Read KIMERU BIBLE PROTESTANT EDITION 2Ane 18 Bible Online

2Ane 18 - KIMERU BIBLE PROTESTANT EDITION bible

2Ane 18

¹Hezekia mûtaana wa Ahazi aaere mûnene wa Juda mwakeene jwa îthatû jwa waathani bwa Hoshea mûnene wa Israeli.

²Hezekia aarî na ûkûrû bwa mîaka mîrongo îîrî na îtaano rîrîa aaere mûnene, nawe aathanîre mîaka mîrongo îîrî na kenda arî Jerusalemu. Ng'ina eetagwa Abi na aarî mwarî wa Zekaria.

³Hezekia nî aathithîrie mantû jameega mbere ya MWATHANI o ta ûrîa kîûjûjû kîaawe Daudi kîathithagia.

⁴ Nî aathûûkangîrie gûntû kûrîa mîrungu ya mîng'uanano yaathaathagîrua, arathetheranga itugî birîa biaarombagwa, na aragiitanga mîng'uanano jwa mûrungu mûka jûrîa jweetagwa Ashera. Aracoka arathetheranga njoka ya îturutia îrîa yaathithîtue nî Musa nîûntû mwanka îgiita rîu antû ba Israeli nî baamîîthagîria ubaani. Njoka îîu yeetagwa Nehushitani.

⁵Hezekia nî eetîkîtie MWATHANI, Mûrungu wa Israeli, na gûtooneka mûnene ûngî tawe kîrî anene barîa beejîre nyuma yaawe, kana kîrî anene barîa baarî mbere yaawe.

⁶Tontû we nî aatwîre eetîkîtie MWATHANI buru na ataatiga kûmwathîkîra. Nî aatwîre amenyagîîra maathana jarîa MWATHANI aaete Musa.

⁷MWATHANI nî aarî amwe na Hezekia. Mantû jonthe jarîa Hezekia aathithagia nî oombanaga. Ningî nî aareganîre na waathani bwa mûnene wa Asîria na aararega kûmûtumîkîra.

⁸Hezekia nî aaithûkîîre nthîgûrû ya Afilisti yonthe aramîûmba kuuma gatûûreene karîa kanini mwanka ntûûra îrîa nene, ciirigîri na nthingo mwanka ntûûra ya Gaza.

⁹Mwakeene jwa îna jwa waathani bwa Hezekia, na nîju jwaarî mwaka jwa mûgwanja jwa waathani bwa mûnene wa Israeli tawe Hoshea mûtaana wa Ela. Rîu nîrîo Shalimaneseri wa Asîria aaithûkîîre Israeli na aracîgîîria ntûûra ya Samaria.

¹⁰Nyuma ya mîaka îthatû aramîtaa. Tontû bûû, ntûûra ya Samaria yaataîrwe mwakeene jwa îtaantatû jwa waathani bwa Hezekia na nîju jwaarî mwaka jwa kenda jwa waathani bwa Hoshea mûnene wa Israeli.

¹¹Mûnene wa Asîria nî aataîre Aisraeli arabathaamia arabaikia nthîgûrûûne ya Asîria barî atae. Araikia bamwe ntûûreene ya Hala, na bangî arabaikia akuî na mûuro jwa Habori nthîgûrûûne ya Gozani, na bangî arabaikia ntûûreene cia antû ba Media.

¹²Gwaakarîkîre ûu nîûntû Aisraeli nî baaregere kwathîkîra MWATHANI Mûrungu waao, barathûûkia kîrîkanîro kîaawe nabo. Kinya Waatho bûrîa Musa nthûûmba ya MWATHANI aaejanîte bateendaga kûbwigua kana kûbwathîkîra.

¹³Mwakeene jwa îkûmi na îna jwa waathani bwa mûnene Hezekia, Senakeribu mûnene wa Asîria nî aaithûkîîre ntûûra cia nthîgûrû ya Juda cionthe, irîa ciairigîri. Nawe aracitaa.

