nî aathithîrie mantû jamathûûku mbere ya MWATHANI, îndî tî jamathûûku nkûrûki ya jarîa anene ba Israeli barîa baarî mbere yaawe baathithagia.

³Shalimaneseri mûnene wa Asîria nî aaithûkîîre nthîgûrû ya Israeli, na mûnene Hoshea arainenkanîra kîrî we. Mûnene Hoshea arambîrîîria kûritagîra mûnene wa Asîria ûgoti.

⁴Îndî mûnene wa Asîria nî aatigîre gwîtîkia Hoshea, nîûntû Hoshea nî aarî agûtûma atûmwa kîrî So, mûnene wa Misri, akîmûrombaga ûteethio na nî aarî agûtiga kûritagîra mûnene wa Asîria ûgoti bûrîa aamûritagîra o mwaka o mwaka. Tontû bûû, mûnene wa Asîria aramûgwata, aramûtheeka ncheera.

⁵Mûnene wa Asîria aracoka araithûkîra nthîgûrû ya Israeli yonthe arakinya ntûûra ya Samaria, na aramîcîgîîria îgiita rîa mîaka îthatû.

⁶Mwakeene jwa kenda jwa waathani bwa mûnene Hoshea nîrîo Shalimaneseri mûnene wa Asîria aataîre ntûûra ya Samaria. Arathaamia antû ba Israeli arabaikia nthîgûrû ya Asîria; araikia bamwe ntûûreene ya Hala, na bangî arabaikia akuî na mûuro jwa Habori nthîgûrûûne ya Gozani, na bangî arabaikia ntûûreene ingî cia Media.

⁷Gwaakarîre ûu nîûntû bwa ûrîa antû ba Israeli beeîîrie MWATHANI Mûrungu waao, ûrîa waabaritîre nthîgûrû ya Misri kuuma waathoone bwa Farao mûnene wa Misri. Ningî nî baathaathaîrie mîrungu îngî,

⁸na barathingata nkuagaya cia antû ba mîgongo îrîa MWATHANI eengîre nîkenda antû ba Israeli baigwatîra kûu, na nî baathingatîre mîîtîre îmîthûûku îrîa booneetue nî anene ba Israeli.

⁹Nabo antû ba Israeli nî baathithagia mantû na witho jatîagîrîte kîrî MWATHANI Mûrungu waao. Nî baaciakîrîte irombero bia mîrungu ya mîng'uanano ntûûreene ciaao cionthe, kuuma irîa nini mwanka irîa nene.

¹⁰ Ningî nî beekîre itugî bia mîrungu ya mîng'uanano ya Baali na Ashera kûrîa kunthe baarombagîra na rungu rwa mîtî îrîa îriibîte yonthe.

¹¹Nabo Aisraeli nî baaîthagîîria ubaani gûntû kûu kunthe o ta ûrîa antû ba mîgongo îrîa MWATHANI aabeengîîre baathithagia. Nabo nî baathithîrie mantû jamathûûku jaratûma MWATHANI athûûra.

¹²Nabo nî baathaathayia mîrungu ya mîng'uanano îrîa MWATHANI aabakaanîtie batîkamîthaathagie.

¹³Ningî MWATHANI nî aakaanîtie antû ba Israeli na ba Juda na njîra ya iroria birîa bionthe aatûmîte akiugaga atîrî, “Garûkeeni bûtigane na mîîtîre yeenu îmîthûûku, bwathîkagîre maathana jaakwa na mawaatho jaakwa, kûringana na ûrîa ndeerîre biûjûjû bieenu na njîra ya nthûûmba ciaakwa, iroria.”

¹⁴Îndî bo nî baaregere kwathîka, baroomia nkoro ciaao o ta ûrîa beethe baathithagia barîa baaregere kwathîkîra MWATHANI Mûrungu waao.

