Read KIMERU BIBLE PROTESTANT EDITION 2Ane 2 Bible Online

2Ane 2 - KIMERU BIBLE PROTESTANT EDITION bible

2Ane 2

¹Rîrîa MWATHANI aarî akuî kûjûkia Elija amwitithia îgûrû na kîbuubani, Elija na Elisha baarî njîreene baumîte Giligali.

²Elija nî eerîre Elisha atîrî, “Itû karakara aja nîûntû MWATHANI agûntûma Betheli.” Îndî Elisha aramwîra, “Ga ngûciîtia nîûntû bwa MWATHANI na nîûntû bwaaku atî ntîgûtiga.” Tontû bûû, bareeta Betheli.

³Nakîo gîkundi kîa iroria birîa biaarî Betheli nî kîejîre kîrî Elisha, kîramwîra atîrî, “Nî wiijî atî naarua MWATHANI akaajûkia mwathi waaku kuuma kîrî gwe?” Elisha arabeera, “Îî nî mbijî; nandî kireeni.”

⁴Elija areera Elisha atîrî, “Itû karakara aja nîûntû MWATHANI agûntûma Jeriko.” Îndî Elisha aramwîra, “Ga ngûciîtia nîûntû bwa MWATHANI na nîûntû bwaaku, atî ntîgûtiga.” Tontû bûû, bareeta Jeriko.

⁵Nakîo gîkundi kîa iroria birîa biarî Jeriko nî gîeetîre kîrî Elisha kîramwîra atîrî, “Nî wiijî atî naarua MWATHANI akaajûkia mwathi waaku kuuma kîrî gwe?” Nawe arabeera, “Îî, nî mbijî; nandî kireeni.”

⁶Rîu Elija areera Elisha atîrî, “Itû karakara aja, nîûntû MWATHANI agûntûma Jorodani.” Îndî Elisha aramwîra, “Ga ngûciîtia nîûntû bwa MWATHANI na nîûntû bwaaku atî, ntîgûtiga.” Tontû bûû, bareetania.

⁷Kînya gîkundi kîu kîa iroria mîrongo îtaano (50) nî kîaabathingatîre mwanka Jorodani. Nabo bararûngama gataaria. Elija na Elisha baarûngi rûteere rwa mûuro jwa Jorodani.

⁸Elija arajûkia nguû yaawe ya îgûrû, aramîkûnjakûnja, araringa rûûjî nayo. Naru rûûjî rûraathûkana, rûratiga nthî înjûmo baraunîîra o.

⁹ Baathiria kuuna rûûjî, Elija areera Elisha atîrî, “Mbîîra ûrîa ûkwenda nkûthithîria mbere ya njûkua kuuma kîrî gwe.” Elisha aramwîra, “Itû reka ntîgîrwe na mainda jaîrî ja Roho waaku.”

¹⁰Elija aramwîra, “Ûkûromba ûntû bûbûûmo. Îndî këethîra ûkaambona nkîjûkua kuuma kîrî gwe, ûkaathithîrua ûu waromba; Îndî këethîra ûtîmbona, gûtî u ûkaathithîrua.”

¹¹Nabo beetîte o ûu bakîaragia rî, ngaarî îgwakana mwanki îîtithîtue nî mbarathi îgwakana mwanki nî yaabaathûranîre. Elija araitia îgûrû na kîbuubani.

¹² Elisha akwona ûntû bûu bwaakarîkîre nî aarîrîre akiugaga, “Wûi baaba, wûi baaba! Gwe nchamba ya Israeli ûgwîta!” Elisha atoonere Elija kaîrî. Rîu Elisha aratambûra nguû ciaawe ichunchî biîrî kûonania kwithikîîra.

¹³Elisha nî oojere nguû ya îgûrû ya Elija îrîa yaagwîte nthî, areeta, ararûngama rûteere rwa mûuro jwa Jorodani.

¹⁴Arajûkia nguû îîu ya îgûrû ya Elija îrîa yaagwîte nthî, araringa rûûjî nayo akiugaga atîrî, “Arîkû MWATHANI, Mûrungu wa Elija?” Rîrîa aaringîre rûûjî, rûûjî nî rwagaûkanîre. Nawe Elisha arauna.

¹⁵Rîrîa gîkundi kîrîa kîa iroria bia kuuma Jeriko kîonere Elisha eetîte kûrîa baarî, nî baugîre atîrî, “Elisha nandî arî na inya ya Elija.” Nabo bareeta kûmûthagaana. Baraturia maru bareenamîîria mwanka nthî.

¹⁶Nabo baramwîra, “Atîrî, tuî nthûûmba ciaaku tûrî antû mîrongo îtaano barî na inya. Itû reka twîte tûgacwee mwathi waaku. Kwombîka Roho wa MWATHANI akeethîrwa amûjûkîîtie akamûtigîîra kîrîmeene kana kîguuruune.” Elisha arabeera atîrî, “Arî, tigeeni gwîta.”

¹⁷Îndî baramwereenca mono mwanka araigua nthoni, arabeera, “Îteeni.” Tontû bûû, antû bau mîrongo îtaano, bareeta baracwaa Elija ntukû ithatû batîmwoone.

¹⁸Baracoka kîrî Elisha, kûrîa aarî Jeriko. Nawe arabeera atîrî, “Ntîrabwîraga bûgéeta?”

¹⁹Nabo antû ba ntûûra ya Jeriko nî beerîre Elisha atîrî, “Nî ûkwona, ntûûra îîjî nî înthongi, îndî rûûjî nî rûrûthûûku, nîka rûtûmaga aka bagata mau.”

²⁰Elisha arabeera atîrî, “Ndeetereeni mpakûri înjerû bwîkîrîte chumbî ku.” Nabo baramwikîria.

²¹Areeta arîa kîthima kîa rûûjî kîaarî, aragera chumbî ku arauga, “MWATHANI ariuga ûjû: Nkûtheria rûûjî rûrû. Kuuma nandî rûtîûraga muntû kana rûtûma mûka ata îu.”

²²Tontû bûû, rûûjî rûu rûtûûraga rûrî rûrûtheru mwanka naarua tûrî, o ta ûrîa Elisha aaugîîte.

²³Kuuma Jeriko, Elisha nî eetîre Betheli. Arî njîreene, tûîjî nî tweetîre kîrî we tûraambîrîria kûmûthekera tûkîmwîraga atîrî, “Îta ûrîa, gwe kîmenchû gîkî! Îta ûrîa gwe kîmenchû!”

²⁴Nawe araciûgûra, oona tûîjî tûu aratûruma riîtweene rîa MWATHANI. Nacio ndûû îjîrî nka iraumîîra kîthakeene, irooraga tûîjî mîrongo îna na twîrî twa tûrîa twaamûkurungaga.

²⁵Kûuma au Elisha areeta mwanka kîrîmeene gîa Karimeli, na nyûmeene aracoka Samaria.