¹⁴Hezekia mûnene wa Juda aratûmana ntûûreene ya Lakishi kîrî mûnene wa Asîria aramwîra atîrî, “Nîngwaatîrîîtie. Tiga gûtwithûkîra naani nkaarita kîrîa kîonthe ûkaambîtia? Mûnene wa Asîria areetia Hezekia mûnene wa Juda, kilo ngiri îkûmi cia fetha (10,000) na Kilo ngiri îmwe cia thaabu (1,000).”

¹⁵Hezekia nawe aramûnenkera fetha yonthe îrîa yaarî kîûrûûne na îrîa yaarî mîthithûûne ya gîkaro kîa mûnene.

¹⁶Ningî o îgiita rîu, Hezekia mûnene wa Juda nî aaritîre thaabu îrîa ereretie nayo mîrango na itugî bia mwari jwa kîûrû aramînenkanîra kîrî mûnene wa Asîria.

¹⁷Mûnene wa Asîria nî aatûmîre mûtongeeria wa njûûrî wa ndaracha ya Taritani, na mûtongeeria wa aakûre wa ndaracha ya Rabusariri, na mûtongeeria wa mbûûtû ya asikarî wa ndaracha ya Rabushake, kuuma ntûûreene ya Lakishi, bareeta Jerusalemu kîrî mûnene Hezekia. Nabo baagûkinya Jerusalemu, nî beetîre bararûngama kîeniine kîa Mûûri wa nguû akuî na mûberethi jûrîa jwaareetaga rûûjî kuuma karieene karîa kaarî rûgûrû rwa ntûûra akuî na njîra îmbariî.

¹⁸Rîu baratûmanîra mûnene. Îndî barîa beetîre kîrî bo nî Eliakimu mûtaana wa Hilikia, ûrîa waarî mûrûngamîîri wa gîkaro kîa mûnene na Shebuna, ûrîa waarî karani, na Joaha mûtaana wa Asafu, ûrîa waarî mwandîki.

¹⁹Mûtongeeria wa mbûûtû ya asikarî ûrîa waarî na ndaracha ya Rabushake arauga atîrî, “Îîreeni Hezekia atîrî, mûnene wa anene, tawe mûnene wa Asîria ariûria ûjû: Nîmbi îgûtûma ûciîtîkia ûjû?

²⁰Ûrîthûgaania biugo bibitheri nîbio bireetaga ûûmbani ndweene? Nûû ûkwigîkîte nandî tontû ûkûrega kûmbathîkîra?

²¹Atîrî, nîmbijî nandî wîîrîgîîrîte ûteethio kuuma kîrî kamûrangi kau kaunîku, tako Misri. Muntû ûrîa ûkeerîgagîîra nîka kaunîkaga gakamûmunta njara. Ûu nîu Farao mûnene wa Misri akari kîrî barîa bonthe beerîgagîîra ûteethio kuuma kîrî we.

²²Ningî menya ûmbîîra atîrî, ‘Nî MWATHANI Mûrungu weetû twîrîgîîrîte.’ Tontû rî, nî Hezekia waathûûkangîrie gûntû kûrîa kûrombagîrwa na kûritagîrwa igongwana rîrîa eerîre antû ba Juda na Jerusalemu atî bathaathagîrie MWATHANI Kîritîroone kîa igongwana akî, kîrîa kîrî Jerusalemu.

²³Nandî rî, njû ngwatanie naagwe antûûne a mwathi waakwa mûnene wa Asîria. Ngaakûnenkera mbarathi ngiri ijîîrî, keethîra ûkoona antû ba gûciîtithia.

²⁴Nîatîa ûkoomba kûrwaa na kinya ûmwe wa atongeeria ba njûûrî ba mwathi waakwa barîa anini buru këethîra nî Misri weeteereete îgûteethia na ngaarî cia ndwaa na eetithia ba mbarathi?

²⁵Ningî rî, ûrîthûgaania nîka mbithûkîrîte nthîgûrû îîjî nîkenda mîthiria MWATHANI atîkwenda? Nî MWATHANI ûmbîîrîte atîrî, ‘Ithûkîra nthîgûrû îîjî ûmîthirie.’”