¹⁵Nî baareganîre na mawaatho jaawe na kîrîkanîro kîrîa MWATHANI aathithîtie na beethe. Ningî nî baareganîre na nkuagaya cia MWATHANI barathingata mîrungu ya mîng'uanano na baraa ba ûtheri. Baathingataga mîtûûrîre ya antû ba mîgongo îrîa yaabathiûrûkîrîte, o îrîa MWATHANI aabakaanîtie batîkathithagie ta yo.

¹⁶ Bararega kwathîkîra maathana ja MWATHANI Mûrungu waao na baracoka baraithithîria mîrungu ya mîng'uanano ya njaû ijîîrî cia chuuma, na mûrungu jwa mûka jweetagwa Ashera. Ningî baracoka barathaathayia njota cionthe cia îgûrû na barathaathayia kinya Baali mûrungu jwa mûng'uanano.

¹⁷ Ningî nî baaritaga aana baao barî igongwana bia gwakîîria. Baracoka baratua kûroragîrua na kûrîngagîrua baracieejana buru kûthithagia mantû jamathûûku mbere ya MWATHANI mwanka arathûûra nîbo.

¹⁸Tontû bûû, MWATHANI nî aathûûrîre mono nîûntû bwa antû ba Israeli mwanka arabeenga barauma kîrî we. Gûtî bo baatigarîre tiga antû ba mwîrîga jwa Juda bonka.

¹⁹Îndî kinya antû ba Juda batoombîre kûmenyeera maathana ja MWATHANI Mûrungu waao. Bo nî beetîre na mbere kûthingata mîîtîre ya antû ba Israeli îrîa baarî bakwambîrîîria.

²⁰MWATHANI nî aaregere nchiarwa cionthe cia Israeli arabakanûkia na arabanenkanîra kîrî anthû mwanka aratûma beebua bauma kîrî we.

²¹Rîrîa MWATHANI aatûmîre Israeli yaathûkana na Juda, Israeli nî yaathuurîre Jeroboamu mûtaana wa Nebati aa mûnene waayo. Jeroboamu nî aatûmîre Israeli îtiga kûthingata MWATHANI îraambîrîîria kûthithia meeyia jamanene.

²²Antû ba Israeli nî beetîre na mbere kûthithia meeyia jarîa jonthe Jeroboamu aathithagia batigûtigana najo,

²³mwanka rîrîa MWATHANI aatûmîre beebua bauma kîrî we, O ta ûrîa nthûûmba ciaawe iroria ciaugaga ûrîa aabeerîte. Tontû bûû, antû ba Israeli nî baathaamîrue baraikua kîthamîrioone nthîgûrûûne ya Asîria na nîku barî mwanka naarua tûrî.

²⁴Mûnene wa Asîria nî aajûkîrie antû kuuma ntûûreene ya Babiloni, ya Kutha, na ya Ava, na ya Hamathi, na ya Sefarivaimu, arabaikia ntûûreene cia Samaria kûrîa antû ba Israeli baarî bakûthaamua. Nabo antû bau ba Babiloni nî baigwatîîre nthî ya Samaria na baratûûra ntûûreene ciaayo.

²⁵Îndî kîambîrîîriene kîa ûtûûro bwaao ku, bataathaathayia MWATHANI. Tontû bûû, MWATHANI nî aabatûmîîre ngatûnyi cioraga bamwe baao.

²⁶Mûnene wa Asîria nî eerîrwe atî antû barîa aaikîrie beeta gûtûûra ntûûreene cia Samaria batiijî waatho bwa mûrungu jwa nthîgûrû îîu. Tontû bûû, mûrungu jûu nî jûtûmîte ngatûnyi ciabooraga nîûntû batîkûmenya waatho bwa mûrungu jûu, jwa nthîgûrû îîu.

²⁷Nîrîo mûnene wa Asîria aaugîre atîrî, “Mûthînjîri-Mûrungu ûmwe wa Aisraeli barîa batai kuuma Samaria nî acoke agatûûre nao nîkenda abaritanaga waatho bwa mûrungu jwa nthî îîu.”

