Read KIMERU BIBLE PROTESTANT EDITION 2Ane 20 Bible Online

2Ane 20 - KIMERU BIBLE PROTESTANT EDITION bible

2Ane 20

¹Îgiiteene o rîu Senakeribu ooragîrwe, mûnene Hezekia nî aajîrue mono na nî aarî akuî gûkua. Kîroria Isaya mûtaana wa Amozi nî eetîre kûmûraitha aramwîra atîrî, “MWATHANI augîîte ûjû: ‘Thuranîra mantû ja nja yaaku bwega nîûntû mbajua îîjî îtîora, nîka ûgaakua.’”

²Hezekia areerekera rûthingo, araromba MWATHANI akiugaga atîrî,

³“Itû MWATHANI, ndakwerenca, ririkana ûrîa ntwîre ngwîtîkîtie na gûkwathîkîra buru na ûrîa ntwîre nkîthithagia mantû jarîa jarî jaameega mbere yaaku.” Nawe Hezekia ararîra mono.

⁴Kîroria Isaya nî baathûkanîre na mûnene. Mbere atîragiitanîîria kîaragoone kîa gatîgatî, MWATHANI nî aamwarîîrie aramwîra atîrî,

⁵“Coka wîîre Hezekia mûnene wa antû baakwa atîrî, ‘Ûûni MWATHANI Mûrungu wa kîûjûjû kîeenu Daudi ndîmwîra ûjû: Ndîkwigua maromba jaaku na ndîkwona meethori jaaku. Ngaakworia mûrimo. Ntukû ya ithatû ûgeeta kîûrûûne.

⁶Naani ngaakwongeera mîaka îkûmi na îtaano ûtûûroone bwaaku. Ngaakwonokia na mbonokie ntûûra îîjî kuuma kîrî mûnene wa Asîria. Ningî ngaakaria ntûûra îîjî nîûntû bwaakwa ningwa na nîûntû bwa wîrane bûrîa ndeekîîre nthûûmba yaakwa Daudi.’”

⁷Kîroria Isaya arauga atîrî, “Ruga nkûû na rûûjî rûrîa rûkauma ku ûrwîkîre kîrondeene, nawe akoora.”

⁸Mûnene Hezekia nî oorîrie kîroria Isaya atîrî, “Mbonia rwano rûrîa rûkaamenyithia atî MWATHANI akaamboria, na atî ntukû ya ithatû ngeeta kîûrûûne.”

⁹Isaya arauga atîrî, “Rûrû nîru rwano kuuma kîrî MWATHANI rwa gûkûmenyithia atî akaathithia ûrîa augîîte. Nîatîa ûkwenda; nî kîthiîki gîîta mbere makinya îkûmi kana nî gîcoke nyuma makinya îkûmi”

¹⁰Hezekia aramûcokeria aramwîra atîrî, “Nî bûbûûthû kîthiîki gwîta mbere makinya îkûmi; nî kaaba kîthiîki gîcoke nyuma makinya îkûmi.”

¹¹Kîroria Isaya araromba MWATHANI, nawe MWATHANI aracokia kîthiîki makinya îkûmi nyuma ya arîa kîaarî gîgûkinya gîtugîîne kîrîa kîaarî na nkinyo, kîrîa gîaaki nî mûnene Ahazi.

¹²Îgiita rîu Merodaki-baladani mûnene wa nthîgûrû ya Babiloni, mûtaana wa Baladani nî eerîrwe atî mûnene Hezekia nî aajîtue. Tontû bûû, aratûma atûmwa na barûga na kîewa baikîria Hezekia.

¹³Hezekia arabagwata ûgeni na araboonia into bionthe birîa bieki mîthithûûne yaawe. Nabio nî fetha, na thaabu, na into bia gûtûma biakûrîa bieera, na maguta ja goro, na into biaawe bia ndwaa, na ûtonga bwaawe bunthe. Gûtî gîntû noo kîmwe kîa birîa biaarî nyomba yaawe kana nthîgûrû yaawe Hezekia ataaboonia.

¹⁴Kîroria Isaya nî eetîre kîrî mûnene Hezekia aramûûria atîrî, “Nîatîa antû bau bakwîrîre? Nî ba kuuma kû?” Hezekia aramwîra, “Baumîte kûraaja nthîgûrûûne ya Babiloni.”

¹⁵Isaya aramûûria, “Nîmbi baroonere nyomba yaaku?” Hezekia aramwîra, “Nî baroonere into bionthe birîa birî nyomba yaakwa. Gûtî ûtonga bwaakwa batîroona.”

¹⁶Isaya areera Hezekia atîrî, “Thikîîra ûrîa MWATHANI akuuga:

¹⁷ Atîrî, îgiita nî rîîjîte rîrîa into bionthe birîa birî nyomba yaaku na birîa bionthe biûjûjû biaaku biûthûranîtie mwanka naarua tûrî, bikaajûkua biikue nthîgûrûûne ya Babiloni, gûtîkîo gîgaatigara. Ûu nîu ûûni MWATHANI nkuuga.

¹⁸ Antû bamwe ba nchiarwa ciaaku bakaajûkua bagatumîkagîre mûnene wa nthîgûrû ya Babiloni barî aakûre.”

¹⁹Hezekia nawe areera Isaya atîrî, “Nteto iu MWATHANI auga nî injega.” Îndî Hezekia aacokerie ûu nîûntû aathûgaanagia gûkeethîrwa kûrî na thîîrî na ûboreri ûtûûroone bwaawe.

²⁰Najo mantû jangî jonthe jamanene jarîa mûnene Hezekia aathithîrie, na ûrîa aakîre kîthima kîa rûûjî na mûberethi jwa kûreeta rûûjî kûu ntûûreene nî jaandîki yukuune rîa ngono cia anene ba Juda.

²¹Hezekia nawe nî aakuîre, na mûtaana waawe Manase arajûkia waathani.