²⁶Eliakimu, na Shebuna, na Joaha bareera mûtongeeria ûu wa ndaracha ya Rabushake atîrî, “Itû twarîrie tuî nthûûmba ciaaku na rûthiomi rwa Kîaramu nîûntû nî tûkiijî. Tiga gûtwarîria na rûthiomi rwa Kîibirania nîûntû antû bau barî rûthingoone nî bagûkîmenya.”

²⁷Îndî mûtongeeria ûu wa ndaracha ya Rabushake arabeera atîrî, “Bûrîthûgaania mwathi waakwa antûmîte mbîja kûbwîra mantû jaja amwe na mwathi weenu îndî antû baba barî rûthingoone barega kûjaîgua na nîbo bakaarîa kîoro kîaao na banyue maumago jaao o ûmwe na baabuî?”

²⁸Mûtongeeria ûû wa ndaracha ya Rabushake ararûngama aratûmîîria na kajû gakanene na rûthiomi rwa Kîibirania akiugaga atîrî, “Thikîîreeni nteto cia mûnene wa anene, tawe mûnene wa Asîria!

²⁹Mûnene ariuga atîrî: Bûkárekeeni Hezekia abwaîria nîûntû atîûmba kûbwonokia njareene ciaakwa.

³⁰Bûkárekeerieni Hezekia atûma bwîka wîîrîgîîro bweenu kîrî MWATHANI akîbwîraga atî: Gûtî nkaanja MWATHANI agaatwonokia, na ntûûra îîjî îtîtawa nî mûnene wa Asîria.

³¹Bûkáthikîîra ûrîa Hezekia akuuga nîûntû mûnene wa Asîria ariuga ûjû: Tumeeni thîîrî naani buumagare ntûûreene buî bwinenkanîre kîrî ni. Rîu bûgeetîkîîrua o muntû atue kûrîîjaga nzabibû cia mîzabibû yaawe, na nkûû kuuma mîkûûne yaawe, na kûnyua rûûjî kuuma gîtaangiine kîaawe.

³²Bûkaathithagia ûu mwanka rîrîa ûûni mûnene nkabûthaamia mbwikie nthîgûrû îngî îkari o ta îîjî yeenu; nthîgûrû îrî na nkano na mîzabibû, na mîzeituni na nainchû. Bwathithia ûu, bûtîkua bûgaatûûra mwoyo. Bûkáthikîîreeni Hezekia nîûntû nîka akûbwayia rîrîa akûbwîra: MWATHANI agaatwonokia.

³³Kûrî mîrungu ya mîgongo noo îrîkû yonokia nthîgûrû yaayo kuuma njareene cia mûnene wa Asîria?

³⁴Îrîkû mîrungu ya ntûûra ya Hamathi na ya ntûûra ya Aripadi? Îrîkû mîrungu ya ntûûra ya Sefarivaimu na ya ntûûra ya Hena na ya ntûûra ya Iva? Nî yoonokerie Samaria kuuma njareene ciaakwa?

³⁵Nî mîrungu îrîkû yonoketie nthîgûrû yaayo kuuma njareene ciaakwa rîu kenda MWATHANI oomba kwonokia Jerusalemu kuuma njareene ciaakwa?”

³⁶Îndî antû bau barakira ki batîmûcokerie ûntû noo bûmwe nîûntû mûnene aaugîîte, “Bûkámûcokerieni ûntû.”

³⁷Eliakimu mûtaana wa Hilikia, ûrîa waarî mûrûngamîîri wa gîkaro kîa mûnene, na Shebuna ûrîa waarî karani, na Joaha mûtaana wa Asafu ûrîa waarî mwandîki nî baacokere kîrî Hezekia batambûrangîte nguû kwonania nî baithikîîrîte. Nabo bareera mûnene ûrîa atongeeria ba mûnene wa Asîria baarî bakuuga.