²⁸Tontû bûû, ûmwe wa athînjîri-Mûrungu barîa baathaamîîtue kuuma Samaria nî eetîre aratûûra ntûûreene ya Betheli. Arabaritanîra ku ûrîa bakaathaathayia MWATHANI.

²⁹Îndî antû ba gûntû mwanya mwanya barîa baarî ku nî beetîre na mbere kwithithîria mîrungu ya mîng'uanano ya kwaao na kûmîîka gûntû kûrîa mîrungu ya mîng'uanano yaathaathagîrua, kûrîa antû ba Israeli baathithîtie. O antû ba gûntû mwanya mwanya baathithagîria ûu ntûûreene irîa baarî.

³⁰Antû ba ntûûra ya Babiloni baraithithîria mûrungu jwa mûng'uanano jûgwîtwa Sukothi-benothi. Nabo antû ba ntûûra ya Kuthi baraithithîria mûrungu jwa mûng'uanano jûgwîtwa Nerigali. Antû ba ntûûra ya Hamathi baraithithîria mûrungu jwa mûng'uanano jûgwîtwa Ashima.

³¹Antû ba ntûûra ya Ava baraithithîria mûrungu jwa mûng'uanano jûgwîtwa Nibihazi na jûgwîtwa Taritaki. Nabo antû ba ntûûra ya Sefarivaimu nî baaritaga aana baao barî igongwana bia gwakîîria kîrî mûrungu jwa mûng'uanano jûgwîtwa Adrameleki na jûngî jûgwîtwa Anameleki.

³²Antû ba ntûûra iu nî baathaathayia MWATHANI kinya we. Ningî nî baathuuraga antû mwanya mwanya baao bakaabaeethia athînjîri-mûrungu. Athînjîri-Mûrungu bau baaritagîra igongwana gûntû kûrîa mîrungu ya mîng'uanano yaathaathagîrua.

³³Nabo nî baathaathayia MWATHANI. Îndî nî beetîre na mbere kûthaathayia mîrungu yaao ya mîng'uanano kûringana na wîthîre bwa kûrîa baumîte.

³⁴ Mwanka naarua tûrî, antû bau nî bathingataga wîthîre bûrîa baathithagia mbere ya beeta Samaria. Nabo batîthaathayia MWATHANI kana baathîkîra mawaatho na Waatho bûrîa aanenkeere nchiarwa cia Jakubu ûrîa wîtagwa Israeli.

³⁵ MWATHANI nî eekîre kîrîkanîro na antû ba Israeli arabeera atîrî, “Bûkáthaathayia mîrungu îngî, kana bûmîritîra igongwana kana bûmîtumîkîra.

³⁶ Îndî buî nthaathayieni ni MWATHANI, ni ndaabûritîre nthîgûrûûne ya Misri na inya înene na ûûmbani. Nî ni bûbuîri kûthaathayia na kûnditagîra igongwana.

³⁷Athîkagîreeni mawaatho jaakwa, na mooritani jaakwa, na Waatho bwaakwa na maathana jaakwa jarîa ndaabwandîkîîre. Bûkáthaathayieni mîrungu ya mîng'uanano.

³⁸Bûkórîrua nî kîrîkanîro kîrîa ndeekanîîre naabuî. Bûkáthaathayieni mîrungu ya mîng'uanano.

³⁹Îndî nthaathagieni ni MWATHANI, Mûrungu weenu, naani nkaabwonokagia kuuma kîrî anthû beenu bonthe.”

⁴⁰Îndî antû bau nî baaregere kwigua, bareeta na mbere kûthingata wîthîre bûrîa baathithagia mbere ya beeta Samaria. Tontû bûû,

⁴¹antû bau, nî bathaathayia MWATHANI. Îndî nî beetîre na mbere kûthaathayia mîrungu yaao ya mîng'uanano. Nchiarwa ciaao itwîre kûthithia ûu mwanka naarua tûrî.